ᓄᓇᕗᒥ ᒪᓕᒐᓕᐅᖅᑎᐅᖃᑦᑕᓚᐅᖅᑐᖅ ᓴᖅᑭᑎᑦᑎᔪᖅ ᐊᑎᓕᐅᕈᑎᒥᒃ ᒐᕙᒪᒃᑯᑦ ᐱᐅᓯᕚᓪᓕᖅᑎᑦᑎᖁᑉᓗᒋᑦ ᐃᓐᓇᑐᖃᐅᓯᕝᕕᖕᓂᒃ ᓄᓇᕗᒥ.
“ᐃᓄᐃᑦ ᐃᓐᓇᑐᖃᐃᑦ ᓂᐱᖃᙱᒻᒪᑕ – ᐅᕙᑉᑎᓐᓂᒃ ᑐᙵᑎᖃᕋᓱᖕᒪᑕ ᓂᐱᖃᕈᒪᑉᓗᑎᒃ,” ᑕᐃᒪᓐᓇ ᑎᑎᕋᖅᓯᒪᔪᖅ ᐊᑎᓕᐅᑎᑦᑎᒍᑕᐅᓇᓱᒃᑐᖅ. “ᐃᓚᒥᓃᑦᑐᒪᔪᑦ ᓄᓇᒥᓃᑦᑐᒪᔪᓪᓗ. ᑭᓯᐊᓂ ᓅᑕᐅᖃᑦᑕᕐᒪᑕ… ᐊᐅᓪᓚᖅᑎᑕᐅᒐᔪᒃᑐᑦ ᓄᓇᕗᑦ ᓯᓚᑖᓄᑦ ᖃᑉᓗᓈᑦ ᓄᓇᖓᓄᑦ ᑲᓇᑕᒥ – ᓅᑕᐅᔪᑦ ᐃᓄᑑᑎᑕᐅᔭᖅᑐᖅᖢᑎᒃ ᐊᒻᒪᓗ ᐅᑎᔾᔮᕈᓐᓃᖅᖢᑎᒃ. ᐸᕐᓇᐅᑎᖃᕆᐊᓕᒃ, ᐅᑉᓗᒥ ᐊᑐᓂ ᓄᓇᓕᖕᓂ – ᓄᓇᓕᖕᓂ ᐊᕕᒃᑐᖅᓯᒪᔪᓂᑐᐃᓐᓇᐅᙱᑦᑐᖅ – ᐃᓂᖃᕈᓐᓇᖁᑉᓗᒋᑦ ᐃᓐᓇᑐᖃᐃᑦ.”
ᓴᖅᑭᑎᑕᐅᓯᒪᔪᖅ ᒥᓂᔅᑕᐅᖃᑕᐅᓚᐅᖅᓯᒪᔪᒧᑦ ᒪᓃᑦᑐᖅ ᑕᒻᓴᓐᒧᑦ, ᐊᓯᖏᓐᓄᓪᓗ, ᐊᑎᓕᐅᕈᑎ ᐊᐱᕆᔪᖅ ᓄᓇᕗᑦ ᒐᕙᒪᒃᑯᖏᓐᓂᒃ ᐃᓐᓇᑐᖃᐅᓯᕝᕕᖕᓂᒃ ᓴᓇᖁᑉᓗᒋᑦ ᐊᑐᓂ ᓄᓇᓕᖕᓂᒃ ᐊᒻᒪᓗ ᓄᑖᙳᖅᑎᕐᓗᒋᑦ ᐃᓐᓇᑐᖃᐅᓯᕝᕕᐅᓕᐊᓂᒃᑐᑦ.
ᐊᐱᕆᓯᒪᔪᖅᑕᐅᖅ ᒐᕙᒪᒃᑯᑦ ᐱᕙᓪᓕᐊᑎᑦᑎᖁᑉᓗᒋᑦ ᐊᔪᕈᓐᓃᖅᓴᕈᑎᓂᒃ ᓄᓇᓕᖕᓂᒃ ᑲᒪᒋᔭᐅᔪᓐᓇᖁᑉᓗᒋᑦ ᐃᓐᓇᑐᖃᐃᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐊᒻᒪᓗ ᓴᖅᑭᑎᑦᑎᓗᑎᒃ ᐸᕐᓇᐅᑎᓂᒃ ᐃᓐᓇᑐᖃᐃᑦ ᖃᑉᓗᓈᑦ ᓄᓇᖓᓃᑦᑐᑦ ᓄᓇᕗᒧᑦ ᐅᑎᖅᑎᑕᐅᔪᓐᓇᖁᑉᓗᒋᑦ.
ᐊᑎᓕᐅᖅᑎᑦᑎᓂᖅ ᓴᖅᑭᑦᑐᖅ ᐊᒃᓱᕈᕐᓇᖅᑐᒃᑰᓕᖅᑎᓪᓗᒋᑦ ᐃᓐᓇᑐᖃᐃᑦ ᑲᒪᒋᔭᐅᖃᑦᑕᕐᓂᖏᑦ ᖃᓄᖅᑑᕈᑕᐅᔭᕆᐊᖃᓕᖅᑎᓪᓗᒋᑦ ᓄᓇᕗᒥ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ ᐅᖃᐅᓯᐅᓚᐅᖅᑐᑎᑐᑦ, ᔮᓐ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓂᒃ - ᑎᑭᕋᕐᔪᐊᕐᒥᓗ, ᓄᓇᕗᑦ ᒐᕙᒪᒃᑯᖏᓐᓂᒃ ᐊᐱᖅᑯᑎᖃᓚᐅᕐᒪᑦ ᐸᕐᓇᐅᑕᐅᔪᑦ ᒥᒃᓴᓄᑦ ᓄᓇᓕᖕᓂ ᐊᕕᒃᑐᖅᓯᒪᔪᓂᒃ ᐋᓐᓂᐊᖅᑐᑦ ᐃᑲᔪᖅᑕᐅᕝᕕᒃᓴᖏᓐᓄᑦ “ᐱᒻᒪᕆᐊᓘᑎᓪᓗᒋᑦ ᑲᒪᒋᔭᐅᑲᐅᑎᒋᓯᒪᙱᓐᓂᖏᓐᓄᑦ.”
“ᓈᒻᒪᒃᓴᙱᑦᑎᐊᖅᑐᖓ ᐸᕐᓇᐅᑕᐅᔪᓂᒃ ᐅᑉᓗᒥᒧᑦ … ᐃᒃᐱᒍᓱᒃᑲᒪ ᒐᕙᒪᒋᔭᖅᐳᑦ ᑐᙵᕕᖃᑦᑎᐊᖅᑎᑦᑎᓯᒪᙱᒻᒪᑕ ᐃᓐᓇᑐᖃᐅᓯᕝᕕᑦ ᒥᒃᓵᓄᑦ,” ᐅᖃᖅᖢᓂᓗ 2020 ᐅᑭᐊᒃᓵᖓᓂ ᒪᓕᒐᓕᐅᖅᑏᑦ ᑲᑎᒪᑎᓪᓗᒋᑦ ᑕᐃᒪᓐᓇ. “ᐊᐃᑦᑖᖑᒐᓗᐊᖅ, ᓴᖅᑭᑎᑕᐅᖅᑳᖅᑎᓪᓗᒍ ᐃᒪᓐᓈᖅᑐᕈᑎᒋᔪᒪᔭᖅᐳᑦ, ᒐᕙᒪᒃᑯᑦ ᐱᓕᕆᐊᕆᓇᓱᒃᑕᖏᑦ ᐃᓐᓇᑐᖃᐅᓯᕝᕕᑦ ᒥᒃᓵᓄᑦ ᑲᒪᒋᔭᐅᔫᔭᕐᒪᑕ ᒪᑐᓯᒪᔪᒃᑯᑦ.”
ᓄᓇᕗᑦ ᒐᕙᒪᒃᑯᖏᑦᑕ ᐸᕐᓇᐅᑎᖓ ᓴᓇᔪᒪᓂᕐᒧᑦ 24-ᓂᒃ ᐃᒡᓕᖃᖅᑐᒥ ᐋᓐᓂᐊᖅᑐᓄᑦ ᐃᓂᒋᔭᐅᓂᐊᖅᑐᒥᒃ ᑲᖏᖅᖠᓂᕐᒥ ᐱᒋᐊᕐᓗᒍ 2021-ᒥ. ᑕᐃᒪᓐᓇᑦᑕᐅᖅ ᓴᓇᔭᐅᔪᖃᕐᓂᐊᖅᖢᓂ ᐃᖃᓗᒃᑑᑦᑎᐊᕐᒥ ᐊᒻᒪᓗ 48-ᓂᒃ ᐃᒡᓕᖃᖅᑐᒥᒃ ᐃᖃᓗᖕᓂ.
ᑭᓯᐊᓂᓕ, ᑕᐃᒪᓐᓇᑦᑕᐅᖅ ᑐᒃᓯᕋᐅᑕᐅᓯᒪᔪᑦ ᖁᕐᓗᖅᑑᕐᒧᑦ, ᒥᑦᑎᒪᑕᓕᖕᒧᑦ, ᖃᒪᓂ’ᑐᐊᕐᒧᑦ ᐊᒻᒪᓗ ᑭᙵᕐᓄᑦ ᐋᒃᑳᖅᑕᐅᓯᒪᑉᓗᑎᒃ.
ᑕᒻᓴᓐ ᐅᖃᖅᖢᓂ ᑕᐃᒪᑐᕉᖅ ᐊᑎᓕᐅᖅᑕᐅᑎᑕᖓ ᓴᖅᑭᑎᑕᐅᔪᓐᓇᕐᓂᐊᖅᐳᖅ ᒪᓕᒐᓕᐅᕐᕕᖕᒥ ᓄᓇᕗᒥᐅᑦ ᓂᕈᐊᕐᓂᖃᖅᑳᖅᑎᓪᓗᒋᑦ ᐅᑐᐱᕆ 25-ᒥ.
“ᒫᓐᓇᐅᔪᖅ ᓈᒻᒪᖅᑰᖅᑐᖅ ᑲᒪᒋᔭᐅᒃᐸᑦ ᓂᕈᐊᖅᑕᐅᔪᑦ ᑲᑎᒪᒋᐊᖅᑳᖅᑎᓐᓇᒋᑦ,” ᑕᐃᒪᓐᓇ ᐅᖃᖅᖢᓂ.
ᖃᓄᐃᓕᐅᕈᑕᐅᓚᐅᖅᑐᑦ ᑕᐃᑉᓱᒪᓂ ᓴᖅᑭᒃᑲᓐᓂᑐᐃᓐᓇᖅᖢᑎᒃ
ᑕᒻᓴᓐ ᐅᖃᐅᓯᖃᑦᑎᐊᓚᐅᖅᑐᖅ ᖃᓄᖅ ᐃᓐᓇᑐᖃᐃᑦ ᐊᐅᓪᓚᖅᑎᑕᐅᖃᑦᑕᕐᓂᖏᓐᓄᑦ ᖃᑉᓗᓈᑦ ᓄᓇᖓᓄᑦ. “ᖃᓄᐃᓕᐅᕈᑕᐅᕙᓚᐅᖅᑐᑦ ᐃᓐᓇᑐᖃᑉᑎᓐᓄᑦ 1960-ᒋᔭᖏᓐᓂᒃ ᐊᑐᒃᑲᓐᓂᖅᑑᔭᓕᕋᑉᑎᒍᑦ,” ᑕᐃᒪᓐᓇ ᐅᖃᖅᖢᓂ, ᐃᓛᒃᑰᖓᑉᓗᒋᑦ ᒫᓐᓇᐅᔪᖅ ᖃᓄᐃᑦᑑᓂᖏᑦ ᐊᒻᒪᓗ ᒐᕙᒪᑐᖃᒃᑯᑦ ᐊᒥᓱᓂᒃ ᐳᕙᒡᓗᒡᕕᓕᐊᖅᑎᑦᑎᖃᑦᑕᓚᐅᕐᓂᖏᓐᓄᑦ 1940-ᖏᓐᓂᒃ, 1950-ᖏᓐᓂᒃ ᐊᒻᒪᓗ 1960-ᖏᓐᓂᒃ.
ᑕᒪᕐᒥᒃ ᒪᓕᒃᑕᒃᓴᓕᐊᖑᔪᑦ ᐊᒃᓱᕈᕐᓇᖅᑐᒃᑰᕈᑕᐅᓚᐅᖅᑐᑦ ᓄᓇᖃᖅᑳᖅᓯᒪᔪᓄᑦ ᑲᓇᑕᒥ ᐊᒻᒪᓗ “ᐅᖃᐅᓯᕐᒥᓂᒃ ᐊᓯᐅᔨᓯᒪᓕᖅᖢᑎᒃ” ᐊᒻᒪᓗ “ᐃᓅᖃᑎᒌᖕᓂᕐᒥᒃ ᐱᒻᒪᕆᐅᑎᑕᐅᔪᓂᒃ.”
40 ᐅᖓᑖᓃᑦᑐᑦ ᐃᓐᓇᑐᖃᐃᑦ Embassy West ᐃᓐᓇᑐᖃᐅᓯᕝᕕᖕᒦᑦᑐᑦ ᐊᑐᕚᒥ, ᑕᐃᒪᓐᓇ ᐅᖃᖅᖢᓂ ᑕᒻᓴᓐ, ᓂᐱᖃᖅᑎᐅᓕᓚᐅᖅᑐᖅ ᐃᓐᓇᑐᖃᕐᓄᑦ ᖃᐅᔨᒐᒥ ᐃᓚᓐᓇᕆᔭᖓ ᑕᐃᑲᓂ ᐃᓐᓇᑐᖃᐅᓯᕝᕕᖕᒦᓕᕐᓂᖓᓄᑦ, ᑕᐃᒪᓐᓇ ᐅᖃᖅᖢᓂ.
ᖃᐅᔨᓚᐅᖅᑕᕋ ᐃᓐᓇᑐᖃᐅᓯᕝᕕᖕᒧᙵᐅᒐᒪ 2016-ᒥ. ᑕᒻᓴᓐ, ᐊᑐᕚᒥᐅᑕᖅ, ᖃᐅᔨᓕᓚᐅᖅᑐᖅ ᐃᓚᓐᓇᕆᔭᖓ ᑕᒥ ᐸᑐᓕᒃ, ᓄᓇᕗᒥᐅᑕᖅ ᐃᓐᓇᑐᖃᖅ ᑕᐃᑲᓃᓐᓂᖓᓄᑦ ᓇᓗᓕᐅᖅᑲᓯᒪᔭᖓ ᐊᒥᓱᓂᒃ ᐅᑭᐅᓂᒃ.
ᐃᓚᖏᑦ ᖃᐅᔨᒪᓚᐅᙱᑦᑐᑦ ᐃᓅᓂᖓᓄᑦ ᑐᖑᖓᓕᕋᓱᒋᔭᖓᓕᐅᒐᓗᐊᖅ, ᑕᐃᒪᓐᓇ ᐅᖃᖅᖢᓂ.
ᑕᒻᓴᓐ ᐅᖃᖅᖢᓂ ᐃᓚᖏᑦ ᐃᓐᓇᑐᖃᐃᑦ Embassy West-ᒦᑦᑐᑦ ᐊᐅᓪᓚᖅᑎᑕᐅᓚᐅᖅᓯᒪᔪᑦ ᑕᐃᑉᓱᒪᓂ ᐳᕙᒡᓗᒡᕕᖕᒧᑦ 1960-ᖏᓐᓂᒃ, “ᐊᒻᒪᓗ ᒫᓐᓇᐅᔪᖅ ᐅᑭᐅᖃᓕᖅᖢᑎᒃ 70-ᓂᒃ 80-ᓂᒃ, ᒐᕙᒪᒃᑯᑦ ᐊᐅᓪᓚᖅᑎᓯᒪᓕᕆᑉᓗᓂᒋᑦ ᖃᑉᓗᓈᑦ ᓄᓇᖓᓄᑦ ᐱᔨᑦᓯᕋᖅᑕᐅᑦᑎᐊᖅᓯᒪᓇᑎᒃ ᓴᓚᐅᓱᑦᑎᐊᕈᓐᓇᖅᑐᒃᑯᑦ. ᑕᒪᓐᓇ ᓈᒻᒪᙱᑦᑐᖅ ᐅᑉᓗᒥᐅᔪᖅ.”
ᑕᒻᓴᓐ ᓂᕆᐅᒃᑐᖅ ᒪᓕᒐᓕᐅᖅᑎᐅᓂᐊᓕᖅᑐᑦ ᑕᒪᑐᒥᙵ ᑲᒪᒋᐊᕐᓂᐊᕐᓂᖏᓐᓄᑦ “ᓯᓚᑖᒍᑦ ᒐᕙᒪᓕᕆᓂᐅᖃᑦᑕᖅᑐᒃᑯᑦ,” ᐃᒪᓐᓇᐃᒻᒪᑦ “ᒐᕙᒪᒃᑯᑎᒍᑦ ᐊᑐᖅᑕᐅᕙᒃᑐᒃᑰᑐᐃᓐᓇᖅᐸᑕ, ᐃᓐᓇᑐᖃᐃᑦ ᐊᖏᕐᕋᖅᓯᒪᓕᔾᔮᙱᑦᑐᑦ ᖁᓕᓂᒃ ᐅᑭᐅᓂᒃ ᖃᐃᔪᓂᒃ.”
ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᖁᓯᒪᔭᖏᑦ Hᐊᒻᓚᒃᑯᓐᓂᒃ ᓄᑖᙳᖅᑎᖁᑉᓗᒋᑦ ᒫᓐᓇᐅᔪᖅ ᐃᓐᓇᑐᖃᐅᓯᕝᕕᑦ ᐃᓂᒃᓴᖅᑖᖁᑉᓗᒋᑦ ᐃᓐᓇᑐᖃᐃᑦ ᒫᓐᓇᐅᔪᒃᑯᑦ ᐃᓂᑖᓪᓚᑦᑖᖅᑳᖅᑎᓐᓇᒋᑦ “ᐃᓐᓇᑐᖃᖁᑎᒋᔭᖅᐳᑦ, ᑖᑉᑯᐊ Embassy West-ᒦᑦᑐᑦ, ᐊᑯᓂᐅᙱᑦᑐᖅ ᓄᓇᒦᓐᓂᐊᓕᕐᒪᑕ. ᐅᑕᖅᑭᔾᔮᙱᑦᑐᑦ ᖁᓕᒃᑲᓐᓂᕐᓂᒃ ᐅᑭᐅᓂᒃ ᐊᖏᕐᕋᕐᓂᐊᕐᓂᕐᒧᑦ.”
“ᐃᓱᒪᒋᙱᑐᐃᓐᓇᕈᓐᓇᙱᓕᖅᑕᖅᐳᑦ ᐃᓐᓇᑐᖃᐃᑦ. ᐃᓱᒪᒋᙱᑐᐃᓐᓇᕈᓐᓇᙱᑕᖅᐳᑦ ᐃᓕᑐᐃᓐᓇᕈᓐᓇᙱᓕᖅᑕᖅᐳᑦ ᐊᑐᕚᒥ,” ᑕᐃᒪᓐᓇ ᐅᖃᖅᖢᓂ.
“ᒐᕙᒪᒃᑯᑦ ᓴᓇᔪᓐᓇᖅᐸᑕ ᐳᓚᕋᖅᑐᓕᕆᕝᕕᖕᓂᒃ, ᑎᖕᒥᓲᖃᕐᕕᖕᓂᒃ ᐅᑕᖅᑭᕕᖕᓂᒃ, ᓯᐊᕐᕆᔮᕐᕕᖕᓂᒃ, ᐃᓕᓐᓂᐊᕐᕕᖕᓂᒃ – ᑕᒪᒃᑯᐊ ᐱᒻᒪᕆᐊᓗᐃᑦ – ᑭᓯᐊᓂ ᑕᐃᒪᐃᓕᐅᕈᓐᓇᖅᐸᑕ, ᓄᑖᙳᖅᑎᕆᔪᓐᓇᖅᑐᑦ ᒫᓐᓇᐅᔪᖅ ᐃᓐᓇᑐᖃᐅᓯᕝᕕᖕᓂᒃ ᓄᓇᓕᖕᓂ ᑕᒪᓐᓇ ᑲᒪᒋᔭᐅᑲᐅᑎᒋᔪᓐᓇᖁᑉᓗᒍ.”