ᓄᓇᕗᒥ ᐊᒡᓂᒍ ᐃᒍᒃᑯᑦ ᓴᓇᔨᖏᑦ ᑭᕙᓪᓕᕐᒥ ᐅᔭᕋᖕᓂᐊᕐᕕᖕᒥ ᐅᑎᕈᒪᖕᒪᖔᑕ ᓴᓇᕝᕕᖕᒥᓄᑦ ᐊᐱᕆᔭᐅᓚᐅᖅᑐᑦ ᐅᑎᕈᓐᓇᖅᓯᒪᑎᑕᐅᑉᓗᑎᒃ ᔫᓐ ᓄᙳᐊᓂ ᐊᑕᐅᓯᕐᒥ ᐅᑭᐅᒥ ᐅᖓᑖᓂᓗ ᓄᖅᑲᖓᓚᐅᖅᑳᖅᑎᓪᓗᒋᑦ.
ᐅᔭᕋᖕᓂᐊᕐᕕᒃ ᓄᓇᕗᒥᐅᓂᒃ ᐊᖏᕐᕋᐅᑎᑦᑎᓚᐅᖅᑐᖅ 75%-ᒥᒃ ᑮᓇᐅᔭᓕᐊᒥᓂᒃ ᑮᓇᐅᔭᓕᐅᖅᑎᖦᖢᒋᑦ ᒫᑦᓯ 2020-ᒥ ᓄᕙᒡᔪᐊᕐᓂᖅ –19 ᓯᐊᒻᒪᖁᓇᒍ ᓄᓇᓕᖕᓂᒃ.
ᑕᐃᒪᙵᓂ, ᐊᒡᓂᒍ ᐃᒍᒃᑯᑦ ᐱᓕᕆᖃᑎᖃᐃᓐᓇᖅᑐᑦ ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᕐᒥᒃ ᐊᑐᓕᖅᑎᕆᔪᒪᑉᓗᑎᒃ ᓴᓇᕝᕕᖕᒧᑦ ᐅᑎᕈᓐᓇᕐᓂᕐᒧᑦ ᐸᕐᓇᐅᑎᒥᒃ, ᒫᓐᓇᓵᖑᓯᒪᔪᖅ ᐊᖏᖅᑕᐅᓚᐅᖅᑐᖅ.
“ᑕᒪᓐᓇ ᐱᒻᒪᕆᐊᓗᒃᑯᑦ ᑎᑭᑦᑐᒪᔭᑉᑎᓐᓄᑦ ᑎᑭᑎᑦᑎᓯᒪᔪᖅ. ᐱᓕᕆᕐᔪᐊᖅᓯᒪᔪᒍᑦ ᑕᒡᕗᙵ ᑎᑭᓐᓇᓱᒃᑎᓪᓗᑕ,” ᑕᐃᒪᓐᓇ ᐅᖃᖅᖢᓂ ᒪᕐᑎᓐ ᐱᓚᓐᑎ, ᐅᔭᕋᖕᓂᐊᖅᑐᓕᕆᔨᒃᑯᑦ ᐊᖓᔪᖅᑳᖓᑕ ᑐᖏᓕᖓ ᓄᓇᕗᒥ ᐊᐅᓚᑕᐅᔪᓄᑦ.
ᐱᓚᓐᑎ ᐅᖃᖅᖢᓂ ᓴᓇᔩᑦ ᐅᓗᕆᐊᓱᒃᐸᑕ ᐅᑎᕆᐊᒃᓴᖅ ᓴᓇᕝᕕᖕᒥᓄᑦ, ᐊᖏᕐᕋᐅᒪᔪᓐᓇᖅᑐᑦ 75%-ᒥᒃ ᑮᓇᐅᔭᓕᐊᒥᓂᒃ ᑮᓇᐅᔭᓕᐅᕐᓗᑎᒃ, ᑕᐃᒪᐃᓕᐅᖅᓯᒪᖕᒪᑕ ᐅᑭᐅᒥ ᖄᖏᖅᓯᒪᔪᒥᒃ.
“ᑕᒪᕐᒥᒃ ᑕᐃᑲᓃᑦᑐᑦ ᐃᓱᒪᖅᓱᖅᖢᑎᒃ,” ᑕᐃᒪᓐᓇ ᐅᖃᖅᖢᓂ.
ᐊᒡᓂᒍ ᐃᒍᒃᑯᑦ ᐊᑐᖅᑐᑦ ᐅᑎᖅᐸᓪᓕᐊᔪᓐᓇᕐᓂᕐᒧᑦ ᓄᓇᕗᒥᐅᑦ ᓴᓇᔨᖏᑦᑎᒍᑦ. ᔫᓐ 28-ᒥ, ᑐᙵᓱᒃᑎᑦᑎᓚᐅᖅᑐᑦ 12-ᓂᒃ ᓴᓇᒥᓂᒃ ᑕᓯᕐᔪᐊᕐᒥ ᐅᔭᕋᖕᓂᐊᕐᕕᖕᒧᑦ, ᐊᕙᑎᒃᑲᓐᓃᑦ ᓴᓇᔩᑦ ᐊᐳᖅᑎᓐᓈᖅᑐᒧᑦ ᓴᓇᔭᖅᑐᓚᐅᖅᖢᑎᒃ ᔫᓐ 29-ᒥ.
ᐸᓚᓐᑎ ᐅᖃᖅᖢᓂ ᒪᕐᕉᖕᓂᒃ ᑕᖅᑮᖕᓂᒃ ᐅᑎᖅᐸᓪᓕᐊᓂᐊᖅᑐᒃᓴᐅᓂᖏᓐᓄᑦ ᓴᓇᔩᑦ.
ᑕᒪᓐᓇ ᐅᑎᖅᐸᓪᓕᐊᕋᐅᔭᕈᑕᐅᔪᖅ ᓴᓇᔩᑦ ᓴᓇᕝᕕᖕᒥᓄᑦ ᐅᑎᖅᐸᓪᓕᐊᔪᑦ ᐅᑉᓗᒥᒧᑦ ᑎᑭᖦᖢᒍ ᐃᓕᓐᓂᐊᕈᑎᓂᒃ ᐃᓕᓐᓂᐊᕆᐊᖃᕐᒪᑕ. ᐃᓕᓐᓂᐊᕈᑕᐅᓂᐊᕆᑉᓗᑎᒃ ᓄᑖᖑᔪᑦ ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓖᑦ. ᑭᓯᐊᓂᓕ, ᓴᓇᕝᕕᖕᒥᓄᑦ ᑐᕌᖓᔪᓂᒃᑕᐅᖅ ᐃᓕᓐᓂᐊᕆᐊᖃᕐᓂᐊᖅᑐᑦ.
“ᓴᓇᔨᐅᑉ ᐱᓕᕆᐊᕆᓯᒪᔭᖏᑦ ᒪᓕᒡᓗᒋᑦ, ᒪᕐᕉᖕᓂᒃ ᐱᓇᓱᐊᕈᓯᓗᒃᑖᒧᓪᓘᓐᓃᑦ ᐃᓕᓐᓂᐊᕆᐊᖃᕐᓂᐊᖅᖢᑎᒃ,” ᐸᓚᓐᑎ ᐅᖃᖅᑐᖅ.
ᑕᒪᕐᒥᒃ ᓄᓇᕗᒥᐅᑦ ᖃᐅᔨᓴᖅᑕᐅᓂᖃᕐᓂᐊᖅᑐᑦ ᓄᕙᒡᔪᐊᕐᓂᖃᙱᒃᑲᓗᐊᕐᒪᖔᑕ, ᑕᓪᓕᒪᖓᓂᒃ ᐅᑉᓗᕐᒥ 14-ᓂᒡᓗ ᐅᑉᓗᕐᓂᒃ ᐅᔭᕋᖕᓂᐊᕐᕕᖕᒦᓕᖅᑎᓪᓗᒋᑦ, ᒪᓕᒃᖢᒍ ᐸᓚᓐᑎᐅᑉ ᐅᖃᐅᓯᖓ.
ᒪᕐᕉᒃ ᐱᓇᓱᐊᕈᓰᒃ ᐱᐊᓂᒃᑎᓪᓗᒋᑦ ᖃᐅᔨᓴᖅᑕᐅᓂᐊᕐᓂᖓ ᐱᔾᔪᑎᖃᖅᑐᖅ ᓄᓇᖓᓃᓕᖅᑎᓪᓗᒍ ᓄᕙᒡᔪᐊᕐᓂᖅᑖᖅᑎᑦᑎᖁᓇᒍ.
“ᑕᐃᒪᓐᓇ ᐱᓕᕆᒃᑲᓐᓂᕈᒪᒐᑉᑕ ᐅᑎᖅᑳᖅᑎᓐᓇᑕ. ᑐᕌᒐᕆᔭᖅᐳᑦ ᓴᐳᓐᓂᐊᕈᒪᓂᖅ ᓄᓇᓕᖕᓂᒃ,” ᑕᐃᒪᓐᓇ ᐅᖃᖅᖢᓂ.
ᐊᒡᓂᒍ ᐃᒍᒃᑯᑦ ᐊᑐᓕᖅᑎᑦᑎᓯᒪᖕᒥᔪᑦ ᐊᓯᖏᓐᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒪᓂᕐᒧᑦ ᖃᓄᐃᓕᐅᕈᑎᒃᓴᓂᒃ ᐅᔭᕋᖕᓂᐊᕐᕕᖕᒥ. ᑲᑎᑦᑕᕐᕕᖕᓂᒃ ᐱᑕᖃᕈᓐᓃᖅᑐᖅ, ᐊᒡᒐᖕᒥᓂᒃ ᐃᕐᒥᒡᕕᖕᓂᒃ ᐃᓕᐅᖅᑲᐃᓯᒪᔪᑦ ᐊᒻᒪᓗ ᐅᖓᓯᒌᒃᑑᑎᖃᑦᑕᖁᑉᓗᒋᑦ ᐋᖅᑭᒃᓯᓯᒪᔪᑦ.
ᐊᒻᒪᓗᑦᑕᐅᖅ, ᐅᔭᕋᖕᓂᐊᕐᕕᒃ ᑐᙵᓱᒃᑎᑦᑎᖃᑦᑕᕐᓂᐊᖅᑐᖅ ᓄᓇᕗᒥᐅᓂᒃ ᓴᓇᔨᓂᒃ ᑭᓯᐊᓂ ᖃᑉᓗᓈᑦ ᓄᓇᖓᓂᙶᖅᑐᑦ ᑎᑭᓯᒪᔾᔮᙱᒃᑳᖓᑕ.
ᐊᒡᓂᒍ ᐃᒍᒃᑯᑦ ᐋᖅᑭᒃᓱᐃᓯᒪᓪᓚᑦᑖᖅᑐᑦ ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓕᖕᓂᒃ ᐃᓕᐅᖅᑲᐃᓯᒪᑉᓗᑎᒃ ᐅᑭᐅᒥ ᖄᖏᓵᖅᑐᒥ. ᖃᑉᓗᓈᓂᙶᓲᑦ ᓴᓇᔩᑦ ᖃᐅᔨᓴᖅᑕᐅᓗᑎᒃ ᓄᕙᒡᔪᐊᕐᓂᖅᑕᖃᙱᓐᓂᖏᓐᓄᑦ ᓇᓗᓇᐃᖅᑕᐅᓯᒪᖃᑦᑕᕆᐊᓖᑦ ᑎᖕᒥᓲᕐᒧᑦ ᐃᑭᖅᑳᕐᓇᑎᒃ. ᐃᓚᐅᖃᑕᐅᑉᓗᒍ ᓴᓇᕝᕕᖕᒧᑦ ᐅᑎᕐᓂᐊᕐᓂᕐᒧᑦ ᐸᕐᓇᐅᑎᒥ, ᑲᒻᐸᓂᒋᔭᐅᔪᖅ ᐋᖅᑭᒃᓯᓯᒪᔪᖅ ᐃᓄᑑᕝᕕᒃᓴᓂᒃ ᑲᖏᖅᖠᓂᕐᒥ ᐊᒻᒪᓗ ᐃᖃᓗᖕᓂ, ᓄᓇᕗᒥᐅᑦ ᐃᓂᒃᓴᖏᓐᓂᒃ ᓄᕙᒡᔪᐊᕐᓂᖅᑕᖃᓕᑳᓪᓚᒐᔭᕐᓂᖅᐸᑕ, ᓄᓇᓕᖕᓂ ᓯᐊᒻᒪᖁᓇᒍ ᓄᕙᒡᔪᐊᕐᓂᖅ.
ᐸᓚᓐᑎ ᐅᖃᖅᖢᓂ ᓄᕙᒡᔪᐊᕐᓂᖅᑕᖃᖅᑐᒥᒃ ᓴᖅᑭᑦᑐᖃᕋᔭᖅᐸᑦ, ᐊᒡᓂᒍ ᐃᒍᒃᑯᑦ ᖃᐅᔨᓴᓪᓚᕆᓕᕋᔭᖅᑐᑦ ᓇᒦᓚᐅᕐᒪᖔᑦ ᓄᕙᒡᔪᐊᕐᓂᖅᑖᖅᓯᒪᔪᖅ ᐃᒪᓐᓇ ᑐᑭᖃᖅᑐᖅ ᑭᓇᑐᐃᓐᓇᖅ ᓄᕙᒡᔪᐊᕐᓂᖅᑖᖅᑐᒥᒃ ᐃᓅᖃᑎᖃᖅᓯᒪᓂᑰᒃᐸᑦ ᐅᔭᕋᖕᓂᐊᕐᕕᖕᒥ ᓅᑕᐅᓇᔭᕐᒥᔪᖅ.
“ᓅᑦᑎᓇᔭᖅᑐᒍᑦ ᓅᑕᐅᔭᕆᐊᓕᖕᓂᒃ ᖃᑉᓯᐅᒐᓗᐊᖅᐸᑕ ᓄᕙᒡᔪᐊᕐᓂᒃᑯᑦ ᐊᒃᑐᖅᑕᐅᓯᒪᔫᔭᖅᑐᑦ,” ᑕᐃᒪᓐᓇ ᐅᖃᖅᖢᓂ ᐸᓚᓐᑎ. “ᐊᓯᖏᓐᓄᓪᓕ ᒪᓕᒃᑕᐅᔭᕆᐊᖃᖅᑐᒃᑯᑦ, ᐊᐅᓚᑦᑎᔪᓐᓇᖅᓯᒪᔪᒍᑦ ᓯᐊᒻᒪᖁᓇᒍ.”