Skip to content

ᐊᒥᓱᓂ ᐱᓱᖕᓂᐅᔪᓂ ᒪᒥᓴᕐᓂᕐᒧᑦ ᐃᖏᕐᕋᓂᐅᔪᒧᑦ

ᐱᓱᖕᓃᑦ ᓱᒃᑲᐃᓐᓂᖅᓴᐅᕗᑦ ᐋᓚᓐ ᓇᕙᓚᓗᒃ ᑲᓇᔪᕐᒧᑦ ᒫᓐᓇᐅᔪᒥ.
25760153_web1_210712-NUN-Kanayok-INUK2_1

ᐱᓱᖕᓃᑦ ᓱᒃᑲᐃᓐᓂᖅᓴᐅᕗᑦ ᐋᓚᓐ ᓇᕙᓚᓗᒃ ᑲᓇᔪᕐᒧᑦ ᒫᓐᓇᐅᔪᒥ.

ᐅᑭᐅᖃᖅᖢᓂ 60ᓂ, ᐃᖃᓗᒃᑑᑦᑎᐊᕐᒥᐊᑕᖅ ᐱᓱᒃᐳᖅ ᐊᔭᐅᑉᐱᐊᖃᖅᖢᓂ.

17 ᑭᓛᒥᑐᓂ ᑎᑭᐅᑎᓂᕐᒧᑦ ᖃᖅᑲᖅ ᐅᕙᔪᕐᒧᑦ — ᓯᕗᓂᐊᓂ ᖃᐅᒪᔭᐅᓚᐅᖅᑐᒥ Mount Pellyᒥ — ᑕᐃᒪᓐᓇᑎᒋ ᐅᖓᓯᖕᓂᖃᖅᐳᖅ ᑕᐃᒪᐃᖏᓐᓇᖅᓯᒪᓂᖓᓂ, ᑭᓯᐊᓂ ᑕᐃᑯᙵᕐᓂᕐᒥ ᐊᒃᓱᕈᕐᓇᕐᓂᖅᓴᐅᓕᖅᐳᖅ, ᐊᒻᒪ ᐊᑯᓂᐅᓂᖅᓴᐅᕗᖅ.

ᐊᒃᓱᕈᖅᑐᒥ ᑲᓇᔪᖅ ᐱᓱᖕᓂᖃᓚᐅᖅᐳᖅ ᔪᓚᐃ 1-ᒥ, ᑲᓇᑕᐅᑉ ᐅᓪᓗᖓᓂ. ᐊᑐᖅᖢᓂ ᓇᓗᓇᐃᒃᑯᑕᐅᔪᓂ ᐅᖃᓕᒫᕐᓂᖃᖅᑐᒥ, “ᓱᕈᓯᓕᒫᑦ ᐱᒻᒪᕆᐅᕗᑦ,” ᐃᑲᕐᕋᓂ 6 ᐅᖓᑖᓂ ᑎᑭᐅᑎᓇᓱᓚᐅᖅᐳᖅ ᐅᐸᒐᓱᐊᖅᑕᒥᓂᑦ. ᓴᙱᓇᓱᐊᕐᔪᐊᓚᐅᖅᐳᖅ ᐱᔭᕇᖅᓯᓂᕐᒥ ᐃᖏᕐᕋᓂᕆᔭᒥᓂᑦ ᐃᖅᑲᐅᒪᓂᐅᔪᒧᑦ ᐱᕋᔭᒃᑕᐅᓂᑯᓂ ᐊᒻᒪ ᐆᒪᔪᓄᑦ ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᑎᒃ.

“ᖁᕕᐊᓱᕐᔪᐊᖅᐳᖓ ᐱᓕᕆᓚᐅᕋᒃᑯ … ᐱᓕᕆᓚᐅᖅᐸᕋ ᓄᓇᓕᖕᓄᑦ, ᐊᐅᓪᓚᖅᑎᑕᐅᕙᓚᐅᖅᑐᓄᑦ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᐆᒪᔪᓄᑦ ᐅᕙᓂ ᓄᓇᓕᑦᑎᓐᓂ, ᐊᒻᒪᓗ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᐆᒪᔪᓄᑦ (ᑲᓇᑕᓕᒫᒥ) ᐊᒻᒪᓗ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᐃᓕᓐᓂᐊᖅᑎᓄᑦ ᐊᖏᕐᕋᕈᓐᓇᖅᓯᓚᐅᙱᑦᑐᓄᑦ,” ᐅᖃᓚᐅᖅᐳᖅ, ᖁᕝᕕᐅᖅᖢᓂ. “ᐊᒥᓱᓗᐊᑦ ᒪᒃᑯᒃᑐᑦ ᐊᒻᒪ ᐃᓄᑐᖃᑦ ᐃᓅᓯᖏᑦ ᐅᓯᐅᔪᑦ, ᐱᓗᐊᖅᑐᒥ ᐊᖏᕐᕋᕈᓐᓇᓚᐅᙱᑦᑐᓄᑦ ᓇᒡᓕᒋᔨᒥᓄᑦ ᐃᓗᕕᖅᑕᐅᑦᑎᐊᕈᓐᓇᕐᓂᕐᒧᑦ.”

ᖃᐅᑎᓪᓗᒍ, ᕿᒥᕐᓗᖓ ᐋᓐᓂᐊᓚᐅᖅᐳᖅ. ᐃᓯᒐᖏᑦ ᐊᒻᒪ ᓂᐅᖏᑦ ᓴᖕᓂᓚᐅᖅᐳᑦ. ᐃᓗᐊᙱᓐᓂᐅᒐᓗᐊᖅᑎᓪᓗᒍ, ᐸᕐᓇᒃᓯᒪᕗᖅ ᐱᓕᕆᒃᑲᓐᓂᕐᓂᕐᒥ ᐱᕈᖅᓴᐃᓂᕐᒥ ᐅᔾᔨᕈᓱᖕᓂᐅᔪᒥ ᐋᓐᓂᐊᕐᓂᐊᔪᒥ ᐊᒻᒪ ᐊᒃᓱᕈᖅᖢᑎᒃ ᐊᑐᖅᑕᐅᓂᑯᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᐃᓗᕖᑦ ᐅᓄᕐᓂᖅᓴᐅᔪᓂ 1,000ᓂ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓂ ᓇᓂᔭᐅᓯᒪᓂᖏᓐᓂ ᖄᖏᖅᓯᒪᓕᖅᑐᒥ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂ ᐊᔾᔨᒌᙱᑦᑐᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ.

“ᐅᑭᐅᖅᑯᖅᑐᒐᓗᐊᖅᑎᓪᓗᒐ ᐊᒻᒪ ᐊᔪᕈᑎᖃᖅᖢᖓ, ᐱᓱᒃᑲᓐᓂᕈᓐᓇᖅᐳᖓ ᖃᖅᑲᖅ ᐅᕙᔪᕐᒧᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐱᔾᔪᑕᐅᔪᒧᑦ. ᐱᓕᕆᒃᑲᓐᓂᕈᓐᓇᖅᐸᕋ ᓯᓚᑦᑎᐊᕙᐅᙱᕐᔪᐊᖅᑐᒥ,” ᑲᓇᔪᖅ ᐅᖃᓚᐅᖅᐳᖅ. “ᐱᓇᔪᐃᓐᓇᕐᓂᐊᖅᐳᖓ ᐱᔪᓐᓇᕐᓂᓕᒫᓐᓂ ᐃᑲᔪᕐᓂᕐᒧᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐆᒪᔪᓄᑦ.”

ᐅᖃᓚᐅᖅᐳᖅ ᖁᕕᐊᓯᒪᕗᖅ ᐃᑲᔪᖅᓱᐃᓂᕐᒧᑦ ᓄᓇᓕᖓᓂ ᐃᖃᓪᓕᐊᕈᔾᔨᕙᒃᖢᓂ ᐊᓯᒥᓄᑦ ᐊᕐᕌᒍᒐᓴᐅᔪᓄᑦ ᐊᖓᔪᖅᑳᖏᑕ ᑕᐃᒪᓐᓇ ᐱᕈᖅᓴᓯᒪᖕᒪᒍ. ᑕᐃᒪᓐᓇᑦᑕᐅᖅ, ᐃᓕᑎᑦᑎᓯᒪᕗᖅ ᑖᒃᑯᓂᖓᑦᑕᐃᓐᓇᖅ ᐱᓐᓇᕆᔭᒥᓂᑦ ᓇᖕᒥᓂᖅ ᕿᑐᕐᙵᒥᓂᑦ, ᐃᒻᒥᓂᒃ ᐃᑲᔪᖅᐸᓕᖅᑐᓂ ᐊᒻᒪ ᐊᓯᖏᓐᓂ ᓄᓇᓕᖕᒥᐅᑕᔪᓂ ᓂᕿᑦᑎᐊᕙᖕᓂ ᑐᓂᓯᕙᒃᖢᑎᒃ, ᐅᖃᓚᐅᖅᐳᖅ.

ᑲᓇᔪᖅ, ᐃᓚᐅᓚᐅᖅᑐᒥ Stringer Hallᒥ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐃᓕᓐᓂᐊᕐᕕᖓᓂ ᐃᓅᕕᖕᒥ ᒪᒃᑯᒃᑎᓪᓗᒍ, ᐃᓄᑑᓚᐅᙱᓚᖅ ᐅᖓᓯᒃᑐᒥ ᔪᓚᐃ 1ᒥ ᐱᓱᖕᓂᐅᔪᒥ. ᐃᓪᓗᖓ ᐋᑎᓚᐃᑦ ᑲᕙᓐᓇ ᐊᒻᒪ ᖃᖏᐊᖓ ᑳᓚᐃᓐ ᕌᐱᓐᓯᓐ ᐊᖁᓚᐅᖅᐳᑦ ᑎᓴᒪᓕᖕᒥ ᐃᒪᒡᒋᖅᖢᑎᒃ ᐊᒻᒪ ᑕᖁᐊᒃᓴᓂ. ᓇᐅᑦᑎᖅᓱᓚᐅᕆᕗᑦ ᓇᓄᕐᓄᑦ ᐊᒻᒪ ᐊᒪᕈᕐᓄᑦ, ᑕᑯᔭᐅᓯᒪᓚᐅᖅᑐᓂ ᐃᓂᐅᔪᒥ ᓯᕗᓂᒃᑲᓐᓂᐊᓂ, ᐊᒻᒪ ᐃᑭᒪᑎᑕᐅᓚᐅᖅᐳᖅ ᓄᓇᓕᖕᓄᑦ ᐅᑎᒧᑦ.

“ᐊᒃᑲᒐ ᐸᖅᑭᒃᑲᒻᒪᕆᐅᓪᓗᓂ, ᓇᒡᓗᒍᑦᑕᐅᕗᖅ ᐊᖑᑕᐅᓪᓗᓂ,” ᕌᐱᓐᓯᓐ ᐅᖃᓚᐅᖅᐳᖅ ᑲᓇᔪᕐᒥ.

ᕌᐱᓐᓯᓐ ᐃᕐᓂᖓ ᐋᔅᑎᓐ ᐱᓱᖃᑎᖃᓚᐅᖅᐳᖅ ᓴᓂᐊᓂ ᑲᓇᔪᕐᒥ ᐊᖅᑯᑎᖓᓄᑦ. ᐊᓯᖏᑦ ᓴᖅᑭᓚᐅᖅᐳᑦ ᑕᑯᒃᓴᐅᑎᑦᑎᓂᕐᒥ ᐃᑲᔪᖅᓱᐃᓂᖏᓐᓂ ᒪᕐᕉᒃ ᐱᓱᕋᔭᐅᔭᖅᑎᓪᓗᒋᑦ.

“ᐱᓲᔮᕐᔪᒃᑎᓪᓗᑕ, ᑕᑯᓚᐅᖅᐳᒍᑦ ᐊᒥᓱᓂ ᐃᓄᖕᓂ ᐃᖃᓪᓕᐊᖅᑐᓂ ᑰᖕᒥ ᐊᒻᒪ ᑕᓯᕐᒥ. ᖁᕕᐊᓚᐅᖅᐳᑦ ᐊᒻᒪ ᐃᕆᐊᓛᖅᖢᑎᒃ ᐊᒻᒪ ᐸᑦᑕᒃᑐᖅᖢᑎᒃ ᑎᑭᐅᑎᓂᐊᕐᓂᕋᐃᓪᓗᑎᒃ ᐅᐸᒐᓱᐊᖅᑕᓐᓄᑦ,” ᐅᖃᓚᐅᖅᐳᖅ ᑲᓇᔪᖅ. “ᐅᕙᓐᓂ ᖁᕝᕕᐅᖅᑎᑦᑎᒐᓛᓚᐅᖅᐳᑦ.”

ᖁᕕᐊᕐᔪᐊᓚᐅᖅᐳᖅ ᑎᑭᐅᑎᒐᒥ ᖃᖅᑲᖅ ᐅᕙᔪᕐᒧᑦ ᐳᐃᒍᖅᐸᓵᕋᒥ ᐃᓕᓯᓂᐊᓚᐅᕐᓂᖓᓂ ᕿᑐᕐᙵᐅᔭᒥᒃ ᐊᒻᒪ ᐃᓯᒐᐅᔭᕋᓛᓂᑦ ᐃᓂᐅᔪᒧᑦ, ᓇᓗᓇᐃᒃᑯᑕᐅᓂᐊᓚᐅᖅᑐᒥ ᐃᖅᑲᐅᒪᓂᐅᔪᒥ ᐃᓅᓯᐅᔪᓄᑦ ᐊᓯᐊᓚᐅᖅᑐᓄᑦ. ᑭᓯᐊᓂ ᑕᒪᓐᓇ ᐳᐃᒍᓚᐅᖅᑕᖓᓂ ᐃᖅᑲᐅᒪᓂᐅᔪᒥ ᑲᑕᒃᑎᑦᑎᓂᖃᓚᐅᙱᓚᖅ ᖁᕕᐊᓐᓂᖓᓂ.

“ᐅᐱᐅᖅᑲᕗᖓ ᖃᓄᐃᓕᐅᕐᓂᓐᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐆᒪᔪᓄᑦ ᐊᒻᒪᓗ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐃᓕᓐᓂᐊᖅᑎᓄᑦ ᐊᖏᕐᕋᕈᓐᓇᖅᓯᓚᐅᙱᑦᑐᓄᑦ,” ᐅᖃᓚᐅᖅᐳᖅ.