ᐃᕙ ᐅᖃᑦᓯᐊᖅ ᐃᓚᒋᔭᐅᖃᑕᐅᔪᖅ ᖁᓕᓂᒃ ᓴᓇᔨᑖᖑᓯᒪᔪᓂᒃ ᐃᓕᓐᓂᐊᖅᑎᑕᐅᓚᐅᖅᑐᓂᒃ ᓯᖓᐃᔪᑦ ᐊᓈᓇᙳᓵᖅᑐᓪᓗ ᐃᑲᔫᑎᒃᓴᖓᒍᑦ ᐃᓕᑕᖅᓯᓂᒃᑯᑦ ᐊᕐᕕᐊᓂ ᑲᖏᖅᖠᓂᕐᒥᓗ.
“ᑕᐃᒪᐃᑦᑐᖃᕋᔮᕐᓂᕐᓕ ᐃᓕᓐᓂᐊᕈᑎᒥᒃ ᓄᑕᖅᑭᐅᖅᑎᓪᓗᖓ,” ᑕᐃᒪᓐᓇ ᐅᖃᖅᖢᓂ ᐅᖃᑦᓯᐊᖅ, ᐊᕐᕕᐊᓂᙶᖃᑕᐅᔪᖅ ᐊᒻᒪᓗ ᓄᑕᕋᓕᒃ ᐊᕐᕕᓂᓕᖕᓂᒃ ᑭᓯᐊᓂ ᑲᑎᖦᖢᒋᑦ 7-ᖑᔪᑦ.
ᐊᕐᕕᓂᓕᐅᓂᐊᖅᑐᑦ ᓴᓇᔩᑦ ᐊᕐᕕᐊᓂ ᐊᒻᒪᓗ ᓯᑕᒪᑦ ᑲᖏᖅᖠᓂᕐᒥ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᓚᐅᖅᑐᑦ ᐃᓕᑕᖅᓯᓂᒃᑯᑦ ᒫᑦᓯ 18-ᒥ ᐊᒻᒪᓗ ᓴᓇᐃᓐᓇᕐᓂᐊᓕᖅᑐᑦ ᐊᖏᕐᕋᕆᔭᐅᔪᓂᒃ ᐃᑲᔪᕆᐊᖅᑎᐅᖃᑦᑕᕐᓗᑎᒃ ᓄᓇᒥᓂ.
ᒪᑕ ᐸᓪᓗᖅ, ᑲᖏᖅᖠᓂᕐᒥᐅᑕᖅ ᐃᓕᓐᓂᐊᖃᑕᐅᓚᐅᖅᑐᖅ, ᐅᖃᓚᐅᖅᑐᖅ ᑕᒪᓐᓇ ᐃᓕᓐᓂᐊᕈᑎ ᐃᑲᔫᑕᐅᓪᓚᕆᖕᓂᐊᕐᒪᑦ ᓄᓇᓕᖕᒥ.
“ᐊᒥᓱᓂᒃ ᐃᓕᑦᑎᓚᐅᖅᑐᒍᑦ ᐃᓱᒪᓚᐅᖅᖢᖓᓘᓐᓃᑦ ᑕᒡᕙᑐᖅ ᐅᑯᐊ ᖃᐅᔨᒪᓐᓂᕐᓚᒃᑲ ᐊᓈᓇᙳᖅᑎᓪᓗᖓ,” ᑕᐃᒪᓐᓇ ᐅᖃᖅᖢᓂ ᐸᓪᓗᖅ, ᒪᕐᕉᖕᓂᒃ ᓄᑕᕋᓕᒃ, ᐅᖃᖅᖢᓂᓗ ᐅᔾᔨᕈᓱᓚᐅᙱᓐᓇᒥᒎᖅ ᖃᓄᖅ ᓄᑕᕋᓛᑦ ᓯᖓᐃᒋᔭᐅᔪᑦ ᐃᓕᑦᑎᕙᓪᓕᐊᑎᒋᖃᑦᑕᕐᒪᖔᑕ ᐃᓅᖅᑳᕐᓇᑎᒃ.
“ᖃᐅᔨᒪᓚᐅᕈᒪ ᖃᓄᖅ ‘ᐃᓕᑦᑎᑎᒋᖃᑦᑕᕐᒪᖔᑕ,’ ᐅᖃᖃᑎᒋᓂᖅᓴᐅᖃᑦᑕᕋᔭᖅᑕᒃᑲ, ᖃᓄᐃᓕᐅᖃᑎᒋᓂᖅᓴᐅᓗᒋᑦ.”
ᖁᕕᐊᓱᒃᑐᖅ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐊᑐᕐᓂᐊᕐᒪᑦ ᐃᓚᒌᖕᓄᑦ ᐃᑲᔪᖅᑕᒥᓄᑦ.
ᑎᐅᕋ ᒍᕆᓐ, ᐃᑲᔫᑎᒥᒃ ᐊᐅᓚᑦᑎᔨ, ᐅᖃᖅᖢᓂ ᐃᓕᓐᓂᐊᕈᑎ ᐊᑐᓕᖅᑎᖅᑕᐅᓚᐅᕐᒪᑦ Martin Family Initiative-ᑯᑎᒍᑦ ᐊᒻᒪᓗ ᐃᓚᐅᖃᑕᐅᑉᓗᑎᒃ ᐊᖅᑭᐅᒪᕝᕕᒃᑯᑦ, ᐃᓐᓇᑐᖃᐃᑦ ᐊᒻᒪᓗ ᐃᓕᓐᓂᐊᖅᑎᑦᑎᔩᑦ ᓄᓇᕗᒥ.
ᒪᕐᕉᖕᓂᒃ ᐱᓇᓱᐊᕈᓰᖕᓂᒃ ᐃᓕᓐᓂᐊᕈᑎ ᐃᓗᓕᖃᖅᑐᖅ 45-ᓂᒃ ᐃᑲᕐᕋᓂᒃ ᐃᓕᓐᓂᐊᖅᑎᑕᐅᓂᒃᑯᑦ, ᐃᓗᓕᖃᖅᖢᓂ ᓄᑕᖅᑭᕆᓂᒃᑯᑦ ᖃᓄᐃᓕᐅᕈᑎᒃᓴᓂᒃ – ᐱᔾᔪᑎᖃᓪᓚᕆᒃᖢᓂᓗ ᐃᓕᓐᓂᐊᖅᑎᑦᑎᓂᕐᒧᑦ ᓄᑕᕋᑦ ᐆᒻᒪᑎᑯᓗᖏᑦᑎᒍᑦ – ᐱᓕᕆᐊᒃᓴᖃᖅᑎᑕᐅᕙᒃᖢᑎᒃ ᐃᓕᓐᓂᐊᕈᑎᒃᑯᑦ ᐊᖏᔪᓂᒡᓗ ᑲᒪᔭᕆᐊᖃᖃᑦᑕᕈᒫᕐᓂᒃᑯᑦ.
ᐃᓕᓐᓂᐊᕈᑎᒥᓂᒃ ᐱᐊᓂᒃᓯᔪᑦ ᓴᓇᐃᓐᓇᓕᕐᓂᐊᖅᑐᑦ ᓴᓇᑦᑕᐃᓕᐅᕌᓂᒃᑐᒥ ᑕᓪᓕᒻᒥᕐᒧᑦ ᐃᑲᔪᖅᑐᐃᖃᑦᑕᕐᓗᑎᒃ 15-ᓄᑦ ᐃᓚᒌᖕᓄᑦ ᐊᑐᓂ.
“ᑕᒪᓐᓇ ᐃᓕᓐᓂᐊᕈᑎ ᐋᖅᑭᒃᓱᖅᑕᐅᓯᒪᔪᖅ ᐊᓈᓇᐅᔪᑦ ᐃᓚᒌᓪᓗ ᐊᒃᓱᕈᕐᓇᙱᑦᑐᒃᑰᕐᓂᖅᓴᐅᖃᑦᑕᖁᑉᓗᒋᑦ,” ᑕᐃᒪᓐᓇ ᐅᖃᖅᖢᓂ ᒍᕆᓐ.
ᐊᖏᕐᕋᕆᔭᐅᔪᓄᙵᐅᔪᑦ ᐃᑲᔪᖃᑦᑕᕐᓂᐊᖅᑐᑦ ᓯᖓᐃᔪᓂᒃ ᐊᒻᒪᓗ ᐊᓈᓇᙳᓵᖅᑐᓂᒃ ᐃᓕᓐᓂᐊᖅᑎᑦᑎᖃᑦᑕᕈᓐᓇᖁᑉᓗᒋᑦ ᓄᑕᕋᒥᓂᒃ, ᑲᒪᑦᑎᐊᕈᓐᓇᖃᑦᑕᖁᑉᓗᒋᑦ ᐊᒻᒪᓗ ᐃᓕᓐᓂᐊᕈᑎᖏᓐᓂᒃ ᐱᕙᓪᓕᐊᑎᑦᑎᔪᓐᓇᖁᑉᓗᒋᑦ, ᐊᔾᔭᖅᑐᖅᑕᐅᔪᓐᓇᖃᑦᑕᖁᑉᓗᒋᓪᓗ ᑕᑯᔭᐅᔭᕆᐊᖃᕌᖓᑕ, ᑲᐱᔭᐅᔭᕆᐊᖃᕌᖓᑕ ᓄᑕᕋᓛᑦ ᐊᒻᒪᓗ ᓂᕿᑖᕆᐊᖅᑐᖃᑎᒋᔭᐅᖃᑦᑕᕐᓗᑎᒡᓘᓐᓃᑦ.
“ᐊᓈᓇᐅᑉᓗᓂ ᐊᒃᓱᕈᕐᓇᖃᑦᑕᕐᒪᑦ, ᐃᑲᔪᖅᑎᖃᕈᓐᓇᕐᓗᓂ, ᐃᑲᔫᑕᐅᓪᓚᕆᖕᓂᐊᖅᑐᖅ ᐃᓚᒌᖕᓄᑦ ᐊᒻᒪᓗ ᓄᑕᖅᑲᓄᑦᑕᐅᖅ,” ᑕᐃᒪᓐᓇ ᐅᖃᖅᖢᓂ ᒍᕆᓐ.
“ᐃᓄᐃᑦ ᓄᑕᖅᑭᕆᔾᔪᑎᖏᑦ ᐊᖏᕐᕋᕆᔭᐅᔪᓂᒃ ᐊᑐᓕᖅᑎᖅᑕᐅᔪᓐᓇᖁᑉᓗᒋᑦᑕᐅᖅ, ᑕᒪᓐᓇ ᐋᖅᑭᒋᐊᕈᑕᐅᓂᐊᖅᑑᔭᖅᑐᖅ ᒪᒥᓴᕈᑕᐅᓗᓂᓗ. ᑭᓯᐊᓂᓕ ᐱᓗᐊᖅᑐᒥ, ᐃᓚᒌᑦ, ᓯᖓᐃᔪᑦ ᐊᒻᒪᓗ ᐊᓈᓇᙳᓵᖅᑐᑦ ᖃᐅᔨᒪᖁᑐᐃᓐᓇᖅᑕᖅᐳᑦ ᐃᑲᔪᖅᑎᒃᓴᖃᕐᒪᑕ ᐊᒻᒪᓗ ᐃᑲᔪᕈᒪᔪᒍᑦ ᐃᓅᓯᒃᑯᑦ.”
ᑕᒪᓐᓇ ᐃᑲᔫᑎᒃᓴᖅ ᐃᓚᐅᖃᑕᐅᔪᒪᔪᓄᑦ ᒪᑐᐃᖅᑕᐅᓂᐊᖅᑐᖅ ᒫᓐᓇᑲᐅᑎᒋ. ᐱᒋᐊᕈᑎᒃᑯᑦ, ᐊᑐᐃᓐᓇᐅᓂᐊᖅᑐᖅ ᓯᖓᐃᔪᓄᑦ ᐊᒻᒪᓗ ᐊᓈᓇᙳᓵᖅᑐᓄᑦ ᐊᕐᕕᓂᓕᖕᓄᑦ ᑕᖅᑭᓕᖕᓄᑦ, ᐃᑲᔪᖅᑕᐅᔪᓐᓇᕐᓂᐊᖅᖢᑎᒃ ᓄᑕᕋᓛᖅ ᒪᕐᕉᖕᓂᒃ ᐅᑭᐅᖃᓕᖅᓂᖓᓄᑦ ᑎᑭᓪᓗᒍ.
ᒍᕆᓐ ᐅᖃᖅᖢᓂ ᐃᓄᐃᒡᒎᖅ ᐅᔾᔨᖅᑐᕐᓂᐊᖅᐳᑦ ᑕᒪᒃᑯᐊ ᒪᑐᐃᕐᓂᐊᕐᓂᖏᓐᓄᑦ ᐆᒃᑐᕈᕈᒪᔪᓄᑦ.
“ᐃᒃᐱᒍᓱᓗᒃᑖᖅᑐᒍᑦ ᑕᒪᓐᓇ ᐃᑲᔫᑕᐅᓂᐊᕐᒪᑦ ᓄᓇᓕᓗᒃᑖᒧᑦ,” ᑕᐃᒪᓐᓇ ᐅᖃᖅᖢᓂ.