ᐊᔭᓕᒃ ᑮᓇᐅᔭᖃᖅᑎᑕᐅᓂᐅᔪᒥ ᐊᒻᒪ ᑲᓇᑕᒥ ᖃᔭᖅᑐᕐᓂᕐᒧᑦ ᑐᙵᕕᐅᔪᖅ ᐱᓯᒪᕗᑦ $22,000–ᒥ ᑐᓂᕐᕈᑎᒥᒃ ᐱᐅᓪᑯᓐᓂ ᐅᖃᓪᓚᓚᐅᖅᑕ ᓄᓇᓕᖕᓂ ᑮᓇᐅᔭᖃᖅᑎᑕᐅᓂᐅᔪᒥ ᐃᑲᔪᖅᓱᐃᓂᐅᔪᒥ ᐱᐅᔪᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓄᖕᓄᑦ ᒪᒃᑯᒃᑐᓄᑦ.
“ᐅᓇ ᐱᔪᓐᓇᖅᑎᑦᑎᕗᖅ ᐅᕙᑦᑎᓐᓂ ᐃᑲᔪᖅᓱᐃᓂᕐᒥ ᐊᔭᓕᒃ ᐱᓕᕆᐊᖑᔪᒥ ᑐᑭᖃᑦᑎᐊᖅᑐᒻᒪᕆᐊᓘᔪᒥ,” ᐅᖃᓚᐅᖅᐳᖅ ᐹᑐᕆᒃ ᕼᐊᓄᕆ, ᐃᒃᓯᕙᐅᑕᐅᔪᖅ ᐊᒻᒪ ᓇᓂᓯᔨᐅᔪᖅ ᑲᓇᑕᒥ ᖃᔭᖅᑐᕐᓂᕐᒧᑦ ᑐᙵᕕᐅᔪᒧᑦ.
ᐊᔭᓕᒃ ᐊᒻᒪ ᑲᓇᑕᒥ ᖃᔭᖅᑐᕐᓂᕐᒧᑦ ᑐᙵᕕᐅᔪᖅ ᐋᖅᑭᒃᓱᐃᓂᐊᖅᐳᑦ ᐱᖓᓱᓂ ᐊᖏᔪᓂ ᖃᔭᖅᑐᖅᑐᓂ ᐊᐅᓪᓛᕐᓂᐅᔪᓂ ᐸᕐᓇᒃᑕᐅᔪᒥ ᐊᐅᔭᐅᔪᒥ 2022–ᒥ ᐃᓄᖕᓄᑦ ᐅᑭᐅᓕᖕᓂ 14–ᒥ 17–ᒧᑦ.
ᐊᐅᔭᐅᔪᒥ 2021–ᒥ ᐊᔭᓕᒃ ᐃᑲᔪᓚᐅᖅᐳᑦ ᑮᓇᐅᔭᖃᖅᑎᑕᐅᓂᐅᔪᒥ ᖃᔭᖅᑐᖅᑐᓂ ᐊᐅᓪᓛᕐᓂᐅᔪᓂ ᒪᒃᑯᒃᑐᓄᑦ ᔭᓗᓇᐃᕝᒥ, ᑎᑭᑎᑦᑎᓪᓗᑎᒃ ᐃᓚᐅᔪᓂ ᓴᓪᓕᓂ, ᐃᖃᓗᒃᑑᑦᑎᐊᖅ, ᑕᓗᕐᔪᐊᖅ, ᑰᒑᕐᔪᒃ ᐊᒻᒪ ᖃᒪᓂᑦᑐᐊᕐᒥ.
$22,000 ᐱᓗᐊᖅᑐᒥ ᐃᑲᔪᖅᓱᐃᓂᐅᓂᐊᖅᐳᖅ ᑐᓂᓯᓂᐅᔪᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᓴᙱᓂᐅᔪᒥ ᐃᓱᒪᓕᕆᓂᐅᔪᒥ, ᓯᕗᓂᐊᓂ, ᐱᓕᕆᑎᓪᓗᒋᑦ ᐊᒻᒪ ᑭᖑᓂᐊᒍᑦ ᖃᔭᖅᑐᖅᑐᓂ ᐊᐅᓪᓛᕐᓂᐅᔪᓂ.
ᒪᕐᕉᒃ ᐅᑯᓇᓂ ᐊᐅᓪᓛᕐᓂᐅᔪᓂ ᐋᖅᑭᒃᓱᖅᑕᐅᓂᐊᖅᐳᑦ Jackpine Paddle–ᒥ ᔭᓗᓇᐃᕝᒥ ᐱᖓᔪᖓᑦ ᐊᖓᔪᒃᖠᐅᔪᓄᑦ ᐊᖑᑎᓅᓂᐊᖅᐳᖅ ᑎᒪᒐᒥ, ᐅᐊᖕᓇᒥ ᐋᓐᑎᐊᕆᐅᒥ. ᐊᑐᓂ ᐅᑯᓇᓂ ᐊᐅᓪᓛᕐᓂᐅᔪᓂ ᐱᓕᕆᓕᒪᔪᒥ ᓄᓇᐃᓐᓇᒥ ᐃᓅᓯᓕᕆᔨᐅᔪᒥ ᐃᓚᐅᖃᑕᐅᔪᖃᕐᓂᐊᖅᐳᖅ.
“ᐃᑲᔪᕐᓂᐊᖅᐳᖅ ᒪᒃᑯᒃᑐᓂ ᐱᓕᕆᓂᖓᓂ ᐊᑲᐅᙱᓕᐅᕈᑕᐅᔪᓂ ᓇᓗᓇᙱᑦᑐᒥ ᓴᖅᑭᓐᓂᐊᖅᑐᓄᑦ, ᐊᒃᓱᓪᓘᓐᓃᑦ ᐃᓚᖏᓐᓄᑦ, ᐊᒃᓱᕈᕐᓇᖅᑐᒥ ᐊᐅᓪᓛᕐᓂᐅᔪᒥ ᐆᒥᖓ ᐱᓕᕆᓂᐅᔪᒥ,” ᐅᖃᓚᐅᖅᐳᖅ ᑕᐃᕕᑦ ᐸᓕ, ᐊᑖᑕᒋᔭᐅᔪᖅ ᐃᐊᕆᒃ ᐊᔭᓕᒃ ᐸᓕᒥ, ᑖᔅᓱᒧᖓ ᐊᔭᓕᒃ ᑮᓇᐅᔭᖃᖅᑎᑕᐅᓂᐅᔪᒥ ᐊᑦᑎᖅᑕᐅᓯᒪᓂᖓᓂ.
ᐃᓅᓯᓕᕆᔨᐅᔪᖅ, ᐸᓕ ᐃᓚᒋᐊᖅᓯᕗᖅ, ᐃᑲᔪᕐᓂᐊᕆᕗᖅ ᒪᒃᑯᒃᑐᓂ ᐃᓚᖏᓐᓂ ᐊᒃᓱᕈᕈᑕᐅᔪᓂ ᓇᒃᓴᖅᑕᖏᓐᓂ ᐊᖏᕐᕋᖏᓐᓂ ᖄᖓᒍᑦ ᐊᒃᓱᕈᕈᑕᐅᔪᓂ ᐊᐅᓪᓚᖅᓯᒪᓂᐅᔪᒥ ᐊᖏᕐᕋᖓᓐᓂ.
“ᐱᐅᓪᑯᓐᓂ ᐅᖃᓪᓚᓚᐅᖅᑕ ᖁᕕᐊᑉᐳᑦ ᐃᑲᔪᕐᓂᕐᒧᑦ ᑲᓇᑕᒥ ᖃᔭᖅᑐᕐᓂᕐᒧᑦ ᑐᙵᕕᐅᔪᒥ ᐊᒻᒪᓗ ᐊᔭᓕᒃ ᑮᓇᐅᔭᖃᖅᑎᑕᐅᓂᐅᔪᒥ ᑐᓂᓯᓂᖏᓐᓂ ᐃᓄᖕᓂ ᒪᒃᑯᒃᑐᓂ ᓄᓇᕗᒻᒥ ᓯᓚᒥ ᐊᑐᓕᒪᓂᐅᔪᓂ ᐃᑲᔪᕐᓂᕐᒧᑦ ᐃᑲᔪᖅᓱᐃᓂᖏᓐᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᖃᓄᐃᙱᑦᑎᐊᕐᓂᐅᔪᒥ,” ᐅᖃᓚᐅᖅᐳᖅ ᒥᐊᕆ ᑏᑲᓐ, ᐃᒃᓯᕙᐅᑕᐅᔪᖅ ᐱᐅᓪᑯᓐᓂ ᐅᖃᓪᓚᓚᐅᖅᑕᒥ.
ᐃᑲᔪᖅᓱᐃᒃᑲᓐᓂᕐᓂᐅᔪᖅ ᐅᖓᓯᒃᑐᒧᐊᕈᔾᔨᓂᐊᖅᐳᖅ ᐊᔾᔨᒋᙱᑕᖓᓂ ᐱᓕᕆᓂᐅᔪᒥ ᐃᓄᖕᓄᑦ ᒪᒃᑯᒃᑐᓄᑦ ᓄᓇᕗᒻᒥ ᐅᖃᐅᓯᐅᓪᓗᓂ ᐋᖅᑭᒃᓱᐃᔨᐅᔪᓄᑦ.
“ᐅᒃᐱᕈᓱᒃᐳᒍᑦ ᐅᓇ ᐊᖏᓪᓗᓂ ᓯᕗᒻᒧᑦ ᐱᓕᕆᓂᐅᓂᖓᓂ ᐱᕙᓪᓕᐊᑎᑕᐅᓂᖓᓂ ᐱᓕᕆᐊᕆᔭᑦᑎᓐᓂ, ᐊᖏᔪᒥᒃ ᐊᔾᔨᒋᙱᓐᓂᖃᕐᓂᐅᔪᒥ ᐃᓅᓯᐅᔪᓂ ᒪᒃᑯᒃᑐᓂ ᓄᓇᕗᒻᒥᐅᓄᑦ,” ᐅᖃᓚᐅᖅᐳᖅ ᐸᓕ.
ᐃᐊᕆᒃ ᐊᔭᓕᒃ ᐸᓕ ᒪᒃᑯᒃᖢᓂ ᐃᓅᓪᓗᓂ ᐊᓕᐊᓇᐃᒋᔭᖃᖅᑐᒥ ᖃᔭᖅᑐᕐᓂᕐᒥ ᑭᓯᐊᓂ ᐊᐃᑦᑖᖑᒐᓗᐊᖅ ᐃᓅᔪᓐᓃᓚᐅᖅᑐᒥ ᐅᑭᐅᖃᖅᖢᓂ 19–ᓂ ᓴᖅᑭᑳᓪᓚᒃᑐᒥ ᐆᒻᒪᑎᐅᑉ ᒪᓕᑦᑎᒌᖅᑕᙱᓐᓂᖓᓂ. ᐅᓪᓗᒥ ᐊᔭᓕᒃ ᑮᓇᐅᔭᖃᖅᑎᑕᐅᓂᐅᔪᒥ ᐋᖅᑭᒃᓱᐃᓲᖑᕗᑦ ᓄᓇᒥ ᐊᐅᓪᓛᕐᓂᐅᔪᓂ ᐃᓄᖕᓄᑦ ᒪᒃᑯᒃᑐᓄᑦ, ᖃᓄᐃᓕᐅᕐᓂᖃᖅᖢᑎᒃ ᐃᓚᖃᖅᑐᒥ ᓇᖕᒪᒐᖅᖢᑎᒃ, ᖃᔭᖅᑐᕐᓂᕐᒥ, ᑎᒋᕋᕐᓂᕐᒥ ᐊᒻᒪ ᐊᓯᖏᓐᓂ ᐃᓕᖅᑯᓯᒧᑦ ᐃᓚᓕᐅᔾᔭᐅᓂᖓᓂ ᐱᓕᕆᐊᖑᔪᓂ ᐃᑲᔪᕐᓂᕐᒧᑦ ᒪᒃᑯᒃᑐᓂ ᑐᓂᔭᐅᓪᓗᑎᒃ ᐱᐅᔪᓂ ᐊᑐᕐᓂᑰᔪᓂ ᑕᐃᒪᐃᑦᑐᓄᑦ ᖃᓄᐃᓕᐅᕐᓂᐅᔪᓄᑦ.