ᑖᓂᐅᓪ ᐊᒻᒪ ᐃᕐᓂᖓ ᕼᐊᓐᑐᕐ ᖃᑉᓗᑦᓯᐊᖅ ᐊᓐᓄᕌᖅᑐᖅᑎᓪᓗᒋᑦ ᐊᕐᕕᐊᓄᑦ 2023 ᑎᐊᕆᓐᔅ ᑑᑑᒥ ᐃᖅᑲᐅᒪᓂᐅᔪᒥ ᕼᐋᑭᒥ ᓵᓚᖃᕋᓱᐊᕐᓂᐅᔪᒥ ᑲᖏᖅᖠᓂᕐᒥ ᑕᒪᑐᒪᓂ ᒫᔾᔨᐅᔪᒥ, ᑖᒃᑯᐊ ᐊᑐᖅᑐᐊᖃᑦᑕᐅᑎᑐᐃᓐᓇᓚᐅᙱᓚᑦ ᐊᓐᓄᕌᖏᑕ ᓇᓗᓇᐃᒃᑯᑕᖏᓐᓂ.
ᐊᕐᕌᓂᐅᓚᐅᖅᑐᒥ, ᖃᑉᓗᑦᓯᐊᖅ ᐃᓚᒌᑦ ᕿᓂᖅᓯᒪᓚᐅᖅᐳᑦ ᑕᖅᑐᒥ ᑐᓂᓯᔨᐅᓂᐊᖅᑐᒥ ᕼᐊᓐᑐᕐᒧᑦ, now 16. ᕼᐊᓐᑐᕐ ᐅᓇᑕᓚᐅᖅᐳᖅ ᐱᓕᕆᓂᐅᔪᒥ 4 ᑕᖅᑐᖓᓂ ᐋᓐᓂᐊᖃᕐᓂᐅᔪᒥ – ᒫᓐᓇ ᐱᓕᕆᓂᖅ 5−ᒦᓕᖅᖢᓂ –ᑕᖅᑐᖓ ᐊᐅᓚᑦᑎᓪᓗᓂ 16 ᐳᓴᓐᑎᑐᐃᓐᓇᕐᒥ. ᑕᖅᑐᖏᑦ ᐃᕐᕈᖅᓴᖅᑕᐅᓂᖅ ᐱᒋᐊᖅᐸᓪᓕᐊᑎᑕᐅᓂᐊᓚᐅᖅᐳᖅ ᑎᑭᐅᑎᒍᓂ 5 ᐳᓴᓐᑎᒧᑦ.
ᕼᐊᓐᑐᕐ ᓱᖅᑯᐃᖅᑕᐅᓚᐅᖅᐳᖅ ᓯᑎᐱᕆ 2020−ᒥ ᓯᕗᓪᓕᖅᓱᕈᑎᓂᒃ ᖃᐅᔨᓴᕐᓂᐅᔪᒥ ᑕᖅᑐᖓᓂ ᐋᓪᓂᐊᕐᓇᐅᔪᒥ ᑕᐃᔭᐅᔪᒥ juvenile nephronopthisis−ᖑᓂᕋᖅᑕᐅᔪᒥ. ᑕᒪᒃᑭᒐᓚᖕᒥ, ᐆᒪᔪᓐᓇᖅᓯᒪᕗᖅ ᑕᐃᒪᐃᒐᔪᖕᓂᐅᔪᒥ, ᓱᓕ ᐱᙳᐊᖅᖢᓂ ᕼᐋᑭᒥ ᐊᒻᒪ ᐊᖑᓇᓱᒃᐸᒃᖢᓂ, ᑭᓯᐊᓂ 10−ᓂ ᐄᔭᒐᕆᐊᖃᖅᐸᒃᖢᓂ ᐅᓪᓗᑕᒫᒥ ᐃᓅᓕᓴᕐᓂᖓᓂ ᖃᓄᐃᓐᓂᖓᓂ ᐊᒻᒪ ᐋᓐᓂᐊᓲᖑᕗᖅ ᐆᒻᒪᕆᖕᓂᑭᖦᖢᓂ ᑭᒡᓕᐅᔪᓂ ᐃᓛᓐᓂᒃᑯᑦ.
ᐃᓚᒌᖑᔪᑦ ᐃᓕᓯᓚᐅᖅᐳᑦ ᐃᓄᓕᒫᓄᑦ ᑐᒃᓯᕋᕐᓂᐅᔪᒥ ᐃᓄᖕᓄᑦ ᐊᑎᓕᐅᕆᖁᔭᐅᓪᓗᑎᒃ ᑕᖅᑐᒧᑦ ᑐᓂᓯᔨᐅᓂᖏᓐᓄᑦ, ᐱᓕᕆᓂᐅᔪᒥ ᐊᖏᖅᑕᐅᓂᕐᒧᑦ ᐊᑯᓂᐅᑎᒍᔪᓐᓇᕐᒪᑦ ᐊᕐᕌᒍᓕᒫᒧᑦ.
ᑖᓂᐅᓪ ᐊᐅᖕᒥ ᖃᓄᐃᑦᑑᓂᖓᓂ ᓇᓕᒧᓐᓂᖃᓚᐅᖅᐳᖅ, ᑭᓯᐊᓂ ᐊᑕᐅᓯᕐᒥ ᐊᑲᐅᙱᓕᐅᕈᑎᖃᖅᐳᖅ.
“ᖁᐃᓂᓗᐊᓚᐅᖅᐳᖓ,” ᐅᖃᓚᐅᖅᐳᖅ ᑖᓂᐅᓪ, 48, ᑕᐃᔅᓱᒪᓂ ᐅᖁᒪᐃᓐᓂᖃᓚᐅᖅᐳᖅ 274 ᐸᐅᓐᓂ. “ᐊᓱᐃᓛᒃ ᐃᖃᐃᓕᓴᕐᔪᐊᓚᐅᖅᐳᖓ ᐊᕐᕌᒍᓕᒫᒥ.”
ᓴᓗᒃᑎᓴᓚᐅᖅᐳᖅ 75 ᐸᐅᓐᓂ ᖄᖏᖅᓯᒪᔪᒥ ᐊᕐᕌᒎᓚᐅᖅᑐᒥ, ᑎᑭᐅᑎᓐᓗᓂ ᐊᑦᑎᖕᓂᖅᓴᐅᔪᒥ 200 ᐸᐅᓐᓄᑦ. ᑎᑭᐅᑎᓚᐅᖅᐸᖓ ᐃᖃᐃᓕᓴᕐᓂᒃᑯᑦ, ᓂᕆᔭᒥᓂ ᓇᐅᑦᑎᖅᓱᑦᑎᐊᕐᓂᖓᓂ ᐊᒻᒪ ᐃᑲᔪᖅᓱᐃᓂᐅᔪᒥ ᓄᓕᐊᖓᓂ ᕗᕌᓐᓰᓐᒥ.
ᐊᒻᒪ ᓇᓪᓕᐅᑎᑎᓪᓗᒍ ᖄᖏᖅᓯᒪᓕᖅᑐᒥ ᒫᔾᔨ 15−ᒥ, ᓯᕗᓪᓕᖅᐸᐅᔪᒥ ᐅᓪᓗᖓᓂ ᑎᐊᕆᓐᔅ ᑑᑑᒥ ᐃᖅᑲᐅᒪᓂᐅᔪᒥ ᕼᐋᑭᒥ ᓵᓚᖃᕋᓱᐊᕐᓂᐅᔪᒥ ᐃᒻᒥᓂᒃ ᐊᒻᒪ ᐃᕐᓂᖓ ᐊᓐᓄᕌᖅᑐᖅᐸᓪᓕᐊᑎᓪᓗᒋᑦ ᑕᐃᒃᑯᓄᖓᑦᑕᐃᓐᓇᖅ ᐱᙳᐊᖅᑎᐅᔪᓄᑦ, ᐃᓪᓚᕆᓚᐅᖅᐳᖅ, ᑭᖑᓪᓕᖅᐹᖑᔪᒥ ᐅᖃᐅᔾᔭᐅᓂᐅᔪᒥ ᓘᒃᑖᓂᑦ: ᐊᖏᑕᐅᓚᐅᖅᐳᖅ ᕼᐊᓐᑐᕐᒧᑦ ᑕᖅᑐᖓᓂ ᑐᓂᓯᔨᐅᔪᓐᓇᕐᓂᖓᓂ.
“ᖁᕕᐊᕐᒧᐊᖅᐳᖓ,” ᐅᖃᓚᐅᖅᐳᖅ ᑖᓂᐅᓪ. “ᐊᒃᓱᐊᓗᒃ ᖁᕕᐊᓱᕐᔪᐊᖅᐳᖓ ᐃᕐᓂᓐᓄᑦ. ᐅᕙᓐᓂ ᖃᓄᐃᒋᙱᓚᖓ, ᑭᓯᐊᓂ ᐃᕐᓂᕋ, ᑐᓂᓯᓂᕐᒥ ᑕᖅᑐᒥ ᐃᓅᓱᒃᑐᑐᐃᓐᓇᐅᔪᓐᓇᕐᓂᐊᕐᒪᑦ ᐄᓯᔭᕆᐊᖃᙱᓪᓗᓂ 10−ᓂ ᐄᔭᒐᓂ ᐅᓪᓗᕐᒥ ᐊᒻᒪ ᑕᐃᒪᓐᓇᒐᓚᒃ, ᖃᓄᐃᓕᐅᒃᑲᐅᑎᓪᓗᒍ ᐊᒻᒪ ᐊᒃᓱᕈᖅᖢᓂ ᕼᐋᑭᖅᑎᐅᓪᓗᓂ… ᐅᑕᖅᑭᔪᓐᓇᐃᓪᓕᕗᖓ ᐅᓇ ᐊᒃᓱᕈᕐᓇᖅᑐᖅ ᐊᓂᒍᕈᓂ.”
ᑖᓂᐅᓪ ᐅᖃᐅᔾᔨᒐᒥ ᕼᐊᓐᑐᕐᒥ ᑐᓴᒐᒃᓴᒥ, ᐃᓅᓱᒃᑑᑉ ᐆᒻᒪᕆᖕᓂᖓ ᐊᓯᔾᔨᓚᐅᖅᐳᖅ.
“ᑎᒥᖓᑕ ᑕᑯᒃᓴᐅᓂᖓ ᖁᕝᕙᕆᐊᓚᐅᖅᐳᖅ,” ᐅᖃᓚᐅᖅᐳᖅ ᑖᓂᐅᓪ. “ᑮᓇᖓ ᖁᕕᐊᓱᓛᑦᑎᐊᖑᓪᓗᓂ ᑕᑯᓚᐅᖅᓯᒪᔭᓐᓂ. ᐃᒡᓚᒐᓛᖕᓂᖓ, ᖁᖓᑦᑐᖅ, ᑮᓇᖓ ᖃᐅᒪᓪᓗᓂ. ᑕᐃᒪᓐᓇ ᑭᐅᓂᖃᓚᐅᖅᐳᖅ. ᑕᒪᓐᓇ, ᐃᓱᒪᕗᖓ, ᓴᖑᕝᕕᒋᓂᕆᓚᐅᖅᐸᖓ ᐊᒃᓱᕈᖅᖢᓂ ᐃᖃᐃᓕᓴᕐᓂᖓᓂ. ᐱᓂᖃᑦᑎᐊᓚᐅᖅᐳᖅ.”
ᑐᓂᔭᐅᓂᐅᔪᒥ ᐋᖅᑭᒃᑕᐅᓯᒪᕗᖅ ᔫᓂ 22−ᒧᑦ. ᑖᓂᐅᓪ ᖃᔅᓯᒐᓚᖕᓂ ᐱᓇᓱᐊᕈᓯᕐᓂ ᐋᓐᓂᐊᕕᖕᒦᓐᓂᐊᖅᐳᖅ, ᕼᐊᓐᑐᕐ ᐋᓐᓂᐊᕕᖕᒦᑦᑐᕐᓇᖅᖢᓂ ᑕᖅᑭᓄᑦ ᐱᖓᓱᓄᑦ. ᖃᖓᐅᓂᖓᓂ ᐱᐅᓂᖅᓴᐅᔪᓐᓇᙱᓚᖅ, ᐅᖃᓚᐅᖅᐳᖅ ᑖᓂᐅᓪ, ᐊᖑᓇᓱᖕᓂᕐᒥ ᐊᕐᕌᒎᑉ ᐃᓚᖓᓐᓂ ᐱᐅᑦᑎᐊᙱᒻᒪᑦ ᐊᐅᔭᐅᔪᒃᑯᑦ ᐊᒻᒪ ᕼᐊᓐᑐᕐ ᐅᑎᓪᓗᐊᖅᐳᖅ ᓈᒻᒪᒃᓯᑦᑎᐊᖅᑎᓪᓗᒍ ᐊᖑᓇᓱᑦᑎᐊᕐᓂᕐᒧᑦ ᐊᒻᒪ ᕼᐋᑭᒧᑦ.
ᑖᓂᐅᓪ ᐅᖃᓚᐅᖅᐳᖅ ᑕᒪᒃᑭᓂ ᐱᓕᕆᖃᓚᐅᖅᐳᖅ ᓇᒡᓕᒍᓱᖕᓂᖓᓂ ᐃᕐᓂᖓᓂ
“ᐱᔪᒪᓂᖃᑦᑎᐊᓚᐅᖅᐳᖓ,”ᐅᖃᓚᐅᖅᐳᖅ. “ᐊᒃᓱᕈᕐᔪᐊᕐᓂᐅᔪᒥ, ᐱᓱᑲᑕᕐᔪᐊᕐᓂᐅᔪᒥ. ᐊᒃᓱᕈᕐᓇᖅᐸᒃᖢᓂ ᐃᓛᓐᓂᒃᑯᑦ ᐃᓱᒪᒧᑦ, ᑭᓯᐊᓂ ᐃᕐᓂᕋ ᓇᒡᓕᒋᓗᐊᒧᑦ ᐅᕙᓐᓂ ᐊᔭᐅᕇᓐᓇᓚᐅᖅᐳᖓ, ᐊᒻᒪ ᒫᓐᓇ ᐱᓕᕆᑦᑎᐊᕐᓂᐅᕗᖅ.”
ᐊᓯᖏᓐᓄᑦ ᐊᖓᒧᖅᑳᖑᔪᓄᑦ ᐅᕝᕙᓘᓐᓃᑦ ᐃᓚᒋᔭᐅᔪᓄᑦ ᐊᔾᔨᐸᓗᐊᓂ ᖃᓄᐃᓐᓂᐅᔪᓂ, ᑖᓂᐅᓪ ᐃᒪᐃᖁᔨᓇᔭᖅᐳᖅ ᓴᙱᓂᐅᔪᒥ ᑐᒃᓯᐊᕐᓂᕐᒥ ᐊᒻᒪ ᖃᐅᔨᒪᓂᕐᒥ ᑭᓱᑐᐃᓐᓇᑦᑎᐊᖅ ᐱᔪᓐᓇᕐᓂᖓᓂ ᐃᓱᒪᐃᑦ ᐊᒻᒪ ᐆᒻᒪᑏᑦ ᐃᓱᓕᐅᕈᑎᒋᒍᕕᒋᑦ.
ᐃᓱᒪᒋᓇᒍ ᑕᖅᑐᖓᓂ ᐊᑲᐅᙱᓕᐅᕈᑕᐅᔪᓂ – ᐊᒻᒪ ᑖᓂᐅᓪ ᐱᓪᓗᐃᓂᖓᓂ ᑐᐃᖓᓂ ᕼᐋᑭᒥ ᓵᓚᖃᕋᓱᐊᕐᓂᐅᔪᒥ – ᐊᕐᕕᐊᑦ ᐱᓚᐅᖅᐳᑦ ᖃᑯᓪᓕᕐᒥ B ᐊᕕᒃᑐᖅᓯᒪᓂᐅᔪᒥ 2023−ᒥ ᑎᐊᕆᓐᔅ ᑑᑑ ᐃᖅᑲᐅᒪᓂᐅᔪᒥ.
“ᖁᕕᐊᑉᐳᖓ ᐱᙳᐊᖃᑎᒋᒃᑲᓐᓂᓛᕐᓂᓐᓂ ᓯᕗᓂᒃᓴᒥ,” ᐅᖃᓚᐅᖅᐳᖅ ᑖᓂᐅᓪ.