ᔨᓂ ᒋᐸᓐᔅ ᐅᖃᐅᓯᖃᓚᐅᖅᑐᖅ ᒫᓐᓇᓵᖑᓯᒪᔪᕈᖅ ᐊᒃᓱᕈᕐᓇᖃᑦᑕᓚᐅᕐᒪᑦ.
ᐃᒡᓗᓕᕆᓂᒃᑯᑦ ᐊᒃᓱᕈᕐᓇᖅᑐᒃᑰᕐᓂᖅ ᐱᒻᒪᕆᐊᓗᒃ ᐃᖕᒥᓄᑦ – ᐅᖃᓘᑎᒨᑲᐅᑎᒋᔪᓐᓇᕐᓇᓂ – ᑭᓯᐊᓂ ᐊᔭᐅᖅᑐᐃᓯᒪᔪᖅ ᒪᑐᐃᖅᓯᖁᔨᑉᓗᓂ ᓄᑖᒥᒃ ᐊᖏᕐᕋᖃᙱᑦᑐᓄᑦ ᐃᒡᓗᒃᓴᒥᒃ ᐊᕐᕕᐊᓂ.
ᒋᐸᓐᔅ ᐅᖃᖅᖢᓂ ᐃᖕᒥᓂᒃ ᖃᐅᔨᓯᒪᔭᒥᒍᑦ ᐃᒡᓗᓕᕆᓂᒃᑯᑦ ᐊᒃᓱᕈᕐᓇᖃᑦᑕᕐᓂᖓ ᐃᑲᔪᕈᒪᓕᓚᐅᖅᑐᖅ ᐃᓅᖃᑎᒥᓂᒃ.
“ᓇᒧᙵᐅᕝᕕᒃᓴᖃᓚᐅᙱᓐᓇᒪ,” ᑕᐃᒪᓐᓇ ᐅᖃᖅᖢᓂ ᐃᒡᓗᓕᕆᓂᒃᑯᑦ ᖃᓄᐃᑦᑐᒃᑰᓚᐅᕐᓂᕐᒥᓄᑦ ᖃᑉᓯᐅᓕᖅᑐᑦ ᐅᑭᐅᑦ ᑕᐃᑉᓱᒪᓂ. ᓵᙵᓕᓚᐅᖅᑐᖅ ᐃᓄᓕᕆᔨᒃᑯᓐᓄᑦ “ᑭᓯᐊᓂ ᐅᕙᑉᑎᓐᓄᑦ ᐅᖃᑐᐃᓐᓇᓚᐅᖅᑐᑦ ᐃᓂᒃᓯᖃᙱᓐᓂᕋᖅᖢᖓ ᓇᒧᙵᐅᕝᕕᒃᓴᒻᓂᒃ ᕿᓂᖅᑎᓪᓗᖓ,” ᑕᐃᒪᓐᓇ ᐅᖃᖅᖢᓂ. “ᑕᐃᒪᐃᑦᑐᒃᑰᖅᑎᓪᓗᖓ, ᑕᑯᖃᑦᑕᓕᓚᐅᖅᑐᖓ ᐃᓅᖃᑎᒃᑲᓂᒃ ᑕᐃᒪᐃᑦᑐᒃᑰᖃᑕᐅᔪᓂᒃ ᑕᒪᓐᓇ ᐋᓐᓂᕈᑎᒋᓚᐅᖅᑕᕋ ᖃᐅᔨᒪᔪᖓᓗ ᖃᓄᖅ ᐃᒃᐱᖕᓇᕐᒪᖔᑦ.”
“ᐃᓱᒪᓕᓚᐅᖅᑐᖓ ᐃᒡᓗᖁᑎᑖᕆᐊᖃᕐᓂᖏᓐᓄᑦ ᐊᖏᕐᕋᖃᙱᑦᑐᑦ ᓄᓇᑉᑎᓐᓂᒃ,” ᑕᐃᒪᓐᓇ ᐅᖃᒃᑲᓐᓂᖅᖢᓂ.
2019-ᒥ, ᐃᓚᐅᖃᑕᐅᓚᐅᖅᑐᖅ ᐱᔫᒥᓵᖅᑎᑦᑎᔪᓂᒃ ᓄᓇᕗᒥ, ᓇᖕᒥᓂᖃᕐᓂᕐᒧᑦ ᓯᕗᓕᖅᑎᒃᓴᓂᒃ ᐊᒻᒪᓗ ᓴᓇᓂᕐᒧᑦ ᐃᑲᔫᑎᒃᓴᖅ.
ᐃᓱᒪᒃᓴᖅᓯᐅᕈᑎᖃᖅᑳᖅᖢᖓ ᓱᓇᒥᒃ ᓇᖕᒥᓂᖅᑖᕈᒪᓇᔭᕐᓂᒻᓄᑦ, ᓄᔭᓕᕆᔨᐅᓂᕐᒥᒃ ᐱᙳᐊᖅᑐᓕᕆᔨᐅᓂᕐᒧᑦ, ᒋᐱᓐᔅ ᐃᓱᒪᓕᐅᓕᓚᐅᖅᑐᖅ ᐊᖏᕐᕋᖃᙱᑦᑐᖅ ᐃᒡᓗᑖᕈᓐᓇᖁᑉᓗᒋᑦ ᓇᔪᖅᑕᐅᓚᐅᐱᓪᓚᖃᑦᑕᕋᔭᖅᑐᒥᒃ ᓄᓇᖓᓂᒃ ᑲᒪᒋᔭᐅᔪᓐᓇᖁᑉᓗᒍ ᐃᓅᖃᑎᒌᑦ ᐃᖢᐊᖏᓕᐅᕈᑎᖃᖃᑦᑕᕐᓂᖏᓐᓄᑦ.
ᐅᑉᓗᒥ, ᐸᕐᓇᐃᔩᑦ ᑕᑯᒋᐊᖅᓯᒪᓕᖅᑐᑦ ᑮᓇᐅᔭᓂᒃ ᑮᓇᐅᔭᖅᑖᕐᕕᐅᔪᓐᓇᕋᔭᖅᑐᓂᒃ ᐊᒻᒪᓗ ᑮᓇᐅᔾᔭᒃᓴᕈᑎᒃᓴᓂᒃ ᐃᑲᔫᑎᒃᓴᒧᑦ ᐱᑕᖃᓕᕈᓐᓇᖁᑉᓗᒍ ᐃᒡᓗᒥᒃ ᐊᖏᕐᕋᖃᙱᑦᑐᓄᑦ ᐊᑐᖅᑕᐅᖃᑦᑕᕋᔭᖅᑐᒥᒃ ᓄᓇᖓᓂ.
ᒋᐸᓐᔅ ᐅᖃᖅᖢᓂ ᓕᓐᓯ ᑐᕐᓄᕐ, ᑐᑭᒧᐊᒃᑎᑦᑎᔨᒋᔭᐅᔪᖅ ᐊᔪᖅᓴᕈᓐᓃᖅᑎᑦᑎᓇᓱᖕᓂᕐᒧᑦ ᓄᓇᕗᒥ ᐃᓄᓕᕆᔨᒃᑯᑎᒍᑦ, ᓴᓇᖃᑎᖏᓪᓗ ᐃᑲᔪᖅᑐᑦ ᐸᕐᓇᐃᓂᕐᒧᑦ ᐊᒻᒪᓗ ᐃᑲᔪᖅᑐᐃᓂᕐᒧᑦ ᐱᓕᕆᐊᖑᖅᑳᕆᐊᓕᖕᓂᒃ.
“ᐱᓕᕆᐊᖑᓇᓱᒃᑐᖅ ᑕᐅᑐᒃᑕᒃᑯᑦ ᒫᓐᓇᐅᔪᖅ, ᐱᒋᐊᖅᐸᓪᓕᐊᓕᓵᖅᑐᖅ.” ᑕᐃᒪᓐᓇ ᐅᖃᖅᖢᓂ ᐊᒪᓐᑕ Hᐊᓐᓴᓐ ᒪᐃᓐ. “ᐱᓕᕆᕙᓪᓕᐊᓕᓵᖅᑐᒍᑦ ᐊᒻᒪᓗ ᓴᖅᑭᑎᑦᑎᓇᓱᒃᖢᑕ ᑲᑎᒪᔨᒃᓴᓂᒃ ᑕᐃᒪᓕ ᑮᓇᐅᔭᖅᑖᕋᓱᓕᕋᔭᖅᑐᒍᑦ, ᐊᐃᑦᑖᖑᒐᓗᐊᖅ ᑕᒪᓐᓇ ᐊᑯᓂ ᑲᒪᒋᓇᔭᖅᑕᒃᓴᕆᒐᑉᑎᒍᑦ.”
“ᓱᓇᑕᖃᙱᒻᒪᑦ ᐊᕐᕕᐊᓂ ᒫᓐᓇᐅᔪᖅ,” ᑕᐃᒪᓐᓇ ᐅᖃᒃᑲᓐᓂᖅᖢᓂ. “ᓄᓇᓕᖕᓂᒃ ᐱᖓᓱᒋᔭᐅᑉᓗᑕ ᐃᓄᒋᐊᖕᓂᖅᐹᖑᖃᑕᐅᔪᒍᑦ ᓄᓇᕗᒥ, ᐊᒻᒪᓗ ᐊᖏᕐᕋᖃᙱᑦᑐᓄᑦ ᐃᒡᓗᖁᑎᖃᙱᑦᑐᒍᑦ. ᑭᓯᐊᓂ ᐊᒥᓱᑦ ᐱᔫᒥᒍᓱᓕᐊᓂᒃᑐᑦ ᑲᑎᒪᔨᐅᖃᑕᐅᔪᒪᓂᕐᒧᑦ ᓄᓇᑉᑎᓐᓂᒃ.”
ᐃᒡᓗᒃᓴᕆᔭᐅᓇᔭᖅᑑᑦ ᐃᓂᒃᓴᖓ ᐱᔾᔪᑎᒋᑉᓗᒍ, Hᐊᓐᓴᓐ ᒪᐃᓐ ᐅᖃᖅᖢᓂ “ᐱᑕᖃᓗᐊᕌᓗᙱᑦᑐᖅ ᐊᕐᕕᐊᓂ ᐃᒡᓗᕐᔪᐊᓕᐅᕐᕕᐅᓇᔭᖅᑐᒥᒃ ᑕᐃᒪᐃᑦᑐᒧᑦ ᐊᖏᕐᕋᒃᓴᕆᔭᐅᓇᔭᖅᑐᒧᑦ.”
“ᑕᐃᒪᑐᖅ, ᑮᓇᐅᔭᖅᑕᖃᕐᓂᐊᖅᐳᖅ ᐃᑲᔫᑕᐅᔪᓐᓇᖅᑐᒥᒃ ᓇᑉᐸᖅᑎᕆᓇᔭᕐᓂᕐᒧᑦ ᓄᑖᒥᒃ,” ᑕᐃᒪᓐᓇ ᐅᖃᖅᖢᓂ. “ᐊᓕᐊᓇᐃᑦᑐᖅ ᐃᓱᒪᑉᓗᓂ ᑕᐃᒪᐃᑦᑐᖃᓕᕈᓐᓇᕋᔭᕐᓂᑉᑎᓐᓄᑦ.”
ᐊᕐᕕᐊᕐᒥᐅᑕᐅᓕᖅᖢᓂ ᐊᕐᕕᓂᓕᖕᓂᒃ ᐅᑭᐅᓂᒃ, Hᐊᓐᓴᓐ ᒪᐃᓐ ᓴᓇᔪᖅ ᐊᕙᑎᓕᕆᓂᒃᑯᑦ ᖃᐅᔨᓴᖅᑎᐅᓂᕐᒧᑦ ᐊᒻᒪᓗ ᐃᓄᖕᓂᒃ ᐃᓅᖃᑎᒌᒃᑎᑦᑎᓂᕐᒧᑦ, “ᐊᒃᑐᐊᓂᖃᓗᐊᙱᑦᑐᖅ ᑕᒪᓐᓇ ᐊᖏᕐᕋᖃᙱᑦᑐᓂᒃ ᐃᒡᓗᑖᖅᑎᑦᑎᓇᔭᕐᓂᕐᒧᑦ ᐃᓅᖃᑎᒌᒃᑐᓕᕆᓂᕐᒧᓪᓗ” ᑭᓯᐊᓂ ᑕᐃᒪᐃᒃᑲᓗᐊᖅᑎᓪᓗᒍ ᐃᓱᒪᔪᖅ ᑕᒪᓐᓇ ᐱᒻᒪᕆᐅᓂᖓᓄᑦ ᐃᒪᐃᒻᒪᑦ “ᐃᓄᓕᕆᙱᓗᐊᕐᒪᑕ” ᓄᓇᕗᒥ, ᑕᐃᒪᓐᓇ ᐅᖃᖅᖢᓂ. “ᔨᓂ (ᒋᐸᓐᔅ) ᐅᕙᖓᓗ ᑲᑎᓚᐅᖅᑎᓪᓗᓄᒃ, ᓇᓗᓇᐃᔭᐃᓚᐅᖅᑐᒍᒃ ᑕᒪᑐᒥᙵ ᐱᓕᕆᐊᖃᕈᒪᓂᕋᖅᖢᓄᒃ ᐃᓱᒪᒋᑉᓗᒋᑦ ᐃᓄᐃᑦ ᐊᖏᕐᕋᖃᙱᑦᑐᑦ ᐅᕝᕙᓘᓐᓃᑦ ᐃᓚᒋᔭᖏᓐᓂᒃ ᐱᑦᑎᐊᖅᑕᐅᓯᒪᙱᑦᑐᑦ ᓇᒧᙵᐅᕝᕕᒃᓴᖃᕈᓐᓇᐃᓪᓕᔪᑦ,” ᑕᐃᒪᓐᓇ ᐅᖃᖅᖢᓂ.
ᐊᖏᕐᕋᖃᖃᑦᑕᙱᓐᓂᖅ ᐃᖢᐊᖏᓕᐅᕈᑕᐅᙱᓐᓇᖅᑐᖅ ᓄᓇᕗᒥ
2018-ᒥ, ᓄᓇᕗᑦ ᒐᕙᒪᒃᑯᖏᑦᑕ ᐃᓄᓕᕆᔨᒃᑯᖏᑦ ᓴᖅᑭᑎᑦᑎᓚᐅᖅᑐᑦ ᓄᓇᕗᒥ ᐃᔨᖅᑕᐅᓯᒪᔪᑦ ᐊᖏᕐᕋᖃᙱᑦᑐᓄᑦ ᖃᐅᔨᓴᕈᑎᕕᓂᖅ ᐊᒻᒪᓗ ᓇᓂᓯᑉᓗᑎᒃ 400 ᐅᖓᑖᓂ ᐃᓄᖕᓂᒃ ᐊᕐᕕᐊᓂ, ᐅᖅᓱᖅᑑᕐᒥ, ᒥᑦᑎᒪᑕᓕᖕᒥ ᐊᒻᒪᓗ ᑲᖏᖅᖢᒑᐱᖕᒥ ᐊᒃᓱᕈᕐᓇᖅᑐᒃᑰᖅᑐᓂᒃ ᐃᒡᓗᓕᕆᓂᒃᑯᑦ.
ᑖᑉᑯᓇᙵᑦ ᓈᓴᐅᑎᓂᒃ, 146 ᐊᕐᕕᐊᓃᓚᐅᖅᑐᑦ.
ᓄᓇᖅᑲᑎᒋᔭᐅᔪᑦ ᓇᒧᙵᐅᕝᕕᒃᓴᖃᙱᑦᑐᑦ ᓵᒐᔪᒃᑐᑦ “ᐃᓚᓐᓈᕐᒥᓄᑦ, ᖃᑕᙳᑎᒥᓄᑦ ᐊᒻᒪᓗ ᐃᓚᒥᓄᑦ. ᑭᓯᐊᓂ ᓴᓇᔭᐅᓯᒪᔪᖃᖅᐸᑦ – ᐃᑲᔪᕆᐊᖅᑕᐅᕝᕕᖃᖅᑐᒥᒃ – ᐃᓄᖕᓄᑦ ᐊᒃᓱᕈᕐᓇᖅᑐᒃᑰᖅᑐᓄᑦ ᐱᑕᖃᕆᐊᓕᒃ,” ᑕᐃᒪᓐᓇ ᐅᖃᖅᖢᓂ Hᐊᓐᓴᓐ ᒪᐃᓐ.
ᓄᕙᒡᔪᐊᕐᓂᖅ ᓇᓗᓇᐃᖅᓯᓚᐅᖅᑐᖅ ᓄᓇᓕᖕᒥ ᐱᔨᑦᓯᕋᐅᑎᑕᖃᑦᑎᐊᙱᓐᓂᖓᓄᑦ ᐊᖏᕐᕋᖃᙱᑦᑐᑦ ᐱᔾᔪᑎᒋᑉᓗᒋᑦ, ᑕᐃᒪᓐᓇ ᐅᖃᖅᖢᓂ Hᐊᓐᓴᓐ ᒪᐃᓐ.
“ᓄᕙᒡᔪᐊᕐᓂᖅᑕᖃᖅᑎᓪᓗᒍ, ᐃᓚᒌᑦ ᐋᓐᓂᖅᑎᕈᑎᖃᑦᑕᕐᓂᖏᑦ ᐊᒃᓱᕈᕐᓇᖅᑐᒃᑰᖅᑐᓪᓗ ᐃᓱᒪᒃᑯᑦ ᐃᓚᕚᓪᓕᖅᓯᒪᓕᖅᑐᑦ,” ᑕᐃᒪᓐᓇ ᐅᖃᖅᖢᓂ. “ᐃᓄᐃᓪᓗ ᓇᒧᙵᐅᕝᕕᒃᓴᖃᙱᑎᓪᓗᒋᑦ ᐊᒃᓱᕈᕐᓇᖅᑐᒃᑯᑦ ᐱᒻᒪᕆᐊᓗᒃᑯᑦ ᑭᒡᓕᖃᖅᑎᑦᑎᔪᖅ.”
“ᑕᐃᒪᓕ, ᐊᒃᑐᖅᑕᐅᓂᖅᐹᖑᓯᒪᓕᓲᑦ ᓄᑕᖅᑲᑦ,” ᑕᐃᒪᓐᓇ ᐅᖃᒃᑲᓐᓂᖅᖢᓂ. “ᐃᒪᓐᓇᐃᒃᑲᓗᐊᖅᐸᑦ ᓄᑕᕋᐃᑦ ᐃᒡᓗᒦᖃᑕᐅᒃᐸᑦ ᐃᓄᒋᐊᓗᐊᖅᑐᒥ, ᐅᕝᕙᓘᓐᓃᑦ ᓄᑕᕋᖅ ᐊᖓᔪᖅᑳᒥᓃᑉᐸᑦ ᐊᖏᕐᕋᖃᙱᑦᑐᒥᒃ ᐊᒻᒪᓗ ᓅᑲᑕᖃᑦᑕᖅᐸᑕ ᐃᒡᓗᒋᔭᐅᔪᓄᑦ, ᑕᐃᒪᓐᓇ ᑐᙵᕝᕕᖃᑦᑎᐊᙱᓐᓂᖅ ᐃᓱᒪᒃᑯᑦ ᐊᒃᓱᕈᕐᓇᖅᑐᒃᑰᕈᑕᐅᓕᓲᖅ ᐃᓄᖕᓄᑦ ᖃᑕᙳᑎᒌᖕᓄᓪᓗ.”