ᐸᐅᓕ ᐱᓱᒃ ᐅᓗᓕᐅᖃᑦᑕᓚᐅᖅᓯᒪᔪᖅ ᓄᑕᕋᐅᑉᓗᓂ ᐊᒻᒪᓗ ᓂᐅᕕᐊᒃᓴᕆᖃᑦᑕᖅᖢᓂᒋᑦ ᓴᓇᖑᐊᕐᕕᖕᒧᑦ ᑲᖏᖅᖠᓂᕐᒥ $5-ᒧᑦ.
“ᖁᕕᐊᓱᑐᐃᓐᓇᖃᑦᑕᓚᐅᖅᑐᖓ ᐊᓈᓇᒐᓅᖅᖢᒍᓗ,” ᑕᐃᒪᓐᓇ ᐅᖃᖅᖢᓂ.
ᐊᑐᓂ ᐅᓗᐃᑦ ᓴᓇᖃᑦᑕᓚᐅᖅᑕᖏᑦ ᓯᑕᒪᓂᒃ ᐅᑉᓗᓂᒃ. ᐅᑉᓗᒥ, ᒥᑭᔪᒥᒃ ᐅᓗᓕᐅᕈᓐᓇᖅᓯᔪᖅ ᒪᕐᕉᖕᓂᒃ ᐃᑲᕐᕋᓂᒃ.
ᓴᓇᖃᑎᖃᓚᐅᖅᑐᖅ ᐃᓐᓇᑐᖃᕐᒥᒃ ᔮᒃ ᖃᕝᕕᑦᑐᕐᒥᒃ ᐃᓕᓐᓂᐊᖅᑎᑦᑎᑉᓗᑎᒃ ᐊᖑᑎᓂᒃ ᐅᓗᓕᐅᕐᓂᕐᒥᒃ ᑲᖏᖅᖠᓂᕐᒥ, ᑕᒪᓐᓇ ᐱᒋᐊᖅᑎᑕᐅᓚᐅᖅᑐᖅ ᐃᓕᓐᓂᐊᕈᑎᒃᓴᖅ ᑯᕆᔅᑎᓐ ᐱᐊᔅᒧᑦ, ᓄᓇᓕᖕᒥ ᐃᓱᒪᓕᕆᓂᕐᒧᑦ ᑲᒪᔨ.
“ᐃᑲᔪᕈᒪᒃᑲᐅᒐᒪ ᒪᒃᑯᒃᑐᓂᒃ,” ᑕᐃᒪᓐᓇ ᐅᖃᖅᖢᓂ ᐱᓱᒃ, ᐅᖃᖅᖢᓂᓗ ᑕᒪᓐᓇ ᐊᓕᐊᓇᐃᑦᑑᖕᒪᑦ ᐊᖏᕐᕋᐅᒪᔭᕆᐊᖃᕐᓇᖅᓯᒪᑉᓗᓂ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ ᐅᕝᕙᓘᓐᓃᑦ ᐊᓯᖏᑦ ᐱᔾᔪᑎᒋᑉᓗᒋᑦ. “ᐃᓕᑦᑎᐊᓚᔪᐊᓗᐃᑦ.”
ᐱᖓᓲᓕᖓᔪᒃᑯᑦ ᐊᕕᒃᑐᖅᓯᒪᔪᑦ ᐃᓕᓐᓂᐊᕈᓐᓇᖅᑎᑕᐅᓚᐅᖅᑐᑦ, ᐊᒥᓱᒻᒪᕆᐊᓗᐃᑦ ᐆᒃᑐᓚᐅᖅᖢᑎᒃ ᐊᒥᓲᓗᐊᓚᐅᖅᑐᓪᓘᓐᓃᑦ.
ᐃᓕᓐᓂᐊᕆᐊᓚᐅᖅᑎᓪᓗᒋᑦ ᕕᕗᐊᕆ 16-ᒥ ᓯᕗᓪᓕᖅᐹᒥ ᐱᐊᔅ ᑲᔪᓯᑎᑦᑎᔪᓐᓇᖅᓯᓚᐅᖅᑐᖅ ᐊᖑᑎᓄᑦ ᐃᓕᓐᓂᐊᕈᑎᒃᓴᒥᒃ ᑲᖏᖅᖠᓂᕐᒥ.
“ᑕᒪᓐᓇ ᑭᖑᓪᓕᖅᐹᖑᔾᔮᕈᓐᓃᖅᑐᖅ,” ᑕᐃᒪᓐᓇ ᐅᖃᖅᖢᓂ ᐊᒥᓱᑦ ᐆᒃᑐᓚᐅᕐᓂᖏᓐᓄᑦ.
ᐅᖃᒃᑲᓐᓂᖅᖢᓂᓗ ᑕᒪᓐᓇ ᐱᒻᒪᕆᐊᓘᓚᐅᕐᒪᑦ ᐊᖑᑎᓄᑦ ᑲᑎᖃᑎᖃᕈᓐᓇᖁᑉᓗᒋᑦ ᐊᓯᖏᓐᓂᒃ ᐊᖑᑎᓂᒃ, ᐃᓕᑦᑎᔪᓐᓇᖁᑉᓗᒋᑦ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᖃᑦᑕᖅᓯᒪᔪᓂᒃ ᐊᒻᒪᓗ ᑲᑎᖃᑎᖃᕈᓐᓇᖁᑉᓗᒋᑦ ᐃᓐᓇᑐᖃᕐᓂᒃ ᐊᒻᒪᓗ ᓄᓇᖅᑲᑎᖏᓐᓂᒃ.
“ᐅᖃᖃᑦᑕᕐᒪᑕ ᓄᓕᐊᕆᔭᖅ ᖁᕕᐊᓱᒃᑎᖃᑦᑕᕈᖕᓂ ᐃᓅᓯᖃᑦᑎᐊᕐᓇᕐᒪᑦ,” ᑕᐃᒪᓐᓇ ᐅᖃᖅᖢᓂ ᐱᐊᔅ. “ᑕᐃᒪᓐᓇᑦᑕᐅᖅ ᐅᖃᕈᓐᓇᖅᑰᖅᑐᒍᑦ – ᐊᖑᑎ ᖁᕕᐊᓱᒃᐸᑦ ᐃᓅᑦᑎᐊᕐᓂᐊᕐᒪᑦ. ᑕᒪᐃᓐᓄᑦ ᑐᕌᖓᔪᖅ.”
ᐊᖑᑎᑦ ᐃᑲᔫᑎᓂᒃ ᓴᖅᑭᕝᕕᐅᒐᔪᙱᒻᒪᑕ, ᑕᐃᒪᓐᓇ ᐅᖃᒃᑲᓐᓂᖅᖢᓂ, ᐅᖃᖅᖢᓂ ᐅᓗᓕᐅᕐᓂᕐᒥᒃ ᐃᓕᓐᓂᐊᕈᑎᒥᒃ ᑲᔪᓯᑎᑦᑎᓚᐅᕐᒪᑦ ᐅᓐᓄᒃᑯᑦ ᐃᓱᒪᒋᑉᓗᒋᑦ ᑕᐃᑉᑯᐊ ᓴᓇᖃᑦᑕᖅᑐᑦ ᐅᑉᓗᒃᑯᑦ.
“ᒫᓐᓇᐅᔪᖅ ᖃᐅᔨᒪᒍᑎᓕᕆᐊᖃᕐᒪᑕ, ᐱᓕᕆᖃᑎᒌᒡᓗᑎᒃ ᐊᒻᒪᓗ ᐃᓕᑦᑎᓗᑎᒃ ᐃᓅᖄᑎᒥᓂᒃ,” ᑕᐃᒪᓐᓇ ᐅᖃᖅᖢᓂ ᐱᐊᔅ.
ᖃᐅᔨᒪᔨᒥᒃ ᐃᓕᑦᑎᔪᓐᓇᖅᓯᓚᐅᖅᑐᑦ ᐃᓐᓇᑐᖃᕐᒥᒃ ᔮᒃ ᖃᕝᕕᑦᑐᕐᒥ. ᐅᖃᓪᓚᒃᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᑐᓵᔨᖃᖅᖢᓂ ᐅᖃᓚᐅᖅᑐᖅ ᐊᓕᐊᓇᐃᒍᓱᖕᒪᑦ ᐃᓕᓐᓂᐊᖅᑎᑦᑎᑉᓗᓂ ᐊᒻᒪᓗ ᐱᓕᕆᖃᑎᖃᖅᖢᓂ ᒪᒃᑯᒃᑐᓂᒃ.
ᒪᒃᑯᒃᑲᓐᓂᖅᖢᓂ, ᐱᓕᕆᖃᑎᖃᕐᓂᖅ ᐃᓐᓇᐅᔪᓂᒃ ᐊᔪᕐᓇᖃᑦᑕᓚᐅᙱᒻᒪᑦ, ᑭᓯᐊᓂᓕ ᒫᓐᓇᐅᔪᖅ ᓇᓂᓯᔪᓐᓇᐃᓪᓕᓐᓇᖅᑐᒃᓴᐅᔪᖅ ᐃᓕᓐᓂᐊᖅᑎᑦᑎᔨᒃᓴᓂᒃ, ᑕᐃᒪᓐᓇ ᐅᖃᒃᑲᓐᓂᖅᖢᓂ ᖃᕝᕕᑦᑐᖅ.
ᐱᐊᔅ ᖁᔭᓐᓇᒦᓚᐅᖅᑐᖅ ᐃᑲᔪᓚᐅᖅᑐᓂᒃ ᐃᓕᓐᓂᐊᖅᑎᑦᑎᔪᓐᓇᓚᐅᖅᑐᓂᒃ, ᐱᓗᐊᖅᑐᒥ ᐱᕙᓪᓕᐊᔪᓕᕆᔨᒃᑯᓐᓂᒃ ᐃᖏᕐᕋᔪᓕᕆᔨᒃᑯᓐᓂᒡᓗ, EPLS-ᑯᓐᓂᒃ, Arctic Connection-ᑯᓐᓂᒃ ᐊᒻᒪᓗ ᓴᓇᖃᑎᓂ ᐃᓂᖃᖅᑎᑦᑎᔪᓐᓇᓚᐅᕐᒪᑦ ᓯᐊᕐᕆᔮᕐᕕᕕᓂᕐᒥ.
“ᑕᒪᒃᑯᐊ ᓴᖅᑭᑦᑐᓐᓇᕋᔭᙱᒻᒪᑕ ᐃᓄᐃᑦ ᐊᓯᖏᓪᓗ ᑲᑐᔾᔨᖃᑎᒌᑦ ᐱᓕᕆᖃᑎᒌᖃᑦᑕᙱᑉᐸᑕ ᖃᓄᐃᓕᐅᖅᑎᑦᑎᔪᓐᓇᕈᒪᓂᕐᒧᑦ ᐅᑭᐅᖅᑕᖅᑐᒥ,” ᑕᐃᒪᓐᓇ ᐅᖃᖅᖢᓂ ᐱᐊᔅ, ᖁᔭᓐᓇᒦᖅᖢᓂᓗ ᖃᕝᕕᑦᑐᕐᒥᒃ, ᐱᓱᖕᒥᒃ ᐊᒻᒪᓗ ᓄᓇᖅᑲᑎᒌᖕᓂᒃ ᐱᔫᒥᒍᓱᓚᐅᕐᓂᖏᓐᓄᑦ ᐃᓕᑦᑎᔪᒪᓂᕐᒧᑦ.
ᐃᓕᓐᓂᐊᕌᓂᒃᐸᑕ, ᓄᓇᓕᖕᒥ ᐃᓐᓇᑐᖃᕆᔭᐅᔪᖅ ᑐᓂᔭᐅᔪᒫᖅᑐᖅ ᐅᓗᓕᐊᖑᔪᒥᒃ.