ᑭᓱᕈᓘᔮᓗᖕᓂ ᑎᑎᕋᐅᓯᖃᓲᖑᕗᒍᑦ ᑐᓴᒐᒃᓴᓕᐅᕐᓂᕐᒥ.
ᖃᐅᑕᒫᒥ ᑐᓴᒐᒃᓴᓕᐊᖑᔪᓂ, ᑐᓴᒐᒃᒪᓕᐅᖅᑎᑦ ᑎᑎᕋᒐᔪᒃᐳᑦ ᐊᑕᐅᓯᕐᒥ ᐱᖓᓱᓄᑦ ᐅᓂᒃᑳᓕᐊᓂ ᖃᐅᑕᒫᒥ – ᑎᑭᐅᑎᔪᒥ 15−ᓂ ᐱᓇᓱᐊᕈᓯᑕᒫᒥ. ᐱᓇᓱᐊᕈᓯᑕᒫᒥ, ᐅᓄᙱᓐᓂᖅᓴᐅᒐᔪᒃᐳᑦ, ᓱᓕ ᑕᑉᐸᐅᙵᒐᓚᒃ 10−ᖑᔪᓂ ᑐᓴᒐᒃᓴᓕᐊᓂ ᐱᓇᓱᐊᕈᓯᑕᒫᑦ.
ᑎᑎᕋᒐᔪᒃᐳᒍᑦ ᐊᒥᓱᓂ ᑲᔪᖏᖅᓴᐃᔪᓂ ᐃᓄᖕᓂ, ᑐᓴᕈᒥᓇᖅᑐᓂ ᐃᓱᒪᓕᐊᖑᔪᓂ ᐊᒻᒪ ᑲᒪᓇᖅᑐᓂ ᒪᒃᑯᒃᑐᓂ. ᑕᒪᒃᑭᒐᓚᑦ ᑲᑎᖅᓱᖅᑕᐅᓲᖑᕗᑦ ᑭᓱᑐᐃᓐᓇᓂ ᐃᓅᓯᐅᔪᒥ ᐅᑎᖅᑕᖅᐸᒃᖢᑕ ᐊᑕᐅᓯᕐᒥ ᐊᐱᖅᓱᖅᑕᐅᓂᐅᔪᒥ ᐊᒥᐊᓄᑦ, ᐃᑉᐸᒃᓴᖅ ᑐᓴᒐᒃᓴᖏᑦ ᐅᖓᓯᒃᑑᔮᓕᖅᖢᑎᒃ.
ᑭᓯᐊᓂ U19 ᓄᓇᕗᒻᒥ ᐱᙳᐊᖅᑏᑦ ᕼᐋᑭᖅᑎᐅᔪᓄᑦ ᓵᓚᖃᕐᓂᖏᓐᓂ ᒎᓗᒥ, ᑕᐃᓐᓇ ᐅᔾᔨᕐᓇᕐᔪᐊᓚᐅᖅᐳᖅ.
ᐃᓚᐅᖃᑕᐅᔪᓐᓇᓚᐅᖅᐳᖓ ᐊᐅᓪᓛᖃᑎᖃᕐᓂᕐᒥ ᓄᓇᕗᒻᒥ ᐱᙳᐊᖅᑎᓂᑦ ᓵᑕᒃᑯᑦ ᐊᒻᒪ ᑎᑎᕋᖅᐸᓪᓕᐊᓪᓗᖓ ᐱᓯᐊᖅᑏᑦ ᐊᐅᓚᓂᖓᓂ ᒎᓗᒧᑦ ᐅᔭᒥᒃᑖᕐᓂᕐᒧᑦ ᐱᙳᐊᕐᓂᐅᔪᒧᑦ. ᑎᑎᕋᐅᓯᖃᖅᓯᒪᕗᖓ ᐊᒥᓱᓂ ᐱᙳᐊᕐᓂᐅᔪᓂ ᖃᓄᐃᓐᓂᐅᔪᓂ, ᐊᒻᒪ ᑕᒪᒃᑭᒐᓚᐅᔪᓂ ᖃᐅᔨᓴᓗᐊᕌᓗᒃᐸᙱᓚᖓ ᐃᓯᖅᑎᑕᐅᔪᓂ ᐊᑐᓂ ᐱᙳᐊᕐᓂᐅᔪᒥ, ᐊᔾᔨᓕᐅᕆᑐᐃᓐᓇᖅᖢᖓ ᐊᒻᒪ ᐅᖃᐅᓯᒃᓴᓕᐊᖑᔪᓂ. ᑕᒪᓐᓇ ᖁᔭᓈᖅᓯᓯᒪᙱᑦᑐᖅ ᖃᓄᐃᓐᓂᐅᔪᓂ, ᑭᓯᐊᓂ ᐅᖃᕐᓂᐅᕗᖅ ᓱᓕᓂᖓᓂ ᑎᑎᕋᐃᓂᕐᒥ ᑐᓴᒐᒃᓴᑦᑎᓐᓂ ᐱᓕᕆᓂᐅᕗᖅ ᐅᕙᑦᑎᓐᓄᑦ. ᐅᓇ ᓵᓚᖃᕋᓱᐊᕐᓂᐅᔪᖅ ᐊᔾᔨᒋᓚᐅᙱᓚᖓ, ᑭᓯᐊᓂ.
ᖁᙱᐊᖅᖢᓂ ᓄᓇᕗᒻᒥ ᐱᙳᐊᖅᑏᑦ ᖃᔅᓯᒐᓚᖕᓂ ᐱᙳᐊᕐᓂᐅᔪᓂ, ᐱᐅᒋᑦᑎᐊᓕᓚᐅᖅᐸᒃᑲ ᐱᙳᐊᖅᑎᐅᔪᑦ ᐊᒻᒪ ᐋᖅᑭᒃᓱᖅᓯᒪᓂᖏᓐᓂ ᑲᑎᙵᓂᐅᔪᓂ. ᑲᐃᑎᓐ ᐃᑦᑐᖅ ᐅᕙᓐᓂ ᐃᖅᑲᐃᑎᑦᑎᓚᐅᖅᐳᖅ ᐳᐹᑦ ᒫᓴᓐᒥ – ᐆᒻᒪᕆᒃᑐᖅ, ᓱᒃᑲᔪᐊᓗᒃ ᑭᓯᐊᓂ ᐊᔪᙱᕐᔪᐊᖅᑐᖅ. ᑕᑯᓚᐅᖅᐸᕋ ᐸᒡᕕᓵᕆᔪᒥ ᐊᓛᔅᑲᒥ ᐱᙳᐊᖅᑎᓂ ᓯᕗᓂᐊᓂ ᒎᓗᒥ ᐅᔭᒥᒃᑖᕋᓱᐊᕐᓂᕐᒥ ᑭᖑᓪᓕᖅᐹᖅᓯᐅᑎᐅᔪᒥ, ᐊᒻᒪ ᐅᔾᔨᕆᓪᓗᒋᑦ ᐅᖃᐱᓗᖕᓂᖏᓐᓂ ᓇᐅᑦᑎᖅᓱᖅᑎᐅᔪᓂ ᖃᔅᓰᖅᓱᒐᓚᒃᖢᑎᒃ. ᐱᙳᐊᖅᑎᐅᕗᖅ ᓇᓗᓕᖅᑎᑦᑎᔪᓐᓇᖅᑐᒥ ᐱᙳᐊᕐᓂᖓᓂ ᓱᓕ ᖁᑦᑎᓛᖓᓂ ᐊᔪᙱᓐᓂᖃᕐᓗᓂ.
ᑰᐱ ᑕᓄᔭᒃ ᐊᖏᔪᐊᓘᕗᖅ, ᓲᖃᐃᒻᒪ. ᑭᓯᐊᓂ ᐊᒡᒐᑦᑎᐊᕆᒃᑐᐊᓗᒃ ᐊᒻᒪ ᐊᒃᓱᕈᕐᔪᐊᓚᐅᖅᐳᖅ ᑐᓄᐊᓂ ᐊᐳᖅᓯᓂᖓᓂ, ᑕᑯᒃᓴᐅᑎᑦᑎᓪᓗᓂ ᐊᖏᑐᐃᓐᓇᙱᓐᓂᖓᓂ. ᓴᙱᓪᓗᓂ ᐱᙳᐊᖅᑎᐅᓚᐅᖅᐳᖅ ᐱᓇᓱᐊᕈᓯᓕᒫᒥ ᐊᒻᒪ ᐊᑭᕋᖏᑦ ᓂᓪᓕᖅᐸᓚᐅᖅᐳᑦ ᑕᑯᔭᐅᒑᖓᒥᒃ ᓴᓂᕋᖓᓄᐊᓕᕌᖓᑦ ᑕᐃᒪᙵᓕᒫᖅ.
ᒪᐃᑲ ᐃᒥᒃᑕᐅᑦ ᐊᓯᐊᓂ ᐱᓐᓇᕆᔭᐅᓚᐅᕆᕙᕋ. ᓱᒃᑲᓂᖓ ᑭᖑᓪᓕᖅᐹᖅᓯᐅᑎᒐᓚᖕᓂ ᐱᓯᐊᕐᓂᐅᔪᒥ ᓄᓇᑦᓯᐊᕐᒥ ᐱᙳᐊᖅᑎᐅᔪᓂ ᐊᔾᔨᒋᙱᓐᓂᖃᖅᑎᑦᑎᓚᐅᖅᐳᖅ. ᐊᖑᑎ 100 ᒪᐃᔪᔅᓂ ᐃᑲᕐᕋᒥ ᐃᖏᕐᕋᐃᓐᓇᓚᐅᖅᐳᖅ, ᑕᒪᒃᑭᓗᒃᑖᑦ ᓄᓇᕗᒻᒥ ᐱᙳᐊᖅᑏᑦ ᓄᖅᑲᕈᓐᓇᓚᐅᙱᓚᑦ ᑕᐃᑲᓂ ᐱᙳᐊᕐᓂᐅᔪᒥ, ᓵᓚᖃᓚᐅᖅᖢᑎᒃ 7-2. ᓄᓇᑦᓯᐊᕐᒥ ᐱᙳᐊᖅᑏᑦ ᑲᑕᓯᑲᐅᑎᒋᓚᐅᖅᐳᑦ ᐱᖏᐊᕐᓂᖓᓂ ᐊᒻᒪ ᖁᕝᕙᕆᐊᒃᑲᓐᓂᕈᓐᓇᓚᐅᙱᓚᑦ.
ᐅᓇ ᓄᓇᕗᒻᒥ ᐱᙳᐊᖅᑎᐅᔪᑦ ᐃᓗᑐᓚᐅᖅᐳᖅ. ᐳᕋᐃᒻ ᐸᓂᔪᒃ, ᑰᐱ ᑳᓂᓕ, ᕋᐃ ᓄᑲᖅᖠᖅ ᐳᓪᓚᑦ, ᒫᒃᓯᒪᔅ ᐊᒫᖅ, ᓴᐃᔅ ᕼᐃᐊᕋᓐ – ᑕᐅᕗᖓ ᑕᐅᕗᖓ. ᑐᑭᓕᐊᕐᓂᖃᖅᐸᓪᓕᐊᖏᓐᓇᓚᐅᖅᐳᖅ ᐆᒻᒪᕆᒃᑐᓂ, ᐊᔪᙱᓐᓂᓕᖕᓂ ᐊᒻᒪ ᓱᒃᑲᓂᖏᓐᓂ. ᒍᕋᒡ ᐅᐊᐃᔅᒪᓐ ᖁᕝᕙᓯᒃᐸᓪᓕᐊᓪᓗᓂ ᐱᙳᐊᖅᑎᕐᔪᐊᖅ – ᑕᑭᔪᑯᑖᖑᓪᓗᓂ 6’ 16-ᓂ-ᐅᑭᐅᓕᒃ ᐱᕙᓪᓕᐊᓪᓗᓂ, ᑭᓯᐊᓂ ᐊᒡᒐᑦᑎᐊᕆᒃᑐᐊᓘᕗᖅ.
ᐅᕝᕙᓘᓐᓃᑦ ᐃᓚᖏᑦ ᐊᓇᐅᓯᓂᐅᔪᑦ ᓵᓐᑎ ᑕᑦᑐᐃᓂ ᐱᓚᐅᖅᑕᖏᓐᓂ, ᓲᕐᓗ ᑕᐃᓐᓇ ᐊᖏᔪᐊᓗᒃ ᑭᖑᓪᓕᖅᐹᖅᓯᐅᑎᓂ? ᕿᒧᖓᓂ ᐊᓇᐅᓪᓗᓂᐅᒃ ᓯᑯᒥ ᐃᓚᒋᔭᐅᑦᑎᐊᓚᐅᖅᐳᖅ ᖁᑦᑎᓛᖑᔪᒥ.
ᕋᓱᓪ ᒪᑑ, ᑎᐊᕆᓐᔅ ᐱᓚᑲᑉᓯ, ᔭᔅᑎᓐ ᐃᓴᒃᑭᐊᖅ ᐊᒻᒪ ᓯᑏᕙᓐ ᓇᐅᓪᓚᖅ ᐃᑲᔪᖅᑐᐃᓐᓇᓚᐅᖅᐳᑦ ᓵᓚᖃᕐᓂᐅᔪᓂᑦᑕᐅᖅ, ᑐᓄᐊᓃᑦᑐᓂ ᓄᖅᑲᖅᑎᑦᑎᔨᐅᓪᓗᑎᒃ ᐊᔪᙱᒃᔪᐊᖅᑐᓂ ᐊᕐᕕᐊᓂ ᑲᑎᙵᓂᐅᔪᓂ ᑕᑯᕐ ᓴᐃᓐᑦ ᔮᓐ ᐊᒻᒪ ᔨᒥ ᐆᓕ.
ᓄᓇᕗᒻᒥ ᐱᙳᐊᖅᑏᑦ ᑲᑉᐱᐊᓇᖅᖢᑎᒃ ᐱᙳᐊᖅᑎᐅᓚᐅᖅᐳᑦ. ᐊᔪᕆᖅᓱᐃᕙᒃᑐᖅ ᑕᐃᕕᑦ ᑲᓛᒃ ᐅᖃᓚᐅᖅᐳᖅ, ᐱᙳᐊᓚᐅᖅᐳᑦ ᑲᑎᙵᓪᓗᑎᒃᑕᐅᖅ. ᐆᒻᒪᕆᓚᐅᖅᐳᑦ – ᐊᒻᒪ ᑐᓴᓚᐅᖅᐳᖓ ᐊᒥᓱᓂ ᐃᓄᖕᓂ ᐅᖃᐅᓯᖃᖅᑐᓂ ᓴᙱᔪᐊᓘᓂᖏᓐᓂ ᓄᓇᕗᒻᒥᐅᑦ – ᑭᓯᐊᓂ ᐊᔪᙱᑦᑐᐊᓘᓪᓗᑎᒃ ᐊᒻᒪ ᓴᐱᓕᓚᐅᙲᓐᓇᖅᐳᑦ.
ᐊᔪᕐᓇᕐᓂᐊᖅᐳᖅ ᓄᓇᕗᒻᒥ ᐱᙳᐊᖅᑎᓂᑦ ᖁᑦᑎᒋᐊᖅᓯᓂᖏᓐᓂ ᐅᑯᓄᖓ ᐱᙳᐊᖅᑎᐅᔪᓂ 2024−ᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ. ᐊᖕᒪᔪᖃᓚᐅᙱᑦᑎᐊᖅᐳᖅ. ᑭᓯᐊᓂ ᐱᕙᓪᓕᐊᑎᑕᐅᓂᐅᔪᒥ ᐱᓕᕆᐊᖑᔪᒥ ᐱᓕᕆᓂᖏᓐᓂ ᐅᕙᓂ, ᑮᓇᐅᔭᒃᑲ ᐃᓕᓯᒪᕙᒃᑲ ᐅᑎᓛᕐᓂᐊᕐᓂᖏᓐᓂ.