ᐱᓕᕆᕙᓪᓕᐊᓂᖃᖅᐳᑦ ᓴᖅᑭᑎᑦᑎᓂᕐᒥ ᐱᓕᕆᔨᕐᔪᐊᖑᔪᒥᑦ ᐊᕐᕕᐊᓂ ᓴᓇᓂᐊᖅᑐᓂ ᓇᑉᐸᖅᑎᕆᓂᐅᔪᒥ ᐊᔾᔨᒌᓕᖅᑎᑦᑎᓇᓱᖕᓂᕐᒥ ᐊᖏᕐᕋᒃᓴᓂ ᐊᕐᕌᒍᓕᒫᒥ ᐊᒻᒪ ᐃᖅᑲᓇᐃᔭᖅᑎᑦᑎᓗᑎᒃ ᓄᓇᓕᖕᓂ ᐃᓄᖕᓂ ᐱᓕᕆᓂᐅᔪᒥ.
“ᐸᕐᓇᐅᑎᕗᑦ ᒫᓐᓇᐅᔪᒥ ᒪᑐᐃᖅᑕᐅᓂᖓᓂ 2025−ᒥ,” ᐅᖃᓚᐅᖅᐳᖅ ᒌᔭᐅᒻ ᒍᐃᑕ, ᐊᖓᔪᖅᑳᑉ-ᑐᖏᓕᖓ ᓴᒃᑰᑉ ᐱᕈᐃᔭᖏᓐᓂ ᐊᐅᓚᑦᑎᔨᖏᓐᓄᑦ.
ᑭᕙᓪᓕᕐᒥ ᐃᓄᐃᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑕᐅᔪᑦ, ᐅᕘᓇ ᓴᒃᑯ ᐃᓱᒪᑐᓂᕐᒥ ᓴᓇᓂᕐᒧᑦ ᐋᖅᑭᒍᑎᒃᓴᓂ, ᖃᐃᖅᑲᒃᓴᐃᕌᓂᒃᓯᒪᕗᑦ 300,000 ᑭᑉᐹᕆᒃᑐᓂ ᐃᓯᒐᓪᓗᐊᓂ ᐃᓂᒃᓴᐅᔪᒥ ᐊᕐᕕᐊᕐᓂ ᑎᑭᓛᖅᑐᒧᑦ 42,000-ᑭᑉᐹᕆᒃᑐᒥ-ᐃᓯᒐᓪᓗᐊᓂ ᐱᓕᕆᔨᕐᔪᐊᖑᔪᒧᑦ – ᐊᒥᐊᒃᑯᖓ ᓄᓇᒥ ᐱᔭᕆᐊᖃᖅᑐᒥ ᑕᒪᒃᑭᓄᑦ ᐃᒡᓗᒃᓴᐅᔪᓄᑦ ᓴᓇᓂᐊᖅᑕᒥᓂᑦ.
“ᐱᓕᕆᔨᕐᔪᐊᖑᔪᑦ ᓴᖅᑭᑎᑦᑎᓂᐊᖅᐳᑦ ᐃᒡᓗᒃᓴᐅᓂᐊᖅᑐᓂ, ᑭᓯᐊᓂ ᐱᓕᕆᔪᓐᓇᕆᕗᑦ ᖃᓄᐃᑦᑐᑐᐃᓐᓇᕐᒥ ᐃᒡᓗᒃᓴᐅᔪᓂ,” ᐅᖃᓚᐅᖅᐳᖅ ᒍᐃᑕ, ᐃᓚᒋᐊᖅᓯᓪᓗᓂ ᒪᑭᑕᓕᕈᓂ ᐊᒻᒪ ᐊᐅᓚᓕᕐᓗᓂ, ᓴᒃᑯ ᓂᕆᐅᒃᐳᖅ ᐱᓕᕆᔨᕐᔪᐊᖑᔪᑦ ᓴᖅᑭᑎᑦᑎᓂᐊᕐᓂᖓᓂ 35−ᓂ ᓇᑉᐸᖅᑎᕆᓂᐅᔪᒥ ᐊᔾᔨᒌᓕᖅᑎᑦᑎᓇᓱᖕᓂᕐᒥ ᐊᖏᕐᕋᒃᓴᐅᔪᓂ ᐊᕐᕌᒍᑕᒫᒥ.
ᑐᕌᒐᓪᓗᐊᑕᖓ ᓵᓚᖃᕋᓱᐊᕐᓂᕐᒥᐅᙱᑦᑐᖅ ᐃᒡᓗᖃᖅᑎᑦᑎᓂᕐᒥ ᑐᐊᕕᕐᓇᕐᓂᐅᔪᒥ, ᑭᓯᐊᓂ ᐃᖅᑲᓇᐃᔭᖅᑎᑦᑎᓂᕐᒥ ᐃᓄᖕᓂ ᐊᒻᒪ ᐱᕙᓪᓕᐊᑎᑦᑎᓗᑎᒃ ᓇᑉᐸᖅᑎᕆᓂᕐᓄᑦ ᐊᔪᙱᓐᓂᖏᓐᓂ ᐊᒻᒪ ᐹᐃᑉᐹᖃᖅᑎᑦᑎᓂᕐᒥ ᓴᓇᓂᕐᒧᑦ ᐃᖅᑲᓇᐃᔭᖅᑎᐅᔪᓂ ᐱᔪᓐᓇᕐᓂᖓᓂ ᐊᕕᒃᑐᖅᓯᒪᓂᐅᔪᒥ.
ᐱᒋᐊᓚᐅᖅᐳᖅ ᑐᒃᓯᕋᕐᓂᐅᔪᒥ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖑᔪᓂ ᑲᑎᒪᔨᖏᓐᓂ ᓴᒃᑯᒃᑯᓐᓄᑦ 2015−ᒥ. ᑕᐃᒪᙵᓂ, ᐃᓄᖕᓄᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑕᐅᔪᑦ ᐱᓕᕆᖃᑎᖃᓕᓚᐅᖅᐳᑦ RG Solutions ᑯᐸᐃᖕᒥ ᓴᓇᓂᕐᒧᑦ ᒪᕐᕉᖕᓂ ᓯᕗᓪᓕᖅᐸᐅᔪᓂ ᐆᒃᑑᑎᒃᓴᓂ ᑕᓪᓕᒪᓂ-ᑲᑎᙵᓂᐅᔪᓂ ᐃᒡᓗᒃᓴᓂ, ᑕᒪᒃᑭᑦ ᐅᒥᐊᕐᔪᐊᒃᑰᖅᑎᑕᐅᓚᐅᖅᑐᓂ ᐊᐅᔭᐅᓚᐅᖅᑐᒥ.
ᐃᓱᒪᓂᐅᔪᖅ ᖃᓪᓗᓈᑦ ᓄᓇᖓᓐᓂ ᐱᖠᕆᖃᑎᖃᕐᓂᐅᔪᒥ ᐊᑐᕐᓂᕐᒧᑦ ᐊᔾᔨᐸᓗᐊᓂ ᐱᓕᕆᔨᕐᔪᐊᖑᔪᒥᑦ ᑕᐃᔅᓱᒥᖓ ᓇᑉᐸᖅᑎᕆᔭᐅᒧᒥ ᐊᕐᕕᐊᕐᓂ ᓴᓇᓂᕐᒧᑦ ᓯᕗᓪᓕᖅᐸᐅᔪᒥ ᐱᓕᕆᐊᖑᓂᐅᔪᒥ, ᓲᕐᓗ ᑕᓪᓕᒪᓂ−ᑲᑎᙵᓂᐅᔪᓂ ᐃᒡᓗᒃᓴᓂ, ᐊᒻᒪ ᓇᐃᓴᐅᓯᕆᓗᓂ ᐃᑲᕐᕋᖏᓐᓂ ᐊᒻᒪ ᓱᓇᒃᑯᑖᓂ ᐊᑭᖏᓐᓂ ᓴᒃᑯᒃᑯᑦ ᐱᔭᕇᕈᓐᓇᕐᓂᐊᕐᒪᑕ ᓇᖕᒥᓂᖃᕐᓂᕐᒧᑦ ᐱᓕᕆᓂᖓᓐᓂ ᐊᕐᕕᐊᕐᓂ ᐱᓕᕆᔨᕐᔪᐊᖑᔪᓄᑦ.
ᒍᐃᑕ ᐅᖃᓚᐅᖅᐳᖅ ᐊᑭᐊ ᓴᓇᓂᕐᒧᑦ ᐱᓕᕆᔨᕐᔪᐊᖑᔪᒥ $30 ᒥᓕᐊᓐᐸᓘᕗᖅ, ᑭᓯᐊᓂ ᑕᐃᓐᓇ ᓈᓴᐅᑎᐅᔪᖅ ᐋᖅᑭᒋᐊᖅᑕᐅᓇᔭᖅᐳᖅ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ. ᐃᖅᑲᓇᐃᔭᖅᑎᑦᑎᓂᐊᖅᐳᑦ 38−ᓂ ᐃᓄᖕᓂ, ᐊᐅᓚᑦᑎᔨᐅᔪᓂ ᐊᒻᒪ ᑮᓇᐅᔭᓕᕆᔨᐅᔪᓂ ᓇᑉᐸᖅᑎᕆᓕᕐᒧᑦ ᐊᒻᒪ ᐱᓕᕆᐊᖃᖅᑐᓂ ᐃᖅᑲᓈᐃᔮᓂ. ᑐᕌᒐᒃᓴᖓ ᓴᓇᑐᐃᓐᓇᕐᓂᕐᒥᐅᙱᑦᑐᖅ ᐃᒡᓗᒃᓴᓂ, ᑭᓯᐊᓂ ᓴᓇᓗᓂ ᐱᔪᓐᓇᕐᓂᐅᔪᒥ ᑭᕙᓪᓕᕐᒥ ᓇᑉᐸᖅᑎᕆᓂᕐᒧᑦ ᐱᓕᕆᔨᕐᔪᐊᖑᔪᓄᑦ.
“ᐅᓄᙱᓗᐊᖅᑐᑯᓗᖕᓂ ᓄᓇᓕᖕᓂ ᐃᓄᒃᑕᖃᖅᐳᖅ ᐃᓚᐅᖃᑕᐅᔪᓂ ᓇᑉᐸᖅᑎᕆᓂᕐᒥ,” ᐅᖃᓚᐅᖅᐳᖅ ᒍᐃᑕ. “ᖃᓪᓗᓈᑦ ᓄᓇᖓᓐᓂ ᓴᓇᔨᓂ ᑎᑭᖃᑦᑕᖅᑐᓂ, ᓴᓇᓪᓗᒍ ᐊᒻᒪ ᐊᐅᓪᓚᖅᖢᑎᒃ. ᐊᒻᒪ ᐱᓕᒻᒪᒃᓴᕐᓂᖃᙱᓚᖅ, ᐱᔪᓐᓇᕐᓂᐅᔪᒥ ᓴᓇᔭᐅᔪᖃᖅᐸᓪᓕᐊᙱᓚᖅ.
“ᓅᑐᐃᓐᓇᓲᖑᕗᑦ, ᐊᒻᒪ ᓈᒻᒪᒃᐳᖅ, ᑭᓯᐊᓂ ᐱᓕᕆᓂᑕᖃᖅᐸ ᐱᐅᓯᒋᐊᖅᑎᑦᑎᔪᓐᓇᕐᓂᑦᑎᓐᓂ ᐱᓕᒻᒪᒃᓴᓂᕐᒥ ᐱᓕᕆᓂᖓᓂ?”
ᓴᓇᓂᕐᒧᑦ ᐱᔪᓐᓇᕐᓂᐅᔪᑦ
ᐊᕐᕕᐊᕐᓂ ᐱᓕᕆᔨᕐᔪᐊᖑᔪᓄᑦ ᐊᐅᓚᓕᕈᓂ, ᒍᐃᑕ ᑕᐅᑐᙳᐊᖅᐳᖅ ᑭᕙᓪᓕᕐᒥ ᐃᓗᖕᓂ ᐃᖅᑲᓇᐃᔭᖅᑐᓂ ᑕᐃᑲᓂ ᖃᔅᓯᐊᕐᔪᖕᓂ ᐊᕐᕌᒍᓂ ᐃᓕᓐᓂᐊᖅᑎᑕᐅᕙᓪᓕᐊᓗᑎᒃ ᐱᓂᕐᒧᑦ ᖁᑦᑎᖕᓂᖅᓴᐅᔪᓂ ᐸᐃᑉᐹᖃᕐᓂᐅᔪᓂ, ᐱᔪᓐᓇᖅᑎᑦᑎᔪᒥ ᓅᓐᓂᕐᒥ ᐱᔪᒪᒍᑎᒃ ᐊᒻᒪ ᐱᓕᕆᕙᒡᓗᑎᒃ ᐊᓯᖏᓐᓂ ᓇᑉᐸᖅᑎᕆᓂᕐᓂ ᐃᖅᑲᓇᐃᔮᖑᔪᓂ ᐊᕕᒃᑐᖅᓯᒪᓂᐅᔪᒥ. ᐱᔪᓐᓴᖅᑎᑦᑎᒋᕗᖅ ᑭᕙᓪᓕᕐᒥ ᐃᓄᖕᓂ ᐱᓂᖏᓐᓂ ᐅᑯᓂᖓ ᐊᔪᙱᓐᓂᐅᔪᓂ ᐃᓚᐅᖃᑕᐅᓂᖏᓐᓂ ᐱᐅᒧᒥ ᐃᖅᑲᓇᐃᔮᒃᓴᓂ ᐱᕕᒃᓴᖃᕐᓂᐅᔪᓂ ᐊᖏᕐᕋᒧᑦ ᖃᓂᑦᑐᒥ, ᐊᕐᕌᒍᓕᒫᒥ, ᐅᖅᑰᔪᒥ, ᖃᐅᒪᔪᒥ, ᒫᓐᓇᓕᓴᐅᔪᒥ ᐃᒡᓗᕐᔪᐊᕐᒥ.
“ᑐᕌᒐᒃᓴᕆᕙᖓ ᐱᓕᕆᔨᕐᔪᐊᖑᔪᒥ, ᐅᖃᕋᔭᖅᐳ, ᓯᕗᓂᐊᓂ ᐃᒡᓗᓕᐅᕐᓂᕐᒥ,” ᐅᖃᓚᐅᖅᐳᖅ ᒍᐃᑕ.
ᒪᕐᕉᒃ ᑕᓪᓕᒪᓂ-ᑲᑎᙵᓂᐅᔪᓂ ᐃᒡᓗᒃᓴᓂ ᓴᓇᔭᐅᔪᓂ RG Solutions ᐱᓕᕆᔨᕐᔪᐊᖑᔪᒥ ᐅᒥᐊᕐᔪᐊᒃᑰᖅᑎᑕᐅᓚᐅᖅᑐᓂ ᐊᕐᕕᐊᓄᑦ ᐊᑐᖅᐳᑦ 90 ᐳᓴᓐᑎᒥ ᐃᓄᖕᓂ ᐃᖅᑲᓇᐃᔭᕐᓂᐅᔪᒥ ᐃᓕᓯᓂᕐᒧᑦ ᐱᔭᕇᖅᑕᐅᓂᖓᓂ ᐊᒃᑐᐃᓂᐅᔪᓂ, ᐅᖃᐅᓯᐅᓪᓗᓂ ᒍᐃᑕᒧᑦ, ᐃᓚᒋᐊᖅᓯᓪᓗᓂ ᑐᕌᒐᒃᓴᕆᕙᐅᒃ ᐆᒧᖓ ᐱᒋᐊᕈᑕᐅᔪᒧᑦ. ᑕᓪᓕᒪᓂ-ᑲᑎᙵᓂᐅᔪᓂ ᐃᒡᓗᒃᓴᓂ ᓯᕗᓪᓕᖅᐸᐅᔪᒥ ᓴᒃᑯᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᒡᓗᒃᓴᐅᓂᐊᓚᐅᕋᓗᐊᖅᐳᑦ, ᑭᓯᐊᓂ ᕼᐋᒻᓚᒃᑯᑦ ᐊᕐᕕᐊᓂ ᓂᐅᕕᖔᓚᐅᖅᐸᖏᑦ, ᖁᕝᕙᕆᐊᖅᑎᑦᑎᓪᓗᑎᒃ ᓴᒃᑯᒃᑯᑦ ᓴᖕᒥᓂᖃᕐᓂᕐᒧᑦ ᐱᓕᕆᓂᖓᓐᓂ ᐱᔪᓐᓇᕐᓂᐅᔪᒥ ᐅᑯᓂᖓ ᐃᒡᓗᒃᓴᐅᔪᓄᑦ.
ᐱᔾᔪᑎᖓ ᓴᒃᑯ ᐱᒋᐊᓚᐅᕐᓂᖓᓂ ᑕᓪᓕᒪᓂ-ᑲᑎᙵᓂᐅᔪᓂ ᐃᒡᓗᒃᓴᓂ ᑕᑯᒃᓴᐅᑎᑦᑎᓂᕐᒥ ᐃᒡᓗᕐᔪᐊᖅ ᓴᓇᔪᓐᓇᕐᓂᖓᓂ ᐃᒡᓗᒃᓴᓂ ᑭᐅᒪᔪᓂ ᓄᓇᕗᒻᒥ ᐃᒡᓗᓕᕆᔨᕐᒧᐊᒃᑯᑦ ᐱᔭᕆᐊᖃᖅᑕᖏᓐᓂ. ᐱᕙᓪᓕᐊᑎᑦᑎᓂᕐᒥ ᑎᒥᖁᑕᐅᔪᑦ ᐸᕐᓇᐃᒋᕗᑦ ᒪᕐᕉᒃᑲᓐᓂᕐᓂ ᓯᕗᓪᓕᖅᐹᖑᔪᒥ ᐱᓕᕆᐊᖑᓂᐅᔪᒥ ᑲᖏᖅᖠᓂᕐᒥ ᐊᕐᕌᓂ – ᐃᓚᖃᖅᑐᒥ ᒪᕐᕉᖕᓂ-ᑯᓕᕇᒃᑐᒥ ᐃᒡᓗᒥᒃ ᐊᒻᒪ 6-ᓂ−ᑲᑎᙵᔪᓂ ᐃᒡᓗᒃᓴᓂ – ᓴᓇᑎᓪᓗᒍ ᑲᒪᒋᔭᕆᐊᖃᖅᑕᖏᓐᓂ ᐱᓕᕆᓂᐅᔪᒥ ᐱᓕᕆᔨᕐᔪᐊᖑᔪᓂ ᓴᖅᑭᑎᑦᑎᔪᓐᓇᕋᔭᕐᓂᖓᓂ ᒪᑭᑕᓕᓚᐅᙱᓐᓂᖓᓂ ᐊᒻᒪ ᐊᐅᓚᓗᓂ.
“ᐊᓯᐊᓂ ᐱᑕᖃᙱᓚᖅ ᐊᖏᓂᖅᓴᐅᔪᒥ ᐱᓕᕆᔪᒪᔭᑦᑎᓐᓂ,” ᐅᖃᓚᐅᖅᐳᖅ ᒍᐃᑕ ᐊᔾᔨᐅᙱᓐᓂᖓᓂ ᐆᒪᙵᑦ ᐱᓕᕆᐊᒃᓴᐅᔪᒥ ᓄᓇᕗᒻᒥ.
ᐃᒡᓗᖃᖅᑎᑦᑎᓂᖅ ᐱᔭᕆᐊᖃᕐᔪᐊᖅᑎᓪᓗᒍ ᓄᓇᕗᒻᒥ, ᐱᓕᕆᐊᒃᓴᖓ ᐆᒪᙵᑦ ᐱᒋᐊᕈᑕᐅᔪᒥ ᐊᖏᒡᓕᒋᐊᖅᑎᑦᑎᓂᕐᒥ ᐱᐅᓂᖓᓂ ᐃᓅᓯᐅᔪᒥ ᐊᒻᒪ ᐱᕕᒃᓴᖃᕐᓂᐅᔪᓂ ᑭᕙᓪᓕᕐᒥ ᐃᓄᖕᓄᑦ, ᐱᓕᕆᐊᖃᙱᓪᓗᑎᒃ ᑕᒪᒃᑭᖅᑐᒥ ᐃᓘᖃᖅᑎᑦᑎᓂᕐᒧᑦ ᑐᐊᕕᕐᓇᕐᓂᐅᔪᒥ, ᒍᐃᑕ ᓇᓗᓇᐃᖅᓯᓚᐅᖅᐳᖅ.
“ᐅᖃᙱᓚᒍᑦ, ‘ᐆ ᐅᓇ ᑲᒪᓇᕐᒧᐊᖅᖢᓂ ᐋᖅᑭᒍᑎᒃᓴᐅᕗᖅ ᐊᒻᒪ ᓴᐳᔾᔨᓂᐊᖅᐳᒍᑦ ᐅᕝᕙᓘᓐᓃᑦ ᐅᓇᑕᕐᓗᑕ ᐃᒡᓗᖃᖅᑎᑦᑎᓂᕐᒧᑦ ᑐᐊᕕᕐᓇᕐᓂᐅᔪᒥ,” ᐅᓂᒃᑳᕆᒪᐅᖅᐳᖅ. ᐃᓱᒪᒋᔭᖃᑐᐃᓐᓇᖅᐳᒍᑦ ᐱᒋᐊᕈᑕᐅᔪᒥ ᐃᒪᓐᓇᐃᑦᑐᑎᑐᑦ ᐱᓕᕆᔾᔪᑎᑐᐃᓐᓇᐅᕗᖅ ᐃᑲᔪᕈᓐᓇᖅᑐᒥ ᐊᓯᖏᓐᓂ ᐊᒡᕕᐊᕈᑕᐅᔪᓂ ᐊᒻᒪ ᐃᓚᖏᓐᓂ ᐊᑲᐅᙱᓕᐅᕈᑕᐅᔪᓂ ᐱᑕᖃᖅᑐᓂ, ᐊᒻᒪ ᐃᓚᒋᐊᖅᓯᑐᐃᓐᓇᖅᐳᒍᑦ ᒐᕙᒪᒃᑯᑦ ᐊᒻᒪ ᐊᓯᖏᓐᓂ ᓇᖕᒥᓂᖃᖅᑎᐅᔪᓂ ᐱᓕᕆᔨᐅᔪᓂ (ᑲᒻᐸᓂᐅᔪᓂ) ᐱᓕᕆᓂᖏᓐᓂ.”
