ᑲᓇᖕᓇᕐᒥ ᐱᓇᖕᓇᕐᒧᑦ, ᐅᐊᖕᓇᒥ ᓂᒋᕐᒧᑦ, ᓄᓇᕗᒻᒥᐅᑦ ᐸᕐᓇᒃᐸᓪᓕᐊᕗᑦ ᓄᓂᕙᖕᓂᕐᒧᑦ. ᖁᕐᓗᖅᑑᒥ, ᐅᐃᓐᑎ ᑭᓕᖏᖕᐴᒡ, ᓄᓂᕙᒋᐊᓲᖑᕗᖅ ᐊᐅᔭᑕᒫᑦ, ᖃᐅᔨᒋᐊᕌᓂᒃᓯᒪᕗᖅ ᑭᒍᑕᖏᕐᓇᓂᑦ. ᓱᓕ ᐊᕝᕗᒐᒃᓴᐅᙱᒃᑲᓗᐊᖅᑎᓪᓗᒋᑦ, ᐅᖃᓚᐅᖅᐳᖅ ᒪᖁᕐᔪᐊᑲᑕᖕᓂᖓᓂ ᐊᒻᒪᓗ ᒫᓐᓇᓕᓴᐅᔪᒥ ᐅᖅᑰᔪᒥ ᓯᓚᒥ — 27 C–ᖑᓚᐅᖅᐳᖅ ᔪᓚᐃ 21–ᒥ — ᐋᖅᑭᒃᓱᐃᕗᖅ ᖃᓄᐃᓕᖓᓂᑦᑎᐊᕚᓗᖕᓂ ᑭᒍᑕᖏᕐᓇᓄᑦ ᐱᕈᑦᑎᐊᕐᓂᖏᓐᓂ. ᒪᒪᕆᓛᕆᕙᖏᑦ.
“ᒪᒪᕐᓂᖅᐹᖑᕗᑦ,” ᐅᖃᓚᐅᖅᐳᖅ. “ᖃᓄᐃᓕᐅᕈᑎᒋᕈᓘᔭᕈᓐᓇᖅᐸᑎᑦ. ᐸᐃᓕᐅᕈᑎᒋᒐᔪᒃᐸᒃᑲ ᐊᕐᕌᒍᑕᒫᑦ.”
ᖄᒃᑲᓐᓂᐊᒍᑦ ᐸᐃᓂᑦ, ᑭᓕᖏᖕᐴᒡ ᒥᖑᐊᓕᐅᓲᖑᕗᖅ ᑭᒍᑕᖏᕐᓇᓄᑦ ᐊᒻᒪ ᐊᖅᐱᓄᑦ. ᐊᖅᐱᑦ ᐊᕝᕗᖅᑕᐅᔪᓐᓇᖅᓯᓲᖑᕗᑦ ᓯᕗᓪᓕᖅᐹᒥ ᐱᓇᓱᐊᕈᓯᐅᔪᒥ ᐋᒍᔅᑎᒥ, ᐅᖃᓚᐅᖅᐳᖅ. ᑭᒍᑕᖏᕐᓇᑦ ᐊᒻᒪ ᓇᐹᖅᑐᓂ ᐸᐅᕐᙵᖏᑦ ᒪᓕᓲᖑᕗᑦ ᖃᔅᓯᐊᕐᔪᖕᓂ ᐱᓇᓱᐊᕈᓯᑦ ᐊᓂᒍᕌᖓᑕ.
ᐋᒍᔅᑎᐅᑉ ᓄᙳᐊᓂ ᑭᖕᒥᖕᓇᐅᕗᑦ.
ᐅᖃᓚᐅᖅᐳᖅ ᐸᐅᕐᙵᐃᑦ ᓇᓂᔭᐅᔪᓐᓇᖅᐳᖅ ᑭᓚᒥᑐᑐᐊᒥ ᒪᕐᕉᖕᓂᓪᓘᓐᓃᑦ ᓄᓇᓕᐅᑉ ᓯᓚᑖᓂ.
“ᐅᖓᓯᓗᐊᙱᑦᑐᑦ,” ᐅᖃᓚᐅᖅᐳᖅ. “ᐱᓱᒍᓐᓇᖅᐳᑎᑦ. ᐱᓱᖁᔭᐅᕙᙱᓚᑦ ᓇᓄᖅᑕᖃᖅᐸᖕᓂᖓᓂ.”
ᑭᓕᖏᖕᐴᒡ ᐹᖅᓯᓂᖃᓚᐅᖅᓯᒪᙱᓚᖅ ᓇᓄᕐᓂ ᑭᓯᐊᓂ ᐅᖃᓚᐅᖅᐳᖅ ᖁᑭᐅᑎᒡᒌᓐᓇᐅᔭᖅᐳᖅ, ᐱᑕᖃᑳᓪᓚᖕᓂᕈᓂ.
ᓇᓄᑐᐃᓐᓇᐅᙱᑦᑐᑦ ᐸᐅᕐᙵᖅᑐᕈᒪᓲᓂ, ᑲᖑᐃᑦ ᓂᕆᕙᒃᑭᕗᑦ ᐸᐅᕐᙵᓂᑦ.
“ᕿᓚᒥᑯᓗᒃ ᓄᓇᓂ ᐸᐅᕐᙵᓂ ᓄᖑᑎᕆᓲᖑᕗᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑎᖕᒥᐊᑦ ᒪᒪᖅᓴᓗᐊᖅᐳᑦ ᑭᒍᑕᖏᕐᓇᓂ.
ᐃᓚᖏᑦ ᐃᓄᐃᑦ ᐊᐅᓪᓛᓲᖑᕗᑦ ᐃᑳᖅᖢᑎᒃ ᖁᕐᓗᖅᑑᑉ ᑰᖓᓂ ᓄᓂᕙᒋᐊᖅᖢᑎᒃ ᑕᐅᕗᖓ.
“ᓇᒥᑐᐃᓐᓈᓘᖅᐳᑦ,”ᐅᖃᓚᐅᖅᐳᖅ.
ᐅᓗᖅᕼᐊᖅᑑᕐᒥᐅᑕᒃᓴᔭᐅᓪᓗᓂ, ᑭᓕᖏᖕᐴᒡ ᐅᖃᓚᐅᖅᐳᖅ ᐸᐅᕐᙵᑐᐊᑦ ᐊᖏᕐᕋᖓᓂ ᓄᓇᓕᖓᓐᓂ ᑭᒍᑕᖏᕐᓇᐅᕗᑦ, ᐊᒻᒪ ᐱᑕᖃᒐᔪᙱᓚᑦ. ᖁᕐᓗᖅᑑᒥ, ᐊᕝᕗᕋᓱᐊᓲᖑᕗᖅ ᖃᔅᓯᒐᓚᖕᓂ ᑭᓗᒍᕌᒻᓂ ᐊᖅᐱᓂᑦ ᐊᒻᒪ ᑭᖕᒥᖕᓇᓂᑦ ᐊᒻᒪᓗ ᑎᑭᖦᖢᒍ 20 ᑭᓕᒍᕌᒻᓂ ᑭᒍᑕᖏᕐᓇᓂᑦ ᐊᐅᔭᑕᒫᑦ.
ᑭᖕᒥᖕᓇᐃᑦ ᒪᕕᓐ ᐃᓚᒋᕙᖓ ᒪᒪᖅᑐᖁᑎᖏᓐᓂ.
ᓴᓂᑭᓗᐊᕐᒥ, ᓯᐊᕋ ᒦᑯ ᐅᖃᓚᐅᖅᐳᖅ ᖃᖅᑲᒥ ᐸᐅᕐᙵᐃᑦ ᓯᕗᓪᓕᖅᐸᐅᓪᓗᑎᒃ ᓈᒻᒪᒃᓯᓲᖑᕗᑦ ᐊᕐᕌᒎᑉ ᐃᓚᖓᓐᓂ, ᑕᒪᑐᒪᓂ ᓄᙳᐊᓂᐸᓗᖕᒥ. ᐅᓂᒃᑳᕆᓚᐅᖅᐸᖏᑦ “ᓰᕐᓇᒐᓚᒃᖢᑎᒃ,” ᑭᓯᐊᓂ ᓱᓕ ᐅᔭᐅᔭᐅᓚᐅᖅᐳᑦ ᔪᓚᐃ 21–ᒥ. ᐊᐅᐸᖅᓯᓂᐊᖅᐳᑦ ᓈᒻᒪᒃᓯᒍᑎᒃ ᓂᕆᔭᐅᓂᕐᒧᑦ, ᐅᖃᓚᐅᖅᐳᖅ.
ᐊᖅᐲᑦ, ᑭᒍᑕᖏᕐᓇᐃᑦ ᐊᒻᒪ ᑲᓪᓚᐃᑦ ᐱᐅᓂᖅᐹᖑᕗᑦ ᐋᒍᔅᑎᒥ.
ᐊᕐᕌᒍ ᐃᓚᖓᓐᓂ ᑭᖑᕙᖅᑐᒥ ᐸᐅᕐᙵᐃᑦ ᓴᖅᑭᓲᑦ ᓴᓂᑭᓗᐊᑉ ᖃᓂᒋᔭᖓᓂ lingonberries–ᖑᕗᑦ — ᑭᖕᒥᖕᓇᑎᑐᑦ — ᑭᓯᐊᓂ ᓱᓕ ᒪᒪᖅᑐᑦ ᐅᐱᕐᙶᒃᑲᓐᓂᖅᑎᓪᓗᒍ, ᐊᕝᕗᖅᑕᐅᙱᒃᑲᓗᐊᖅᑎᓪᓗᒋᑦ, ᒦᑯ ᐅᖃᓚᐅᖅᐳᖅ.
“ᓰᕐᓇᖅᓯᓲᖑᕗᑦ ᐅᑭᐅᒃᑯᑦ, ᐊᒻᒪ ᐃᓄᑐᖃᑦ ᐊᑐᖅᐸᓚᐅᖅᐳᑦ lingonberries–ᓂ ᐃᓅᓕᓴᐅᑎᒋᔭᐅᓪᓗᑎᒃ, ᑕᐃᔅᓱᒪᓂᑐᖄᓗᒃ. ᐅᖃᓚᐅᖅᐳᖅ ᐸᐅᕐᙵᑦ ᓈᙳᔪᓐᓃᕐᓇᖅᐳᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᒪᒪᖅᑐᐊᓗᖕᒥ ᒥᖑᐊᓕᐅᓲᖑᒋᕗᑦ.
ᓄᓇᖃᖅᑎᐅᔪᑦ ᓇᓂᓯᔪᓐᓇᖅᐳᑦ ᐸᐅᕐᙵᓂ ᓴᓂᑭᓗᐊᕐ ᖃᓂᒋᐸᓗᒃᑕᖓᓂ, ᑭᓯᐊᓂ ᐃᓚᖏᑦ ᐊᐅᓪᓛᓲᖑᕗᑦ 20 ᑭᓛᒥᑐᒥ ᓂᒋᕐᒧᑦ ᑲᓇᖕᓇᒧᑦ ᐃᓚᖓᓐᓂ ᕿᑭᖅᑕᒧᑦ ᐅᒥᐊᒃᑯᑦ.
“ᐅᓄᕐᓂᖅᓴᒻᒪᕆᐅᕗᑦ ᑕᐅᕙᓂ ᐅᖅᑰᓂᖅᓴᐅᓕᓲᖑᖕᒪᑦ ᐅᕙᓂ ᐃᓚᖓᓐᓂ ᕿᑭᖅᑕᐅᔪᓄᑦ,” ᒦᑯ ᐅᖃᓚᐅᖅᐳᖅ. “ᐊᐃᑉᐸᖓ ᕿᑭᖅᑕᖅ 120 ᑭᓛᒥᑐᒥ ᓂᒋᕐᒧᑦ ᑲᓇᖕᓇᒧᑦ ᓴᓂᑭᓗᐊᕐᒥ, ᐃᓚᖏᑦ ᐃᓄᐃᑦ ᑕᖕᒫᕆᐊᕐᕕᒋᓲᖓᓐᓂ ᐊᐅᔭᒃᑯᑦ ᐊᒻᒪ ᓇᒃᓴᓲᖑᕗᑦ ᐊᒥᓱᓂ ᐸᐅᕐᙵᓂ ᐊᒻᒪ ᐃᖃᓗᖕᓂ.”
ᐸᐅᕐᙵᐃᑦ, ᐱᓗᐊᖅᑐᒥ lingonberries, ᒪᒪᕈᑕᐅᕗᑦ ᓄᓇᒥ ᑏᓕᐊᒥ, ᐊᒻᒪ ᓄᓇᒥ ᑏᑦ ᐱᑕᖃᕐᔪᐊᖅᐳᑦ ᐃᓂᐅᔪᒥ, ᐃᓚᒋᐊᖅᓯᓚᐅᖅᐳᖅ.
ᒦᑯ ᐊᕝᕗᒐᔪᓲᖑᕗᖅ ᐊᖏᐸᓗᒃᑐᒥ ᐸᐅᕐᙵᓂ ᐃᒻᒥᓄᑦ ᐊᒻᒪ ᐃᓚᖏᓐᓄᑦ ᐊᕐᕌᒍᑕᒫᑦ.
“ᓈᒻᒪᑐᐃᓐᓇᖅᑐᒥ ᐸᐃᓕᐅᕐᓂᕐᒧᑦ ᐊᒻᒪ ᐸᐸᑦᑎᓪᓗᓂ ᖃᔅᓯᐊᕐᔪᖕᓂ ᐴᒃᓴᓂ ᖁᐊᖃᐅᒻᒥ ᐅᑭᐅᒧᑦ,” ᐅᖃᓚᐅᖅᐳᖅ.