ᓵᓐᑐᕋ ᑐᓗᒐᖅ ᐅᐸᒃᐸᓪᓕᐊᕗᖅ ᒫᑕᓕᓐ ᒪᓃᑦᑐᖅ ᐊᖏᕐᕋᖓᓄᑦ ᖃᐅᑕᒫᐸᓗᑦᑎᐊᖅ ᐃᑲᔪᕐᓂᕐᒧᑦ ᐊᖏᕐᕋᖓᓂ 75-ᓂ-ᐅᑭᐅᓕᖕᒥ ᐊᔭᖓᓂ ᐊᖏᕐᕋᒥ ᐊᐅᖕᒥ ᐃᕐᕈᖅᓴᕐᓂᕐᒥ ᐃᓅᓕᓴᐃᓂᐅᔪᒥ, ᐊᒻᒪᓗ ᐸᑦᑕᒃᐸᒃᐳᑦ.
“ᖁᔭᓕᕐᔪᐊᖅᓯᒪᕗᖓ,” ᐅᖃᓚᐅᖅᐳᖅ ᒪᓃᑦᑐᖅ ᓄᐊᖓᑕ ᐊᑭᓕᖅᓱᖅᑕᐅᓇᓂ ᐃᑲᔪᕐᓂᖓᓂ.
ᔪᕕᑦ ᑯᕋᒃ, ᒪᓃᑦᑑᑉ ᐅᑯᐊᖓ, ᖁᔭᓕᓂᖃᕆᕗᖅᑕᐅᖅ.
“ᐱᐅᓕᔭᐅᓂᐅᕗᖅ ᐃᓄᒃᑕᖃᕐᓂᖓᓂ ᓲᕐᓗ ᓵᓐᑐᕋᒥ ᐃᑲᔪᖅᓱᐃᓂᖓᓂ ᓴᑭᓐᓂ,” ᐅᖃᓚᐅᖅᐳᖅ ᑯᕋᒃ. “ᑕᐃᒪᐃᑦᑐᒥ ᑕᑯᒐᔪᖕᓇᕈᓐᓃᖅᐳᖅ. ᐃᓚᒌᑦ ᑐᑭᖃᕐᔪᐊᖅᐳᖅ ᓄᓇᕐᔪᐊᓕᒫᒥ ᐊᒻᒪ ᑕᑯᕙᒃᐸᐃᑦ ᐸᖅᑭᓂᐅᔪᒥ ᐊᓯᒧᑦ ᐅᑎᖅᑎᕝᕕᐅᔮᙱᖦᖢᓂ ᑭᓱᑐᐃᓐᓇᒥᒃ. ᓴᙳᔪᐊᓘᕗᖅ.”
ᒪᓃᑦᑐᖅ ᓯᕗᓂᐊᓂ ᐊᕐᕌᒍᓂ ᒪᕐᕉᖕᓂ ᓇᑉᐸᖓᓂᓗ ᐅᐃᓂᐱᐊᒡᒥ ᐱᕙᒃᖢᓂ ᐊᐅᖕᒥ ᐃᕐᕈᖅᓴᕐᓂᕐᒥ ᐃᓅᓕᓴᐃᓂᐅᔪᒥ ᓯᕗᓂᐊᓂ ᐊᖏᕐᕋᒥ ᐃᓅᓕᓴᖅᑕᐅᔪᓐᓇᕐᓂᖓᓂ, ᐱᖃᑦᑕᖅᓯᒪᔪᒥ ᖄᖏᖅᓯᒪᓕᖅᑐᒥ ᐊᕐᕌᒎᔪᒥ.
“ᑕᐅᓄᙵᐅᔪᒪᔪᓐᓃᓚᐅᖅᐳᖓ,” ᐅᖃᓚᐅᖅᐳᖅ ᒪᓃᑦᑐᖅ ᑐᓂᔭᐅᒐᒥ ᑐᒃᓯᕋᕐᓂᐅᔪᒥ ᐅᑎᕐᓂᖓᓄᑦ ᐅᐃᓂᐱᐊᒡᔪᑦ ᐃᓅᓕᓴᖅᑕᐅᒃᑲᓐᓂᕐᓂᐅᔪᒥ. “ᐅᖃᓚᐅᖅᐳᖓ, ‘ᑐᖁᔭᕆᐊᖃᕈᒪ, ᑐᖁᓂᐊᖅᐳᖓ.’”
ᑲᖏᖅᖠᓂᕐᒥ ᐃᓄᑐᖃᖅ ᐅᖃᓚᐅᖅᐳᖅ ᐊᔪᕐᓇᕐᔪᐊᓚᐅᖅᐳᖅ ᐊᖏᕐᕋᒥ ᐊᐅᓚᖅᓯᒪᔭᕆᐊᒃᓴᖅ.
“ᐃᕐᙳᑕᒃᑲ ᐅᕙᓃᑉᐳᑦ, ᕿᑐᕐᙵᒃᑲ ᐅᔭᓃᑉᐳᑦ,” ᐅᖃᓚᐅᖅᐳᖅ ᒪᓃᑦᑐᖅ, ᐃᓚᒋᐊᖅᓯᓪᓗᓂ ᐊᓯᖏᓐᓂ ᐃᓚᖏᓐᓂ ᐃᑲᔪᓲᖑᖕᒥᕗᑦ ᐃᑲᔪᖅᓱᐃᓂᕐᒥᑦᑕᐅᖅ. “ᓄᐊᕋ ᐅᕙᓃᑉᐳᖅ. ᑕᐅᓇᓃᑎᓪᓗᑕ ᐊᕐᕌᒍᓄᑦ ᒪᕐᕉᖕᓄᑦ ᐊᒻᒪ ᓇᑉᐸᓪᓗᐊᖓᓂ, ᐅᕙᖓᑐᐃᖅ ᐅᐃᒐᓗᓘᓚᐅᖅᐳᒍᑦ.”
“ᐊᖏᕐᕋᖅ ᐊᖏᕐᕋᐅᕗᖅ,” ᐃᓚᒋᐊᖅᓯᓚᐅᖅᐳᖅ ᑐᓗᒐᖅ.
ᒪᓃᑦᑑᑉ ᐊᖅᑯᑎᖓ ᑲᑎᒪᔨᕐᔪᐊᖑᔪᓂ ᐊᖏᖅᑕᐅᓂᐅᔪᓄᑦ ᐊᒻᒪ ᒐᕙᒪᒃᑯᓐᓂ ᑲᑐᔾᔨᖃᑎᒌᖕᓂᐅᔪᒥ ᐊᖏᕐᕋᒥ ᐊᐅᖕᒥ ᐃᕐᕈᖅᓴᕐᓂᕐᒥ ᑲᖏᖅᖠᓂᕐᒥ ᑎᑎᕋᖅᑕᐅᕐᔪᐊᖅᓯᒪᕗᖅ ᐅᓂᒃᑳᕆᑦᑎᐊᖅᑐᒥ The Globe and Mail−ᒥ.
ᐱᕙᓚᐅᖅᐳᖅ ᑎᓴᒪᓂ ᐃᓅᓕᓴᐃᓂᐅᔪᓂ ᐅᓪᓗᓕᒫᒥ, ᐅᓪᓚᒥᒃ ᐅᓐᓄᒧᑦ. ᒫᓐᓇ, ᐅᓐᓄᐊᖏᓐᓇᕐᓂ ᐊᐅᖕᒥ ᐃᕐᕈᖅᓴᕐᓂᕐᒥ, ᐲᖅᐸᒃᖢᓂᐅᒃ ᐅᓪᓛᒃᑯᑦ.
ᑐᓗᒐᖅ ᐅᖃᓚᐅᖅᐳᖅ ᐊᓕᐊᓇᐃᒋᔭᖓ ᐊᔭᒃᑯᖓᓄᙵᐅᓂᕐᒥ ᐊᒻᒪ ᐸᑎᖃᑎᒋᓪᓗᓂᐅᒃ, ᑭᓯᐊᓂ ᐊᑕᐅᓯᐅᔪᖅ ᐱᓇᓱᐊᕐᓂᖓᓂ ᖃᓂᓐᓂᖅᓴᐅᓇᓱᐊᕐᓂᖓᓂ ᒪᓃᑦᑐᕐᒧᑦ.
“ᐊᕙᓂᐊᓗᒃ ᐃᒡᓗᖃᕋᒪ, ᑕᐃᒫᒃ ᐃᒡᓗᑖᕋᓱᐊᖅᐳᖓ ᖃᓂᓐᓂᖅᓴᐅᔪᒥ,” ᐅᖃᓚᐅᖅᐳᖅ ᑐᓗᒐᖅ, ᐅᖃᖅᖢᓂ ᐊᑯᓂᕈᓗᒃ ᐱᓱᖕᓇᕐᒪᑦ ᐃᓛᓐᓂᒃᑯᑦ ᐊᒃᓱᕈᕐᓇᖅᑐᒥ ᓯᓚᒥ ᖃᓄᐃᓐᓂᖓᓂ.
ᒪᓃᑦᑐᖅ ᓱᓕᑦᑎᐊᓚᐅᖅᐳᖅ ᐊᐱᕆᔭᐅᒐᒥ ᖃᓄᐃᓐᓂᖓᓂ ᒫᓐᓇᐅᔪᒥ: “ᐱᐅᓗᐊᙱᑦᑐᖅ, ᑭᓯᐊᓂ ᓱᓕ ᐊᓂᖅᑎᕆᕗᖓ.”