North Arrow ᐅᔭᕋᖕᓂᐊᖅᑐᓕᕆᔨᒃᑯᑦ ᖃᐅᔨᓴᐃᕙᓪᓕᐊᖏᓐᓇᖅᑐᑦ ᖃᓄᖅ ᐱᒻᒪᕆᐅᑎᒋᖕᒪᖔᑕ ᑕᐃᒪᓐ (diamond) ᐅᔭᖅᑲᑦ ᓇᐅᔮᓂ ᐱᓕᕆᕝᕕᒋᔭᖓᓂᒃ ᖃᐅᔨᓴᐃᓂᖃᖅᖢᑎᒃ ᐊᖏᔪᒥᒃ ᐊᐅᔭᖅ.
ᑭᓐ ᐊᐅᕐᓯᑐᕋᖕ, ᑐᑭᒧᐊᒃᑎᑦᑎᔨ North Arrow ᐅᔭᕋᖕᓂᐊᖅᑐᓕᕆᔨᒃᑯᓐᓄᑦ, ᐅᖃᖅᖢᓂ ᑲᒻᐸᓂᒋᔭᐅᔪᖅ ᓂᕆᐅᖕᓂᖃᕐᒪᑦ ᖃᐅᔨᒪᓂᖅᓴᐅᓕᕋᔭᕐᓂᖏᓐᓄᑦ ᖃᓄᖅ ᐱᒻᒪᕆᐅᑎᒋᖕᒪᖔᑕ ᑕᖅᓴᓖᑦ ᑕᐃᒪᓐ ᐅᔭᖅᑲᑦ ᐱᔭᐅᓯᒪᔪᑦ ᐆᒃᑑᑕᐅᓵᓚᐅᖅᑐᒃᑯᑦ.
“ᑕᐃᒪᐅᔪᑦ ᐅᐱᓐᓇᖅᑐᑦ ᑕᐃᒪᓐ ᐅᔭᖅᑲᑦ,” ᑕᐃᒪᓐᓇ ᐅᖃᖅᖢᓂ ᐊᐅᕐᓯᑐᕋᖕ.
ᕙᐃᓐᑯᕙᒥ ᐅᔭᕋᖕᓂᐊᖅᑐᓕᕆᔨᒃᑯᑦ ᑲᒻᐸᓂᓖᑦ ᖃᐅᔨᓴᐃᖏᓐᓇᖅᑐᑦ ᑕᐅᕙᓂ ᐊᖏᓗᐊᙱᑦᑐᒥ ᓄᓇᒥ ᓇᐅᔮᑦ ᓯᓚᑖᓂ ᑕᐃᒪᙵᓂ 2014-ᒥ ᐱᒋᐊᖅᖢᑎᒃ.
ᐊᐅᔭᒃᑯᑦ 2014-ᒥ, North Arrow–ᑯᑦ ᑲᒪᓚᐅᖅᑐᑦ 1,350 - ᑕᓐᓂᒃ ᐅᖁᒪᐃᓐᓂᓕᖕᓂᒃ ᐆᒃᑑᑎᓂᒃ kimberlite-ᓂᒃ ᑕᐅᕙᓂ. ᑕᐃᑲᙵᓪᓗ 234-ᑕᓐᓂᒃ ᐊᖏᓗᐊᙱᑦᑐᓂᒃ ᐆᒃᑑᑎᓂᒃ 2017-ᒥ.
ᑲᒻᐸᓂᒋᔭᐅᔪᖅ ᐅᑎᖅᓯᒪᓕᖅᑐᖅ ᑲᒪᔭᖅᑐᖅᖢᓂ 2,000-ᑕᓐᓂᒃ ᐅᖁᒪᐃᓐᓂᓕᖕᓂᒃ ᐆᒃᑑᑎᓂᒃ. North Arrow ᐅᔭᕋᖕᓂᐊᖅᑐᓕᕆᔨᒃᑯᑦ ᐸᕐᓇᒃᓯᒪᓚᐅᖅᑐᑦ ᐅᑎᕋᔭᕐᓂᕐᒥᓄᑦ ᓇᐅᔮᓄᑦ 2020-ᒥ, ᑭᓯᐊᓂ ᓄᕙᒡᓂᐊᕐᓂᖅ -19 ᓴᖅᑭᓚᐅᖅᑎᓪᓗᒍ ᑭᖑᕙᕆᐊᖅᑕᐅᔭᕆᐊᖃᓕᓚᐅᕐᒪᑦ ᑎᑭᓐᓂᐊᕐᓂᖏᑦ ᐊᒻᒪᓗ ᑮᓇᐅᔭᓕᖅᑐᖅᑕᐅᓂᐊᕐᓂᖓᓄᑦ. ᑲᒻᐸᓂᒋᔭᐅᔪᖅ ᓴᖅᑭᑎᑦᑎᔪᓐᓇᖅᓯᓚᐅᖅᑐᖅ ᐊᖏᕈᑎᒥᒃ Burgundy Diamond ᐅᔭᕋᖕᓂᐊᖅᑐᓕᕆᔨᒃᑯᓪᓗ ᑮᓇᐅᔭᓕᖅᑕᐅᓇᔭᕐᓂᖓᓄᑦ ᑕᒪᓐᓇ ᐅᑭᐅᖑᔪᖅ ᐱᓕᕆᐊᖑᔪᖅ.
ᒪᓕᒃᖢᒋᑦ ᒫᓐᓇᓵᖑᓯᒪᔪᖅ ᐆᒃᑑᑏᑦ, ᑲᒻᐸᓂᒋᔭᐅᔪᖅ ᐅᒃᐱᕈᓱᒃᑐᖅ ᐱᑕᖃᕐᓂᖓᓄᑦ 20-ᒥᓕᔭᓂᒃ ᐊᑭᖃᕋᔭᖅᑐᓂᒃ ᐅᔭᖅᑲᓂᒃ, ᓇᓚᐅᑦᑖᕈᑕᐅᔪᖅ ᓇᓗᓇᕈᔪᒃᖢᓂ. North Arrow-ᑯᑦ ᒫᓐᓇᐅᔪᖅ ᖃᐅᔨᓴᕈᑎᒋᔭᖓ ᓇᓗᓇᐃᖅᓯᓇᓱᒃᑐᖅ ᖃᓄᖅ ᐱᒻᒪᕆᐅᑎᒋᖕᒪᖔᑕ ᑕᐃᒪᓐ ᐅᔭᖅᑲᑦ, ᐱᓗᐊᖅᑐᒥ ᖁᖅᓱᐊᖓᔪᑦ ᑕᐃᒪᓐ ᓇᓂᔭᐅᓯᒪᔪᑦ ᐃᓚᖏᓐᓂᒃ ᖃᐅᔨᓴᖅᑕᔪᓂᒃ.
ᐊᓯᖏᑦᑎᑑᙱᒻᒪᑕ ᐅᔭᖅᑲᑎᑐᑦ ᐊᑭᒋᓇᔭᖅᑕᖏᓪᓕ ᑕᐃᑉᑯᐊ ᓇᓗᓇᙱᑲᐅᑎᒋᖃᑦᑕᕐᒪᑕ ᐅᖁᒪᐃᓐᓂᖏᑦ ᒪᓕᒃᖢᒋᑦ, ᑕᐃᒪᙳᔪᑦ ᐊᑭᖏᑦ ᓇᓗᓇᐃᖅᑕᐅᓲᑦ ᖃᑉᓯᑲᓪᓚᖕᓂᒃ ᐱᔾᔪᑎᖃᖅᖢᑎᒃ, ᓲᕐᓗ ᐊᖏᓂᖏᑦ, ᑕᖅᓴᖏᑦ ᐊᒻᒪᓗ ᓇᓗᓇᐃᔭᖅᑕᐅᑦᑎᐊᖅᓯᒪᔭᕆᐊᖃᕐᓂᖏᑦ.
North Arrow-ᑯᑦ ᓇᓗᓇᐃᔭᐃᓯᒪᓕᐊᓂᒃᑐᑦ ᑕᖅᓴᖏᓐᓂᒃ ᐱᒻᒪᕆᐅᓂᖏᓐᓄᑦ ᖃᐅᔨᓴᖅᑕᐅᓚᐅᖅᑎᓪᓗᒋᑦ Geological Institute of America-ᑯᓐᓄᑦ ᐅᔭᖅᑲᓕᕆᔨᓄᑦ. ᑕᐃᒪᓕ ᖃᐅᔨᓇᓱᒋᐊᖃᓕᖅᑐᑦ ᖃᑉᓯᓂᒃ ᑕᐃᒪᐃᑦᑐᓂᒃ ᐅᔭᕋᖃᕐᒪᖔᑦ ᑕᐅᕙᓂ.
“ᑐᕌᒐᕆᔭᐅᔪᖅ ᐱᓇᓱᒋᐊᖃᕐᓂᕐᒧᑦ ᓈᒻᒪᒃᑐᓂᒃ ᑕᖅᓴᓕᖕᓂᒃ ᑕᐃᒪᓐᓂᒃ ᑕᑯᑎᑦᑎᔪᓐᓇᕐᓂᕐᒧᑦ ᓈᒻᒪᒃᑐᓂᒃ ᐃᓗᓕᖃᕐᓂᖓᓄᑦ ᐱᓕᕆᓂᐊᕐᓂᖅᐳᑦ ᐱᔾᔪᑎᖃᑦᑎᐊᕈᓐᓇᖁᑉᓗᒍ,” ᑕᐃᒪᓐᓇ ᐅᖃᖅᖢᓂ ᐊᐅᕐᓯᑐᕋᖕ.
ᐊᓯᖏᑦᑎᑑᙱᑦᑐᖅ ᐅᔭᕋᖕᓂᐊᖅᐸᒃᑐᓂᒃ ᓄᓇᕗᒥ, North Arrow-ᑯᑦ ᐱᓕᕆᕝᕕᒋᔭᖓ ᑲᒥᓯᓇᒃᑯᑦ ᓄᓇᖓᓃᑦᑐᖅ. ᑐᑭᖃᖅᑐᖅ Hᐊᒻᓚᒃᑯᑦ ᓄᓇᖓᓃᓐᓂᖓᓄᑦ.
ᑕᐃᒪᐃᒻᒪᑦ, North Arrow-ᑯᑦ ᐱᓕᕆᖃᑎᖃᑦᑎᐊᖅᓯᒪᔪᑦ ᓄᓇᓕᐅᑉ Hᐊᒻᓚᒃᑯᖏᓐᓂᒃ ᐱᔪᓐᓇᐅᑎᑖᖅᑎᑕᐅᔪᓐᓇᕐᓂᕐᒧᑦ ᐅᔭᕋᒃᓯᐅᕐᓂᐊᕐᓗᓂ. ᐊᐅᕐᓯᑐᕋᖕ ᐅᖃᖅᖢᓂᓗ ᓄᓇᓕᐅᔪᖅ ᐃᓚᐅᖃᑕᐅᓪᓚᕆᒐᔭᕐᓂᖓᓄᑦ ᐋᔩᖃᑎᒌᒃᑐᓂᒃ ᐅᔭᕋᐃᑦ ᒥᒃᓵᓄᑦ ᐱᔪᓐᓇᐅᑎᖃᕐᓂᕐᒧᑦ ᒪᑐᐃᖅᓯᓇᔭᖅᐸᑕ ᐅᔭᕋᖕᓂᐊᕐᕕᖕᒥ.
“ᑕᐃᒪᐅᖕᒪᑕ ᐊᒥᓱᑦ ᑲᒪᒋᔭᐅᔭᕆᐊᓖᑦ ᐅᔭᕋᖕᓂᐊᖅᑐᓕᕆᓂᒃᑯᑦ ᑲᒪᒋᔭᐅᔭᕆᐊᖃᕋᔪᙱᑦᑐᑦ,” ᑕᐃᒪᓐᓇ ᑐᑭᓯᑎᑦᑎᒋᐊᖅᖢᓂ ᐊᐅᕐᓯᑐᕋᖕ.
ᓇᓃᓐᓂᖓ ᑕᐃᒪᑦᑕᐅᖅ ᐱᔾᔪᑎᒋᑉᓗᒍ ᓴᓇᑎᑦᑎᔪᓐᓇᖅᓯᒪᔪᑦ ᐊᒥᓱᓂᒃ ᓄᓇᖅᑲᑎᒌᖕᓂᒃ ᐃᑲᔪᖅᓯᒪᔪᓂᒃ ᐱᓕᕆᐊᖑᔪᒃᑯᑦ ᐅᑭᐅᓂᒃ ᖄᖏᖅᓯᒪᔪᓂᒃ.
ᐊᐅᔭᐅᔪᖅ North Arrow-ᑯᑦ ᓴᓇᑎᑦᑎᓂᐊᖅᑐᑦ 25-ᓂᒃ ᓇᐅᔮᕐᒥᐅᓂᒃ ᑕᒡᕘᓇ ᐱᓕᕆᐊᖑᔪᒃᑯᑦ.