ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᒻᒪᓗ ᓴᒃᑯᒃᑯᑦ ᐱᓕᕆᖃᑎᒌᒃᖢᑎᒃ ᓴᖅᑭᑎᑦᑎᓯᒪᔫᒃ ᓄᑖᒥᒃ ᑯᐊᐳᕇᓴᒥᒃ ᐊᐅᓚᑦᑎᔨᐅᓂᐊᖅᑐᒥᒃ ᐱᕙᓪᓕᐊᑎᑦᑎᓂᕐᒧᑦ ᑭᕙᓪᓕᕐᒥ ᐅᒃᑳᓕᕆᓂᕐᒧᑦ ᖃᕆᑕᐅᔭᓕᕆᓂᕐᒧᓪᓗ ᐱᓕᕆᐊᖑᓇᓱᒃᑐᒥᒃ. ᑯᐊᐳᕇᓴᐅᔪᖅ ᑕᐃᔭᐅᑉᓗᓂ ᐃᒪᓐᓇ ᓄᑭᒃ, ᐊᑐᓕᖅᑎᖅᑕᐅᓪᓚᑦᑖᓚᐅᖅᑐᖅ ᒫᑦᓯᒥ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᐊᒻᒪᓗ ᓴᒃᑯᒃᑯᑦ ᓂᕈᐊᕐᓂᖃᖅᑳᖅᖢᑎᒃ ᑕᒪᐃᓐᓄᑦ ᐃᑲᔪᖅᑐᖅᑕᐅᔪᒃᑯᑦ ᑎᒥᐅᔪᒥᒃ ᓴᖅᑭᑎᑦᑎᓇᔭᕐᓂᕐᒧᑦ.
ᐱᒋᐊᖅᑎᑦᑎᔨᐅᓂᐊᓕᖅᑐᑦ ᐱᕙᓪᓕᐊᑎᑦᑎᓂᕐᒧᑦ ᐅᒃᑳᓕᕆᓂᒃᑯᑦ ᖃᕆᑕᐅᔭᓕᕆᓂᒃᑯᓪᓗ ᐱᓕᕆᐊᖑᓇᓱᒃᑐᒥᒃ ᓴᖅᑭᑎᑦᑎᓂᐊᖅᑐᒥᒃ ᓴᓗᒪᔪᒥᒃ ᐅᒃᑳᓕᕆᓂᒃᑯᑦ ᖃᕆᑕᐅᔭᓕᕆᓂᒃᑯᓪᓗ ᐱᔨᑦᓯᕋᐅᑎᓂᒃ ᑭᕙᓪᓕᕐᒧᑦ.
“ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᒻᒪᓗ ᓴᒃᑯᒃᑯᑦ ᐱᓕᕆᐊᖑᔪᓂᒃ ᐸᕐᓇᐃᓂᒃᑯᑦ ᐊᖏᖃᑎᒌᓚᐅᖅᑑᒃ ᑕᒪᓐᓇ ᐊᖏᔫᑎᓪᓗᒍ ᐱᓕᕆᐊᖑᓇᓱᒃᑐᖅ… ᐃᓱᒪᓚᐅᕋᑉᑕ ᐊᑑᑎᖃᕐᓂᖅᓴᐅᓇᔭᕐᓂᖓᓄᑦ ᓴᖅᑭᑎᑦᑎᒍᑉᑕ ᑎᒥᐅᔪᒥᒃ ᓲᕐᓗ ᓄᑭᒥᒃ,” ᑕᐃᒪᓐᓇ ᑐᑭᓯᑎᑦᑎᒋᐊᖅᖢᓂ ᖃᑯᖅᑎᓐᓂᖅ, ᓂᕈᐊᖅᑕᐅᓚᐅᖅᑐᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪᓗ ᓴᒃᑯᒃᑯᓐᓄᑦ ᐊᖓᔪᖅᑳᖑᓂᐊᕐᓂᕐᒧᑦ ᓄᑭᒃ ᑯᐊᐳᕇᓴᒃᑯᖏᓐᓂᒃ.
ᖃᑯᖅᑎᓐᓂᖅ ᐊᖓᔪᖅᑳᖑᖕᒥᔪᖅ ᑐᑭᒧᐊᒃᑎᑦᑎᔨᐅᑉᓗᓂᓗ ᓴᒃᑯᒃᑯᓐᓂᒃ. ᒪᓕᒃᖢᒍ ᒐᕙᒪᒃᑯᑦ ᐊᑎᓕᐅᖅᑕᐅᕝᕕᖓ, ᐊᓯᖏᑦ ᐱᖓᓲᔪᑦ ᑲᑎᒪᔩᑦ ᓄᑭᒃᑯᓐᓄᑦ ᐅᑯᐊᖑᔪᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓ ᑯᓄ ᑕᑦᑐᐃᓂ ᐊᒻᒪᓗ ᐲᑕ ᖃᑎᒑᑦᓯᐊᖅ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑲᑎᒪᔨᖓ ᐃᒡᓗᓕᒑᕐᔪᖕᒧᑦ, ᐊᒻᒪᓗ ᓴᒃᑯᒃᑯᑦ ᑲᑎᒪᔨᖏᑦᑕ ᐃᒃᓯᕙᐅᑕᖓ ᑎᓄ ᐳᕈᔅ.
ᓄᑖᖅ ᑯᐊᐳᕇᓴᐅᔪᖅ 51%-ᒥᒃ ᓇᖕᒥᓂᖁᑎᒋᔭᐅᔪᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ 49% ᐊᒥᐊᒃᑯᖓ ᓇᖕᒥᓂᖁᑎᒋᔭᐅᑉᓗᓂ ᓴᒃᑯᒃᑯᓐᓄᑦ.
KPMG-ᑯᑦ ᐊᑎᓕᐅᓚᐅᖅᑐᑦ ᑮᓇᐅᔭᓕᕆᓂᒃᑯᑦ ᐅᖃᐅᔾᔨᒋᐊᖅᑎᐅᓂᐊᕐᓂᕐᒧᑦ
ᐅᖃᖃᑎᒌᒍᑕᐅᓯᒪᔪᑦ ᐅᒃᑳᓕᕆᓂᒃᑯᑦ/ᖃᕆᑕᐅᔭᓕᕆᓂᒃᑯᑦ ᐊᒃᑐᐊᔾᔪᑎᓕᕋᔭᕐᒪᖔᑉᑕ, ᓄᓇᕗᑦ ᓂᒋᐊᓂ ᒪᓂᑑᐸᒧᑦ ᐊᑯᓂ ᐅᖃᖃᑎᒌᒍᑕᐅᓯᒪᓕᖅᑐᑦ ᐊᒥᓱᓂᒃ ᐅᑭᐅᓂᒃ. ᒪᓕᒃᖢᒍ ᖃᑯᖅᑎᓐᓂᐅᑉ ᐅᖃᐅᓯᕆᓯᒪᔭᖓ, ᓴᖅᑭᑎᑕᐅᑎᓪᓗᒍ ᓄᑭᒃ ᐱᒻᒪᕆᐊᓗᒃᑯᑦ ᓯᕗᒻᒧᐊᒃᐸᓪᓕᐊᔾᔪᑕᐅᔪᖅ ᐱᙳᖅᑎᑕᐅᓂᐊᕐᓂᖓᓄᑦ ᐱᓕᕆᐊᖑᔪᒪᔫᑉ.
“ᑕᒪᓐᓇ ᐱᓕᕆᐊᖑᓇᓱᒃᑐᖅ ᐱᒻᒪᕆᐊᓗᒃ ᑭᕙᓪᓕᕐᒧᑦ, ᑭᓯᐊᓂ ᐱᒻᒪᕆᐊᓗᒃᑕᐅᖅ ᓄᓇᕗᓗᒃᑖᒧᑦ. ᐊᒻᒪᓗ ᑲᓇᑕᓕᒫᕐᒥ ᐱᕙᓪᓕᐊᑎᑕᐅᓇᓱᒃᑎᓪᓗᒍ. ᖁᕕᐊᓱᑦᑎᐊᖅᑐᒍᑦ ᓂᕆᐅᖕᓂᖃᖅᖢᑕᓗ ᓱᓇᑦ ᑲᒪᒋᔭᐅᕙᓪᓕᐊᓂᐊᓕᕐᓂᖏᓐᓄᑦ.” ᑕᐃᒪᓐᓇ ᐅᖃᖅᖢᓂ ᖃᑯᖅᑎᓐᓂᖅ.
ᐊᑕᐅᓯᖅ ᓄᑭᒃᑯᑎᒍᑦ ᓯᕗᓪᓕᖅᐹᖅ ᑎᒥᙳᖅᑎᑕᐅᑎᓪᓗᒍ ᐊᑎᓕᐅᕆᐊᖃᓚᐅᖅᑐᑦ ᐊᖏᕈᑎᒥᒃ ᑲᓇᑕᒥ ᑮᓇᐅᔭᖃᕐᕕᒋᔭᐅᔪᑉᓗ Canada Infrastructure Bank-ᓗ. ᑲᒻᐸᓂᐅᔪᖅ ᓴᓇᑎᑦᑎᓕᕐᒥᔪᖅ KPMG-ᑯᓐᓂᒃ ᑮᓇᐅᔭᓕᕆᓂᒃᑯᑦ ᐅᖃᐅᔾᔨᔨᐅᓕᖅᖢᑎᒃ ᑕᒡᕘᓇ ᐱᓕᕆᐊᖑᔪᒃᑯᑦ.
“ᐊᑎᓕᐅᖅᑕᐅᖃᑕᐅᓯᒪᓕᖅᑐᑦ ᓄᑭᒃᑯᑎᒍᑦ ᑕᒪᓐᓇ ᐱᓕᕆᐊᖑᖁᑉᓗᒍ ᑮᓇᐅᔭᓕᕆᓂᒃᑯᑦ,” ᖃᑯᖅᑎᓐᓂᖅ ᐅᖃᐅᔾᔨᓚᐅᖅᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ.
$3 ᒥᓕᔭᓐ ᒐᕙᒪᑐᖃᒃᑯᓐᓂᙶᖅᑐᖅ
ᑐᓴᒐᒃᓴᖅ ᓄᑭᒃ ᓴᖅᑭᑎᑕᐅᓯᒪᓂᖓᓄᑦ ᓇᓗᓇᐃᖅᑕᐅᓚᐅᖅᑐᖅ ᒐᕙᒪᑐᖃᒃᑯᑦ ᑐᓴᖅᑎᑦᑎᑎᓪᓗᒋᑦ $3 ᒥᓕᔭᓐ ᐃᑲᔪᑕᐅᓂᐊᕐᓂᖓᓄᑦ ᑲᔪᓯᑎᑕᐅᔪᓐᓇᖁᑉᓗᒋᑦ ᖃᓄᖅ ᐊᑑᑎᖃᕋᔭᕐᓂᖓᓄᑦ ᖃᐅᔨᓴᕈᑏᑦ ᕿᒥᕐᕈᔾᔪᑏᓪᓗ, ᑲᔪᓯᑎᑕᐅᓯᒪᓕᖅᑐᑦ ᖃᑉᓯᑲᓪᓚᖕᓂᒃ ᐅᑭᐅᓂᒃ.
ᖃᑯᖅᑎᓐᓂᖅ ᐅᖃᖅᖢᓂ ᑕᐃᑉᑯᐊ ᖃᐅᔨᓴᕈᑕᐅᔪᑦ ᐊᑑᑎᖃᕐᓂᐊᕐᒪᑕ ᓄᑭᒃᑯᑦ ᒪᓕᑦᑎᐊᕈᓐᓇᖁᑉᓗᒋᑦ ᓄᓇᕗᒥ ᐊᕙᑎᓕᕆᔨᒃᑯᑦ ᒪᓕᒋᐊᖃᕐᓂᕋᖅᓯᒪᔭᖏᓐᓂᒃ, ᓄᓇᕗᒥᓗ ᐃᒪᕐᒧᑦ ᑲᑎᒪᔨᒃᑯᓐᓄᑦ ᒪᓕᖁᔭᐅᓯᒪᔪᑦ ᐊᒻᒪᓗ ᐊᓯᖏᑦᑕ ᓄᓇᓕᖕᓂᒃ ᐅᖃᖃᑎᒌᒍᑕᐅᓯᒪᔪᒃᑯᑦ ᐊᑐᖅᑕᐅᔭᕆᐊᖃᕐᓂᐊᖅᑐᑦ ᑕᒪᓐᓇ ᐱᓕᕆᐊᖑᔪᒪᔪᖅ ᐊᖏᖅᑕᐅᔪᓐᓇᖁᑉᓗᒍ.
ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᒥᔪᑦ ᐃᓕᓯᓂᐊᕐᓂᕋᖅᖢᑎᒃ $40.4 ᒥᓕᔭᓂᒃ ᐱᖓᓱᓂᒃ ᐅᑭᐅᓂᒃ ᑕᒡᕙᓂ ᐅᑭᐅᒥ ᑮᓇᐅᔭᓕᖅᑕᐅᓯᒪᔪᒃᑯᑦ ᐃᑲᔫᑕᐅᖁᑉᓗᒍ ᖃᓄᖅ ᐊᑑᑎᖃᕐᓂᐊᕐᓂᖓᓄᑦ ᓇᓗᓇᐃᔭᐃᓂᕐᒧᑦ ᐊᒻᒪᓗ ᐸᕐᓇᐃᓂᕐᒧᑦ ᐅᒃᑳᓕᕆᓂᒃᑯᑦ ᐊᒻᒪᓗ ᖃᕆᑕᐅᔭᓕᕆᓂᒃᑯᑦ ᓴᕕᒐᐅᔭᓕᖅᑐᐃᓂᕐᒧᑦ ᐅᑭᐅᖅᑕᖅᑐᒥ. ᖃᑯᖅᑎᓐᓂᖅ ᐅᖃᖅᖢᓂ ᓄᑭᒃᑯᑦ ᐊᑐᕈᒪᓂᐊᖅᑐᑦ ᑕᒡᕙᙵᑦ ᑮᓇᐅᔭᒥᒃ ᑭᕙᓪᓕᕐᒥ ᐅᒃᑳᓕᕆᓂᒃᑯᑦ ᖃᕆᑕᐅᔭᓕᕆᓂᒃᑯᓪᓗ ᐱᓕᕆᐊᖑᔪᒧᑦ.
ᐊᒻᒪᓗᑦᑕᐅᖅ ᐃᓄᐃᑦ ᑮᓇᐅᔭᖏᑦᑎᒍᑦ, ᓄᑭᒃᑯᑦ ᕿᓂᕐᓂᐊᖅᑐᑦ ᓇᖕᒥᓂᓕᖕᓂᒃ ᐱᕈᖅᑎᑦᑎᔪᒪᓇᔭᖅᑐᓂᒃ ᐊᒻᒪᓗ ᐱᓕᕆᖃᑎᒃᓴᓂᒃ.
ᑯᐊᐳᕇᓴᐅᔪᒃᑯᑦ ᐱᓕᕆᐊᖑᒋᐊᕐᓂᐊᓕᕐᒥᔪᖅ ᓂᕈᐊᖅᖠᕐᓂᖅ ᐱᕙᓪᓕᐊᑎᑦᑎᔨᒃᓴᓂᒃ ᐱᓕᕆᖃᑎᒃᓴᓂᒃ ᐱᓕᕆᓯᒪᓪᓚᕆᒃᑐᓂᒃ ᐸᕐᓇᐃᓂᒃᑯᑦ ᐊᑐᓕᖅᑎᕆᓂᒃᑯᓪᓗ ᐅᒃᑳᓕᕆᔾᔪᑎᓂᒃ.
ᖃᑯᖅᑎᓐᓂᖅ ᐅᖃᖅᖢᓂ ᓄᑭᒃᑯᑦ ᓂᕆᐅᖕᒪᑕ ᓂᕈᐊᖅᖠᕈᒪᓂᕐᒧᑦ ᐱᓕᕆᖃᑎᒃᓴᒥᓂᒃ ᐊᐅᔭᐅᔪᖅ ᐃᓱᓕᖅᑳᖅᑎᓐᓇᒍ.
“ᐊᒐᓯᒥ ᖃᐅᔨᒪᓕᕐᓂᐊᖅᑐᒍᑦ ᑭᒃᑯᑦ ᐱᕙᓪᓕᐊᑎᑦᑎᔨᒋᓕᕐᓂᐊᕐᒪᖔᑉᑎᒍᑦ,” ᑕᐃᒪᓐᓇ ᐅᖃᖅᖢᓂ ᖃᑯᖅᑎᓐᓂᖅ.
“ᑕᒪᓐᓇ ᓇᓗᓇᕈᓐᓃᖅᐸᑦ, ᐱᓕᕆᖃᑎᒋᓂᐊᖅᑕᖅᐳᑦ ᐋᖅᑭᖕᓂᐊᖅᑐᖅ ᓄᑭᒃᑯᑦ ᑭᒡᒐᖅᑐᐃᔾᔪᑎᖏᓐᓄᑦ ᐊᒻᒪᓗ ᓱᓇᑦ ᓯᕗᒻᒧᐊᒍᑎᒋᓕᕐᓂᐊᕐᒪᖔᑉᑎᒍᑦ.”
ᐊᖏᔪᑦ ᐱᕚᓪᓕᕈᑎᑦ ᐅᒃᑳᓕᕆᓂᒃᑯᑦ ᖃᕆᑕᐅᔭᓕᕆᓂᒃᑯᓪᓗ
ᕿᓚᒻᒥᐅᓂᖅᐹᒃᑯᑦ ᓇᓚᐅᑦᑖᕈᑎᒃᓴᑦ ᐊᑭᒋᓂᐊᖅᑕᖏᑦ ᐱᓕᕆᐊᖑᔪᒃᑯᑦ $1.6 ᐱᓕᔭᒃᑯᑦ. ᐱᓕᕆᖃᑎᒌᖕᓂᒃᑯᑦ ᐱᕙᓪᓕᐊᑎᑦᑎᓂᖅ ᐅᒃᑳᓕᕆᓂᒃᑯᑦ ᖃᕆᑕᐅᔭᓕᕆᓂᒃᑯᓪᓗ ᓴᖅᑭᑎᑦᑎᔪᓐᓇᖅᑐᑦ ᐊᖏᔪᒥᒃ ᐱᕚᓪᓕᕈᑎᒃᓴᓂᒃ ᑭᕙᓪᓕᕐᒧᑦ.
ᒪᓕᒃᖢᒋᑦ ᑐᑭᓯᒋᐊᕈᑎᒃᓴᑦ ᓴᖅᑭᑎᑕᐅᓯᒪᔪᑦ www.kivalliqlink.ca-ᑯᑦ, ᐅᒃᑳᓕᕆᓂᒃᑯᑦ ᑎᑭᑕᐅᓯᒪᓕᕐᓂᐊᕐᓂᕐᒧᑦ ᐊᑭᓗᒃᓯᕚᓪᓕᖅᑎᑦᑎᓂᐊᖅᑐᖅ 50%-ᒧᑦ. ᑕᐃᒪᐃᑎᓪᓗᒍ ᖃᕆᑕᐅᔭᓕᕆᓂᒃᑯᑦ ᓱᒃᑲᒃᑎᑦᑎᕚᓪᓕᖅᑎᑦᑎᓂᐊᖅᑐᖅ 3,000%-ᑎᒃᑯᑦ, ᖃᕆᑕᐅᔭᒃᑯᓪᓗ ᓴᖅᑭᑎᑦᑎᖃᑦᑕᕐᓂᖅ 1,000-%-ᑎᒥᒃ ᓱᑲᓂᖅᓴᐅᓕᕐᓂᐊᖅᖢᓂ.
ᖃᕆᑕᐅᔭᓕᕆᓂᖅ ᐃᓚᐅᖃᑕᐅᑎᖦᖢᒍ ᐅᒃᑳᓕᕆᓂᕐᒧᑦ, ᑭᕙᓪᓕᕐᒥ ᐊᑐᙱᓐᓂᖅᓴᐅᓕᕈᓐᓇᕐᓂᐊᖅᑐᑦ ᐅᖅᓱᐊᓗᖕᒥᒃ, ᑕᒪᓐᓇ ᐊᑭᓗᒃᓯᕚᓪᓕᖅᑎᑦᑎᓂᐊᖅᑐᖅ ᐅᒃᑳᓕᕆᓂᒃᑯᑦ ᐊᒻᒪᓗ ᐱᐅᓯᕚᓪᓕᖅᑎᑦᑎᓗᓂ ᓄᓇᕗᒥ ᐳᔪᕐᓗᐃᑦ ᓴᖅᑭᖃᑦᑕᕐᓂᖏᓐᓄᑦ.
ᐊᒻᒪᓗᑦᑕᐅᖅ ᑖᑉᑯᑎᒎᓇᖅ ᐃᑲᔫᑎᒃᑯᑦ, ᐊᑭᓗᒃᓯᕚᓪᓕᖅᑎᑦᑎᓂᕐᒨᖓᕙᓪᓕᐊᓂᐊᖅᑎᓪᓗᒋᑦ ᐊᒻᒪᓗ ᓴᓗᒪᓂᖅᓴᒃᑯᑦ ᐅᒃᑳᓕᕆᔾᔪᑎᖃᓕᕐᓂᐊᖅᑎᓪᓗᒋᑦ ᐱᕈᖅᑎᑦᑎᒃᑲᓐᓂᕈᒪᔪᑦ ᑭᕙᓪᓕᕐᒥ ᑕᐃᒪᐅᓕᕐᓂᐊᖅᑐᑦ.
“ᑕᒪᓐᓇ ᓴᖅᑭᑎᑦᑎᔪᓐᓇᖅᑐᖅ ᑮᓇᐅᔾᔭᒃᓴᕈᑎᒃᓴᓄᑦ ᑭᕙᓪᓕᕐᒥ ᓯᕗᓂᒃᓴᒧᑦ, ᓄᓇᒥᙶᖅᑐᓂᒃ ᐊᑐᒃᑲᓐᓂᕈᓐᓇᕐᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᖃᑯᖅᑎᓐᓂᖅ.