ᐊᖏᓚᐅᙱᓚᖅ Canada Goose–ᑯᓐᓂ 2018–ᒥ ᓄᓇᕐᔪᐊᒥ ᐱᓕᕆᔨᐅᔪᑦ ᐱᓕᕆᖃᑎᖃᕈᒪᑎᓪᓗᒋᑦ ᕕᒃᑐᐊᕆᐊᐅᑉ ᐅᑭᐅᖅᑕᖅᑐᒥ ᐊᓐᓄᕌᓕᐊᖏᓐᓂ ᓯᕗᓪᓕᖅᐸᐅᔪᒥ ᐱᓕᕆᐊᒃᓴᖅ ᐊᑎᒋᒥ, ᑭᓯᐊᓂ ᑲᖏᖅᖠᓂᕐᒥᐅᑕᖅ ᕕᒃᑐᐊᕆᐊ ᑲᑯᒃᑎᓐᓂᖅ ᐋᒃᑳᒃᑲᓐᓂᕈᓐᓇᓚᐅᙱᓚᖅ ᒫᓐᓇᐅᔪᒥ.
“ᓂᐅᕕᕐᕕᖃᓚᐅᖅᐳᖓ ᐃᖃᓗᖕᓂ ᐊᒻᒪᓗ ᑐᕌᖅᑎᑦᑎᓂᖃᕈᓐᓇᓚᐅᙱᓚᖓ ᐊᑯᓂᐅᓂᐅᔪᒥ ᐱᓕᕆᐊᒃᓴᐅᔪᒧᑦ,” ᐅᖃᓚᐅᖅᐳᖅ ᑲᑯᒃᑎᓐᓂᖅ 2018–ᒥ ᐱᕕᒃᓴᖃᕐᓂᐅᔪᒥ.
“ᐅᖃᖃᑎᒌᖏᓐᓇᓚᐅᖅᐳᒍᑦ ᐊᒻᒪ ᖃᐅᔨᒋᐊᒃᑲᓐᓂᕐᒪᑕ ᐆᒧᖓ ᐱᖓᔪᖓᓐᓂ ᑲᑎᙵᓂᐅᔪᒧᑦ, ᖃᐅᔨᒪᓚᐅᖅᐳᖓ ᐱᓕᕆᔭᕆᐊᖃᕐᓂᓐᓂ.”
Canada Goose–ᑯᑦ ᐱᓕᕆᐊᒃᓴᖅ ᐊᑎᒋ ᐱᕙᓪᓕᐊᑎᑕᐅᓚᐅᖅᐳᖅ ᓴᖅᑭᑎᑦᑎᓂᕐᒧᑦ ᐃᓅᖃᑎᒌᖑᔪᓂ ᓇᖕᒥᓂᖃᕐᓂᐅᔪᓄᑦ ᐱᕕᒃᓴᖃᕐᓂᐅᔪᓂ ᐃᓄᖕᓄᑦ ᓴᓇᔨᐅᔨᐅᔪᓄᑦ ᐊᖏᓛᖑᔪᒥ ᐱᔪᓐᓇᕐᓂᕆᔭᖓᓂ ᑲᒻᐸᓂᐅᑉ ᐱᓕᕆᕝᕕᖓᓂ ᑕᑯᒃᓴᐅᑎᑦᑎᓂᕐᒧᑦ ᐃᓄᐃᑦ ᓴᓇᒃᑲᐅᓂᕆᔭᖏᓐᓂ.
ᑲᑯᒃᑎᓐᓂᖅ ᐱᓕᕆᖃᑎᖃᓚᐅᖅᐳᖅ ᖃᐃᖁᔭᐅᓯᒪᓪᓗᓂ ᓴᓇᔨᐅᓪᓗᓂ 2022–ᒧᑦ ᓴᖅᑭᑎᑕᐅᓂᖓᓂ ᐱᓕᕆᐊᒃᓴᐅᔪᒥ. ᓴᓇᓚᐅᖅᐳᖅ ᐱᖓᓱᓂ ᓴᓇᓯᒪᓂᐅᔪᓂ: ᑲᑯᒃᑎᓐᓂᖅ ᖁᓕᑦᑕᐅᔭᖅ, ᑲᑯᒃᑎᓐᓂᖅ ᖁᓂᕈᕐᒥ ᔭᐃᑲᖕᒥ ᐊᒻᒪ ᑲᑯᒃᑎᓐᓂᖅ ᔭᐃᑲᖕᒥ.
“ᐅᓇ ᑲᑎᙵᓂᐅᔪᖅ ᑲᔪᖏᖅᓴᖅᑕᐅᓚᐅᖅᐳᖅ ᐱᕈᖅᓴᓂᕆᓚᐅᖅᑕᓐᓂ ᐊᒻᒪ ᐅᓂᒃᑳᖅᑐᐊᓐᓂ ᐅᓂᒃᑳᕆᕗᖅ ᐊᒥᓱᓂ ᐊᔾᔨᒌᙱᕈᓘᔭᖅᑐᓂ ᐱᓕᕆᓂᐅᔪᓂ,” ᐅᖃᓚᐅᖅᐳᖅ ᑲᑯᒃᑎᓐᓂᖅ.
“ᑕᐃᒪᓐᓇᑎᑐᑦ ᓇᖕᒥᓂᖅ ᓴᓇᐅᒐᕆᓯᒪᔭᓐᓂ, ᑲᓚᖓᓂ ᐊᔾᔨᒌᙱᕈᓘᔭᖅᑐᓂ ᑲᔪᖏᖅᓴᖅᑕᐅᕗᖅ ᐊᖅᓴᕐᓂᓂ – ᖁᔭᓕᓂᐅᔪᒥ ᐅᓐᓄᖕᒥ ᕿᓚᖓᓐᓂ ᐊᖏᕐᕋᓐᓂ ᑲᖏᖅᖠᓂᕐᒥ. ᐊᔾᔨᒌᙱᑦᑐᓂ ᑲᓚᖃᕐᓂᐅᔪᓂ ᑕᑯᒃᓴᐅᑎᑕᐅᒋᕗᖅ ᐊᑐᓂ ᓴᓇᓯᒪᓂᐅᔪᓂ, ᖃᓄᐃᓕᖓᓂᐅᔪᖅ ᐃᓚᓕᐅᔾᔨᒐᔪᒃᑕᓐᓂ ᓴᓇᐅᒐᓐᓂ.”
ᓴᖅᑭᑎᑦᑎᓚᐅᕆᕗᖅ ᐊᔾᔨᐅᙱᑦᑐᒥ ᑲᑭᓃᕐᓂ ᓯᓂᖓᓂ ᑕᑯᒃᓴᐅᓕᒫᖅᑐᖅ ᑲᑎᙵᓂᐅᔪᒥ.
“ᑲᑭᓃᑦ ᓯᓂᖓ ᐅᓂᒃᑳᖅᑐᐊᕆᑐᐃᓐᓇᙱᓚᕋ ᑭᓯᐊᓂ ᐅᓂᒃᑳᖅᑐᐊᖑᕗᖅ ᐃᓕᖅᑯᓯᓐᓂ ᐊᒻᒪ ᐱᐅᓯᑐᖃᓐᓂ,” ᐅᖃᓚᐅᖅᐳᖅ ᑲᑯᒃᑎᓐᓂᖅ. “ᐃᓄᐃᑦ ᐊᑯᓂᐊᓗᒃ ᐊᑐᓕᒪᓂᖃᖅᐳᑦ ᐱᖅᑯᓯᑐᖃᖅᑎᒍᑦ ᑲᑭᓃᕐᓂ. ᓴᓇᓯᒪᓂᐅᔪᑦ ᐊᒻᒪᓗ ᑐᑭᖏᑦ ᐊᔾᔨᒌᙱᕈᓘᔭᖅᐳᑦ ᐃᓄᖕᓂ ᐊᒻᒪ ᓄᓇᓕᐅᔪᓂ. ᐅᓇ ᑐᕌᖔᔪᖅ ᑭᒡᒐᖅᑐᐃᕗᖅ ᐃᖅᑲᐅᒥᓇᖅᑐᓂ ᖃᓄᐃᓐᓂᐅᔪᓂ ᐃᓅᓯᓐᓂ, ᓴᙱᓂᓐᓂ ᐊᒻᒪᓗ ᖁᔭᓕᔾᔪᑕᐅᕗᖅ ᐊᖓᔪᖅᑳᓐᓄᑦ ᐊᒻᒪ ᐸᓂᓐᓄᑦ, ᐃᑲᔪᖅᓱᐃᖏᓐᓇᐅᔭᖅᑐᒥ.”
ᓴᓇᔭᐅᓂᖓᓂ ᐱᓕᕆᓂᐅᔪᖅ ᐊᕐᕌᒍᓕᒫᒥ ᐊᒻᒪ ᓇᑉᐸᖓᓂ. ᑲᑯᒃᑎᓐᓂᖅ ᐊᓕᐊᓇᐃᒋᔭᖃᓚᐅᖅᐳᖅ ᑲᑐᔾᔨᖃᑎᒌᖕᓂᖓᓂ Canada Goose–ᑯᓐᓂ ᐊᒻᒪ ᐃᓕᑦᑎᕙᓪᓕᐊᓪᓗᓂ ᐱᓕᕆᑎᓪᓗᒋᑦ. ᑐᕌᒐᕆᔭᖓ ᑲᑎᑎᕆᓂᕐᒥ ᐱᖅᑯᓯᑐᖃᕐᒥ ᒫᓐᓇᓕᓴᐅᔪᓄᑦ ᓴᓇᓯᒪᓂᐅᔪᓄᑦ.
ᐱᓕᕆᐊᒃᓴᐅᔪᖅ ᑕᐃᓚᐅᖅᐸᖓ ᑲᔪᖏᖅᓴᐃᓂᐅᔪᒥ.
“ᒥᖅᓱᕐᓂᖅ ᐱᖅᑯᓯᑐᖃᖅᑎᒍᑦ ᐊᓐᓄᕌᓂ ᐱᒻᒪᕆᐅᓪᓗᓂ ᐃᓚᒋᔭᐅᕗᖅ ᐃᓅᓯᕐᒥ ᐅᑭᐅᖅᑕᖅᑐᒥ, ᐃᓄᖕᓄᑦ ᐱᓗᐊᖅᑐᒥ,” ᐅᖃᓚᐅᖅᐳᖅ ᑲᑯᒃᑎᓐᓂᖅ. “ᐅᓇ ᐊᔪᙱᓐᓂᐅᔪᖅ ᑐᓂᔭᐅᓯᒪᕗᖅ ᐱᐅᓯᖃᑎᒌᖑᔪᓂ ᐱᐅᓯᖃᑎᒌᖑᔪᓄᑦ. ᓴᓇᐅᒐᔨᕆᔨᐅᕗᒍᑦ, ᐅᓂᒃᑳᓲᖑᕗᒍᑦ ᐅᓂᒃᑳᖅᑐᐊᑦᑎᓐᓂ ᓴᓇᐅᒐᑦᑎᓐᓄᑦ. ᓴᓇᐅᒐᑦᑎᒍᑦ ᐊᓐᓇᐅᒪᓇᓱᐊᕐᓂᕐᒥ, ᐃᓅᓯᕆᕙᕗᑦ.”
ᐊᒻᒪ ᓇᒃᓴᕐᓂᕐᒥ ᐅᑯᓂᖓ ᓴᓇᐅᒐᐅᔪᓂ ᓄᓇᕐᔪᐊᒧᑦ ᑕᑯᒃᓴᐅᑎᑦᑎᓂᐅᔪᒃᑯᑦ ᐃᑲᔪᓲᖑᕗᖅ ᖁᕕᐊᓱᒍᑎᖃᕐᓂᕐᒥ, ᐃᓕᓐᓂᐊᖅᑎᑦᑎᓂᕐᒥ ᐊᒻᒪ ᑲᔪᖏᖅᓴᐃᓂᕐᒥ ᐃᓄᖕᓂ ᑲᓇᑕᐅᑉ ᐅᖓᑖᓄᑦ, ᐃᓚᒋᐊᖅᓯᓚᐅᖅᐳᖅ.
ᑲᑯᒃᑎᓐᓂᖅ ᐅᐱᒋᔭᖃᓗᐊᓚᐅᖅᐳᖅ ᐱᓕᕆᓂᕐᒥ ᐆᒥᖓ ᐱᓕᕆᐊᒃᓴᐅᔪᒥ ᑕᑯᒃᓴᐅᑎᑦᑎᓂᕐᒧᑦ ᐆᒪᔪᖅᑕᐅᓯᒪᔪᓂ ᒥᖅᑯᓂᑦ.
“ᓄᓇᖃᖅᑳᖅᓯᒪᓪᓗᖓ ᐊᕐᓇᐅᓪᓗᖓ, ᐃᑲᔪᖅᓱᐃᕐᔪᐊᖅᐳᖓ ᐊᑐᖅᑕᐅᓂᖓᓂ ᐊᒻᒪ ᖁᕝᕙᖅᓴᐃᓂᕐᒥ ᐆᒪᔪᖅᑕᐅᓯᒪᔪᓂ ᒥᖅᑯᓂᑦ,” ᐅᖃᓚᐅᖅᐳᖅ. “ᐃᓅᓪᓗᖓ, ᓄᓇᓕᐅᔪᑦ ᐊᒻᒪ ᐊᓐᓇᐅᒪᓇᓱᐊᕐᓂᖅ ᒪᓕᖕᓂᖃᖅᐳᖅ ᐆᒪᔪᓐᓇᕐᓂᕐᒥ ᓂᒡᓚᓱᕐᔪᐊᖅᑐᒥ ᐅᑭᐅᖅᑕᖅᑐᒥ ᓯᓚᖓᓐᓂ, ᐊᒻᒪ ᐱᖅᑯᓯᑐᖃᖅᑎᒍᑦ ᐃᓅᓯᖃᕐᓂᖏᓐᓂ ᐱᓕᕆᖃᑎᖃᑦᑎᐊᖅᐳᖅ ᓄᓇᒥ, ᐊᒻᒪ ᐊᒥᓲᓂᖏᓐᓂ ᐃᑲᔪᕈᑎᒃᓴᓂ ᓄᓇ ᑐᓂᓯᕙᒃᑕᖓᓐᓂ, ᐱᓪᓚᕆᐅᕗᖅ ᐃᑲᔪᖅᓱᐃᓂᓐᓂ ᐊᒻᒪ ᓱᓖᓐᓇᕐᓗᖓ ᐆᒧᖓ ᐱᖅᑯᓯᑐᖃᖅᑎᒍᑦ ᐃᓅᓂᐅᔪᒥ.”
ᐊᐱᕆᔭᐅᒐᒥ ᐃᓱᒪᒋᔭᖏᓐᓂ ᑐᕌᖓᓂᕆᔭᖓᓂ ᐊᓐᓄᕌᓕᐊᓄᑦ ᐱᓕᕆᓂᕐᔪᐊᖑᔪᒥ ᐊᒻᒪ ᖃᓄᖅ ᐃᓄᐃᑦ ᐊᒻᒪ ᓄᓇᖃᖅᑳᖅᓯᒪᔪᑦ ᓴᓇᐅᒐᓕᕆᔨᐅᔪᑦ ᐃᓚᐅᖃᑕᐅᔪᓐᓇᕐᓂᖓᓂ ᐊᑐᕐᓂᖃᐅᑎᒥᒃ, ᑲᑯᒃᑎᓐᓂᖅ ᐅᖃᓚᐅᖅᐳᖅ ᓄᓇᕐᔪᐊᒥ ᓴᖑᕙᓪᓕᐊᓂᖃᕐᓂᖓᓂ ᐅᕙᙶᖅᑐᒥ “ᓱᒃᑲᔪᒥ ᐊᓐᓄᕌᓕᐊᖑᔪᓂ” ᐊᖑᓇᓱᒃᑕᐅᓯᒪᔪᓄᑦ ᐊᓐᓄᕌᓕᐊᖑᔪᓄᑦ.
“ᓄᓇᖃᖅᑳᖅᓯᒪᔪᓂ-ᓴᓇᔭᐅᓂᑯᓂ ᐊᓐᓄᕌᑦ ᐊᒻᒪ ᐃᓚᒋᐊᕈᑎᖏᓐᓂ ᓴᓇᔭᐅᒐᔪᒃᐳᑦ ᐱᓕᕆᓂᐅᔪᒥ ᐃᑲᔪᖅᓱᐃᔪᒥ ᓄᓇᖃᖅᑳᖅᓯᒪᔪᓂ ᓄᓇᓕᐅᔪᓂ, ᐊᑐᖅᖢᑎᒃ ᐊᖑᓇᓱᒃᑕᐅᓯᒪᔪᓂ ᑭᓱᑐᐃᓐᓇᓂᒃ ᓲᕐᓗ ᒥᖅᑯᓂᑦ ᐊᒻᒪ ᕿᓯᖕᓂ, ᐊᒻᒪ ᐊᒡᒐᒧᑦ ᓴᓇᓯᒪᓪᓗᑎᒃ ᐊᑐᖅᑕᐅᒃᑲᓐᓂᖅᑐᓂ ᖃᓪᓗᓈᖅᑕᓂ ᐅᕝᕙᓘᓐᓃᑦ ᐊᕙᑎᒧᑦ ᑐᙵᓇᕐᓂᖅᓴᐅᔪᓂ ᖃᓪᓗᓈᖅᑕᓂ, ᐊᒥᓱᐊᓘᙱᖦᖢᑎᒃ ᐱᓕᕆᕝᕕᒡᔪᐊᕐᓂᓂ,” ᐅᖃᓚᐅᖅᐳᖅ.
“ᐃᓱᒪᕗᖓ ᓂᐅᕕᖅᐸᒃᑐᑦ ᐃᓱᒪᒧᑦ ᓴᖑᕙᓪᓕᐊᓂᖃᖅᐳᑦ ᓱᒃᑲᐃᒡᓕᒋᐊᕐᓂᕐᒧᑦ, ᓂᐅᕕᕋᕐᓗᑎᒃ ᐱᔾᔪᑎᖃᑦᑎᐊᕐᓗᑎᒃ ᐊᒻᒪ ᐃᑲᔪᖅᓱᐃᓗᑎᒃ ᓇᖕᒥᓂᕆᔭᐅᔪᓂ ᖁᕝᕙᖅᓴᐃᔪᓂ ᓄᓇᓕᖕᓂ ᐊᒻᒪ ᐃᖏᕐᕋᓂᐅᔪᒥ ᒥᒃᖠᒋᐊᖅᑐᒥ ᐊᕙᑎᒧᑦ ᐊᒃᑐᐃᓂᐅᔪᓂ. ᓄᓇᖃᖅᑳᖅᓯᒪᔪᓂ ᓴᓇᐅᒐᐃᑦ ᐆᒥᖓ ᐊᑐᕐᓂᖃᑦᑎᐊᖅᐳᖅ. ᐊᓗᓂ ᐸᖅᑭᔨᐅᕗᒍᑦ ᓄᓇᒥ ᐊᒻᒪ ᐊᑐᖅᐸᒃᐳᒍᑦ ᐱᓕᕆᓂᐅᔪᓂ ᑕᒫᓃᓯᒪᔪᓂ ᕼᐊᓐᓇᓚᖏᓐᓂ ᑕᐅᓴᓐ–ᖏᓐᓂ ᐊᕐᕌᒍᓄᑦ.”
ᑮᓇᐅᔭᓕᐊᖑᔪᑦ ᓯᕗᓪᓕᖅᐹᖓᓂ ᒪᕐᕈᖓᓂᓪᓗ ᐱᓕᕆᐊᒃᓴᖅ ᐊᑎᒋᒥ ᑲᑎᙵᓂᐅᔪᓂ ᑲᑎᓪᓗᒋᑦ ᐅᓄᕐᓂᖅᓴᐅᓚᐅᖅᐳᑦ $165,000–ᓂ. Canada Goose ᓂᕆᐅᒃᐳᑦ ᖄᖏᐅᑎᓛᕐᓂᖏᓐᓂ ᐅᑯᓂᖓ ᓇᐃᓴᐅᑕᐅᔪᓂ ᐆᒥᖓ ᓄᑖᖑᔪᒥ.
