ᐊᕐᕕᐊᓂ ᐸᕐᓇᐃᔪᑦ ‘ᐃᖅᑲᐅᒪᓇᕐᓂᐊᖅᑐᓂᒃ’ ᖁᕕᐊᓱᒃᑎᑦᑎᔪᒪᓂᕐᒧᑦ ᑲᓇᑕᐅᑉ ᐅᑉᓗᖓᓂᒃ ᑕᒡᕙᓂ ᐅᑭᐅᒥ, ᑕᐃᒪᓐᓇ ᐅᖃᖅᓯᒪᔪᖅ ᔫ ᓴᕕᑲᑖᖅ ᓄᑲᖅᖠᖅ.
“ᑲᓇᑕᒥᐅᑕᐅᒐᑉᑕ. ᑲᓇᑕᒥᐅᑕᐅᔪᒍᑦ, ᖁᕕᐊᓲᑎᖃᕐᓂᐊᖅᑐᒍᑦ ᑲᓇᑕᒥ ᑲᓇᑕᐅᑉ ᐅᑉᓗᖓᓂᒃ,” ᑕᐃᒪᓐᓇ ᐅᖃᖅᖢᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᔫᓐ 25-ᒥ.
ᓴᕕᑲᑖᖅ ᐅᖃᖅᖢᓂ ᑕᐃᒪᓐᓇ ᐃᓱᒪᓕᐅᓚᐅᕐᓂᖏᓐᓄᑦ ᐊᑯᓂ ᑲᑎᒪᔨᖏᑦ ᐅᖃᖃᑎᒌᖅᑳᖅᖢᑎᒃ ᐱᓇᓱᐊᕈᓯᐅᓚᐅᖅᑐᒥ.
“ᐊᓕᐊᓇᐃᑦᑐᐊᓘᓂᐊᖅᑐᖅ. ᑭᖑᓪᓕᖅᐹᖅᓯᐅᑎᓂᒃ ᐋᖅᑭᒃᓱᐃᕙᓪᓕᐊᔪᒍᑦ ᓱᓕ ᑭᓯᐊᓂ ᐃᖅᑲᐅᒪᓇᕐᓂᐊᖅᑐᖅ,” ᑕᐃᒪᓐᓇ ᐅᖃᖅᖢᓂ.
ᑐᓴᒐᒃᓴᖅ ᓴᖅᑭᓚᐅᖅᑐᖅ ᐊᓯᖏᑦ ᑭᕙᓪᓕᕐᒥ ᓄᓇᓖᑦ ᑐᓴᖅᑎᑦᑎᓯᒪᓕᖅᑎᓪᓗᒋᑦ ᖁᔭᓈᖅᓯᓂᐊᕐᓂᖏᓐᓄᑦ ᐅᕝᕙᓘᓐᓃᑦ ᓇᑲᑎᕆᓂᐊᕐᓂᖏᓐᓄᑦ ᖃᓄᐃᓕᐅᕈᑎᒃᓴᓂᒃ ᐅᑭᐅᖑᔪᖅ ᐱᓕᕆᖃᑎᒌᖕᓂᒃᑯᑦ ᐊᒥᓱᙳᖅᐸᓪᓕᐊᑎᓪᓗᒋᑦ ᐃᓗᕕᑦ ᓇᓂᔭᐅᕙᓪᓕᐊᔪᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐃᓕᓐᓂᐊᕐᕕᖏᓐᓂᒃ.
ᔫᓐ 24-ᒥ, ᑲᐅᐃᓴᔅ ᐊᓪᓚᖓᔪᑦ ᓄᓇᖅᑲᑎᒌᑦ ᓴᔅᑲᑦᑐᐊᓐᒥ ᓇᓂᓯᓚᐅᖅᑐᑦ 751-ᓂᒃ ᐃᓗᕕᕐᓂᒃ ᐊᑎᓕᖅᓯᒪᙱᑦᑐᓂᒃ ᐃᓕᓐᓂᐊᕆᐊᕐᕕᐅᕙᓚᐅᖅᑑᑉ ᐃᓂᖓᓂᒃ. ᒪᐃᒥ, 251 ᓄᑕᖅᑲᑦ ᐃᓗᕕᖏᑦ ᓇᓂᔭᐅᓚᐅᖅᖢᑎᒃ ᑳᒻᓗᑉᔅᒥ.
ᑲᖏᖅᖠᓂᕐᒥᐅᑦ ᓯᕗᓪᓕᖅᐸᐅᑉᓗᑎᒃ ᑐᓴᖅᑎᑦᑎᓚᐅᖅᑐᑦ ᓇᑲᑎᕆᓂᐊᕐᓂᕋᖅᖢᑎᒃ ᐸᕐᓇᒃᓯᒪᔭᒥᓂᒃ ᖁᕕᐊᓱᒃᑎᑦᑎᓇᔭᕐᓂᕐᒧᑦ, ᖃᑉᑎᕆᔨᒃᑯᖏᑦ ᐃᓱᒪᓕᐅᖅᑎᓪᓗᒋᑦ ᖁᔭᓈᖅᓯᓂᐊᕐᓂᕐᒧᑦ ᔪᓚᐃ 1-ᒥ ᓄᓇᒃᑰᕈᑎᒃᑯᑦ ᒪᓕᒍᑏᓐᓇᖃᑦᑕᖅᓯᒪᓂᖏᓐᓄᑦ.
ᔫᓐ 23-ᒥ, ᐃᒡᓗᓕᒑᕐᔪᖕᒥᑕᑦ ᑕᐃᒪᐃᓕᐅᓚᐅᕐᒥᔪᑦ. ᑲᑎᒪᖃᑎᒌᖅᑳᖅᖢᑎᒃ ᑕᒪᑐᒪ ᒥᒃᓵᓄᑦ ᐅᖃᖃᑎᒌᖕᓂᒃᑯᑦ, ᒪᐃᔭᒋᔭᐅᔪᖅ ᐊᒻᒪᓗ ᑲᑎᒪᔩᑦ ᐃᓱᒪᓕᐅᓚᐅᖅᑐᑦ ᓈᒻᒪᙱᑦᑑᓇᔭᕐᓂᖓᓄᑦ ᖁᕕᐊᓲᑎᖃᖅᐸᑕ.
“ᐅᖃᖃᑎᒌᑦᑎᐊᖅᑳᖅᖢᑕ ᐊᒻᒪᓗ ᐃᓱᒪᒃᓴᖅᓯᐅᑦᑎᐊᖅᑳᖅᖢᑕ, ᐃᒡᓗᓕᒑᕐᔪᖕᒥᐅᑦ Hᐊᒻᓚᒃᑯᖏᑦ ᐃᓱᒪᓕᐅᓚᐅᖅᑐᖅ ᖁᕕᐊᓲᑎᖃᔾᔮᙱᓐᓂᕐᒧᑦ ᑲᓇᑕᐅᑉ ᐅᑉᓗᖓᓂᒃ ᐅᑭᐅᖑᔪᖅ,” Hᐊᒻᓚᒃᑯᑦ ᑐᑭᒧᐊᒃᑎᑦᑎᔨᖓ ᔮᓐ ᐊᐃᕕ ᑕᐃᒪᓐᓇ ᑎᑎᕋᓚᐅᖅᑐᖅ.
Hᐊᒻᓚᒃᑯᑦ ᓴᖅᑭᑎᑦᑎᓂᐊᕐᒥᔪᑦ ᓇᓗᓇᐃᔭᐅᑎᒥᒃ ᐅᕝᕙᓘᓐᓃᑦ ᐃᖅᑲᐅᒪᔾᔪᑎᒥᒃ ᐃᓄᖕᓄᑦ ᑲᑎᕝᕕᐅᖃᑦᑕᕐᓂᐊᖅᑐᒥᒃ ᐅᕝᕙᓘᓐᓃᑦ ᐱᙳᐊᓂᒃ ᐱᕈᖅᓯᐊᓂᒡᓘᓐᓃᑦ ᕿᒪᐃᕝᕕᐅᖃᑦᑕᕐᓂᐊᖅᑐᒥᒃ.
ᑎᑭᕋᕐᔪᐊᕐᒥᐅᑦ ᑕᒡᕙᓂ ᑕᖅᑭᕐᒥ ᑲᑎᒪᓚᐅᙱᒃᑲᓗᐊᖅᑎᓪᓗᒋᑦ, ᒪᐃᔭᒋᔭᐅᔪᖅ ᐳᕐᓯ ᖃᑉᓗᓇᖅ ᐅᖃᓚᐅᖅᑐᖅ ᑲᑎᒪᔩᑦ ᐃᖕᒥᓄᑦ ᐅᖃᖅᓯᒪᖕᒪᑕ ᖁᕕᐊᓱᒍᑎᖃᕈᒪᙱᓐᓂᕐᒧᑦ.
ᕿᑎᒃᑎᑦᑎᙱᖔᕐᓗᑎᒃ ᑲᓇᑕᐅᑉ ᐅᑉᓗᖓᓂᒃ, Hᐊᒻᓚᒃᑯᑦ ᐃᖅᑲᐅᒪᓂᖃᕐᓂᐊᖅᑐᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂᒃ ᓂᐸᐃᓚᐅᐱᓪᓚᖕᓂᒃᑯᑦ. Hᐊᒻᓚᒃᑯᑦ ᑐᓂᐅᖅᑲᐅᑎᖃᕐᓂᐊᕐᒥᔪᑦ ᐅᓲᔮᖅᑐᓂᒃ ᐊᒻᒪᓗ Hᐊᒻᐳᑯᓂᒃ Hᐊᓚᑏᕐᓇᐅᑎᓪᓗᒍ. ᖃᑉᓗᓈᖅ ᐅᖃᖅᓗᓂᓗ ᓄᓇᓕᐅᔪᒥ ᐊᐅᓚᖁᑏᑦ ᐊᑦᑎᒃᓯᒋᐊᖅᑕᐅᓂᐊᕐᓂᖏᓐᓄᑦ 215 ᐅᑉᓗᓂᒃ, ᐱᒋᐊᕐᓗᒍ ᒪᐃ 30-ᒥ ᐃᖅᑲᐅᒪᑉᓗᒋᑦ ᐃᓗᕕᑦ ᓇᓂᔭᐅᓚᐅᖅᑐᑦ ᑳᒻᓘᑉᔅᒥ.
“ᐃᒃᐱᒋᑐᐃᓐᓇᖅᑕᖅᐳᑦ ᐃᖅᑲᐅᒪᑉᓗᒋᑦ ᓄᑕᕋᑯᓘᓚᐅᖅᑐᑦ,” ᖃᑉᓗᓈᖅ ᐅᖃᖅᖢᓂ.