ᓕᐳᕈᒃᑯᑦ ᓯᕗᓕᐅᖅᑎ ᔭᔅᑎᓐ ᑐᕉᑑ ᒥᓚᐅᑲᓚᐅᖅᐳᖅ ᐃᖃᓗᖕᓄᑦ ᐋᒍᔅᑎ 30−ᒥ ᑐᓂᓯᔭᖅᑐᖅᖢᓂ ᐃᑲᔪᖅᓱᐃᓂᖓᓂ ᓄᓇᕗᒻᒥ ᓂᕈᐊᒐᒃᓴᐅᔪᒧᑦ ᐹᑦ ᐊᕐᓇᒃᑲᕐᒧᑦ.

ᐃᓚᐅᖃᑕᐅᔪᒥ ᑐᕉᑑᒥ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᒥᓂᔅᑕᖓ ᒫᒃ ᒥᓗᕐ.

ᐃᓚᖏᓐᓂ ᐅᖃᐅᓯᒃᓴᐅᔪᓂ ᑲᓇᑕᒥ ᐊᖓᔪᖅᑳᕐᔪᐊᖓ ᕿᓚᒻᒥᐅᔪᒥ ᐅᖃᓪᓚᓚᐅᖅᐳᖅ ᐃᖃᓗᖕᓂ ᐃᓄᑐᖃᒃᑯᕕᐅᑉ ᓯᓚᑖᓂ ᐃᓄᒋᐊᖑᔪᓄᑦ 100−ᒐᓚᖕᓂ ᐃᓄᖕᓄᑦ ᓄᕙᒡᔪᐊᕐᓇᖅ-19 ᐋᓐᓂᐊᓕᕇᒃᑯᑎᓂ — ᓄᓇᕗᑦ ᓯᕗᓪᓕᐅᔾᔨᑎᑕᐅᓚᐅᖅᑐᓄᑦ — ᐃᒡᓗᒃᓴᖃᖅᑎᑦᑎᓂᕐᒧᑦ ᐊᒻᒪ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ.

ᑐᕉᑑ ᐊᒻᒪ ᒥᓗᕐ ᓇᓗᓇᐃᖅᓯᓚᐅᖅᐳᑦ ᓄᕙᒡᔪᐊᕐᓇᖅ-19−ᒥ ᑭᐅᓂᐅᔪᒥ ᓄᓇᕗᒻᒥ, ᐱᓗᐊᖅᑐᒥ.

“ᑐᑭᓯᐅᒪᓂᕐᒥ ᓄᓇᕗᒻᒥ ᐊᒻᒪ ᑐᑭᓯᐅᒪᓂᕐᒥ ᐅᑭᐅᖅᑕᖅᑐᒥ ᑐᑭᓯᐅᒪᑦᑎᐊᕈᓐᓇᕐᓂᑐᐊᖑᕗᖅ ᑲᓇᑕᒥ ᐊᒻᒪᓗ ᑲᓇᑕᒥᐅᓕᒫᓂᑦ,” ᐅᖃᓚᐅᖅᐳᖅ ᑐᕉᑑ. “ᐃᑲᔪᖃᑦᑕᐅᑎᓚᐅᖅᐳᓯ, ᑐᓂᓯᓂᖃᓚᐅᖅᐳᓯ ᐱᓕᕆᓂᕐᔪᐊᖑᔪᓂ, ᐃᑲᔪᖅᓱᐃᖃᑦᑕᐅᑎᓪᓗᓯ, ᑕᐃᒫᒃ ᐱᓕᕆᓚᐅᖅᐳᒍᑦ ᓇᒃᓯᐅᔾᔨᓂᕐᒥ ᐃᑲᔪᖅᓱᐃᓂᐅᔪᒥ. ᐱᓕᕆᓚᐅᖅᐳᒍᑦ ᐋᓐᓂᐊᓕᕇᒃᑯᑎᑦ ᐱᓗᐊᖅᑐᒥ ᐅᑭᐅᖅᑕᖅᑐᒧᐊᕐᓂᖓᓂ ᐊᒻᒪᓗ ᐃᓄᑐᖃᕐᓄᑦ ᐅᑭᐅᖅᑕᖅᑐᒥ ᓱᒃᑲᓂᖅᓴᐅᔪᒥ ᓇᒥᓕᒫᑦᑎᐊᑲᓴᖕᒥ ᑲᓇᑕᒥ.”

ᒥᓗᕐ “ᓇᓗᓇᐃᖅᓯᔪᒪᓚᐅᖅᐳᖅ ᐱᓕᕆᓂᐅᔪᒥ ᑭᒃᑯᓕᒫᑦ ᐱᓕᕆᓯᒪᓂᖏᓐᓂ ᑕᒪᒃᑭᓗᒃᑖᓂ ᐊᑦᑕᓇᔾᔭᐃᖅᓯᓯᒪᓂᕐᒥ, ᐱᓗᐊᖅᑐᒥ ᒪᑐᔭᐅᓯᒪᓂᐅᔪᒥ ᐃᖃᓗᖕᓂ.” ᐅᖃᐅᓯᖃᓚᐅᕆᕗᖅ ᓂᕿᓄᑦ ᐃᑲᔪᖅᓱᐃᓂᐅᔪᒥ ᑐᓂᔭᐅᔪᓂ ᓄᓇᕗᒻᒥᐅᓄᑦ, ᐊᒻᒪᓗᑦᑕᐅᖅ ᐱᓕᕆᓂᐅᔪᒥ ᓄᕙᒡᔪᐊᕐᓇᖅ-19−ᒥ ᐋᓐᓂᐊᓕᕇᒃᑯᑎᓂ ᓄᓇᕗᒻᒧᐊᖅᑕᐅᓂᖏᓐᓂ.

ᑐᕉᑑ ᐱᓕᕆᓂᐊᕐᓂᕋᓚᐅᕆᕗᖅ ᑲᑎᖅᓱᖅᑕᐅᕙᓪᓕᐊᓂᕐᒥ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓂᕐᒥ ᕼᐊᓐᓇᓚᖏᓐᓂ ᒥᓕᐊᓐᓂ ᐃᒡᓄᒃᓴᖃᖅᑎᑦᑎᓂᕐᒧᑦ ᑎᑭᑉᐸᓪᓕᐊᔪᓂ ᐊᕐᕌᒎᔪᓂ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓚᖃᕋᔭᖅᑐᒥ ᐃᓄᖕᓄᑦ−ᑐᕌᖓᔪᓄᑦ ᑐᕌᒐᕆᔭᐅᔪᒥ.

ᐃᒡᓗᒃᓴᖃᖅᑎᑦᑎᓂᖅ ᐅᖃᐅᓯᒃᓴᐅᓚᐅᕆᕗᖅ ᐊᕐᓇᒃᑲᖅ ᑭᐅᓚᐅᕐᒥᔭᖓᓂᑦᑕᐅᖅ.

“ᐃᓚᒋᔭᖓ ᓂᕈᐊᒐᒃᓴᐅᓂᓐᓄᑦ ᐃᒡᓗᒃᓴᖃᖅᑎᑦᑎᓂᐅᕗᖅ ᐊᒻᒪᓗ ᐃᒡᓗᒃᓴᖃᕆᐊᖃᕐᓂᖓᓂ. ᖃᐅᔨᒪᔪᐃᓐᓇᐅᕗᒍᑦ ᑭᓱᓂ ᐃᒡᓗᒃᓴᖃᖅᑎᑕᐅᓂᕐᒧᑦ ᐱᔭᕆᐊᖃᖅᑕᑦᑎᓐᓂ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐱᓕᕆᐊᒃᓴᖃᕐᔪᐊᖅᐳᑦ ᐱᔾᔪᑎᖃᖅᑐᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ. “ᑕᐃᒫᒃ ᓂᕈᐊᒐᒃᓴᙳᕈᒪᓚᐅᖅᐳᖓ ᓕᐳᕈᒃᑯᑦ ᐊᐅᓚᖁᑎᖓᒍᑦ, ᐃᒃᐱᒍᓱᓚᐅᕋᒪ ᐱᐅᓂᖅᐹᖑᓪᓗᑎᒃ ᑲᑎᒪᔨᕐᔪᐊᖑᔪᓂ ᐅᕙᑦᑎᓐᓄᑦ ᑐᓂᓯᓂᕐᒥ ᖃᓄᐃᓕᐅᕐᓂᐅᔪᒥ ᐱᔭᕆᐊᖃᖅᑐᒥ ᒫᓐᓇᐅᔪᒥ.”

ᐅᐸᒃᓯᒪᓚᐅᖅᑐᒥ ᑐᕉᑑᑉ ᓴᖅᑭᓐᓂᖓᓂ ᐊᖓᔪᖅᑳᖃᕐᕕᖓᓂ ᐃᖃᓗᖕᒥᐅᑕᖅ ᐃᓄᑐᖃᖅ ᒫᑕ ᑎᑭᕕᒃ, ᐃᖅᑲᐅᒪᓚᐅᖅᑐᒥ ᑕᑯᔭᕆᐅᕐᓂᖓᓂ ᔭᔅᑎᓐ ᐊᑖᑕᖓᓂ ᐱᐊᕆ ᑐᕉᑑᒥ ᑎᑭᑉᐸᒃᑎᓪᓗᒍ ᐊᒻᒪ ᐳᓚᕋᕆᐊᖅᖢᓂ ᓄᓇᕗᒻᒧᑦ. ᐅᐱᒋᓚᐅᖅᐸᖓ ᔭᔅᑎᓐ ᐱᓕᕆᓂᐊᓂ ᑲᑎᒪᔨᕐᔪᐊᖑᓂᖓᓂ.

ᑐᕉᑑ ᐃᖅᑲᐅᒪᓚᐅᖅᐳᖅ ᐃᖃᓗᖕᓃᓚᐅᕐᓂᖓᓂ ᑲᑎᒪᔨᕐᔪᐊᖑᓂᖓᓂ.

“ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 6−ᓄᑦ ᖁᕕᐊᒋᕐᔪᐊᖅᓯᒪᕙᕋ ᑕᒪᐅᙵᒐᔪᒋᐊᒃᓴᖅ ᐅᖃᓪᓚᒋᐊᖅᑐᕐᓂᕐᒧᑦ ᐱᓕᕆᓂᐅᔪᓂ ᑲᑎᙵᓗᑕ ᐱᓕᕆᔭᕆᐊᖃᖅᑕᑦᑎᓐᓂ,” ᐅᖃᓚᐅᖅᐳᖅ. “ᐃᓕᑦᑎᓂᕆᓚᐅᖅᑕᑦᑎᓐᓂ ᓄᕙᒡᔪᐊᕐᓇᕐᒧᑦ, ᑲᔪᓯᑏᓐᓇᕆᐊᖃᖅᐸᕗᑦ ᑎᑭᑉᐸᓪᓕᐊᔪᓄᑦ ᑕᖅᑭᐅᔪᓄᑦ ᐊᒻᒪ ᐊᕐᕌᒍᓄᑦ ᐱᕈᖅᓴᐃᑎᓪᓗᑕ ᐱᐅᓂᖅᓴᐅᔪᒥ ᓯᕗᓂᒃᓴᐅᔪᒥ ᑭᒃᑯᓕᒫᓄᑦ.

“ᐊᒥᓱᒃᑲᓐᓂᐊᓗᖕᓂ ᐱᓕᕆᐊᒃᓴᖃᖅᐳᒍᑦ ᓱᕈᓯᕐᓄᑦ ᐸᖅᑭᔭᐅᓂᖏᓐᓄᑦ, ᐃᓕᓐᓂᐊᕐᓂᓕᕆᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐊᒥᓱᐊᓗᖕᓄᑦ ᐱᓕᕆᖃᑎᒌᖕᓂᐅᔪᓄᑦ,” ᐅᖃᓚᐅᖅᐳᖅ. “ᐃᓕᖕᓂ ᐱᓕᕆᖃᑎᖃᐃᓐᓇᕐᓂᐊᖅᐳᒍᑦ, ᐃᓕᔅᓯᓐᓄᑦ ᐊᐅᓚᑕᐅᔪᓄᑦ, ᐱᕈᖅᓴᓂᕐᒧᑦ ᓴᙱᓂᖅᓴᐅᔪᒥ ᓯᕗᓂᒃᓴᐅᔪᒥ ᐅᑭᐅᖅᑕᖅᑐᒧᑦ ᐊᒻᒪᓗ ᑲᓇᑕᓕᒫᒧᑦ.”

ᑐᕉᑑ ᓂᕈᐊᒐᒃᓴᐅᓂᖓᓄᑦ ᓂᕈᐊᖅᑕᐅᔪᒪᓂᖓᓂ ᓄᓇᕗᒻᒥ ᐊᖓᔪᖅᑳᖃᕐᕕᖓᓂ, NDP−ᑯᑦ ᓗᐊᕆ ᐃᓪᓚᐅᑦ ᑐᓴᒐᒃᓴᓕᐅᓚᐅᖅᐳᖅ ᓯᐊᒻᒪᖅᑎᑦᑎᔨᐅᔪᓄᑦ: “ᔭᔅᑎᓐ ᑐᕉᑑ ᑐᓴᕐᓂᕈᓐᓇᖅᐳᖅ ᐱᓕᕆᓂᐊᕐᓂᕋᖅᑕᖏᓐᓂ, ᑭᓯᐊᓂ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 6−ᓄᑦ, ᓄᓇᕗᒻᒥᐅᑦ ᐃᓕᑦᑎᓯᒪᕗᑦ ᑐᕌᖓᓂᖃᓗᐊᙱᒻᒪᑦ ᑐᓂᓯᓂᕐᒥ ᐊᖏᖅᓯᒪᓂᕆᔭᖏᓐᓂ. ᐊᕐᕌᒍᓂ 6−ᓂ ᐋᖅᑭᒃᓯᓇᓱᐊᕈᓐᓇᓚᐅᖅᐳᖅ ᐃᒡᓗᒃᓴᖃᓂᕐᒧᑦ ᑐᐊᕕᕐᓇᕐᓂᖓᓂ ᐊᒻᒪ ᑭᐅᓂᖓᓂ ᐊᑭᑐᓗᐊᙱᓐᓂᐅᔪᓂ ᓄᓇᕗᒻᒥ—ᓱᓕ ᐃᒡᓗᖃᖅᐳᒍᑦ ᐅᖁᖃᐅᖅᑐᓂ, ᐸᖕᒥᐅᓗᐊᖅᑐᓂ ᐊᖏᕐᕋᓂ ᐊᒻᒪ ᐊᒥᓱᑦ ᐃᒃᓯᖕᓇᖅᑕᐅᓯᒪᕗᑦ ᐃᒪᑦᑎᐊᕙᐅᙱᑦᑐᒥ. ᐊᒃᓱᕈᖅᐳᒍᑦ ᓂᐅᕕᕋᓱᐊᕐᓂᕐᒧᑦ ᑭᓱᑐᐃᓐᓇᓂ ᓲᕐᓗ ᓂᕿᓂᑦ ᐊᒻᒪ ᐅᖅᓱᕐᒥ, ᐊᒻᒪ ᒪᒃᑯᒃᑐᑦ ᐊᒃᓱᕈᖅᐳᑦ ᐃᓱᒪᒥ ᐋᓐᓂᐊᖃᕐᓇᙱᑦᑐᓕᕆᓂᖏᓐᓂ.”

Leave a comment

Your email address will not be published. Required fields are marked *