ᖁᕕᐊᓱᒡᕕᖕᒥ ᕿᑲᕐᓇᐅᔪᑦ ᖁᕕᐊᓇᕐᓂᖅᓴᐅᓂᐊᖅᐳᖅ ᑭᙵᕐᒥᐅᑕᓄᑦ ᐱᔾᔪᑎᖃᖅᑐᒥ ᐊᒥᓱᒻᒪᕆᐊᓗᖕᓂ ᑐᓐᓂᖅᑯᓯᐊᖑᔪᓂ ᑲᓇᑕᒥ ᐸᓖᓯᒃᑯᓐᓂ.
ᐸᓖᓯᒃᑯᑦ ᓂᕈᐊᓚᐅᖅᐳᑦ ᑭᙵᕐᓂ ᐱᓂᐊᕐᓂᖏᓐᓂ ᐊᕐᕌᒍᑕᒫᒥ ᑎᒍᐊᕆᑦᑎ ᓄᓇᓕᖕᒥ ᐱᓕᕆᓂᐅᔪᒥ, ᐃᓚᖃᖅᑐᒥ ᖃᔅᓯᒐᓚᖕᓂ ᖃᖓᑕᓲᒥ ᐅᓯᓂᐅᔪᓂ ᐱᖁᑎᓂᑦ ᑎᑭᑎᑕᐅᔪᓂ ᐋᑐᕚᒥ, ᓯᕗᓪᓕᖅᐸᐅᔪᒥ ᑎᑭᓚᐅᖅᑐᓂ ᑕᖅᑭᐅᑉ ᐱᒋᐊᕐᓂᐸᓗᐊᓂ.
ᐃᓚᒋᔭᐅᖃᑕᐅᔪᓂ ᐱᖁᑎᓂ ᖃᖓᑕᓲᒃᑰᖅᑎᑕᐅᔪᓂ ᐃᓚᖃᖅᐳᖅ ᑕᓚᕖᓴᒧᑦ ᐱᙳᐊᕈᑎᓂ ᐊᒻᒪ ᐊᓯᖏᓐᓂ ᐱᙳᐊᕐᓂ; ᐊᓐᓄᕌᑦ ᐊᖑᑎᓄᑦ, ᐊᕐᓇᓄᑦ ᐊᒻᒪ ᓱᕈᓯᕐᓄᑦ, ᐃᓚᖃᖅᑐᒥ ᐊᓕᖅᓯᓂ ᐊᒻᒪ ᑲᒥᓪᓛᕈᑎᓂ; ᐃᕐᒥᒍᑎᓂ ᓲᕐᓗ ᐅᐊᓴᐅᑎᑦ, ᑭᒍᑎᓯᐅᑎᑦ ᐊᒻᒪ ᑭᒍᑎᓯᐅᕈᑎᓂ; ᐸᓂᖅᑐᓂ ᓂᕿᓂᑦ; ᖁᐃᖏᓕᓴᑦ ᐊᒻᒪ ᓄᑕᕋᓛᒧᑦ ᐊᓪᓚᕈᑎᕋᓛᑦ; ᒥᖅᓱᒐᒃᓴᓂ ᓱᓇᒃᑯᑖᓂ; ᕼᐋᑭᒧᑦ ᐊᓇᐅᑕᑦ ᐊᒻᒪ ᐊᓯᖏᓐᓂ ᕼᐋᑭᕈᑎᓂᑦ; ᐊᒻᒪ ᐊᓯᖏᓐᓂ ᓱᓇᒃᑯᑖᓂ ᐱᖁᑎᓂᑦ.
“ᑐᓴᕈᒥᓇᑦᑎᐊᖅᐳᖅ,” ᐅᖃᓚᐅᖅᐳᖅ ᑕᐃᒨᓐ ᑐᓐᓄ, ᑭᙵᐃᑦ ᒪᐃᔭᖓ, ᐃᓚᒋᐊᖅᓯᓚᐅᖅᑐᒥ ᖁᔭᓕᕐᔪᐊᓚᐅᕐᓂᖓᓂ ᐃᑲᔪᕈᑎᒃᓴᐅᔪᓂ ᐸᓖᓯᐅᔪᓂ.
ᐱᖁᑏᑦ ᑐᓐᓂᖅᓴᖅᑕᐅᕗᑦ ᑕᒪᑐᒪᓂ ᐱᓇᓱᐊᕈᓯᐅᔪᒥ ᐊᒻᒪ ᑐᕌᒐᒃᓴᖓ ᐊᑐᓂ ᓄᓇᖃᖅᑎᐅᔪᒥ ᐱᓂᕐᒥ ᐊᑕᐅᓯᓪᓗᐊᒥ ᑐᓐᓂᖅᑯᑕᐅᔪᒥ.
ᐱᒋᐊᕈᑕᐅᔪᖅ ᐊᐅᓚᑕᐅᕙᒃᑎᓪᓗᒍ ᐸᓖᓯᐅᔪᓂ ᑲᓇᑕᐅᑉ ᐊᖓᔪᖅᑳᖃᕐᕕᖓᓂ, V ᐊᕕᒃᑐᖅᓯᒪᓂᐅᔪᒥ ᐊᖓᔪᖅᑳᕐᔪᐊᖓ ᐊᒫᓐᑕ ᔫᓐᔅ ᐊᔭᐅᕆᓂᖃᓚᐅᖅᐳᖅ ᓂᕈᐊᕐᓂᕐᒥ ᑭᙵᕐᓂ ᓄᓇᓕᐅᔪᒥ ᐱᕚᓪᓕᕈᑎᖃᕐᓂᖓᓂ ᐆᒥᖓ ᐊᕐᕌᒎᔪᒥ ᑲᓇᑕᒥ ᐸᓖᓯᒃᑯᓐᓂ ᑎᒍᐊᕆᑦᑎ ᓄᓇᓕᖕᒥ ᐱᓕᕆᓂᐅᔪᒥ, ᐅᖃᓚᐅᖅᐳᖅ ᐅᖃᖅᑎᐅᔪᖅ ᐸᓖᓯ ᐹᓖᓐ ᒥᓛᓐᓯᓐ.
2020–ᒥ, ᓄᓇᑦᓯᐊᕐᒥ ᕼᐋᒻᓚᐅᔪᖅ ᕗᐊᑦ ᒥᒃᕘᓴᓐ ᓂᕈᐊᖅᑕᐅᓚᐅᖅᐳᖅ ᐱᓂᐊᕐᓂᖏᓐᓂ 1,800 ᑭᓕᒍᕌᒻᒥ ᑐᓐᓂᖅᑯᓯᐊᖑᔪᓂ .
“ᖃᐅᔨᒋᐊᖅᑕᐅᓯᒪᙱᓚᖅ ᓱᓕ ᑕᒪᑐᒪᓂ ᐊᕐᕌᒎᔪᒥ (ᐅᖁᒪᐃᓐᓂᖓᓂ) ᑭᓯᐊᓂ ᐅᖃᐅᔾᔭᐅᓯᒪᓂᓐᓂ, ᑐᓐᓂᖅᑯᑕᐅᔪᑦ ᓱᓕ ᑎᑭᑉᐸᓪᓕᐊᕗᑦ ᓄᖅᑲᕐᕕᒃᓴᖏᑕ ᐅᓪᓗᖓ ᐊᓂᒍᕋᓗᐊᖅᑎᓪᓗᒍ. ᐅᓯᔭᐅᔪᒥ ᓇᒃᓯᐅᔾᔨᓯᒫᓂᒃᐳᑦ ᐊᒻᒪ ᐸᕐᓇᒃᑲᓐᓂᖅᐳᑦ ᐊᓯᔭᐅᒃᑲᓐᓂᕐᓂᐊᖅᑐᒥ ᒫᓐᓇᐅᔪᒥ,” ᒥᓛᓐᓯᓐ ᐅᖃᓚᐅᖅᐳᖅ.