ᓯᑎᕕᓂ ᐅᓴᒃ ᐃᒥᑦᑎᐊᕈᓐᓇᐃᓪᓕᔪᖅ ᓂᕆᑦᑎᐊᕈᓐᓇᐃᓪᓕᓪᓗᓂᓘᓐᓃᑦ, ᖁᓛᓃᑦᑐᑦ ᑭᒍᑎᖏᑦ ᓱᕉᖕᒪᑕ ᐋᓐᓂᐊᕇᓐᓇᓕᖅᖢᓂᒋᓪᓗ.
ᑎᒥᖓ ᓈᒻᒪᒃᓴᙱᒻᒪᑦ ᐃᒃᐱᖕᓇᐃᓐᓇᙱᑦᑐᓂᒃ, ᐅᓴᒃ ᑲᒪᒋᔭᐅᖏᓐᓇᖅᑐᖅ ᑕᐃᓕᓈᓂᒃ (Tylenol) ᐊᒻᒪᓗ ᐊᑦᕕᐅᓂᒃ (Advil) ᐄᓯᑎᑕᐅᕙᒃᖢᓂ ᐱᖓᓱᓂᒃ ᐅᑭᐅᓂᒃ.
ᐅᓈᓇᖓ, ᑯᕆᓴ ᐅᓴᒃ, ᖃᓄᖅᑑᒃᑲᓐᓂᕈᓐᓇᐃᓪᓕᔪᖅ ᐊᒻᒪᓗ ᐸᓂᓂ ᐃᑲᔪᖅᑕᐅᖁᓕᖅᑕᖓ ᖃᑉᓗᓈᑦ ᓄᓇᖓᓄᙵᖅᐸᑎᒃ ᑭᒍᓯᕆᔭᐅᔪᓐᓇᖁᑉᓗᒍ ᒪᐃᒥ.
“ᐅᕙᒻᓂᒡᓘᓐᓃᑦ ᐊᒫᒪᒃᑎᓐᓇᓱᒃᖢᒍ, ᐊᔪᓕᖃᑦᑕᖅᑐᖅ,” ᑕᐃᒪᓐᓇ ᐅᖃᖅᖢᓂ ᑯᕆᓴ.
ᐸᓂᖓ ᒥᑭᓗᐊᕐᒪᑦ ᑭᒍᑕᐃᔭᖅᑕᐅᓇᔭᕐᓂᕐᒧᑦ ᑲᖏᖅᖠᓂᕐᒥ ᐃᒃᐱᖕᓇᐃᔪᓐᓃᕈᑎᓂᒃ ᐱᑕᖃᙱᓗᐊᕐᓂᕐᒧᑦ ᓄᓇᓕᖕᒥ, ᑯᕆᓴ ᑕᐃᒪᓐᓇ ᑐᑭᓯᑎᑦᑎᒋᐊᖅᖢᓂ. ᐋᓐᓂᐊᕐᕕᓕᐊᖃᑦᑕᖅᓯᒪᔪᖅ ᐊᒥᓱᐃᖅᖢᓂ ᐊᒻᒪᓗ ᑭᒍᓯᕆᔨᒃᑯᓐᓄᑦ, ᐅᐃᓂᐲᒃᒧᑦ ᑕᑯᔭᐅᑎᑕᐅᑦᑕᐃᓕᒪᐃᓐᓇᖅᖢᓂ ᑕᐃᑲᓂ ᑲᒪᒋᔭᐅᑦᑎᐊᕋᔭᖅᑎᓪᓗᒍ.
“ᐅᓐᓄᐊᒃᑯᑦ ᓯᓂᑦᑎᐊᕈᓐᓇᐃᓪᓕᔪᒍᑦ ᐋᓐᓂᐊᖃᑦᑕᕐᓂᖓᓄᑦ ᑕᒪᓐᓇ ᓈᒻᒪᙱᑦᑐᖅ,” ᑕᐃᒪᓐᓇ ᐅᖃᖅᖢᓂ ᑯᕆᓴ. “ᐊᖓᔪᖅᑳᕆᔭᑐᐊᕆᖕᒫᖓ ᑲᒪᔨᒋᔭᑐᐊᕆᑉᓗᓂᖓ. ᑲᖏᖅᖠᓂᕐᒥ ᐃᒃᐱᖕᓂᐊᒍᓐᓇᐃᓪᓕᒍᑎᓂᒃ ᐱᑕᖃᕆᐊᖃᓪᓚᕆᓕᖅᑐᖅ ᐊᑯᓂ ᐅᑕᖅᑭᔭᕆᐊᖃᕈᓐᓃᕋᔭᕋᑉᑕ ᓄᑕᕋᖅ ᐋᓐᓂᐊᖅᑎᓪᓗᒍ.”
ᑯᕆᓴ ᐋᖅᑭᒃᓯᔪᓐᓇᓚᐅᙱᑦᑐᖅ ᑕᑯᔭᐅᔪᓐᓇᖁᑉᓗᒍ ᐅᐃᓂᐲᒃᒥ ᓄᕙᒡᔪᐊᕐᓂᖅ ᑕᐃᒪᐅᓚᐅᕐᒪᑦ, ᑭᓯᐊᓂ ᐋᖅᑭᒃᓯᓯᒪᓕᖅᑐᖅ ᐸᓂᓂ ᐊᐅᓪᓚᕈᓐᓇᖁᑉᓗᒍ ᒪᐃ ᓄᙳᐊᓂ.
ᑕᓂᐅᕇ ᓴᒧᕐᕕᐅᓪ, ᑐᓴᐅᒪᖃᑦᑕᐅᑎᓕᕆᔨ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓂᒃ, ᐅᖃᓚᐅᖅᑐᖅ ᖃᕆᑕᐅᔭᒃᑯᑦ ᑎᑎᕋᖅᖢᓂ ᐃᒃᐱᖕᓂᐊᒍᓐᓇᐃᔾᔪᑎᓕᒎᖅ ᓄᓇᕗᒥ ᑭᓯᒥ ᕿᑭᖅᑖᓘᑉ ᐋᓐᓂᐊᕐᕕᒡᔪᐊᖓᓂᒃ ᐃᖃᓗᖕᓂ.
“ᒫᓐᓇᐅᔪᖅ, ᐸᕐᓇᐃᓯᒪᙱᑦᑐᑦ ᐱᑕᖃᓕᕋᔭᕐᓂᖓᓄᑦ ᐃᒃᐱᖕᓂᐊᒍᓐᓇᐃᔾᔪᑎᓂᒃ ᐊᓯᖏᓐᓂᒃ ᓄᓇᓕᖕᓂᒃ ᓄᓇᕗᒥ,” ᑕᐃᒪᓐᓇ ᑎᑎᕋᖅᖢᓂ ᓴᒧᕐᕕᐅᓪ.
“ᐃᒃᐱᖕᓂᐊᒍᓐᓇᐃᔾᔪᑏᑦ ᑭᒍᓯᕆᔨᒃᑯᑎᒍᑦ ᑕᐃᒪᐅᖕᒥᔪᑦ ᐊᑐᕚᒥ, ᐅᐃᓂᐲᒃᒥ, ᑰᒡᔪᐊᕐᒥ ᐊᒻᒪᓗ ᐃᑦᒥᓐᑕᓐᒥᓗ. ᑕᒪᒃᑯᐊ ᐊᑐᐃᓐᓇᐅᑎᑕᐅᓲᑦ ᐱᓗᐊᖅᑐᒥ ᓄᑕᖅᑲᓄᑦ ᐅᑭᐅᓕᖕᓄᑦ 12-ᓂᒃ ᐊᒻᒪᓗ ᑐᖔᓂ.”
ᑯᕆᓴ ᐊᐃᑦᑖᕈᓱᒃᑐᖅ ᐊᑯᓂ ᐅᑕᖅᑭᔭᕆᐊᖃᖃᑦᑕᕐᓂᖏᓐᓄᑦ, ᑲᑉᐱᐊᓱᒃᖢᓂᓗ ᐸᓂᑯᓗᓂ ᖃᓄᐃᓐᓇᔭᕐᒪᖔᑦ, ᑭᓯᐊᓂ ᐊᓕᐊᓇᐃᒍᓱᒃᑐᖅ ᐅᑉᓗᕐᒥᒃ ᐋᖅᑭᒃᓯᓯᒪᓕᕐᒪᑕ.
“ᓂᕆᔪᓐᓇᙱᑦᑐᕐᓘᓐᓃᑦ ᐊᕿᑦᑐᓂᒃ ᓂᕿᓂᒃ, ᓂᒡᓕᓇᙱᑦᑐᓂᒡᓘᓐᓃᑦ ᐃᒥᒐᕐᓂᒃ ᐃᒥᕈᓐᓇᙱᖦᖢᓂ,” ᑕᐃᒪᓐᓇ ᐅᖃᖅᖢᓂ ᑯᕆᓴ, ᐅᖃᖅᖢᓂᓗ ᑕᐃᒪᑐᕉᖅ ᐸᓂᖓᑕ ᑕᐃᒪᐃᑦᑐᒃᑰᕐᓂᖓ ᖃᓄᐃᓕᒋᐊᕈᑕᐅᓂᐊᖅᐳᖅ ᐱᔨᑦᓯᕋᐅᑎᓂᒃ ᐱᑕᖃᕆᐊᖃᕐᒪᑦ ᑭᕙᓪᓕᕐᒥ.