ᐃᑲᔪᖅᑐᖅᑕᐅᑉᓗᓂ ᐃᓅᖃᑎᒥᓄᑦ, ᔮᓐ ᓂᐊᖁᖅ ᒪᓕᒍᒪᔭᕐᒥᓂᒃ ᒪᓕᓕᖅᑐᖅ ᓴᓇᕝᕕᖕᒥᓂᒃ ᒐᕙᒪᒃᑯᓐᓂᒃ ᕿᒪᐃᑉᓗᓂ ᐊᓕᐊᓇᐃᒋᔭᕐᒥᓂᒃ ᒪᓕᓕᖅᖢᓂ ᒪᑐᐃᖅᓯᑉᓗᓂ ᓂᕆᕝᕕᖕᒥᒃ ᑲᖏᖅᖠᓂᕐᒥ.
“ᐃᒃᐸᒃᓴᖅ ᑭᖑᓪᓕᖅᐹᕆᓕᓚᐅᖅᑕᕋ ᓄᓇᕗᑦ ᒐᕙᒪᒃᑯᖏᓐᓂᒃ,” ᑕᐃᒪᓐᓇ ᐅᖃᖅᖢᓂ ᓂᐊᖁᖅ ᐃᒐᓂᐊᖅᑕᒥᓂᒃ ᐋᖅᑭᒃᓱᐃᑉᓗᓂ Iglu Donairs-ᒥ, ᓂᕆᕝᕕᒃᑖᓵᖓ ᐊᒡᓂᒍ ᐃᒍ ᓯᐊᕐᕆᔮᕐᕕᒃᑖᓵᖑᔪᒥᒃ.
“ᐃᓱᒪᓕᐅᓚᐅᖅᑐᖓ ᒪᓕᒍᒪᑉᓗᒍ ᖁᕕᐊᒋᔭᕋ. ᐊᓕᐊᓇᐃᑦᑐᐊᓗᒃ, ᐱᒻᒪᕆᐊᓗᒃ.”
ᒪᕐᕉᒃ ᐱᓇᓱᐊᕈᓯᒃ ᓯᕗᓂᐊᓂ, ᓴᓇᔪᓐᓃᕈᒫᓕᕐᓂᕐᒥᓄᑦ ᑎᑎᖅᑲᖅ ᑐᓂᕐᕈᑎᒋᓚᐅᖅᑕᖓ ᐊᓄᓪᓚᒃᓯᕝᕕᖕᒥ ᒥᐊᓂᖅᓯᔨᒥᓄᑦ ᑲᖏᖅᖠᓂᕐᒥ. ᒐᕙᒪᒃᑯᓐᓄᑦ ᓴᓇᔨᒋᔭᐅᓚᐅᖅᑐᖅ 12 ᐅᑭᐅᑦ ᐅᖓᑖᓂ.
ᐱᕕᒃᓴᖃᖅᑎᑕᐅᓕᕋᒥ ᓂᕆᕝᕕᒃᑖᕈᓐᓇᕐᓂᕐᒧᑦ ᓄᑖᒥ ᓯᐊᕐᕆᔮᕐᕕᒃᑖᓵᖑᔪᒥ ᐅᑭᐊᒃᓵᖅ, ᐆᒃᑐᓚᐅᖅᑐᖅ ᐊᖏᖅᑕᐅᑉᓗᓂᓗ.
“ᐃᑲᔪᖅᑐᖅᑕᐅᓯᒪᑦᑎᐊᖅᑐᖓ ᐃᓚᒃᑲᓄᑦ,” ᑕᐃᒪᓐᓇ ᐅᖃᖅᖢᓂ ᓂᐊᖁᖅ. “ᓂᕆᕝᕕᒃᑖᖅᑳᕐᓇᖓ, ᒪᕐᕉᒃ ᐱᓇᓱᐊᕈᓰᒃ ᐱᐊᓂᒃᑳᖓᑕ donair-ᓂᒃ ᓂᕆᔭᒃᓴᓂᒃ ᓂᐅᕕᐊᒃᓴᖃᖃᑦᑕᓚᐅᕋᒪ (ᐅᕙᓂ).”
Donair-ᓕᐅᖃᑦᑕᕐᓂᐊᖅᑐᖓ, ᐊᒥᓱᓂᒡᓗ ᐊᓯᖏᓐᓂᒃ ᓯᐊᕐᕆᔮᕐᕕᖕᒥ ᓂᕆᔭᒃᓴᓂᒃ, ᓲᕐᓗ pizza, ᐸᑦᑕᐃᑦᑐᑦ ᖃᓛᖅᑎᓯᒪᔪᑦ, burger, ᐅᓲᔮᖅᑐᑦ, poutine, nachos ᐊᒻᒪᓗ ᐊᒥᓱᑦ ᐊᓯᖏᑦ.
“Hᐊᑭᒋᐊᖅᑐᖅᑐᑦ ᑎᑭᖃᑦᑕᓕᕐᒥᒃᐸᑕ, ᐱᓕᕆᓐᓇᖅᑐᒻᒪᕆᐊᓘᖃᑦᑕᓕᕈᒫᕐᒥᔪᖅ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᐅᐱᒍᓱᒃᓯᒪᒐᒥ ᓂᐅᕕᕐᕕᐅᒐᔪᒃᓯᒪᓕᐊᓂᒃᑲᒥ.
ᓂᐅᕕᕆᐊᖅᑐᖃᖃᑦᑕᕆᐊᖃᕈᒫᕐᒥᔪᖅ – ᓂᐊᖁᖅ ᐅᖃᖅᖢᓂ ᐊᑐᖅᓯᒪᒐᒥ $9,000-ᒥ $12,000-ᒧᑦ ᐸᕐᓇᐃᑉᓗᓂ ᓇᖕᒥᓂᒃᓴᒥᓄᑦ ᐱᔨᑦᓯᕋᕈᓐᓇᖃᑦᑕᕈᒪᑉᓗᓂ ᓂᐅᕕᕆᐊᖃᑦᑕᕐᓂᐊᖅᑐᓂᒃ, ᕕᓕᐲᒃᓕᐊᖅᓯᒪᑉᓗᓂᓗ ᐃᒐᔾᔪᑎᒃᓴᓂᒃ ᓂᐅᕕᕆᐊᖅᖢᓂ.
“ᑮᓇᐅᔭᓂᒃ ᐊᑐᕆᐊᖃᕐᓇᖅᑐᖅ ᓇᖕᒥᓂᖅᑖᕐᓂᐊᕐᓗᓂ,” ᑕᐃᒪᓐᓇ ᐅᖃᖅᖢᓂ. “ᑮᓇᐅᔭᓂᒃ ᐊᑐᕆᐊᖃᕐᓇᖅᑐᖅ ᑮᓇᐅᔭᓕᐅᕐᓂᐊᕐᓗᓂ.”
Iglu Donairs ᓂᕆᕝᕕᓕᐊᖓ ᐊᔾᔨᖃᔾᔮᙱᑦᑐᖅ ᐊᓯᖏᓐᓂᒃ ᓂᕆᕝᕕᖕᓂᒃ ᑲᖏᖅᖠᓂᕐᒥ ᐊᑯᓂᐅᓂᖅᓴᖅ ᒪᑐᐃᖓᖃᑦᑕᕐᓂᐊᕐᒪᑦ ᐊᒻᒪᓗ ᓂᐅᕕᐊᖑᔪᑦ ᐊᔾᔭᖅᑐᖅᑕᐅᔪᓐᓇᖃᑦᑕᕐᓗᑎᒃ. ᐅᑉᓗᕈᒥᑕᕐᓇᒥ ᐅᓐᓄᒍᒥᑕᕐᓇᒥᓗ ᐱᓕᕇᓐᓇᖃᑦᑕᕐᓂᐊᖅᖢᓂ, ᐊᒻᒪᓗ ᐅᑉᓛᕈᒥᑕᖅᑐᖅᑎᑦᑎᕙᒡᓗᓂ ᐱᓇᓱᐊᕈᓯᐅᑉ ᓄᙳᐊᓂ.
ᓂᐊᖁᖅ ᐃᒐᔪᒪᖃᑦᑕᓕᓚᐅᖅᑐᖅ ᐃᓕᑦᑎᓯᒪᑉᓗᓂ ᐊᑖᑕᒥᓂᒃ ᐊᒻᒪᓗ ᑕᕐᕆᔭᖃᑦᑕᖅᖢᓂ ᐃᒐᔪᓂᒃ.
“ᖁᕕᐊᓱᒃᑐᖓ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᐃᓚᓂ ᐃᓚᓐᓈᓂᓗ ᐃᑲᔪᖅᑐᐃᓯᒪᓪᓚᕆᖕᒪᑕ ᑕᒪᑐᒥᙵ ᐱᓕᕆᐊᖃᖅᑎᓪᓗᒍ. “ᖁᕕᐊᓱᒃᑐᒍᑦ.”