ᑲᖏᖅᖠᓂᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᖁᒃᓴᓪᓚᒃᓯᒪᔪᑦ ᑐᒃᑐᑦ ᓂᕿᖏᑦ ᐃᒃᓯᓐᓇᖅᑕᐅᓯᒪᖃᑦᑕᕐᓂᖏᓐᓄᑦ Hᐊᒻᓚᒃᑯᑦ ᑲᑎᒪᔨᖏᓐᓄᑦ ᑕᑯᑎᑕᐅᓚᐅᖅᑳᖅᑎᓪᓗᒋᑦ ᐊᔾᔨᓂᒃ ᑐᒃᑐᑦ ᓂᕿᑦ ᐃᒃᓯᓐᓇᖅᑕᐅᖃᑦᑕᖅᓯᒪᓂᖏᓐᓄᑦ.
ᑕᒪᓯ ᑯᒧᕐ, ᓴᓇᓚᐅᐱᓪᓚᒃᑐᖅ ᐊᖑᓇᓱᒃᑎᒃᑯᑦ ᑎᑎᕋᕐᕕᖓᓂᒃ, ᐅᖃᖅᖢᓂ ᐊᔾᔩᑦ ᑕᑯᑎᑕᐅᖅᑳᓚᐅᕐᒪᑕ Hᐊᒻᓚᒃᑯᑦ ᑲᑎᒪᔨᖏᓐᓄᑦ.
“ᑭᐅᓯᖁᔨᔪᑦ ᐊᔾᔨ ᓴᖅᑭᑎᑕᐅᓚᐅᖅᑎᓪᓗᒍ Facebook-ᑯᑦ,” ᑯᒧᕐ ᐅᖃᖅᖢᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ. “ᑕᓪᓕᒪᐅᓚᐅᖅᑐᑦ ᐅᖓᑖᓂᓘᓐᓃᑦ ᑐᒃᑐᑦ ᓂᕿᖏᑦ ᕿᒪᒃᑕᐅᓯᒪᒥᐊᖅᑐᑦ. ᐃᓚᖏᑦ ᓂᖀᑦ ᑎᒍᔭᐅᑉᓗᑎᒃ ᐃᓚᖏᓪᓗ ᕿᒪᒃᑕᐅᒥᐊᖅᓗᑎᒃ.”
ᐊᔾᔨᑦ ᑕᑯᖅᑳᖅᖢᒋᑦ, ᑯᕐᒧᕐ ᐃᓱᒪᓕᐅᓕᓚᐅᖅᑐᖅ ᑎᑎᕋᕈᒪᑉᓗᓂ ᐃᓄᖕᓄᑦ ᐱᔾᔪᑎᒋᓗᒍ ᐅᖃᐅᓯᐅᓯᓚᐅᖅᑐᖅ Facebook-ᑯᑦ.
“Hᐊᒻᓚᒃᑯᑦ ᑲᖏᖅᖠᓂᕐᒥ ᐊᒻᒪᓗ ᑭᕙᓪᓕᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᐊᐃᑦᑖᕈᓱᓪᓚᕆᒃᑐᑦ ᑕᐃᒪᐃᓕᐅᖅᑐᖃᖅᓯᒪᓂᖓᓄᑦ.”
ᑕᒪᓐᓇ ᑐᓴᖅᑎᑦᑎᒍᑕᐅᓚᐅᖅᑎᓪᓗᒍ ᐃᖅᑲᐃᑎᑦᑎᔪᒪᔪᑦ ᐊᖑᓇᓱᒃᑎᓄᑦ ᐊᑭᓖᑎᑕᐅᔪᓐᓇᖃᑦᑕᕐᒪᑕ ᑲᒪᑦᑎᐊᙱᓐᓂᕐᒥᓄᑦ ᐱᑕᖅᑕᒥᓂᒃ ᐊᑭᓗᖕᓂᖅᐹᒃᑯᑦ $575-ᒥ ᓄᓇᕗᒥ ᐆᒪᔪᓕᕆᓂᕐᒧᑦ ᐱᖁᔭᒃᑯᑦ.
ᒪᓕᒃᖢᒍ ᐱᖁᔭᖅ, ᐊᖑᓇᓱᒃᑎᑦ ᒪᓕᒐᑎᒍᑦ ᕿᒪᐃᔪᓐᓇᖃᑦᑕᖅᑐᑦ ᓂᐊᖁᖏᓐᓂᒃ, ᓂᐅᖏᓐᓂᒃ ᓰᖅᑯᖓᑕ ᐊᑖᒍᑦ, ᐊᒻᒪᓗ ᐃᓗᖏᓐᓂᒃ. ᐊᒥᖏᑦ ᕿᒪᒃᑕᐅᔪᓐᓇᖃᑦᑕᕐᒥᔪᑦ ᑐᒃᑐ ᒥᖅᑯᐃᔭᖅᐸᑦ ᐊᒻᒪᓗ ᐱᑕᖅᑕᐅᕝᕕᖏᑦ ᐲᔭᖅᑕᐅᓯᒪᔪᓐᓇᖃᑦᑕᕐᒥᔪᑦ ᐋᓐᓂᐊᓕᕈᑕᐅᖁᓇᒋᑦ.
ᑐᒃᑑᑉ ᐃᓚᖓ ᐊᖑᓇᓱᒃᑎᒧᑦ ᐱᔭᐅᔪᒪᙱᒃᑲᓗᐊᖅᐸᑦ, ᕿᒪᐃᑐᐃᓐᓇᕆᐊᖃᙱᑦᑐᑦ, ᑯᕐᒧᕐ ᑎᑎᕋᖅᖢᓂ.
“ᑐᒃᑑᑉ ᐃᓚᖓ ᓱᓇᐅᒐᓗᐊᖅᐸᑦ ᐱᔪᒪᙱᒃᑯᖕᓂ, ᐃᓱᒪᖃᑦᑕᕐᓗᓯ ᐃᓐᓇᑐᖃᕐᓂᒃ ᐱᑕᖃᕐᒪᑦ ᐊᒻᒪᓗ ᐊᓯᖏᑦ ᓄᓇᖅᑲᑎᓯ ᐱᔪᒪᓇᔭᖅᑐᑦ ᓂᕿᓂᒃ.”
ᑯᕐᒧᕐ ᐅᖃᖅᖢᓂ ᐊᔪᕐᓇᕈᔪᖃᑦᑕᖅᑐᕉᖅ ᐸᓯᔭᒃᓴᙳᖅᑎᑦᑎᓂᐊᕐᓗᓂ ᑕᐅᑐᒃᑐᖃᕆᐊᖃᕋᔭᕐᒪᑦ ᑕᐃᒪᐃᓕᐅᖅᑐᒥᒃ.
“ᖃᐅᔨᓴᐃᓂᐊᕈᑉᑕ ᑕᐃᒪᐃᓕᐅᖅᑐᒥᒃ ᑐᓴᖅᑎᑕᐅᔭᕆᐊᖃᖃᑦᑕᖅᑐᒍᑦ. ᐊᖑᓇᓱᒃᑎᒥᒃ ᑭᓇᑐᐃᓐᓇᕐᒥᒡᓘᓐᓃᑦ ᐅᐸᒃᑕᐅᒍᑉᑕ ᑐᓴᖅᑎᑕᐅᓗᑕᓗ ᑕᐃᒪᐃᓕᐅᖅᑐᒥᒃ ᑲᒪᒋᒋᐊᕈᓐᓇᕐᓂᐊᖅᑕᖅᐳᑦ ᐊᒻᒪᓗ ᐅᖃᖃᑎᒋᓗᒍ ᐆᒪᔪᓕᕆᔨᕗᑦ. ᐆᒪᔪᓕᕆᔨᒃᑯᑦ ᐃᓗᐃᑦᑐᒃᑯᑦ ᖃᐅᔨᓴᐃᔪᓐᓇᖃᑦᑕᕐᒪᑕ.”
ᐅᔾᔨᕈᓱᓕᖅᑎᑦᑎᓂᐊᕐᓗᑕ ᐃᒃᓯᓐᓇᐃᔭᕆᐊᖃᖃᑦᑕᙱᓐᓂᕐᒧᑦ, ᑯᕐᒧᕐ ᐅᖃᖅᖢᓂ ᑐᓂᓯᓂᐊᕋᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦᑕ ᐅᖃᐅᓯᕆᓯᒪᔭᖓᓂᒃ ᓈᓚᒡᕕᖕᒧᑦ.
“ᐃᓚᐅᖃᑕᐅᑎᑦᑎᑦᑎᐊᕈᒪᔪᒍᑦ ᑕᒡᕗᓇ ᐊᒻᒪᓗ ᐃᓐᓇᑐᖃᐃᑦ ᓂᑉᓕᖃᑦᑕᖁᑉᓗᒋᑦ ᓈᓚᐅᑎᒃᑯᑦ. ᑕᒪᓐᓇ ᖃᓄᑭᐊᖅ ᓄᖅᑲᖅᑎᑕᐅᔭᕆᐊᓕᒃ. ᓄᓇᒥ ᕿᒪᐃᑐᐃᓐᓇᖃᑦᑕᕐᓂᖅ ᓂᕿᓂᒃ ᐃᓄᐃᑦ ᖃᐅᔨᒪᔭᑐᖃᖏᑦᑎᒎᙱᒻᒪᑦ. ᐊᒥᓱᑦ ᐃᓐᓇᑐᖃᖁᑎᕗᑦ ᑕᒫᓂ ᑕᒪᑐᒥᙵ ᓈᒻᒪᒃᓴᔾᔮᙱᑦᑐᑦ.”
ᑯᕐᒧᕐ ᐅᖃᒃᑲᓐᓂᖅᖢᓂ ᑕᑯᔪᒪᓂᕐᒥᓄᑦ ᑕᒪᐃᓐᓂᒃ ᓄᓇᓕᖕᓂᒃ ᑭᕙᓪᓕᕐᒥ ᐃᓄᖕᓂᒃ ᑕᒪᑐᒥᙵ ᓄᖅᑲᖅᑎᑦᑎᓇᓱᒃᑐᓂᒃ ᐊᖑᓇᓱᒃᑏᑦ ᑲᒪᑦᑎᐊᖃᑦᑕᙱᓐᓂᖏᓐᓄᑦ.
“ᓄᓇᖅᑲᑎᒌᒃᑑᑎᓪᓗᑕ ᐅᖃᐅᓯᕆᖃᑦᑕᖅᑕᑉᑎᓐᓂᒃ ᒪᓕᑦᑎᐊᖃᑦᑕᕐᓂᐊᕈᑉᑕ ᓂᕿᓂᒃ ᕿᒪᐃᑐᐃᓐᓇᖃᑦᑕᕆᐊᖃᙱᑦᑐᒍᑦ.”