ᐊᔾᔨᐅᙱᑦᑑᔪᖅ ᐅᑭᐅᖅᑕᖅᑐᒥ – ᑲᖏᖅᖠᓂᕐᒥᐅᑕᑦ ᐅᔾᔨᖅᑐᕈᓐᓇᖅᓯᔪᑦ ᑭᒍᓯᕆᖃᑦᑕᕈᓐᓃᕋᔭᕐᓂᕐᒧᑦ, ᑲᒪᒋᔭᐅᔭᕆᐊᖃᕈᓐᓃᕐᓂᕐᒧᑦ, ᐊᓕᐊᓇᐃᑦ ᑲᖏᖅᖠᓂᕐᒥ ᑭᒍᓯᕆᔨᖃᓕᕐᒪᑕ ᑕᐃᑲᓃᖏᓐᓇᕐᓂᐊᓕᖅᑐᒥᒃ.
“ᐱᓕᕆᓐᓇᖅᑐᒻᒪᕆᐊᓘᓯᒪᔪᖅ,” ᑕᐃᒪᓐᓇ ᐅᖃᖅᖢᓂ Hᐊᒻᓴ ᔭᕗᕆ, ᓇᖕᒥᓂᖃᖅᑐᖅ Northern Smiles Dental Clinic-ᒥ ᑭᒍᑎᓕᕆᕝᕕᖕᒥ ᓄᐊᓂᓗ ᓱᕆᓐ, ᓯᕗᓪᓕᖅᐹᒥ 7-ᓂᒃ ᑕᖅᑭᓂᒃ ᐱᓕᕆᓯᒪᓕᖅᑎᓪᓗᒋᑦ ᒪᑐᐃᓚᐅᖅᑳᖅᑎᓪᓗᒍ ᔫᓐ 2021-ᒥ.
ᑭᒍᓯᕆᔨᒧᑦ ᖃᐅᔨᓴᖅᑕᐅᖃᑦᑕᙱᑦᑐᑦ ᑭᒍᓯᕆᓕᕈᓐᓇᖅᑐᑦ, ᑕᐃᒪᐃᒻᒪᑦ ᔭᕗᕆ ᖃᐃᔪᓂᒃ ᑕᑯᒃᑲᓐᓂᖃᑦᑕᕈᒪᓯᒪᔪᖅ ᑭᒍᑎᖏᑦ ᓴᓗᒻᒪᖅᓴᖅᑕᐅᖃᑦᑕᕈᓐᓇᖁᑉᓗᒋᑦ ᑭᒍᓯᕆᓕᖁᓇᒋᑦ ᓯᕗᓂᒃᓴᒥ.
ᓇᓕᐊᖕᓂᑐᐃᓐᓇᖅ ᐅᑉᓗᕐᒥ, ᑭᒍᑎᓕᕆᕝᕕᖓᓂᒃ ᑲᒪᖃᑦᑕᖅᑐᑦ 15-ᓂᒃ ᐃᓄᖕᓂᒃ, ᑭᒍᑎᖏᑦ ᓴᓗᒻᒪᖅᓴᖅᑕᐅᑉᓗᑎᒃ ᐊᒻᒪᓗ ᑲᒪᒋᔭᐅᑉᓗᑎᒃ.
“ᐱᒋᐊᓕᓵᖅᑎᓪᓗᑕ, ᒪᑐᐃᖅᓯᓇᓱᒃᑎᓪᓗᑕ ᑭᒍᑎᓕᕆᕝᕕᖕᒥ ᐱᔭᕆᐊᑐᔪᐊᓘᓚᐅᖅᑐᖅ ᓄᕙᒡᔪᐊᕐᓂᖅ ᑕᐃᒪᐅᑎᓪᓗᒍ,” ᑕᐃᒪᓐᓇ ᐅᖃᖅᖢᓂ ᔭᕗᕆ, ᐅᖃᖅᖢᓂᓗ ᓄᕙᒡᔪᐊᕐᓂᖅ ᐅᖓᓯᒃᓯᒋᐊᖅᑎᑦᑎᖃᑦᑕᓚᐅᕐᒪᑦ ᒪᑐᐃᕐᓂᐊᕐᓂᖓᓄᑦ ᐊᑕᐅᓯᕐᒥᓘᓐᓃᑦ ᐅᑭᐅᒥ.
ᐱᖁᑎᑖᕐᕕᑦ ᐊᑯᓂ ᐅᑕᖅᑭᑎᑦᑎᕙᖕᒪᑕ, ᑕᐃᒪᓐᓇ ᐅᖃᖅᖢᓂ.
“ᓱᓇᑐᐃᓐᓇᑦ ᓴᖅᑭᖃᑦᑕᕐᒪᑕ,” ᑕᐃᒪᓐᓇ ᐅᖃᑦᑎᐊᖅᖢᓂ ᑭᒍᓯᕆᔨ. “ᑭᓯᐊᓂ ᐱᓕᕆᔭᕆᐊᖃᕋᑉᑕ. ᖁᕕᐊᓱᒃᑐᖓ ᒪᑐᐃᖓᓕᕐᒪᑦ. ᐱᔨᑦᓯᕋᓕᕋᑉᑕ ᓄᓇᖅᑲᑎᒌᖕᓂᒃ. ᐃᑲᔪᕋᓱᑦᑎᐊᖅᑐᒍᑦ. ᑕᐃᒪᐃᒻᒪᑦ ᐊᒃᓱᓪᓘᓐᓃᑦ ᒪᑐᐃᖓᓕᕐᒪᑦ.”
ᓄᓇᓖᑦ ᑭᒍᓯᕆᔨᓂᒃ ᑎᑭᑎᑦᑎᕙᒃᑐᑦ ᖃᑯᑎᒃᑯᑦ ᑭᒍᓯᕆᔪᓂᒃ ᑲᒪᓂᖅᓴᐅᕙᖕᒪᑕ ᑭᒍᑎᓕᕆᔭᐅᙱᑦᑐᓐᓇᕐᓂᕐᒧᑦ ᑲᒪᒋᔭᐅᙱᓐᓂᖅᓴᐅᑉᓗᑎᒃ, ᑕᒪᓐᓇ ᑕᒡᕙ ᔭᕗᕆᐅᑉ ᐱᓕᕆᐊᕆᔪᒪᓯᒪᔭᖓ ᒪᑐᐃᖅᓯᔪᒪᑎᓪᓗᒍ ᑭᒍᓯᕆᕝᕕᖕᒥ ᒪᑐᐃᖓᐃᓐᓇᓕᕋᔭᖅᑐᒥᒃ ᑲᖏᖅᖠᓂᕐᒥ. ᓄᓇᓕᖕᓄᑦ ᑎᑭᖃᑦᑕᓚᐅᖅᓯᒪᔪᖅ ᓄᓇᕗᒥ 2017-ᒥ, ᑕᐃᒪᐃᒻᒪᑦ ᒪᑐᐃᖅᓯᔪᒪᓕᓚᐅᖅᑐᖅ ᑭᒍᑎᓕᕆᕝᕕᖕᒥ ᑭᕙᓪᓕᕐᒥ.
“ᒪᑐᐃᖓᐃᓐᓇᕐᓂᐊᖅᑐᒥᒃ ᑭᒍᑎᓕᕆᕝᕕᖃᓕᖅᑎᓪᓗᑕ, ᑕᑯᖃᑦᑕᕈᓐᓇᖅᓯᔪᒍᑦ ᑭᒍᑎᓕᕆᔭᐅᔭᕆᐊᖃᖅᑐᓂᒃ ᐋᓐᓂᐊᙱᑦᑐᓂᒃ ᐊᒻᒪᓗ ᖃᐅᔨᒋᐊᕐᕕᒋᓗᒋᑦ ᖃᓄᖅ ᐃᑲᔪᖅᑕᐅᔭᕆᐊᖃᕐᓂᖏᓐᓄᑦ,” ᑕᐃᒪᓐᓇ ᐅᖃᖅᖢᓂ.
ᐃᒪᓐᓇ ᑐᑭᖃᖅᑐᖅ ᓯᕗᓂᑉᑎᓐᓂᒃ, ᐃᓄᐃᑦ ᑭᒍᓯᕆᔪᐊᓘᖃᑦᑕᖁᓇᒋᑦ ᑭᒍᑕᐃᔭᖅᑕᐅᑐᐃᓐᓇᖃᑦᑕᖁᓇᒋᓪᓗ.
ᐅᖃᖅᖢᓂ ᐃᓄᐃᒡᒎᖅ ᓄᓇᓕᖕᒥ ᐊᓕᐊᓇᐃᒍᓱᒃᓯᒪᔪᑦ ᒪᑐᐃᓚᐅᖅᑳᖅᑎᓪᓗᒍ. ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᐊᔾᔨᓕᐅᕆᔭᖅᑐᓚᐅᖅᑐᓪᓘᓐᓃᑦ, ᑭᒍᑎᓕᕆᔭᐅᖃᑦᑕᖅᓯᒪᓂᑰᔪᖅ ᑕᐃᑲᓃᖦᖢᓂ ᖁᔭᓐᓇᒦᕆᐊᖅᑐᖅᓯᒪᑉᓗᓂ ᔭᕗᕆᒥᒃ ᑲᒪᒋᔭᐅᑦᑎᐊᖅᓯᒪᓂᖓᓄᑦ.
“ᖁᔭᓕᑦᑎᐊᖅᑐᑦ ᑭᒍᓯᕆᔨᖃᓕᕐᒪᑕ ᓄᓇᓕᖕᒦᖏᓐᓇᕐᓂᐊᓕᖅᑐᒥᒃ ᐊᒻᒪᓗ ᐅᑕᖅᑭᖃᑦᑕᕆᐊᖃᕈᓐᓃᕋᒥᒃ ᐱᓇᓱᐊᕈᓯᕐᓂᒃ ᐊᒥᓱᓂᒃ ᑲᒪᒋᔭᐅᓂᐊᕐᓂᕐᒧᑦ, ᐱᓗᐊᖅᑐᒥ ᑭᒍᓯᕆᔪᐊᓗᒃᑕᖃᖅᑎᓪᓗᒍ,” ᑕᐃᒪᓐᓇ ᐅᖃᖅᖢᓂ.
ᔭᕗᕆ ᖃᐅᔨᒪᖁᔨᖕᒥᔪᖅ ᐃᓄᖕᓂᒃ ᐊᓯᖏᓐᓂᒃ ᓄᓇᓕᖕᒥᐅᓂᒃ ᑭᕙᓪᓕᕐᒥ ᑲᒪᒋᖃᑦᑕᕈᓐᓇᕐᒥᒐᒥᒋᑦ, ᑭᒍᓯᕆᔪᐊᓘᔭᕆᐊᖃᙱᒻᒪᑕ ᐅᕝᕙᓘᓐᓃᑦ ᐅᑕᖅᑭᔭᕆᐊᖃᙱᑦᑐᑦ ᑭᒍᓯᕆᔨᒥᒃ ᑎᑭᓐᓂᐊᖅᑐᒥᒃ.