ᑲᖏᖅᖠᓂᖅ ᓯᕗᓪᓕᖅᐹᖑᓗᓂ ᓄᓇᕗᒥ ᐊᑐᓕᖅᑎᑦᑎᓂᐊᖅᑐᒃᓴᐅᔪᖅ ᑲᐱᔭᐅᓯᒪᔪᐃᓐᓇᐃᑦ Hᐊᒻᓚᒃᑯᑦ ᐱᓕᕆᕝᕕᖏᓐᓄᑦ ᐃᑎᕈᓐᓇᖅᑎᑕᐅᓯᒪᖃᑦᑕᕐᓗᑎᒃ ᖃᓄᐃᓕᐅᕈᑎᒃᓴᐃᑦ ᐅᑉᓗᑕᒫᒃᑯᑦ ᑲᔪᓯᑎᑕᐅᔪᓐᓇᖅᓯᖁᑉᓗᒋᑦ.
ᑕᒪᓐᓇ ᐊᑐᓕᖁᔭᐅᓚᐅᖅᑐᖅ ᑲᑎᒪᔨᒧᑦ ᔭᔅᑕᓐ ᒥᐅᕆᑦᒧᑦ Hᐊᒻᓚᒃᑯᑦ ᑲᑎᒪᔨᖏᑦ ᑲᑎᒪᑎᓪᓗᒋᑦ ᓯᑎᐱᕆ 13-ᒥ.
ᒥᐅᕆᑦ ᐅᖃᖅᖢᓂ ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᕐᔪᐊᖅ ᖃᓄᐃᓕᒋᐊᔾᔮᙱᑉᐸᑕ, Hᐊᒻᓚᒃᑯᑦ ᐃᓱᒪᒃᓴᖅᓯᐅᕋᔭᕐᒪᑕ ᐃᖕᒥᓂᒃ ᐱᒋᐊᖅᑎᑦᑎᓇᔭᕐᓂᕐᒧᑦ.
ᒥᐅᕆᑦ ᐅᖃᖅᖢᓂ ᓈᒻᒪᙱᒻᒪᒡᒎᖅ ᖃᑉᓰᓐᓇᑦ ᐃᓄᐃᑦ ᑲᐱᔭᐅᔪᒪᙱᑦᑐᑦ ᓄᖅᑲᖓᑎᑦᑎᑐᐃᓐᓇᖅᑎᓪᓗᒋᑦ ᖃᓄᐃᓕᐅᕈᑎᒃᓴᓂᒃ ᐃᑲᔫᑎᒃᓴᓂᒃ ᑲᔪᓯᑎᑕᐅᓇᔭᕋᓗᐊᖅᑐᓂᒃ ᐊᒻᒪᓗ ᐱᓕᕆᕝᕕᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᓗᐃᑦᑐᒃᑯᑦ ᓄᖅᑲᖓᑎᑦᑎᑐᐃᓐᓇᓕᕐᒪᑕ.
“ᐃᓅᓯᕆᓚᐅᖅᑕᑉᑎᓐᓄᑦ ᐅᑎᖅᐸᓪᓕᐊᔪᒪᓕᕋᒪ,” ᑕᐃᒪᓐᓇ ᐅᖃᖅᖢᓂ. “ᒪᑐᓯᒪᑐᐃᓐᓇᖁᔪᓐᓃᕋᑉᑭᑦ ᐊᑕᐅᓯᕐᒥᒃ ᐅᑭᐅᒥᒃ 80%-ᒋᔭᖏᑦ ᐃᓄᐃᑦ ᒪᕐᕉᓕᖓᔪᒃᑯᑦ ᑲᐱᔭᐅᓯᒪᓕᖅᑎᓪᓗᒋᑦ. ᑐᑭᖃᙱᒻᒪᑦ ᒫᓐᓇᐅᔪᖅ. ᑲᐱᔭᐅᓯᒪᙱᑦᑐᑦ ᐃᖢᐊᖏᓕᐅᕈᑕᐅᓕᖅᑐᑦ.” ᒥᐅᕆᑦ ᐅᖃᖅᖢᓂ ᓄᕙᒡᔪᐊᕐᓂᖅᑕᖃᕐᓂᕋᖅᑕᐅᔭᕌᖓᒡᒎᖅ ᓄᓇᕗᒥ Hᐊᒻᓚᒋᔭᐅᔪᒥ, ᓱᓇᓗᒃᑖᑦ ᒪᑐᔭᕆᐊᖃᓕᖃᑦᑕᕐᒪᑕ ᓄᓇᓕᖕᓂᑐᐃᓐᓇᐅᙱᑦᑐᖅ ᐱᑕᖃᕐᓂᕋᖅᑕᐅᔪᓂᒃ ᑭᓯᐊᓂᓕ ᑭᕙᓪᓕᓗᒃᑖᒥ.
ᒥᐅᕆᑦ ᐅᖃᖅᖢᓂ ᑕᒪᓐᓇᒎᖅ ᑲᔪᓯᑎᑕᐅᔪᓐᓇᐃᓪᓕᔪᖅ ᓄᓇᓖᑦ ᖃᑉᓗᓈᑦ ᓄᓇᖓᓂ ᑲᓇᑕᒥ ᐃᓗᐃᑦᑐᒃᑯᑦ ᐱᙳᐊᕐᕕᖕᓂᒃ ᐊᑐᕈᓐᓇᖅᓯᑎᑦᑎᓯᒪᓕᕐᒪᑕ ᓯᐊᕐᕆᔮᕐᕕᖕᓂᒃ 1000-ᖏᓐᓃᑦᑐᓂᒃ ᐃᓄᖃᖃᑦᑕᖅᑐᓂᒃ.
“20,000-ᓂᒃ ᐃᓐᓄᒃᑎᑦᑎᔪᓐᓇᕈᕕᑦ Blue Bombers-ᑯᑦ ᐱᙳᐊᕐᕕᖓᓂᒃ ᐊᒻᒪᓗ 20,000 ᐃᓄᐃᑦ MTS Centre-ᒥ, ᑲᖏᖅᖠᓂᖅ ᐃᓐᓄᒃᑎᑦᑎᔪᓐᓇᖅᑐᖅ 200-ᓂᒃ ᐅᕝᕙᓘᓐᓃᑦ 300-ᓂᒃ ᓯᐊᕐᕆᔮᕐᕕᖓᓂᒃ ᑲᐱᔭᐅᓯᒪᒃᐸᑕ,” ᑕᐃᒪᓐᓇ ᐅᖃᖅᖢᓂ.
“ᓄᓇᒋᔭᖅᐳᑦ ᐊᐅᓪᓛᕈᓐᓇᕆᐊᓕᐅᒐᓗᐊᖅ ᓄᓇᓕᒡᔪᐊᖅᑎᑐᑦ ᐅᐃᓂᐲᒃᑎᑐᑦ.”
ᒥᐅᕆᑦ ᐅᖃᖅᖢᓂ ᓇᓗᓇᕈᓐᓃᖅᓯᒪᖕᒪᒡᒎᖅ ᑲᐱᔭᐅᓯᒪᙱᑦᑐᑦ ᐊᒥᓲᓂᖅᓴᑦ ᐋᓐᓂᐊᕐᕕᖕᒦᖃᑦᑕᓕᕐᒪᑕ ᑕᒪᓐᓇ ᐊᒃᓱᕈᕐᓇᖅᑐᒃᑰᕈᑕᐅᓲᖅ ᓄᓇᕗᒥ ᑕᐃᒪᐃᑦᑕᕆᐊᖃᕐᓇᓂ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ. ᒥᐅᕆᑦ ᐅᖃᖅᖢᓂ ᐊᑐᓕᖁᔭᖓᒍᒡᒎᖅ ᑲᐱᔭᐅᓯᒪᙱᑦᑐᑦ ᐊᑐᕆᐊᖃᓪᓚᑦᑖᖅᑐᓂᒃ ᐊᑐᖃᑦᑕᕈᓐᓇᕋᔭᖅᑐᑦ ᓲᕐᓗ ᓂᕿᑖᕆᐊᖅᑐᖃᑦᑕᕐᓂᕐᒧᑦ ᐊᒻᒪᓗ ᐋᓐᓂᐊᕐᕕᓕᐊᖃᑦᑕᕆᐊᖃᕐᓂᕐᒧᑦ.
ᑭᓯᐊᓂᓕ, ᑕᑯᑎᑦᑎᔪᓐᓇᙱᒃᑯᑎᒃ ᑲᐱᔭᐅᓯᒪᓂᕐᒥᓂᒃ ᐃᑎᕈᓐᓇᖃᑦᑕᕋᔭᙱᑦᑐᑦ Hᐊᒻᓚᒃᑯᑦ ᐱᓕᕆᕝᕕᖏᓐᓄᑦ.
“ᐃᒪᓐᓇ ᑐᑭᖃᖅᑐᖅ Bingo-ᕈᑎᑖᕆᐊᖅᑐᕈᓐᓇᔾᔮᙱᑦᑐᑦ. Bingo-ᖃᑕᐅᔪᒪᒍᕕᑦ Bingo-ᕈᑎᑖᕆᐊᖅᑐᕈᔾᔭᐅᔪᓐᓇᕐᓗᑎᑦ. ᓯᐊᕐᕆᔮᕐᕕᖕᒧᙵᐅᔪᒪᒍᕕᑦ ᑕᐅᑐᒋᐊᖅᑐᕈᒪᒍᕕᑦ ᓄᑕᕋᕐᓂᒃ Hᐊᑭᑦᑐᒥᒃ? ᓄᑕᕋᕆᔭᐃᑦ ᓯᐊᕐᕆᔮᕐᕕᓕᐊᕈᑎᔪᓐᓇᔾᔮᙱᑕᐃᑦ ᑭᓯᐊᓂ ᑲᐱᔭᐅᓯᒪᒍᕕᑦ.”
ᒥᐅᕆᑦ ᐅᖃᖅᖢᓂᓗ Hᐊᒻᓚᒃᑯᑦ ᐊᑐᓕᖅᑎᑦᑎᓇᔭᕐᒪᑕ ᒪᓕᒐᕐᒥᒃ ᐅᖃᖅᓯᒪᔪᒥᒃ ᑕᒪᕐᒥᒃ ᓴᓇᔨᖏᑦ ᑲᐱᔭᐅᔭᕆᐊᖃᖅᓯᒪᓂᕋᕐᓗᒋᑦ.
ᐅᖃᖃᑎᒌᖅᑳᖅᖢᑎᒃ ᑲᑎᒪᔩᑦ ᐊᖏᖃᑎᒌᓚᐅᖅᑐᑦ ᐋᖅᑭᒃᓯᓂᐊᕐᓂᕐᒧᑦ ᐅᑉᓗᕐᒥᒃ ᓯᕗᓂᒃᓴᒥ ᑕᒪᓐᓇ ᐊᐃᕙᐅᑎᒋᔪᓐᓇᖁᑉᓗᒍ ᐃᓗᐃᑦᑐᒃᑯᑦ. Hᐊᒻᓚᒃᑯᓐᓂᒃ ᑐᑭᒧᐊᒃᑎᑦᑎᔨ ᑎᐅᕆᓐ ᕕᓕᓐ ᐅᖃᖅᖢᓂᓗ ᐸᕐᓇᐃᓂᐊᕋᒥᒎᖅ ᑎᑎᕋᖅᐸᓪᓕᐊᓗᓂ ᑐᒃᓯᕋᐅᑎᒥᒃ ᐊᐅᓪᓚᖅᑎᓐᓇᔭᖅᑕᒥᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᕐᔪᐊᕐᒧᑦ.
ᑲᑎᒪᔨ ᒪᐃᑯᓪ ᓱᑕᐃᔅ ᐅᖃᖅᖢᓂ ᒥᐅᕆᑦ ᐃᓱᒪᒋᔭᖓ “ᐱᒻᒪᕆᐊᓘᓂᕋᖅᖢᓂᐅᒃ” ᑭᓯᐊᓂ ᐅᖃᖃᑎᒌᒍᑎᒋᒃᑲᓐᓂᕈᒪᔭᖓ.
“ᐊᓯᖏᑦ ᓄᓇᓖᑦ ᑕᐃᒪᐃᓕᐅᖅᑰᙱᑦᑐᑦ. ᑐᓴᕈᒪᓇᔭᖅᑐᖓᓕ ᐊᓯᖏᑦᑕᐅᖅ ᐅᖃᖅᓯᒪᖕᒪᖔᑕ “ᐃᖕᒥᓂᒃ ᐱᒋᐊᒥᐊᕋᔭᕐᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᓱᑕᐃᔅ. “ᑕᒪᓐᓇ ᐊᒃᓱᕉᑕᐅᓇᔭᖅᑐᖅ ᓇᓗᓇᙱᑦᑐᖅ ᓂᕈᐊᖅᑕᐅᓇᓱᒃᑐᓄᑦ.”
ᒥᐅᕆᑦ ᑭᐅᑉᓗᓂ ᑕᒪᓐᓇ ᐊᔭᐅᖅᑐᕈᑕᐅᔪᓐᓇᕐᒥᖕᒪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᕐᔪᐊᖓᓄᑦ ᖃᓄᐃᓕᒋᐊᕈᑎᖃᕋᔭᕐᓂᕐᒧᑦ. “ᑎᑎᕋᕐᕕᖓ ᐸᒡᕕᓵᖑᔭᕆᐊᓕᒃ.” ᑕᐃᒪᓐᓇ ᐅᖃᖅᖢᓂ ᕕᓕᓐ.
ᒥᐅᕆᑦ ᑭᖑᓪᓕᖅᐹᒃᑯᑦ ᐅᖃᖅᖢᓂ Hᐊᒻᓚᒃᑯᑦ ᐱᒋᐊᖅᑳᖅᐸᑕ ᒪᓕᒐᓕᖅᑐᐃᓂᕐᒧᑦ ᑲᐱᔭᐅᓯᒪᙱᑦᑐᓂᒃ ᐊᑐᖃᑦᑕᖁᓇᒋᑦ Hᐊᒻᓚᒃᑯᑦ ᐱᓕᕆᕝᕕᖏᓐᓂᒃ ᐃᓄᐃᑦ ᑲᐱᔭᐅᔪᒪᓂᖅᓴᐅᓕᕋᔭᖅᑐᑦ, ᑕᐃᒪᓐᓇ ᐅᓗᕆᐊᓇᖅᑐᒦᙱᓐᓂᖅᓴᐅᓕᕋᔭᖅᑐᑦ ᐃᓄᐃᑦ.
ᑲᑎᒪᔨᑦ ᐅᑉᓗᕐᒥᒃ ᐋᖅᑭᒃᓯᔭᕆᐊᓖᑦ ᓱᓕ ᑕᒪᑐᒥᙵ ᐊᐃᕙᐅᑎᖃᕐᓂᐊᕐᓗᑎᒃ, ᑭᓯᐊᓂ ᒥᐅᕆᑦ ᓂᕆᐅᒃᑐᖅ ᑲᑎᒪᔩᑦ ᐸᕐᓇᒃᓯᒪᖁᑉᓗᒋᑦ ᓂᕈᐊᕈᒫᕐᓂᕐᒧᑦ ᐅᑭᐅᒃᑯᑦ Hᐊᑭᖃᑦᑕᓕᖅᑳᖅᑎᓐᓇᒋᑦ.
“ᑲᐱᔭᐅᓯᒪᔪᖓ ᐊᒻᒪᓗ ᑕᖃᒋᔭᒃᑲ ᑲᐱᔭᐅᓯᒪᙱᑦᑐᑦ,” ᑕᐃᒪᓐᓇ ᐅᖃᖅᖢᓂ. “ᐊᒥᓱᒃᑲᓐᓂᕐᓂᒃ ᐅᑭᐅᓂᒃ ᐃᕐᖑᑕᑯᓗᒐ ᑕᑯᖃᑦᑕᕆᐊᖃᕈᒪᔪᓐᓃᕋᑉᑯ ᐃᓄᐃᑦ ᑲᐱᔭᐅᔪᒪᙱᑐᐃᓐᓇᕐᓂᖏᓐᓄᑦ.”
ᐊᐱᕆᔭᐅᖕᒪᑕ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᑦ ᖃᓄᖅ ᐃᓱᒪᖕᒪᖔᑕ ᐃᖢᐊᖅᓴᐃᔨ ᐸᑐᓴᓐ ᐱᓯᒪᓚᐅᙱᑦᑐᖅ ᓱᓕ ᑐᒃᓯᕋᐅᑎᒥᒃ ᐊᒻᒪᓗ ᑭᐅᔪᓐᓇᕐᓇᓂ ᕿᒥᕐᕈᓚᐅᖅᑳᖅᑎᓐᓇᒍ ᑐᒃᓯᕋᐅᑎᒥᒃ.