ᑲᖏᖅᖠᓂᕐᒥᐅᑕᖅ ᐳᕆᑕᓐ ᐅᓗᖅᓯ ᒪᔪᕆᐊᕐᓂᐊᓕᕐᒥᔪᖅ Hᐊᑭᖅᑎᕐᔪᐊᙳᖅᐸᓪᓕᐊᓂᕐᒧᑦ ᐊᓐᑎᐅᕆᔪᒥ ᐊᑎᓕᐅᖅᑕᐅᓯᒪᓕᖅᑎᓪᓗᒍ Bradford Rattlers ᒪᒃᑯᒃᑐᕐᔪᐊᑦ Hᐊᑭᖅᑎᖏᓐᓄᑦ.
“ᓈᒻᒪᑦᑎᐊᕐᓂᐊᖅᑰᖅᑐᖓ ᑕᐃᑉᑯᓇᓂ ᐃᓚᐅᖃᑕᐅᓕᕈᒪ,” ᐅᓗᖅᓯ ᐅᖃᐅᔾᔨᑉᓗᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ. “ᐱᕙᓪᓕᐊᑦᑎᐊᖅᓯᒪᒐᒪ ᐊᒻᒪᓗ ᐱᓕᕆᕐᔪᐊᖅᓯᒪᑉᓗᖓ ᒥᐊᓂᖅᓯᔨᒃᑲ ᐅᕙᒻᓂᒃ ᐅᒃᐱᕈᓱᖕᓂᓖᑦ.”
6 feet-ᓂᒃ ᑕᑭᓂᓕᒃ, 170-ᓂᒃ ᐅᖁᒪᐃᓐᓂᖃᖅᖢᓂ Hᐊᑭᖅᑎ Mount Academy Saints-ᑯᓐᓄᑦ 18 ᑐᖔᓂ ᐅᑭᐅᓕᖕᓂᙶᖃᑕᐅᔪᖅ, ᐱᖓᓱᓂᒃ ᐅᑭᐅᓂᒃ ᑕᐃᑉᑯᓇᓂ Hᐊᑭᖃᑕᐅᖃᑦᑕᖅᓯᒪᑉᓗᓂ.
ᐱᒋᐊᖅᑳᓚᐅᖅᓯᒪᔪᖅ Prince Edward Island-ᒥ Hᐊᑭᖅᑎᓂᒃ ᑕᐅᕙᓂ ᐊᔪᙱᓐᓂᕐᒥᓂᒃ ᑕᑯᑎᑦᑎᓚᐅᖅᖢᓂ ᐊᕐᕌᒍᑕᒫᒃᑯᑦ Andrews-ᑯᑦ ᐊᔪᙱᓐᓂᕆᔭᐅᔪᓂᒃ ᓴᖅᑭᑎᑦᑎᕙᒃᑎᓪᓗᒋᑦ, ᓇᓂᑐᐃᓐᓇᑦᑎᐊᖅ ᓄᓇᕐᔪᐊᕐᒥ Hᐊᑭᖅᑏᑦ ᑕᐃᑯᙵ Hᐊᑭᒋᐊᖅᑐᓲᑦ ᒪᒃᑯᒃᑐᕐᔪᐊᓂᒃ ᓯᓚᑦᑐᖅᓴᕐᕕᖕᒥᙶᖅᑐᓪᓗ Hᐊᑭᖅᑏᑦ.
“ᓂᕈᐊᖅᑕᐅᑳᓪᓚᒍᓐᓇᓚᐅᕋᒪ Mount-ᑯᓐᓄᑦ. ᖁᕕᐊᓇᖃᑦᑕᖅᓯᒪᔪᖅ. ᐊᓕᐊᓇᐃᒋᑦᑎᐊᖅᑕᕋ ᑕᒫᓂ, ᐊᖏᕐᕋᕆᒃᑲᓐᓂᖅᑑᔭᑐᐃᓐᓇᖅᑕᕋ,” ᑕᐃᒪᓐᓇ ᐅᖃᖅᖢᓂ.
ᐅᓗᖅᓯ ᐅᖃᖅᖢᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ Bradford-ᑯᑦ ᐊᖓᔪᖅᑳᖓ ᐃᖕᒥᓄᑦ ᖃᐅᔨᒋᐊᓚᐅᕐᒪᑦ ᐅᑭᐅᖅ Hᐊᑭᒋᐊᓕᓵᖅᑎᓪᓗᒋᑦ ᐅᖃᐅᔾᔭᐅᑉᓗᓂ ᐱᔫᒥᒋᔭᐅᖕᒪᑦ.
“ᐅᑭᐅᓗᒃᑖᖅ ᐅᖃᖃᑎᒋᖃᑦᑕᖅᓯᒪᔭᕋ. ᐅᑭᐅᖅ Hᐊᑭᓐᓂᐅᔪᖅ ᐃᓱᓕᑉᐸᓪᓕᐊᓕᖅᑎᓪᓗᒍ ᐅᕙᒻᓄᑦ ᖃᐅᔨᒋᐊᓪᓚᑦᑖᓕᓚᐅᖅᑐᑦ, ᐊᒻᒪᓗ ᖃᑉᓰᓐᓇᑦ ᐱᓇᓱᐊᕈᓰᑦ ᐱᐊᓂᖕᒪᑕ ᐊᑎᓕᐅᖅᑕᐅᕝᕕᒋᑉᓗᒋᑦ,” ᑕᐃᒪᓐᓇ ᐅᖃᖅᖢᓂ.
ᐅᓗᖅᓯ, 19-ᓂᒃ ᐅᑭᐅᓕᒃ, ᐊᑎᓕᐅᖅᑕᐅᓪᓚᑦᑖᓚᐅᖅᑐᖅ ᐊᑕᐅᓯᕐᒧᑦ ᐅᑭᐅᒧᑦ ᑳᓐᑐᕌᒃᑯᑦ ᒫᑦᓯ 29-ᒥ. ᐅᖃᖅᖢᓂ ᐃᓱᒫᓘᑎᖃᓚᐅᖅᑑᒐᓗᐊᕉᖅ ᓇᓂᓯᔾᔮᕋᓱᒋᙱᖦᖢᓂ Hᐊᑭᖃᑎᒋᖃᑦᑕᕐᓂᐊᖅᑕᖏᓐᓂᒃ ᑭᓯᐊᓂ Bradford-ᑯᑦ ᐃᖕᒥᓂᒃ ᐱᔫᒥᒍᓱᖕᓂᖅᖢᑎᒃ.
“ᑕᒪᓐᓇ ᐊᒃᓱᕈᕈᑎᒋᒃᑲᓐᓂᖅᓯᒪᔭᕋ ᐱᓇᓱᐊᕈᑎᒋᓯᒪᑦᑎᐊᖅᑕᕋ.,” ᑕᐃᒪᓐᓇ ᐅᖃᖅᖢᓂ.
Rattlers-ᑯᑦ ᐊᖓᔪᖅᑳᖓ ᓵᓐ ᐅᕈᑦ ᐅᖃᖅᖢᓂ ᐅᓗᖅᓯ ᐃᖕᒥᓄᒡᒎᖅ ᐃᓱᒪᒃᓴᖅᓯᐅᕈᑕᐅᖁᔭᐅᓚᐅᕐᒪᑦ ᓄᓇᕗᒥᐅᑕᕐᒧᑦ.
“ᐊᐅᔭᖅ ᐱᓕᕆᕙᓪᓕᐊᓕᖅᑎᓪᓗᑕ ᐊᑎᕐᓂᒃ ᑲᑎᑦᑎᓂᕐᒧᑦ ᐊᑎᖓ ᓯᕗᓪᓕᖅᐸᐅᖃᑕᐅᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ ᐅᕈᑦ. “ᒪᕐᕉᓕᖓᔪᒃᑯᑦ ᐱᙳᐊᖃᑦᑕᕐᒪᑦ. ᓯᐊᕐᕆᔮᔪᔪᐊᓘᑉᓗᓂ. ᑎᒥᖓ ᓈᒻᒪᑦᑎᐊᖅᖢᓂ ᑭᓯᐊᓂ ᓴᙱᔪᐊᓗᒃ. ᐱᙳᐊᖅᑎᑦᑎᐊᕚᓗᒃ ᐊᒻᒪᓗ ᐅᓗᕆᐊᓇᖅᑐᒃᑰᓗᐊᕋᓱᒍᓐᓇᙱᑦᑐᖅ.”
ᐅᕈᑦ ᐅᖃᖅᖢᓂ Hᐊᑭᖅᑐᓕᕆᔨᒃᑯᖏᑦ ᐱᔫᒥᒍᓱᐃᓐᓇᖅᓯᒪᖕᒪᑕ ᓄᓇᕗᒥᐅᑕᓂᒃ ᑕᐃᒪᙵᓂ ᖃᒪᓂ’ᑐᐊᕐᒥᐅᑕᖅ ᑎᐅᕆᓐᔅ ᒪᑲᓚᐃᓐ ᐊᑎᓕᐅᖅᑕᐅᓚᐅᖅᑳᖅᑎᓪᓗᒍ, Hᐊᑭᖅᑎᖏᓐᓂᒃ ᐊᖓᔪᖅᑳᕆᔭᐅᓕᓚᐅᖅᑐᖅ ᑕᐃᑉᓱᒪᓂᐊᕐᔪᒃ.
ᑳᓐᑐᕌᒃᒥᒃ ᐊᑎᓕᐅᕆᖅᑳᖅᖢᓂ, ᐅᓗᖅᓯ ᐅᖃᖅᖢᓂ ᐃᓕᓐᓂᐊᕈᑎᒋᔭᖏᒡᒎᖅ ᐱᕚᓪᓕᖅᑎᓯᒪᔭᖏᑦ. ᓂᕆᑦᑎᐊᔪᓴᕐᓂᖅᓴᐅᓕᖅᖢᓂᓗ.
“ᒫᓐᓇᐅᔪᖅ ᐅᑉᓗᑕᒫᒃᑯᑦ ᐊᔪᕈᓐᓃᖅᓴᖃᑦᑕᖅᑐᖓ, ᒪᕐᕈᐃᖅᑕᖅᖢᖓ ᐅᑉᓗᑕᒫᒃᑯᑦ, ᐊᒻᒪᓗ ᒪᒪᖅᑐᖅᑐᖃᑦᑕᖅᑕᒃᑲ ᓇᑉᐸᖓᒍᑦ ᐱᖃᑦᑕᕈᓐᓃᖅᖢᒋᑦ: ᐅᖁᒻᒥᐊᖃᑦᑖᑦ, ᐃᒥᒐᐃᑦ ᐊᒻᒪᓗ ᐸᑦᑕᐃᑦᑐᑦ.”
ᐅᓗᖅᓯᐅᑉ Mount Academy Saints-ᑯᓐᓃᓐᓂᕆᓚᐅᖅᑕᖓ ᐃᓱᓕᓚᐅᖅᑐᖅ ᓵᓚᒃᓴᓚᐅᖅᖢᑎᒃ Hᐊᑭᖅᑎᖏᑦ 2020-ᒥ. Prince Edward Island-ᒥ ᐱᙳᐊᖃᑦᑕᓚᐅᖅᖢᓂ, ᐅᓗᖅᓯ Hᐊᑭᖃᑕᐅᓚᐅᖅᓯᒪᖕᒥᔪᖅ ᓄᓇᕗᒥ ᒪᒃᑯᒃᑐᕐᔪᐊᑦ ᑲᓇᑕᒥ ᐅᑭᐅᒃᑯᑦ ᐱᙳᐊᕕᒡᔪᐊᖅᑎᓪᓗᒋᑦ. ᐅᖃᖅᖢᓂ ᑕᐃᒻᓇᒎᖅ ᐱᒻᒪᕆᐅᓂᖅᐹᖑᖃᑕᐅᓯᒪᔪᖅ Hᐊᑭᖃᑦᑕᖅᓯᒪᓕᖅᑎᓪᓗᒍ.
“ᑕᐃᑲᓂ ᓯᕗᓪᓕᖅᐹᑦᑎᐊᒥ ᓄᓇᕗᒥᐅᑕᐅᖃᑎᒃᑲ ᐱᙳᐊᖅᑎᐅᖃᑎᒋᓚᐅᖅᑕᒃᑲ. ᐊᓕᐊᓇᐃᑦᑐᐊᓘᓚᐅᖅᑐᖅ. Hᐊᑭᒋᐊᖅᑐᖅᓯᒪᖃᑦᑕᖅᑎᓪᓗᑕ ᐊᓕᐊᓇᐃᓐᓂᖅᐹᖑᖃᑕᐅᓯᒪᔪᖅ,” ᑕᐃᒪᓐᓇ ᐅᖃᖅᖢᓂ.
ᐊᔪᙱᓐᓂᕆᔭᖏᑦ ᑕᐃᒪᐅᑎᓪᓗᒋᑦ, ᐅᕈᑦ ᐅᖃᖅᓯᒪᔪᖅ ᐅᐱᒍᓱᓚᐅᖅᑐᕉᖅ ᐅᓗᖅᓯ ᒪᒃᑯᒃᑐᕐᔪᐊᑦᑎᐊᕙᒻᒪᕆᐊᓘᖕᒪᑦ ᐊᒻᒪᓗ ᐱᒻᒪᕆᐊᓗᖕᓂᒃ ᕿᑎᖃᑕᐅᖃᑦᑕᖅᓯᒪᑉᓗᓂ.
“ᖁᕕᐊᒋᔭᖅᐳᑦ ᕿᑎᒃᑏᑦ ᐊᒃᓱᕈᕐᓇᖅᑐᒃᑰᖅᓯᒪᔪᑦ,” ᑕᐃᒪᓐᓇ ᐅᖃᖅᖢᓂ. “ᐊᔪᙱᑦᑐᕐᔪᐊᑎᑐᑦ ᑕᐅᑦᑐᖃᓕᐊᓂᒃᑐᖅ.”
ᐅᓗᖅᓯ ᐱᕈᖅᓴᓚᐅᖅᑐᖅ Hᐊᑭᖅᑎᐅᑉᓗᓂ ᑲᖏᖅᖠᓂᕐᒥ. ᑭᖑᓪᓕᖅᐹᒃᑯᑦ Hᐊᑭᕐᔪᐊᕐᓂᕆᓚᐅᖅᑕᖓ ᑕᐃᑲᓂ 2018-ᒥ, Hᐊᑭᖃᑎᖏᑦ ᓵᓚᒃᓴᓚᐅᖅᑎᓪᓗᒋᑦ Polar Bear Plate-ᒥᒃ Hᐊᑭᕕᒡᔪᐊᕐᓂᐅᖃᑦᑕᖅᑐᒥᒃ. ᖁᔭᓐᓇᒦᖅᓯᒪᔪᖅ ᐊᑖᑕᒥᓂᒃ ᔪᐊᑎᒥᒃ ᐊᒻᒪᓗ ᐳᔾᔫᑦ ᑯᓱᒐᕐᒥᒃ ᐃᑲᔪᖅᓯᒪᖕᒪᑎᒃ ᐱᙳᐊᖃᑦᑕᕐᓂᖓᒍᑦ.
“ᐃᖃᓗᖕᒥᐅᑕᐅᑉᓗᓂ, ᐃᖃᐃᓕᓴᖃᑎᖃᖃᑦᑕᓚᐅᖅᑐᖅ ᑯᓱᒐᕐᒥᒃ. ᐅᖃᖃᑎᒋᖃᑦᑕᓚᐅᕋᑉᑯ ᐃᒪᓐᓈᖅᑐᑦᑎᐊᖃᑦᑕᖅᖢᓂᖓᓗ,” ᑕᐃᒪᓐᓇ ᐅᖃᖅᖢᓂ. “ᐃᑲᔪᒃᑳᓗᒃ ᐊᒻᒪᓗ ᐃᖕᒥᓂᒃ ᐅᒃᐱᕈᓱᒍᓐᓇᖅᑎᑦᑎᓲᖅ ᐊᒻᒪᓗ ᐃᖅᑲᐅᒪᑎᑦᑎᓇᓱᓲᖅ ᐊᒃᓱᕈᐃᓐᓇᖁᔨᑉᓗᓂ.”
Hᐊᑭᖅᑎᕐᔪᐊᓂ ᐅᓗᖅᓯᐅᑉ ᐅᐱᒋᓂᖅᐹᖓ ᐃᑕᓐ ᐱᐊ, Edmonton Oiler’s -ᑯᓐᓄᑦ Hᐊᑭᖅᑎ Ochapowace-ᑯᓐᓂᕐᒥᐅᑕᖅ ᐊᓪᓚᓂ. ᐱᐊᑎᑐᑦ, ᐅᓗᖅᓯ Hᐊᑭᕐᓂᒃᑯᑦ ᓴᐳᓐᓂᐊᖅᑎᐅᔪᖅ ᐋᖅᑭᒃᓱᐃᓲᑦ ᖃᓄᐃᓕᒋᐊᕐᓂᐊᕐᓂᖏᓐᓄᑦ ᑎᒥᒃᑯᓪᓗ ᑲᒪᒋᔭᐅᓪᓚᕆᓲᑦ.
“ᐊᒥᓱᓂᒃ ᑐᓗᖅᑕᕈᑎᓂᒃ ᓯᖁᒥᑦᑎᓯᒪᔪᖅ ᐊᒻᒪᓗ ᐱᓕᕆᕐᔪᐊᒃᓲᖅ,” ᑕᐃᒪᓐᓇ ᐅᖃᖅᖢᓂ.
ᐅᖃᖅᖢᓂ ᐊᔾᔨᒋᔪᒪᖃᑦᑕᓚᐅᖅᑕᖓᒎᖅ ᔪᐊᑕᓐ ᑐᑐ ᐱᕈᖅᓴᑉᓗᓂ ᐊᒻᒪᓗ ᑕᐃᒪᑐᕉᖅ ᔪᐊᑕᓐᑎᑐᑦ Hᐊᑭᖅᑎᕐᔪᐊᓃᖃᑕᐅᔪᓐᓇᖅᓯᔪᒫᖅᐳᖅ.
“ᑕᐃᒪᐃᑦᑐᙳᕈᒪᔪᖓ ᖃᑯᒍ. Hᐊᑭᖅᑎᕐᔪᐊᓃᖃᑕᐅᖃᑦᑕᕈᒪᓕᕐᓂᐊᖅᑐᖓ.”