ᑯᕆᔅ ᐃᑯᓪᔅ ᐃᓱᓕᑦᑎᓚᐅᖅᑎᓪᓗᒍ ᐊᕐᕌᒍᓄᑦ−30-ᓄᑦ ᐃᓕᓴᐃᔨᐅᓂᕐᒥ ᐃᖅᑲᓇᐃᔮᕆᔭᒥᓂ ᑲᖏᖅᖠᓂᕐᒥ, ᕿᓂᖅᐸᓪᓕᐊᓕᓚᐅᖅᐳᖅ ᐊᔾᔨᒋᙱᑕᖓᓂ ᐱᓕᕆᓂᐅᔪᓂ ᐱᓕᕆᐊᒃᓴᒥᓂ ᐊᒻᒪ ᐃᑲᔪᖅᓱᐃᔪᓐᓇᕐᓂᖓᓂ.
“ᐃᓕᓴᐃᔨᐅᓪᓗᓂ, ᐱᓕᕆᓗᐊᖅᐸᙱᓚᑎᑦ ᐊᓯᖏᓐᓂ ᐃᓕᓴᐃᓂᕐᒥ,” ᐅᖃᓚᐅᖅᐳᖅ ᐃᑯᓪᔅ, ᒪᓐᑐᕆᐋᓪᒥᐅᑕᓪᓚᕆᐅᓪᓗᓂ ᑭᓯᐊᓂ ᓅᓚᐅᖅᓯᒪᕗᖅ ᑲᖏᖅᖠᓂᕐᒧᑦ ᐃᓕᓐᓂᐊᖅᑎᑦᑎᓂᕐᒥ ᐊᒻᒪ ᓄᓇᓐᓇᕆᕐᔪᐊᓕᓚᐅᖅᐸᖓ. “ᒫᓐᓇ ᓄᖅᑲᖓᓕᖅᖢᖓ ᐱᕕᒃᓴᖃᖅᑎᑦᑎᕗᖅ ᐆᒃᑐᕋᓱᐊᕐᓂᕐᒥ ᐊᓯᖏᓐᓂ ᐊᔾᔨᒋᙱᑕᖓᓂ ᐱᓕᕆᓂᐅᔪᓂ ᐃᓱᒪᒋᓚᐅᖅᑕᕐᓂ ᑕᐃᔅᓱᒪᓂᒃᑲᓐᓂᕐᒥ.”
ᐃᓂᒃᓴᒥ ᕼᐋᒻᓚᒃᑯᑦ ᑲᑎᒪᔨᖏᓐᓄᑦ ᒪᑐᐃᖅᑐᖃᕐᒪᑦ, ᐃᓅᔪᓐᓃᕐᓂᐅᔪᒥ ᑲᑎᒪᔨ ᔭᐃᒥᓯ ᒥᐊᕆᑦᒥ ᖁᕕᐊᓱᒡᕕᐅᑎᓪᓗᒍ, ᐃᑯᓪᔅ ᑐᓂᓯᓚᐅᖅᐳᖅ ᐊᑎᖓᓂ ᐱᓇᓱᐊᕐᓂᖓᓄᑦ.
ᕼᐋᒻᓚᒃᑯᑦ ᑲᑎᒪᔨᖏᑦ ᓂᕈᐊᓚᐅᖅᐳᑦ ᖃᔅᓯᒐᓚᖕᓂ ᓂᕈᐊᒐᒃᓴᐅᔪᓂ ᐃᓚᐅᖃᑕᐅᓂᕐᒥ ᑲᑎᙵᓂᐅᔪᓂ ᐊᒥᐊᒃᑯᖓᓂ ᑲᑎᒪᔨᒃᓴᐅᓂᖓᓄᑦ ᕕᕗᐊᕆ 13−ᒥ ᑲᑎᒪᔨᒃᑯᓐᓂ ᑲᑎᒪᓂᐅᔪᒥ ᑕᐃᒪᓐᓇᑦᑕᐃᓐᓇᖅ ᑲᑎᒪᔨᒃᑯᑦ ᓂᕈᐊᖅᓯᓚᐅᕐᓂᖏᓐᓂ ᑲᑎᒪᔨ ᒪᐃᒋᓐ ᐱᑦᓱᓪ−ᓚᐃᔪᓪᒥ ᐊᒻᒪ ᑲᑎᒪᔨ ᐹᑐᕆᒃ ᑕᒍᕐᓈᒥ 2022−ᒥ. ᐃᑯᓪᔅ ᓵᓚᖃᓚᐅᖅᐳᖅ ᑕᐃᕕᑦ ᑲᑯᒃᑎᓐᓇᖅ ᓄᑲᖅᖠᕐᒥ ᑭᖑᓪᓕᖅᐹᖑᔪᒥ ᓂᕈᐊᖅᑕᐅᓂᐅᔪᒥ 4-3−ᒥ ᐃᓂᒃᓴᖓᓂ ᐱᓂᕐᒧᑦ ᑲᑎᒪᔨᒃᑯᓐᓄᑦ. ᒫᓐᓇᐅᔪᒥ ᑲᑎᒪᔨᒧᑦ ᑲᑎᒪᔨᐅᓂᖓᓂ ᐃᓱᓕᓐᓂᐊᖅᐳᖅ ᐅᒃᑐᐱᕆ 23−ᒥ ᑕᒪᑐᒪᓂ ᐊᕐᕌᒎᔪᒥ.
“ᐅᕙᓐᓄᑦ ᐅᖃᐅᓯᐅᓚᐅᖅᐳᖅ ᐊᒻᒪ, ᐃᓛᒃ, ᓄᓇᓕᑦᑎᐊᕙᐅᒋᔭᐃᑦ ᐊᒻᒪ ᑕᑯᔪᒪᕙᐃᑦ ᐱᕈᖅᐸᓪᓕᐊᓂᖓᓂ ᐊᒻᒪ ᑐᕌᑦᑎᐊᕐᓂᖓᓂ ᑐᕌᒐᒃᓴᑦᑎᐊᕙᖕᒧᑦ,” ᐅᖃᓚᐅᖅᐳᖅ.
ᐃᑯᓪᔅ ᐅᖃᓚᐅᖅᐳᖅ ᓄᓇᓕᒃ ᑲᒪᓇᖅᑐᐊᓘᕌᓂᒃᐳᖅ ᐊᒻᒪ ᓯᕗᓕᐅᖅᑎᑦᑎᐊᕚᓂᖃᖅᖢᓂ, ᑕᐃᒫᒃ ᐊᖏᔪᒥᒃ ᐱᓕᕆᕐᒧᐊᕐᓂᖃᕈᒪᙱᓚᖅ, ᑭᓯᐊᓂ ᐃᓱᒪᕗᖅ ᑐᑭᓯᐅᒪᓂᖃᕐᓂᖓᓂ ᒪᒃᑯᒃᑐᓂ ᐱᔭᕆᐊᓕᖏᓐᓂ – ᐃᓕᓐᓂᐊᖅᑎᑦᑎᓯᒪᓪᓗᓂ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐊᑯᓂᒻᒪᕆᐊᓗᒃ – ᐊᒻᒪ ᐊᔭᐅᕆᔪᒪᕗᖅ ᐊᖏᕐᕋᒥ ᓇᖕᒥᓂᖃᕐᓂᕐᒥ.
ᑕᐃᓚᐅᖅᐸᖓ ᑲᖏᖅᖠᓂᕐᒥ “ᓈᒻᒪᒃᓯᑦᑎᐊᕐᓂᖓᓂ”ᐊᖏᕐᕋᒥ ᓇᖕᒥᓂᖃᕐᓂᕐᒥ ᐃᑲᔪᕐᓂᕐᒧᑦ ᐊᑭᑐᓗᐊᙱᑎᑦᑎᓂᕐᒥ ᐊᒻᒪ ᐊᔪᕐᓇᔾᔮᙱᓐᓂᖓᓂ ᒪᒃᑯᒃᑐᓄᑦ ᐊᐃᑉᐸᕇᖑᔪᓄᑦ ᐊᒻᒪ ᓄᑖᖑᔪᓂ ᐃᓚᒌᖑᔪᓂ ᐃᒡᓗᒋᓂᐊᖅᑕᖓᓂ ᐊᒻᒪ ᐱᕈᑦᑎᐊᕐᓂᖏᓐᓂ ᓄᓇᓕᖕᓂ.
“ᑕᒪᓐᓇ ᑕᑯᔪᒪᓇᔭᖅᑕᕋ ᑕᐃᒪᐃᒐᔪᖕᓂᖅᓴᐅᓂᖓᓂ,” ᐅᖃᓚᐅᖅᐳᖅ ᐃᑯᓪᔅ.
ᕼᐋᒻᓚᒃᑯᑦ ᑲᑎᒪᔨᖏᑦ ᐱᓚᐅᕆᕗᑦ ᑐᒃᓯᕋᕐᓂᐅᔪᓂ ᐃᓂᐅᔪᒧᑦ ᔮᓂ ᐊᔭᕈᐊᕐᒥ, ᐱᕐᓈᑦ ᑯᕋᐃᑯ, ᔅᑳᑦ ᓵᑦᓗᕐ, ᕼᐊᐃᓕ ᐊᓚᑲᓐ ᐅᐊᐃᑦ ᐊᒻᒪ ᐋᑦ ᐅᐊᐃᑦ-ᓵᑦᑎᐊᓇᒥ.