ᑎᓴᒪᐃᑦ ᐃᓄᑐᖃᐃᑦ ᐃᒡᓗᖃᖅᑐᑦ ᐃᖃᓗᖕᓂ ᐃᓄᑐᖃᕐᓄᑦ ᑐᔪᕐᒥᕕᖓᓂ ᑐᔪᕐᒥᓯᒪᕗᑦ ᐋᑐᕚᒥ ᐃᐊᒻᐸᓯ ᐱᓇᖕᓇᕐᒥ ᐃᓄᑐᖃᒃᑯᕕᖕᒥ ᑕᐃᒪᙵᓂ ᒪᐃᒥ, ᑭᓯᐊᓂ, ᑕᐃᒪᐃᓪᓗᐊᓚᐅᙱᓚᖅ, ᐅᖃᖅᐳᖅ ᐃᖃᓗᖕᓂ-ᓂᐊᖁᙴᒥ ᒪᓕᒐᓕᐅᖅᑎᐅᓚᐅᖅᑐᒥ ᐹᑦ ᐊᕐᓇᒃᑲᖅ.
ᐃᒻᒥᓂᒃ ᐊᒻᒪ ᑎᓴᒪᓂ ᐊᓯᖏᓐᓂ ᐃᓚᒋᔭᐅᓚᐅᖅᐳᑦ ᓴᐃᓕᕕᒃ ᑲᑐᔾᔨᖃᑎᒌᒃᑯᓐᓂ, ᑮᓇᐅᔾᔭᒐᓱᐊᙱᓐᓂᐅᔪᒥ ᑲᑎᙵᓂᐅᔪᒥ ᑕᒪᕐᒥᒐᓚᒃ ᐱᓕᕆᓂᖃᓚᐅᖅᑐᓂ ᐱᓕᕆᕙᓪᓕᐊᓂᖓᓂ ᐊᒻᒪ ᐸᕐᓇᐃᓂᕐᒧᑦ ᓄᑖᒧᑦ ᐃᓄᑐᖃᐃᑦ ᐃᒡᓗᕐᔪᐊᒃᓴᖓᓐᓂ ᐃᖃᓗᖕᓂ, ᓯᕗᓪᓕᖅᐸᐅᔪᓂ ᑎᑎᖅᑲᓂ ᐃᑲᔪᖅᓱᐃᔪᓂ ᐱᓕᕆᐊᒃᓴᒧᑦ ᑎᑭᑉᐸᓪᓕᐊᔪᒥ 2016 ᐱᒋᐊᕐᓂᐸᓗᐊᓂ. ᐊᕐᓇᒃᑲᖅ ᐊᖓᔪᖅᑳᖑᕗᖅ ᑲᑐᔾᔨᖃᑎᒌᖑᔪᓄᑦ.
ᓴᐃᓕᕕᒃ ᑲᑐᔾᔨᖃᑎᒌᒃᑯᑦ ᑐᙵᓱᒃᑎᑦᑎᒃᑲᓐᓂᕈᒪᕗᑦ ᐃᓚᒋᔭᐅᒃᑲᓐᓂᕐᓂᐊᖅᑐᓂ ᓄᑖᒥ ᐊᕐᕌᒎᔪᒥ ᑲᑎᒪᒃᑲᓐᓂᓕᕈᑎᒃ.
ᐊᑭᑐᔫᑎᓂᑦ ᑮᓇᐅᔭᖃᖅᑎᑕᐅᓂᐅᔪᒥ, ᓯᕗᓪᓕᖅᐸᐅᔪᓂ ᐸᕐᓇᐅᑎᓂ ᐊᒻᒪ ᓄᓇᒃᓴᖏᓐᓂᓪᓘᓐᓃᑦ ᓂᕈᐊᖅᑕᐅᓚᐅᖅᐳᑦ ᐃᓄᑐᖃᕐᓄᓪᓚᕆᒃ ᐸᕐᓇᒃᐸᓪᓕᐊᓂᕐᒧᑦ ᓇᑉᐸᖅᑎᕆᕙᓪᓕᐊᓂᖓᓂ ᓄᑖᖑᔪᒥ ᐃᓄᑐᖃᑦ ᐊᖏᕐᕋᖓᓐᓂᑦ.
ᐅᖃᐅᓯᐅᓪᓗᓂ ᒪᐃᓴᓐ ᐅᐊᐃᑦᒧᑦ ᐃᒡᓗᕐᔪᐊᓂ ᑎᑎᕋᐅᔭᖅᑎᑦ ᐊᒻᒪ ᓇᑉᐸᖅᑎᕆᔨᐅᔪᑦ Lateral Office, ᐱᓕᕆᓚᐅᖅᑐᓂ ᑐᒃᓯᕋᖅᑕᐅᔪᒥ ᐃᒡᓗᕐᔪᐊᕐᒥ, ᐃᒡᓗᖃᖅᑎᑦᑎᓂᐊᓚᐅᖅᐳᖅ ᐃᒡᓗᕐᔪᐊᒥ ᐸᖅᑭᓂᕐᒧᑦ ᐃᓕᖅᑯᓯᖅᓱᕈᓐᓃᖅᑐᓄᑦ ᐳᐃᒍᑎᓕᖅᐸᓪᓕᐊᔪᓄᑦ ᐅᓂᒃᓯᒪᔪᓂ ᐃᓚᖃᕐᒥᓗᓂ ᐸᐃᕆᕝᕕᖕᒥ ᓯᕗᓪᓕᖅᐹᖓᓂ ᓇᑎᐅᔪᒥ.
“ᐃᑲᕐᕋᒐᓵᓗᖕᓂ ᐃᓕᓯᓯᒪᕗᒍᑦ ᐸᕐᓇᒃᑕᐅᓂᖓᓄᑦ,” ᐅᖃᓚᐅᖅᐳᖅ ᐊᕐᓇᒃᑲᖅ. “ᐅᖃᖃᑎᖃᓚᐅᖅᐳᒍᑦ ᓄᓇᕗᒻᒥ ᓇᑉᐸᖅᑎᕆᔨᐅᔪᒥ ᑲᒻᐸᓂᐅᔪᒥ ᐊᖏᓚᐅᖅᑐᓂ ᐊᑭᓖᓂᐊᕐᓂᖏᓐᓂ, ᑮᓇᐅᔭᑦ ᐅᑎᖅᑎᓐᓇᔭᖅᐸᕗᑦ, ᑭᓯᐊᓂ ᐊᑭᑐᔫᑎᓄᑦ ᑮᓇᐅᔭᓂ ᑲᒪᒋᔭᖃᕋᔭᓚᐅᖅᐳᑦ ᒐᕙᒪᒃᑯᑦ ᐱᓇᓱᒋᐊᖃᕋᔭᓚᐅᙱᓚᑦ.”
ᓄᓇᒥ ᓴᓂᕐᕙᐃᓯᒪᓚᐅᖅᐳᑦ ᓄᓇᓕᐸᐅᔭᒥ, ᓯᕗᓪᓕᖅᐹᖑᔪᒥ $30,000–ᒥ ᑮᓇᐅᔭᖃᖅᑎᑕᐅᓂᐅᔪᒥ ᑐᓂᔭᐅᓚᐅᖅᐳᖅ ᑲᓇᑕᒥ ᐊᑭᓕᐅᑕᐅᔪᖅ ᐃᒡᓗᒧᑦ ᓄᓇᒧᓪᓘᓐᓃᑦ ᐊᒻᒪ ᐃᒡᓗᓕᕆᔨᕐᔪᐊᒃᑯᓐᓂ, ᖄᒃᑲᓐᓂᐊᒍᑦ $40,000–ᓂ ᓴᓂᕐᕙᒃᑕᐅᓚᐅᖅᐳᖅ ᓄᓇᕘᑉ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ, ᐊᒻᒪ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐃᑲᔪᖅᓱᐃᖃᑕᐅᓚᐅᖅᐳᑦ ᓴᐃᓕᕕᐅᑉ ᐱᒋᐊᕈᑎᖓᓐᓂ.
“ᐱᒋᐊᕈᑎᑕᖃᓚᐅᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐃᑲᔪᖅᓱᐃᓂᕐᒧᑦ ᐆᒥᖓ, ᐱᒋᐊᕈᑕᐅᔪᒥ ᓄᓇᓕᐸᐅᔭᒥ ᐊᒻᒪ ᐊᔾᔨᒌᙱᑦᑐᓂ ᑎᑎᖅᑲᓂ ᐃᑲᔪᖅᓱᐃᓂᐅᔪᒥ - ᐃᓄᑐᖃᐃᑦ ᓂᕈᐊᓚᐅᖅᐳᖅ ᓄᓇᒃᓴᖓᓂ ᐱᔪᒪᔭᒥᓂᑦ, ᐸᓯᒃᑰᖅᖢᑕ, ᑲᑎᒪᖃᑎᖃᓚᐅᖅᐳᒍᑦ ᐃᓄᑐᖃᕐᓂ ᐅᖃᓪᓚᖃᑎᖃᕐᓂᕐᒧᑦ ᐃᓂᒃᓴᖓᓂ, ᖃᓄᖅ ᑕᐅᑦᑐᖃᕋᔭᕐᓂᖓᓂ,” ᐅᖃᓚᐅᖅᐳᖅ ᐊᕐᓇᒃᑲᖅ.
ᐊᑕᐅᓯᐅᔪᒥ ᓯᕗᓪᓕᖅᐸᐅᔪᒥ ᒪᑐᐃᖓᔪᒥ ᑎᑎᖅᑲᓂ ᐃᑲᔪᖅᓱᐃᓂᕐᒧᑦ ᐅᕙᙶᓚᐅᖅᐳᖅ ᑕᐃᔅᓱᒪᓂ-ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᖓᔪᖅᑳᖑᓚᐅᖅᑐᒥ ᐊᒻᒪ ᒫᓐᓇ ᓯᕗᓕᖅᑎᐅᔪᖅ ᓄᓇᕗᒻᒥ, P.J. ᐊᕿᐊᕈᕐᒥ ᑎᑎᕋᓚᐅᖅᑐᒥ ᔭᓄᐊᕆ 7, 2016–ᒥ “ᐱᕈᖅᐸᓪᓕᐊᔪᒥ ᐱᔭᕆᐊᖃᕐᓂᖃᖅᐳᖅ ᐃᓄᑐᖃᕐᓄᑦ ᐸᖅᑭᔭᐅᓂᖏᓐᓄᑦ ᓄᓇᕗᒻᒥ.
“ᐃᑲᔪᖅᓱᐃᕐᔪᐊᖅᐳᖓ ᐆᒥᖓ ᐱᓕᕆᐊᒃᓴᐅᔪᒥ ᐊᒻᒪ ᐃᓕᖕᓂ ᐊᔭᐅᕆᕗᖓ ᑐᓂᓯᓂᕐᒥ ᐆᒥᖓ ᓯᕗᓪᓕᐅᔾᔭᐅᖁᔭᐅᓂᐅᔪᒥ ᐱᕚᓪᓕᕈᑕᐅᓂᐊᖅᑐᒥ ᐃᓄᑐᖃᑦᑎᓐᓄᑦ.”
ᐊᕐᓇᒃᑲᖅ ᐃᓚᒋᐊᖅᓯᓚᐅᖅᐳᖅ ᑐᓂᔭᐅᓚᐅᖅᐳᖅ ᐊᔾᔨᒌᙱᑦᑐᓄᑦ ᐱᓕᕆᕝᕕᐅᔪᓄᑦ ᐃᓗᐊᓂ ᓄᓇᕗᒻᒥ ᒐᕙᒪᒃᑯᓐᓄᑦ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᑕᐃᔅᓱᒪᓂ–ᒥᓂᔅᑕᐅᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᔪᐊᔾ ᕼᐃᒃᔅ ᐊᒻᒪ ᒥᓂᔅᑕᐅᓚᐅᖅᑐᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ ᓗᐊᓐ ᑯᓱᒐᕐᒥ.
ᐱᓕᕆᐊᒃᓴᐅᔪᖅ ᐃᓗᐃᑦᑐᒥᒃ ᓄᑖᒥᒃ ᐃᓄᑐᖃᕐᓄᑦ ᐃᒡᓗᕐᔪᐊᒃᓴᖓ ᐃᖃᓗᖕᓂ “ᐱᔪᓐᓇᐃᓪᓕᓚᐅᖅᐳᖅ ᒐᕙᒪᒃᑯᓐᓂ” ᑭᒡᓕᐅᔪᒥ, ᐊᕐᓇᒃᑲᖅ ᐅᖃᓚᐅᖅᐳᖅ, ᐊᒻᒪ ᐆᒧᖓ ᐅᓪᓗᖓᓄᑦ, ᐃᒻᒥᓂᒃ ᐊᓯᖓᓐᓂᓪᓘᓐᓃᑦ ᓴᐃᓕᕕᖕᒥ ᑐᓴᖅᑐᖃᒃᑲᓐᓂᓚᐅᙱᓚᑦ ᓄᓇᕗᒻᒥ ᒐᕙᒪᒃᑯᓐᓂ.
“ᒐᕙᒪᒃᑯᑦ ᑭᐅᓚᐅᕈᑎᒃ ᐅᖃᑐᐃᓐᓇᕐᓗᑎᒡᓘᓐᓃᑦ ᑐᒃᓯᕋᐅᑏᑦ ᐱᓚᐅᖅᐸᕗᑦ, ᑭᐅᓗᑎᒃ ᑎᑎᖅᑲᓂ ᓇᒃᓯᐅᔾᔭᐅᓚᐅᖅᑐᓂ, ᐹᕗᑦ ᒪᑐᐃᕋᔭᓚᐅᖅᐳᑦ 2020–ᒥ. ᐃᒻᒪᖄ ᓄᕙᒡᔪᐊᕐᓇᒨᙱᑦᑐᖅ ᑭᓯᐊᓂ ᑕᒪᓐᓇ ᐸᕐᓇᐅᑎᐅᓚᐅᖅᐳᖅ … ᐱᓕᕆᖃᑎᒌᖕᓂᐅᓂᐊᓚᐅᖅᐳᖅ ᐅᕙᑦᑎᓐᓂ, ᑮᓇᐅᔾᔭᒃᓴᓇᓱᐊᙱᑦᑐᒥ ᓄᓇᓕᖕᓂᙶᖅᑐᓂ, ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᐊᒻᒪ ᒐᕙᒪᐅᔪᓄᑦ, ᑕᐃᒪᓐᓇᓪᓚᕆᒃ ᐱᓕᕆᕙᖕᓂᖏᓐᓂ ᐃᐊᒻᐸᓯ (ᐱᓇᖕᓇᕐᒥ).”
“ᐅᕙᓃᓐᓇᔭᓚᐅᖅᐳᑦ ᐃᖃᓗᖕᓂ, ᐅᕙᓂ ᐃᖅᑲᓇᐃᔮᖃᕋᔭᓚᐅᖅᐳᑦ, ᐃᓕᖅᑯᓯᒧᑦ ᐊᑑᑎᖃᕐᓂᖅᓴᐅᓇᔭᓚᐅᖅᐳᑦ, ᐃᓚᒌᑦ ᑕᑯᔪᓐᓇᕋᔭᓚᐅᖅᐳᑦ ᓇᒡᓕᒋᔭᒥᓂᑦ, ᐃᖃᓗᐃᑦ ᑲᑎᕝᕕᐅᓲᖑᖕᒪᑦ.”
ᐊᕐᓇᒃᑲᕐᒧᑦ, ᐅᓇ ᐊᑲᐅᙱᓕᐅᕈᑕᐅᔪᖅ ᓇᖕᒥᓂᕐᒧᑦ ᑭᒡᓕᖃᕐᓂᐅᕗᖅ, ᐊᓯᐅᔨᓯᒪᓪᓗᓂ ᐊᖓᔪᖅᑳᖓᓂ ᐃᐊᒻᐸᓯ ᐱᓇᖕᓇᕐᒥᐅᑕᐅᔪᒥ ᖃᔅᓯᐊᕐᔪᖕᓂ ᑕᖅᑭᐅᓚᐅᖅᑐᓂ.
“ᐊᓈᓇᒐ ᑕᐃᑲᓃᓚᐅᖅᐳᖅ ᑭᓯᐊᓂ ᒫᓐᓇᓕᓴᐅᔪᒥ, ᐃᓅᔪᓐᓃᓚᐅᖅᐳᖅ ᐅᒃᑐᐱᕆᒥ ᐅᑎᓚᐅᖅᓯᒪᓇᓂ (ᓄᓇᕗᒻᒧᑦ), ᐊᒻᒪ ᓄᒫᓇᕐᔪᐊᖅᐳᖅ. ᐊᑖᑕᒐ ᐃᒡᓗᒥᓂᒃ ᓂᐅᕕᐊᒃᓴᖃᕆᐊᖃᓚᐅᖅᐳᖅ ᑕᒫᓂ ᐊᑭᓖᔭᕆᐊᖃᕐᓂᖓᓄᑦ ᓄᓇᖃᖃᑕᐅᓂᕐᒥ ᑕᐅᓇᓂ ᓄᓕᐊᒥᓂᑦ. ᑕᐃᒪᐃᓕᐅᓚᐅᖅᐳᖅ ᐊᒻᒪ ᓱᓕ ᖃᐅᔨᓇᓱᐊᖅᐳᖅ ᖃᓄᐃᓕᐅᒃᑲᓐᓂᕆᐊᖃᕐᓂᖓᓂ.”
ᒐᕙᒪᒃᑯᑦ ᐊᑭᓖᓲᖑᕗᑦ ᐃᓚᒋᔭᐅᔪᒥ ᐋᑐᕚᓕᐊᖅᐸᖕᓂᖓᓂ ᐳᓚᕋᕐᓂᕐᒧᑦ ᑕᖅᑭᑦ 6 ᐊᓂᒍᕌᖓᑦ, “15–ᓂ ᐃᓚᒥᐅᑕᖃᕈᕕᑦ, ᐃᓚᖏᑦ ᐃᓚᒋᔭᐅᔪᑦ ᑕᑯᒃᑲᓐᓂᔾᔮᙱᓚᑦ (ᐃᓚᒥᓂᑦ),” ᐊᕐᓇᒃᑲᖅ ᐅᖃᓚᐅᖅᐳᖅ.
ᑕᐃᒪᐃᑦᑕᕆᐊᖃᙱᓚᖅ ᐊᓯᖏᓐᓄᑦ ᐃᓚᒌᖑᔪᓄᑦ, ᐅᖃᖅᐳᖅ. ᑕᒪᕐᒥᒐᓚᒃ ᖃᐅᔨᒋᐊᕐᓂᕐᒧᑦ ᐱᓕᕆᓂᐅᔪᒥ ᓄᑖᖑᔪᒥ ᐃᓄᑐᖃᕐᓄᑦ ᐊᖏᕐᕋᖓᓄᑦ ᐱᔭᕇᖅᑕᐅᕌᓂᖕᓂᖓᓂ, ᐊᕐᓇᒃᑲᖅ ᐅᖃᖅᐳᖅ ᐃᓕᒐᒃᓴᑦᑎᐊᕙᐅᕗᖅ ᖃᓄᑐᐃᓐᓇᖅ ᕿᓂᒃᑲᓐᓂᕐᓂᕐᒧᑦ ᐆᒥᖓ ᐱᓕᕆᓂᐅᔪᒧᑦ.
“ᐱᓕᕆᕐᔪᐊᓚᐅᖅᐳᒍᑦ ᐊᒻᒪ ᐊᑭᑐᔪᐊᓘᓚᐅᖅᐳᖅ ᐊᒻᒪ ᖃᓄᐃᓕᐅᕐᓂᖃᓪᓚᕆᒍᓐᓇᖅᐳᒍᑦ,” ᐅᖃᓚᐅᖅᐳᖅ.