ᑕᒪᕐᒥᑲᓴᑦᑎᐊᑦ ᐊᑑᑎᓕᖕᓂ ᑲᑐᔾᔨᖃᑎᒌᖑᔪᓂ — ᒐᕙᒪᐅᔪᓂ ᐊᖑᓇᓱᒃᑐᓕᕆᔨᓄᑦ ᒥᑭᒋᐊᕐᓂᐊᖅᑎᓄᓪᓗ, ᐊᒻᒪᓗ ᐊᒥᓱᓂ ᓄᓇᓕᖕᒥᐅᑕᓂ — ᑐᓂᓯᓚᐅᖅᐳᑦ ᐅᖃᐅᓯᒃᓴᖏᓐᓂ ᐊᒻᒪ ᐊᐱᖅᓱᓚᐅᖅᐳᑦ ᐱᔾᔪᑎᖃᖅᑐᒥ ᐊᒡᓂᑯ ᐄᒍᓪᑯᑦ ᐸᕐᓇᐅᑎᖏᓐᓂ ᐅᖓᕙᕆᐊᖅᓯᓂᕐᒥ ᐃᖃᓗᒑᕐᔫᑉ ᐅᔭᕋᖕᓂᐊᕐᕕᖓᓂ ᑕᐃᑲᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᑲᑎᒪᓂᖏᓐᓂ ᑕᖏᖅᖠᓂᕐᒥ ᓄᕕᐱᕆ 23-26−ᒧᑦ.

ᐃᒻᒥᓄᑦ ᐅᖃᓪᓚᒃᖢᓂ, ᐳᖃᐃᔭᓐ ᓴᕙᑦᔅᑭ ᑐᑭᓯᓇᑦᑎᐊᓚᐅᖅᐳᖅ ᐱᒐᒥᐅᒃ ᓂᐱᖅᑯᖅᑐᓯᔾᔪᑎᒥ ᑕᐃᑲᓂ ᓄᓇᓕᖕᓂ ᑲᑎᒪᑎᑦᑎᓂᐅᔪᓂ.

“ᐊᑭᕋᖅᑐᖅᐳᖓ ᐊᒡᓂᑯ ᐄᒍᓪ ᑐᒃᓯᕋᖅᑕᖓᓂ ᐅᔭᕋᖕᓂᐊᕐᕕᖕᒥ ᐅᖓᕙᕆᐊᖅᑕᐅᓂᖓᓂ,” ᐅᖃᓚᐅᖅᐳᖅ.

ᐃᖃᓗᒑᕐᔫᑉ ᐅᖓᕙᕆᐊᖅᑕᐅᓂᖓ ᑐᒃᓯᕋᖅᐳᖅ ᐅᔭᕋᖕᓂᐊᒃᑲᓐᓂᕐᓂᖓᓐᓂ ᓴᕕᕋᔭᒃᓴᓂ ᓯᕗᓪᓕᐅᖅᐸᐅᓚᐅᖅᑐᒥ ᐱᓕᕆᐊᖑᔪᒥ ᐱᕙᓪᓕᐊᑎᑦᑎᓗᑎᒃ ᓄᑖᖑᔪᒥ ᐅᔭᕋᖕᓂᐊᒐᒃᓴᒥ, ᐊᑎᖃᖅᑎᑕᐅᔪᒥ ᑎᕆᒐᓂᐊᖅ-Wolf ᓄᓇᐅᑉ ᐊᑖᓂ, ᐊᒻᒪᓗ ᐃᓚᒋᐊᖅᓯᓗᓂ ᓄᓇᐅᑉ ᐊᑖᓂ ᐅᔭᕋᖕᓂᐊᕐᓂᕐᓂ ᖃᓄᐃᓕᐅᕐᓂᐅᔪᓂ Pump, Fzone ᐊᒻᒪ Discovery ᐃᓂᒋᔭᐅᔪᓂ, ᖄᖓᓂ ᐅᔭᕋᖕᓂᐊᕐᕕᖕᒥ ᖃᓄᐃᓕᐅᕐᓂᐅᔪᓂ ᐊᖏᖅᑕᐅᕌᓂᓚᐅᖅᑐᓂ. ᐅᖓᕙᕆᐊᖅᑕᐅᓂᖓ ᐊᖏᒡᓕᒋᐊᖅᓯᓇᔭᖅᐳᖅ ᐅᔭᕋᖕᓂᐊᕐᕕᐅᑉ ᐃᓅᓯᖓᓂ ᐊᕐᕌᒍᓄᑦ 11−ᓄᑦ, ᐊᔭᐅᕆᓪᓗᓂ ᐅᔭᕋᖕᓂᐊᕐᕕᐅᑉ ᒪᑐᔭᐅᓂᖓᓂ 2043−ᒧᖔᒧᑦ ᐅᓇᐅᙱᖔᖅᑐᒥ 2032−ᒥ. ᐊᖏᒡᓕᒋᐊᖅᑎᑦᑎᓇᔭᕆᕗᖅ ᑕᖕᒫᕐᕕᖕᒥ ᐃᓐᓄᒍᓐᓇᕐᓂᖓᓂ 225 ᐃᒡᓗᕈᓯᐅᔪᓄᑦ, ᖁᕝᕙᒋᐊᖅᑐᒥ 905−ᓄᑦ ᐃᖅᑲᓇᐃᔭᖅᑎᐅᔪᓄᑦ. ᑲᒻᐸᓂ ᓂᕆᐅᖕᓂᖃᖅᐳᖅ ᓴᖅᑭᑎᑦᑎᓂᐊᕐᓂᖓᓐᓂ 205−ᓂ ᓄᑖᖑᔪᓂ ᐃᖅᑲᓇᐃᔮᒃᓴᓂ ᑕᐃᑲᓂ ᐱᔭᒃᓴᖃᓛᖑᔪᒥ ᐊᕐᕌᒍᖓᓂ ᐊᐅᓚᑕᐅᓂᐅᔪᓂ.

ᐸᕐᓇᐅᑎᑦ ᐃᓚᖃᖅᐳᑦ ᐱᖓᓱᓂ ᓄᑖᖑᔪᓂ ᐃᓚᒃᓴᖏᓐᓂ: ᐊᓄᕆᓕᐅᕈᑎᒥᒃ ᓄᓇᒥ, ᒥᑦᑕᕐᕕᖕᒥ ᐊᒻᒪ ᐃᓗᑐᔪᐊᓗᖕᒥ ᐊᖕᒪᔪᒥ ᓄᓇᒥ ᐃᒋᑦᑎᕝᕕᒃᓴᐅᔪᒥ.

ᐊᓄᕆᓕᐅᕈᑎᒥᒃ ᓄᓇᒥ ᐃᓚᖃᕋᔭᖅᐳᖅ ᑎᑭᐅᒪᔪᓄᑦ 11−ᓂ ᐊᓄᕆᓕᐅᑎᓂᑦ ᐊᐅᓚᓐᓇᔭᖅᑐᓂ ᐊᕐᕌᒍᓕᒫᒥ ᐊᑯᓂᐅᓂᖓᓂ ᐃᖃᓗᒑᕐᔫᑉ ᐅᔭᕋᖕᓂᐊᕐᕕᐅᑉ ᐃᓅᓯᖓᓐᓂ ᐊᒻᒪ ᐃᒍᑦᑎᖅᑕᐅᓗᓂ ᐊᒻᒪ ᐅᑎᖅᑎᕆᔭᐅᓗᓂ ᓄᓇᖓᓂ ᒪᑐᔭᐅᓂᖓᓂ.

ᓴᓇᓗᓂ ᐊᓯᐊᒎᕐᕕᒃᓴᐅᔪᒥ ᒥᑦᑕᕐᕕᖕᒥ ᐅᔭᕋᖕᓂᐊᕐᕕᐅᑉ ᐃᓂᖓᑕ ᖃᓂᒋᔭᖓᓐᓂ ᑲᒻᐸᓂᐅᔪᖅ ᐊᑐᕆᐊᖃᔾᔮᙱᒻᒪᑕ ᑲᖏᖅᖠᓂᐅᑉ ᒥᑦᑕᕐᕕᖓᓂ ᐊᑕᐅᓯᐅᔪᒥ ᐊᑲᕆᔭᐅᙱᓛᖑᔪᒥ ᓂᕈᐊᒐᒃᓴᐅᓚᐅᖅᐳᖅ ᐃᓄᓕᒫᓄᑦ ᑲᑎᒪᓂᐅᔪᒥ, ᐊᒡᓂᑯ ᐄᒍᓪ ᐅᖃᖅᐳᖅ ᑐᓂᓯᓇᔭᕐᓂᖓᓂ ᓴᖑᓴᕋᐃᓐᓂᐅᔪᒥ ᑐᒃᑐᓄᑦ ᐅᑎᖅᑕᕐᓂᐅᔪᓄᑦ, ᒥᒃᖠᒋᐊᖅᑎᑦᑎᓗᓂ ᐳᔪᕐᓂ ᐊᓂᐊᑎᑕᐅᕙᓪᓕᐊᓂᐅᔪᓂ ᐊᖅᑯᒻᒥ ᐊᒻᒪ ᑐᓂᓯᓗᓂ ᐊᓯᐊᒎᕈᑕᐅᔪᓐᓇᖅᑐᓂ ᐃᓂᐅᔪᒥ ᖃᖓᑕᓲᓄᑦ ᒥᕝᕕᒋᔪᓐᓇᖅᑕᖓᓂ ᑐᐊᕕᕐᓇᖅᑐᖃᓯᑳᓪᓚᖕᓂᖅᐸᑦ.

ᐊᓯᐊᒎᖅᑐᒥ ᐃᓗᑐᔪᐊᓗᖕᒥ ᐊᖕᒪᔪᒥ ᓄᓇᒥ ᐃᒋᑦᑎᕝᕕᒃᓴᒥ, ᐊᓯᐊᓂ ᓂᕈᐊᒐᒃᓴᐅᔪᒥ ᐱᓕᕆᓂᐅᔪᒥ, ᑕᐃᓐᓇ ᐃᓚᒋᐊᕈᑎᖓᓐᓂ ᖃᐅᔨᓴᐃᓇᔭᖅᐳᖅ ᐃᓂᒃᓴᐅᔪᓂ ᐃᓗᑐᔪᐊᓗᖕᒥ ᐊᖕᒪᔪᒥ ᓄᓇᒥ ᕿᒻᒪᑯᓂ ᐊᒻᒪ ᐊᒃᑕᑯᓂ ᐅᔭᖅᑲᓂ ᐱᐅᓂᖅᐹᖑᔪᒥ ᐃᓂᒋᔭᐅᒧᒥ ᑐᒥᓕᐊᖓᓂ ᐊᒻᒪ ᒥᒃᖠᒋᐊᖅᑎᑦᑎᓂᕐᒧᑦ ᖄᖓᓂ ᐃᓂᐅᔪᒥ ᐊᒃᑐᖅᑕᐅᓂᖓᓂ.

ᓴᕙᑦᔅᑭ ᐅᖃᐅᔾᔨᓚᐅᖅᐳᖅ ᑲᒻᐸᓂᒥ ᓇᖕᒥᓂᖅ ᐃᓚᒋᐊᕈᑕᐅᔪᑦ ᐅᔭᕋᖕᓂᐊᕐᕕᖕᒧᑦ ᐃᓂᒋᔭᖓᓄᑦ ᐱᐅᒨᔮᖅᐳᖅ ᓇᖕᒥᓂᖅ, ᑭᓯᐊᓂ ᑲᑎᙵᓪᓗᑎᒃ, ᓴᖅᑭᑎᑦᑎᕗᑦ ᐊᖏᐸᓗᒃᑐᒥ ᐊᑲᐅᙱᓕᐅᕈᑕᐅᔪᒥ.

“ᑕᒪᒃᑭᑦ ᑲᑎᓪᓗᒋᑦ, ᑎᑭᐅᑎᓂᖃᕐᓂᐊᖅᐳᑎᑦ ᓱᔪᐃᓂᖃᑐᐃᓐᓇᕆᐊᓕᖕᒥ ᐊᕙᑎᒧᑦ ᐊᒻᒪ ᐆᒪᔪᓄᑦ ᐊᑐᖅᐸᒃᑕᑦᑎᓐᓂ ᐅᕘᓇ ᐊᖅᑯᓵᖅᐸᒃᑐᓄᑦ,” ᐅᖃᓚᐅᖅᐳᖅ.

ᐅᒃᐱᕈᓱᓚᐅᙱᓚᖅ ᐊᓄᕆᓕᐅᕈᑎᒥᒃ ᓄᓇᒥ ᓴᖅᑭᑎᑦᑎᓂᖃᕋᔭᙱᓚᖅ ᒥᑭᓛᖑᔪᒥ ᓂᐱᖃᕐᓂᐅᔪᒥ, ᐊᒻᒪ ᐅᖃᓚᐅᕆᕗᖅ ᓯᕗᓂᐊᓂ ᐊᑐᖁᔭᐅᓇᔭᖅᑐᓂ ᑲᒻᐸᓂᒃᑯᓐᓂ ᐃᓱᒪᒋᔭᖃᕐᓂᖏᓐᓂ ᓯᕿᓂᕐᒧᑦ ᐆᒻᒪᖅᑯᑎᓕᐅᕆᔪᓂᖔᖅ.

ᐃᓱᒪᓚᐅᕆᕗᖅ ᖃᓄᑎᒋ ᐱᓕᕆᐊᒃᓴᐅᔪᖅ ᐊᖏᒡᓕᕙᓪᓕᐊᓇᔭᕐᓂᖓᓂ.

ᓇᓂᓯᒍᑎᒃ ᒎᓗᒥᒃ 20 ᒪᐅᔪᓂ ᐅᐊᖕᓇᒥ, ᓴᓇᒃᑲᓐᓂᕈᒪᓇᔭᖅᐸᑦ ᐊᖅᑯᑎᒃᑲᓐᓂᕐᒥ?” ᐊᐱᕆᓚᐅᖅᐳᖅ ᓴᕙᑦᔅᑭ, ᐃᓚᒋᐊᖅᓯᓪᓗᓂ ᖃᐅᔨᔪᒪᕗᖅ ᑲᒻᐸᓂᐅᑉ ᐊᑯᓂᐅᔪᒥ ᐸᕐᓇᐅᑎᖏᓐᓂ.

ᐳᔾᔪᑦ ᑯᓱᒐᖅ, ᐊᐅᓚᑦᑎᔨᒻᒪᕆᒃ ᓄᓇᓕᖕᓂ ᐱᓕᕆᓂᐅᔪᒧᑦ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖓᓄᑦ, ᑭᐅᓚᐅᖅᐳᖅ ᐅᖃᐅᓯᒃᓴᐅᔪᒥ ᐱᔾᔪᑎᖃᖅᑐᒥ ᒥᑦᑕᕐᕕᒃᓴᒧᑦ.

“ᑐᒃᓯᕋᖅᐳᒍᑦ ᒫᓐᓇ ᑕᐃᒪᐃᑦᑕᕆᐊᖃᔾᔮᙱᓐᓇᑦᑕ ᖃᖓᒃᑲᓐᓂᐅᓂᐊᖅᑐᒥ,” ᐅᖃᓚᐅᖅᐳᖅ, ᐅᓂᒃᑳᕆᓪᓗᓂ ᑲᒻᐸᓂ ᓇᓗᓇᐃᖅᓯᔪᒪᕗᑦ ᓈᒻᒪᒃᑐᓂ ᐱᓕᕆᓂᒃᑰᕐᓂᖏᓐᓂ ᓯᕗᕐᙵᒍᑦ, ᐃᓚᖏᓐᓂ ᐃᓱᒪᒋᔭᐅᓂᐅᔪᓂ ᐸᕐᓇᐅᑎᓂ ᓲᕐᓗ ᒥᑦᑕᕐᕕᒃᓴᒥ ᓴᖅᑭᙱᒃᑲᓗᐊᖅᐸᑦ.

ᓵᒥᐅᓪ ᐊᓚᕋᓚᒃ ᐊᐱᕆᓚᐅᖅᐳᖅ ᑐᕌᖓᒧᒥ ᐊᐱᖅᑯᑕᐅᔪᒥ ᑲᑐᔾᔨᖃᑎᒌᖑᔪᑦ ᑭᒡᒐᖅᑐᐃᔨᖏᓐᓄᑦ ᑭᐳᒥ: ᐃᑲᔪᖅᓱᐃᕕᑦ ᐃᖃᓗᒑᕐᔫᑉ ᐅᖓᕙᕆᐊᖅᑕᐅᓂᖓᓂ ᐸᕐᓇᐅᑎᖓᓐᓂ, ᐄ ᐋᒃᑲᓘᓐᓃᑦ?

“ᑐᕌᖓᓂᐅᔪᒥ ᑭᐅᓂᖓᓂ ᐋᒃᑲᐅᕗᖅ,” ᐅᖃᓚᐅᖅᐳᖅ ᐋᓐᑐᕉ ᐊᑭᕈᓕᒃ ᑲᖏᖅᖠᓂᕐᒥ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ.

ᓄᓇᕗᒻᒥ ᑐᙵᕕᒃᑯᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖑᔪᓂ, ᑲᓇᑕᒥ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᒐᕙᒪᒃᑯᑦ ᑕᒪᒃᑭᑦ ᐅᖃᓚᐅᖅᐳᑦ ᐅᑕᖅᑭᔪᐃᓐᓇᐅᓂᖏᓐᓂ ᑭᐅᔾᔪᑎᒃᓴᒃᑲᓐᓂᕐᓂ ᐊᒻᒪ ᐊᖏᖅᓯᒪᓂᐅᔪᓂ ᕿᒥᕐᕈᔭᐅᓂᖓᓂ ᐱᓕᕆᓂᐅᔪᒥ.

ᑯᓱᒐᖅ, ᑭᐅᓪᓗᓂ ᐅᖃᐅᓯᒃᓴᓕᐊᒥ ᐃᓄᐃᑦ ᐃᖅᑲᓇᐃᔮᖃᕐᓂᖏᓐᓂ ᐅᔭᕋᖕᓂᐊᕐᕕᖕᒥ, ᓇᓗᓇᐃᖅᓯᓚᐅᖅᐳᖅ ᐅᖃᐅᓯᒃᓴᐅᓂᖓᓂ ᖁᕕᐊᒋᑦᑎᐊᖅᑕᖓᓂ ᑭᓯᐊᓂ ᐊᖏᓂᖅᓴᐅᔪᒥ ᐊᒡᓂᑯ ᐄᒍᓪᑐᐊᖑᔪᒥ.

“ᓱᕈᓯᐅᓪᓗᖓ ᐱᕈᖅᓴᑎᓪᓗᖓ, ᐃᓄᒃᑕᖃᓚᐅᙱᓚᖅ ᓴᐳᓐᓂᐊᖅᑎᐅᔪᓂ, ᐃᓄᖕᓂ ᓘᑦᑖᖅᑕᖃᓚᐅᙱᓚᖅ, ᐊᒥᓲᓗᐊᙱᑦᑐᓂ ᓇᖕᒥᓂᖃᖅᑎᐅᔪᓂ,” ᐅᖃᓚᐅᖅᐳᖅ.

ᒫᓐᓇ ᐅᑭᐅᖃᖅᖢᓂ 43−ᓂ, ᑕᑯᔪᓐᓇᖅᓯᕗᖅ ᐱᓕᕆᑦᑎᐊᕐᓂᐅᔪᒥ ᑕᒫᓂᕈᓘᔭᖅ. ᓱᒃᑲᐃᑦᑑᔮᖃᑦᑕᕋᓗᐊᖅᑎᓪᓗᒍ ᐃᓛᓐᓂᒃᑯᑦ. ᐅᖃᓪᓚᓚᐅᖅᐳᖅ ᐱᒻᒪᕆᐅᓂᖓᓂ ᓴᖅᑭᑎᑦᑎᓂᕐᒥ ᓄᓇᓕᖕᒥ ᖁᕝᕙᖅᓴᐃᔪᒥ ᐱᕈᖅᐸᓪᓕᐊᓂᐅᔪᒥ.

“ᐱᓕᕆᐊᒃᓴᕗᑦ ᓴᖅᑭᑎᑦᑎᓂᕐᒥ ᑕᐃᒃᑯᓂᖓ ᑐᙵᕕᒃᓴᐅᔪᓂ ᐃᓕᓐᓂᐊᖅᑏᑦ ᐱᓕᕆᑦᑎᐊᕈᓐᓇᕐᓂᐊᕐᓂᖏᓐᓂ ᐊᒻᒪ ᐱᓇᓱᐊᕈᓐᓇᕐᓂᐊᕐᓗᑎᒃ ᓇᓕᐊᑐᐃᓐᓇᒥᒃ ᐃᖅᑲᓇᐃᔮᒥ ᐱᔪᒪᔭᖏᓐᓂ,” ᐅᖃᓚᐅᖅᐳᖅ ᑯᓱᒐᖅ. “ᐅᔭᕋᖕᓂᐊᕐᓂᕐᒥ ᐱᓕᕆᓂᕐᔪᐊᖑᔭᕆᐊᖃᙱᓚᖅ, ᑭᓯᐊᓂ ᐃᓱᐊᓂ, ᓴᖅᑭᑎᑦᑎᔭᕆᐊᖃᖅᐳᒍᑦ ᑐᙵᕕᒋᓂᐊᖅᑕᖓᓂ ᐊᒻᒪ ᑲᔪᖏᖅᓴᐃᓗᑕ ᐊᒻᒪ ᑭᓱᑐᐃᓐᓇᓂ ᐱᓕᕆᓂᖃᕐᓂᖓᓂ ᓴᖅᑭᑎᑦᑎᓂᕐᒧᑦ ᓱᕈᓯᕐᓂ ᐊᒻᒪ ᒪᒃᑯᒃᑐᓂ ᐱᓕᕆᑦᑎᐊᕈᓐᓇᕐᓂᐊᖅᑐᓂ.”

ᕼᐃᐊᕆ ᑕᐅᑐᒋ, ᐅᖃᓪᓚᒃᖢᓂ ᑭᒡᒐᖅᑐᐃᓪᓗᓂ ᕼᐋᒻᓚᒃᑯᓐᓂ ᑲᖏᖅᖠᓂᕐᒥ, ᐅᖃᓚᐅᖅᐳᖅ ᕼᐋᒻᓚᒃᑯᑦ ᐊᑭᕋᖅᑐᖅᐳᑦ ᒥᑦᑕᕐᕕᒃᓴᒥ.

“ᑕᒪᓐᓴ ᑐᓴᖅᑕᐅᖁᔭᕋ,” ᐅᖃᓚᐅᖅᐳᖅ. “ᐱᔪᒪᙱᑕᕗᑦ… ᑐᑭᓯᐅᒪᖁᕙᒋᑦ ᐋᒃᑲ ᐋᒃᑲᐅᕗᖅ. ᒥᑦᑕᕐᕕᒃ ᐱᔪᒪᙱᑕᕗᑦ.”

ᐊᓄᕆᓕᐅᕈᑎᒥ ᓄᓇᒥ, ᕼᐋᒻᓚᒃᑯᑦ ᖃᐅᔨᓴᖅᑕᐅᒃᑲᓐᓂᖁᔨᕗᑦ ᐊᒻᒪ ᐃᓱᒪᒃᓴᖅᓯᐅᕆᒃᑲᓐᓂᕐᓂᕐᒥ ᐊᓯᖏᓐᓂ ᐃᓂᒃᓴᐅᔪᓂ ᐊᓄᕆᓕᐅᕈᑕᐅᔪᓄᑦ, ᐅᖃᓚᐅᖅᐳᖅ.

Leave a comment

Your email address will not be published. Required fields are marked *