ᐋᓕᒃᓵᓐᑐᕐ ᓴᒻᒧᖅᑐᖅ, ᑲᖏᖅᖠᓂᕐᒧᑦ ᐅᐊᖕᓇᒥ-ᐃᒡᓗᓕᒑᕐᔪᖕᒧᑦ, ᐊᔭᐅᕆᓚᐅᖅᐳᖅ ᒥᓂᔅᑕᖓᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᔮᓐ ᒪᐃᓐᒥ ᓴᖅᑭᑎᑦᑎᓂᕐᒥ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᒃᓴᒥ ᑲᖏᖅᖠᓂᕐᒥ ᐋᓐᓂᐊᕕᓕᐊᖅᑐᓄᑦ ᐊᐅᓪᓛᖅᑎᐅᔪᓄᑦ ᐱᓇᓱᐊᕈᓯᐅᓚᐅᖅᑐᒥ, ᑭᓯᐊᓂ ᐅᒃᐱᕈᓱᖕᓂᖅᑖᓗᐊᓚᐅᙱᓚᖅ ᐱᓇᓱᐊᖅᑕᐅᓇᔭᙱᓐᓂᖓᓂ.
“ᐊᐱᕆᓯᒪᕗᖓ ᖃᔅᓰᖅᓱᒐᓚᒃᖢᖓ ᓴᖅᑭᑎᑦᑎᓂᕐᒥ ᐃᒻᒥᒃᑰᖅᑐᒥ ᑐᔪᕐᒥᕕᒃᓴᒥ ᑲᖏᖅᖠᓂᕐᒥ,” ᓴᒻᒧᖅᑐᖅ ᐅᖃᓚᐅᖅᐳᖅ ᒪᓕᒐᓕᐅᕐᕕᖕᒥ ᒫᔾᔨ 14−ᒥ.
ᐊᐱᕆᓚᐅᖅᐳᖅ ᒪᐃᓐ ᐊᖏᖅᓯᒪᓂᖃᕋᔭᕐᓂᖓᓂ ᐃᓱᒪᒃᓴᖅᓯᐅᕆᒃᑲᓐᓂᕐᓂᖓᓂ ᑐᓂᓯᓂᕐᒥ ᖄᒃᑲᓐᓂᐊᒍᑦ ᑐᔪᕐᒥᕕᒃᓴᓂ ᓂᕈᐊᒐᒃᓴᐅᔪᓂ ᑲᖏᖅᖠᓂᕐᒥ ᐋᓐᓂᐊᕕᓕᐊᖅᑐᓄᑦ ᐊᐅᓪᓛᖅᑎᐅᔪᓂ ᐃᓂᒃᓴᖃᕈᓐᓃᔾᔮᙱᓐᓂᖏᓐᓂ ᑐᔪᕐᒥᕖᑦ ᑕᑖᖅᑎᓪᓗᒋᑦ ᐊᒻᒪ ᐊᐅᓪᓛᕐᓂᕐᒧᑦ ᓄᖅᑲᖅᑎᑕᐅᓂᖃᖅᑎᓪᓗᒋᑦ ᖃᖓᑕᓲᓂ.
“ᐊᖏᖅᓯᒪᔪᓐᓇᓪᓚᕆᒃᐳᖓ ᕿᒥᕐᕈᐊᒃᑲᓐᓂᕐᓂᓐᓂ,” ᑭᐅᓚᐅᖅᐳᖅ ᒪᐃᓐ. “ᑭᓯᐊᓂ, ᐃᓱᒪᕗᖓ ᕿᒥᕐᕈᒐᓗᐊᕐᓗᒍ, ᑕᑯᓂᐊᖅᐳᒍᑦ ᐅᓄᕐᓂᐅᔪᓂ, ᕿᒥᕐᕈᔭᐅᕌᓂᒃᓯᒪᔪᓂ, ᐃᑲᔪᖅᓱᐃᙱᓐᓂᖏᓐᓂ ᓵᖅᑭᑎᑦᑎᓂᕐᒧᑦ ᑐᔪᕐᒥᕕᒃᓴᒥ. ᑕᐃᒫᒃ ᐊᑐᕐᓂᖃᓲᖑᕗᒍᑦ ᑐᔪᕐᒥᕕᖕᓂ ᑲᖏᖅᖠᓂᕐᒥ. ᓴᙱᔪᒥ ᐊᖏᖅᓯᒪᓂᖃᙱᓚᒍᑦ ᓇᓗᓇᐃᖅᓯᓂᕐᒥ ᐃᓗᐊᕐᓂᐅᔪᒥ ᐊᒻᒪ ᐊᑦᑕᓇᔾᔭᐃᖅᓯᓯᒪᓂᕐᒥ ᐋᓐᓂᐊᕕᓕᐊᖅᑐᓄᑦ ᐊᐅᓪᓛᖅᑎᐅᔪᓂ. ᐃᓱᒪᒋᓗᐊᕌᓗᒃᓯᒪᙱᓚᕗᑦ.”
ᐅᖃᕆᐊᓪᓚᓚᐅᖅᐳᖅ ᐅᑯᓇᓂ ᖃᓄᐃᑦᑑᓂᖏᓐᓂ ᖃᓄᐃᓐᓂᐅᔪᓂ, ᐅᓄᕐᓂᐅᔪᑦ “ᓴᒡᓗᒐᔪᙱᓚᑦ” ᐊᒻᒪᓗ “ᐱᓪᓚᕆᐅᔪᒥ ᐅᓄᕐᓂᐅᔪᓂ ᐱᔭᕆᐊᖃᖅᑐᓂ ᓈᒻᒪᖕᓂᖓᓂ ᐃᒡᓗᕐᔪᐊᖃᕐᓂᕐᒥ, ᐅᕝᕙᓘᓐᓃᑦ ᐅᓄᕐᓂᖃᙱᑉᐳᑦ.”
ᒪᐃᓐ ᐅᖃᓚᐅᖅᐳᖅ ᐱᓕᕆᕝᕕᖓ ᑕᐅᑐᒃᑕᑐᐊᖃᑲᐃᓐᓇᖅᐳᖅ ᒪᕐᕉᔪᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑐᕌᒐᒃᓴᐅᔪᓂ: ᓄᓇᓕᖕᓂ ᐋᓐᓂᐊᕕᖕᓂ ᐊᒻᒪ ᐃᓄᑐᖃᒃᑯᕕᖕᓄᑦ.
“ᐃᓚᒋᔭᐅᔪᖅ ᑐᒃᓯᕋᕈᒪᒍᓂ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᐊᓯᖏᓐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᓯᕗᓪᓕᐅᑎᑕᐅᖁᔭᐅᔪᓂ, ᑕᐃᒪᐃᑦᑐᓐᓇᑦᑎᐊᖅᐳᖅ,” ᐅᖃᓚᐅᖅᐳᖅ ᒪᐃᓐ. “ᐃᒃᐱᒍᓱᕐᔪᐊᖅᐳᖓ ᓄᓇᓕᖕᓂ ᐋᓐᓂᐊᕖᑦ ᓯᕗᓪᓕᐅᑎᑕᐅᔭᕆᐊᖃᕐᓂᖏᓐᓂ, ᐊᒻᒪᓗᑦᑕᐅᖅ ᐃᓄᑐᖃᒃᑯᕕᖕᓂ.”