ᒫᓐᓇᓵᖑᓚᐅᖅᑐᒥ ᖃᐅᔨᓴᖅᑕᐅᒍᑕᐅᓚᐅᖅᑐᒥ ᖃᐅᔨᓐᓇᕈᑕᐅᓚᐅᖅᐳᖅ ᐃᓚᐃᓐᓇᑯᓗᖏᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐃᑲᔪᖅᑕᐅᒍᑎᑦ ᑮᓇᐅᔭᑦ ᐊᑐᖅᑕᐅᖃᑦᑕᕐᓂᖏᓐᓄᑦ ᐊᑭᑐᓗᐊᖅᑐᓂᒃ ᐊᑭᑭᒡᓕᒋᐊᕈᑕᐅᓪᓗᑎᒃ ᓂᕿᓂᒃ ᐅᑭᐅᖅᑕᖅᑐᒥᐅᓄᑦ ᐊᑐᖅᑕᐅᕙᒃᑐᑦ ᑕᐃᒪ ᑕᒪᓐᓇ ᐊᑲᐅᓯᕚᓪᓕᖁᔭᐅᓯᒪᕗᖅ ᓂᕿᑦᓯᐊᕙᖕᓂᒃ ᑎᑭᑎᑦᓯᖃᑦᑕᕐᓂᕐᒧᑦ ᐊᑭᓗᒃᓯᒋᐊᕈᑎᐅᖃᑦᑕᖅᑐᑦ ᐊᑲᐅᓯᕚᓪᓕᕈᑕᐅᖁᓪᓗᒋᑦ ᐅᑭᐅᖅᑕᖅᑐᒥᐅᓄᑦ.
“ᖁᕕᐊᓱᒃᐳᒍᑦ ᖁᔭᓐᓇᒦᕈᑎᖃᖅᐳᒍᓪᓗ ᐃᑲᔪᖅᑕᐅᒍᑎᖃᖃᑦᑕᕋᑉᑕ, ᑭᓯᐊᓂ ᐃᔨᕋᖅᑐᕈᑕᐅᖏᑦᑐᒥᒃ ᑕᑯᒍᒪᕗᒍᑦ ᐊᑐᕈᒪᕗᒍᑦ,” ᐅᖃᓚᐅᖅᐳᖅ ᓄᓇᕗᒥ ᑲᑐᔾᔨᖃᑎᒌᒃᑯᖏᑦ ᓄᓇᓕᕆᔨᒃᑯᑦ ᐊᖓᔪᖄᖓᑦ ᔫ ᓴᕕᑲᑖᖅ ᓄᑲᖅᖠᖅ. “ᐄ, ᓂᐅᕈᖅᖢᓂ ᓂᐅᕕᕈᑎᓂ ᑎᑎᖃᖁᑎᖏᓐᓂ ᑕᑯᒃᓴᐅᖃᑦᑕᖅᐳᑦ ᖃᑉᓯᓂᒃ ᐊᑐᖏᓐᓂᖅᓴᐅᖕᒪᖔᖅᐱᑦ ᐃᑲᔪᖅᑕᐅᒍᑎᑖᕈᑎᓂ. ᖃᓄᑎᒋ ᐃᑲᔪᕐᓂᖃᕐᒪᖔᑦ ᖃᐅᔨᒪᖏᑉᐳᒍᑦ ᖃᖅᓯᓪᓚᑦᑖᓂᒃ? ᑭᑐᑦ ᐃᑲᔪᖅᑕᐅᓂᖅᓴᐅᕙᑦ, ᓂᐅᕕᕐᕕᑦ ᓂᐅᕕᖃᑦᑕᖅᑐᓪᓘᓐᓃᑦ? ᖃᐅᔨᒪᕗᒍᑦ ᓱᓇᑐᐃᓐᓇᖅ ᐊᑭᑦᑐᕆᐊᖅᐸᖕᒪᑦ ᐅᖅᓱᐊᓗᐃᑦ ᐊᑭᑦᑐᕆᐊᕌᐊᖓᑕ ᒪᓕᒃᓴᖅᐸᒃᖢᑎᒃ ᓱᓇᑐᐃᓐᓇᐃᑦ, ᐱᓗᐊᖅᑐᒥᒃ ᑕᒪᒃᑯᐊ ᑎᖕᒥᓲᒃᑯᑦ ᑭᓯᐊᓂ ᑎᑭᑕᐅᕙᒃᑐᑦ ᐱᖁᑎᖏᓪᓗ ᑎᖕᒥᓲᒃᑯᑦ ᐅᓯᔭᐅᕙᒃᑐᑦ. ᑐᑭᓯᐅᒪᑉᓗᑕᓗ ᐅᓯᔭᐅᔪᖃᕌᖓᑦ ᐊᑭᑐᔪᒻᒪᕆᐅᖃᑦᑕᕐᒪᑕ, ᑕᐃᒪᓐᓇ ᐃᑲᔪᕈᑎᑦ ᐃᑲᔪᕈᑕᐅᕙᒃᖢᑎᒃ ᑎᖕᒥᓲᒃᑰᕈᑎᓄᑦ. ᑕᑯᒍᒪᓐᓇᖅᐳᖅ ᑮᓇᐅᔭᑦ ᑎᑎᕋᖅᑕᐅᓯᒪᒃᐸᑕ ᖃᑉᓯᓂᒃ ᑮᓇᐅᔭᓂᒃ ᐱᖃᑦᑕᕐᒪᖔᑉᑕ ᐃᑲᔪᕈᑎᒃᓴᓂᒃ − ᖃᑉᓯᓂᒡᓗ ᐊᑭᓗᒃᓯᒋᐊᕈᑎᑖᖃᑦᑕᖅᐱᑕ?”
ᓄᓇᕗᒥ ᒪᓕᒐᓕᐅᖅᑎᐅᖃᑕᐅᔪᖅ ᐊᑐᕚᒥ ᓗᐊᕆ ᐃᓪᓚᐅᑦ ᑐᒃᓯᕋᐅᑎᖃᒃᑲᓐᓂᓕᖅᐳᖅ ᑲᓇᑕᐅᑉ ᒐᕙᒪᒃᑯᖏᓂᑦ ᐋᖅᑭᒃᓱᒃᑕᐅᖁᓪᓗᒍ ᑕᒪᓐᓇ ᐊᑐᖅᑕᐅᖏᓐᓇᐅᔭᓕᕐᒪᑦ ᐊᑲᐅᖏᑦᑐᒃᑯᑦ.
“ᓕᐳᕈᒃᑯᑦ ᐱᓕᕆᑦᓯᐊᖅᓯᒪᖏᒻᒪᑕ ᑕᒪᑐᒥᖓ ᓂᕿᓄᑦ ᐃᑲᔪᕈᑎᒃᓴᓂᒃ ᐅᑭᐅᖅᑕᖅᑐᒥᐅᓄᑦ ᓂᕿᓪᓗ ᐊᑭᑐᑦᓯᐊᖅᑎᓪᓗᒋᑦ ᐅᑭᐅᖅᑕᖅᑐᒥ,” ᐃᓪᓚᐅᑦ ᐅᖃᓚᐅᖅᐳᖅ. “ᐊᑭᑐᓗᐊᖃᑦᑕᕐᓂᖏᑦ ᓂᕿᑦ ᐊᒃᓱᐊᓗᒃ ᐃᓱᒫᓗᒍᑕᐅᓯᒪᓪᓗᓂ ᐅᑭᐅᖅᑕᖅᑐᒥᐅᓄᑦ ᐊᒥᓱᓄᑦ ᐅᑭᐅᓄᑦ, ᒫᓐᓇᐅᓕᖅᑐᖅ ᑭᓯᐊᓂ ᓕᐳᕈᒃᑯᑦ ᐅᔾᔨᕆᕙᓪᓕᐊᓕᑕᐃᓐᓇᕐᒪᒍ ᑕᐃᒪᐃᑦᑐᓪᓚᕆᐅᓂᖓᓄᑦ ᐊᓯᖏᓐᓄᑦ ᐊᑐᖅᑕᐅᕙᓪᓕᐊᓕᑕᐃᓐᓇᖅᖢᓂ ᐊᑭᑦᑐᖅᐸᓪᓕᐊᓂᖏᑦ ᓂᕿᑦ. ᓂᕿᑦᓯᐊᕙᓕᕆᔨᒃᑯᑦ ᐅᑭᐅᖅᑕᖅᑐᒥ ᓂᐅᕕᕐᕕᖕᓂᒃ ᑮᓇᐅᔭᓕᐅᖅᑎᑦᓯᖕᒪᑕ ᐊᒃᓱᐊᓗᒃ, ᖃᐅᔨᓴᖅᑕᐅᒋᐊᖃᓕᖅᖢᓂᓗ ᐊᑭᑭᒡᓕᒋᐊᖅᑕᐅᕙᓪᓕᐊᖁᓪᓗᒋᑦ ᓂᕿᑦ ᐊᓯᐊᒍᑦ ᐱᓕᕆᐊᕆᔭᐅᒋᐊᖃᓕᕐᒪᑦ. ᑕᐃᒪ ᐋᓯᑦ ᐳᐃᒍᖅᑕᐅᑐᐃᓐᓇᖃᑦᑕᕐᒪᑕ ᐅᑭᐅᖅᑕᖅᑐᒥᐅᑦ ᕿᒪᑕᐅᑐᐃᓐᓇᖅᖢᑎᒃ.
“ᓕᐳᕈᒃᑯᑦ ᐱᓕᕆᓪᓚᕆᒍᒪᒃᐸᑕ ᐊᑭᑭᒡᓕᒋᐊᖅᑎᑎᓂᕐᒧᑦ ᓂᕿᓂᒃ ᐅᑭᐅᖅᑕᖅᑐᒧᐊᖅᐸᒃᑐᓂᒃ, ᐱᓪᓚᕆᒋᐊᖃᖅᐳᑦ ᐅᑭᐅᖅᑕᖅᑐᒥᐅᓂᒃ ᐃᑲᔪᕐᓗᑎᒃ ᐅᑕᕿᑐᐃᓐᓇᖏᓪᓗᑎᒃ ᓂᕿᑖᕐᕕᖕᓄᑦ ᐊᖓᔪᑲᑎᑦ ᐱᓕᕆᑎᑕᐅᖏᓐᓂᖅᓴᐅᓗᑎᒃ ᐃᓱᒪᓕᐅᖏᓐᓂᖅᓴᐅᓗᑎᒃ,” ᑕᐃᒪᓐᓇ ᐅᖃᓚᐅᖅᐳᖅ. “ᐅᑭᐅᖅᑕᖅᑐᒥᐅᑦ ᓯᕗᓕᖅᑎᖃᕆᐊᖃᖏᒻᒪᑕ ᐊᐱᖅᓱᑦᓯᐊᖃᑦᑕᖅᑐᓂᒃ ᐱᑦᓯᐊᕋᓱᐊᖏᓐᓇᕐᓗᑎᒃ, ᓯᕗᓕᖅᑎᖃᓪᓚᕆᒋᐊᖃᕋᑦᑕ ᐱᓕᕆᐊᕆᔭᐅᓪᓚᕆᒡᓗᓂ ᒫᓐᓇ ᐊᑭᓗᒃᓯᒋᐊᕈᑎᒃᓴᐃᑦ ᓂᕿᓄᑦ ᑲᔪᖏᖅᓴᐃᓗᑎᒡᓗ ᓂᕿᑐᖃᖏᓐᓂᒃ ᐃᓄᐃᑦ ᐱᓕᕆᐊᖃᕐᓂᖅᓴᐅᓕᖅᐸᓪᓗᑕ.”
ᐃᓪᓚᐅᑦ ᐃᐊᓐᑏᐲᒃᑯᓐᓂᓗ ᑲᑎᒪᔨᐅᖃᑎᐊ ᓂᑭ ᐋᔅᑕᓐ ᐃᓱᒫᓗᒍᑎᒥᖕᓂᒃ ᐅᖃᐅᓯᖃᓚᐅᖅᐳᑦ ᑕᒪᑐᒪ ᒥᒃᓵᓄᑦ ᓄᕕᐱᕆ 2022-ᒥ.
“ᑕᐃᒪ ᐊᖏᓪᓚᕆᒃᐳᖓ ᓂᕿᑦᓯᐊᕙᓕᕆᓂᖅ ᐅᑭᐅᖅᑕᖅᑐᒥᐅᓄᑦ ᐋᖅᑭᒃᓱᖅᑕᐅᒋᐊᖃᒃᑲᓐᓂᓕᕐᒪᑦ,” ᐅᖃᓚᐅᖅᐳᖅ ᐃᓪᓚᐅᑦ ᑕᐃᑦᓱᒪᓂ. “ᐊᔾᔨᒌᖏᒻᒪᑕ ᑲᓇᑕᐅᑉ ᒐᕙᒪᒃᑯᖏᑦ ᐅᖃᐅᓯᕆᔭᖏᓪᓗ ᐊᒻᒪ ᓄᓇᓕᖕᓂᒥᐅᑦ ᑐᓴᖅᐸᓪᓕᐊᔭᖏᑦ.”
ᑕᒪᓐᓇ ᐱᓕᕆᐊᕆᔭᐅᓂᖓᓄᑦ ᐊᑐᖃᑦᑕᕐᒪᑕ ᑮᓇᐅᔭᓂᒃ $131 ᒥᓕᔭᓐᑖᓚᓂᒃ ᐅᑭᐅᒧᑦ ᐊᑕᐅᓯᕐᒧᑦ ᐃᑲᔪᕈᑎᖃᖅᖢᑎᒃ ᓂᐅᕕᕐᕕᖕᓄᑦ ᓂᕿᑖᕈᑎᓄᑦ ᐊᑭᑭᓐᓂᖅᓴᒥᒃ ᐊᑭᓕᐅᑎᖃᕈᓐᓇᖁᓪᓗᒋᑦ ᐅᓯᔭᐅᓂᖏᓐᓄᑦ ᓂᕿᒃᓴᐃᑦ ᓂᐅᕕᕐᕕᓕᐊᖅᑐᑦ ᐅᑭᐅᖅᑕᖅᑐᒥ.
“ᐃᒪᓐᓇ ᑐᑭᖃᕐᒪᑦ ᒐᕙᒪᒃᑯᑦ ᐊᑭᓖᒃᐸᑕ $1-ᒥᒃ ᓂᕿᓂᒃ ᓂᐅᕕᕐᕕᖕᒧᑦ ᐅᓯᔭᐅᓂᐊᕐᓗᓂ ᓂᕿ, ᑕᐃᒪᓐᓇ $1−ᒧᑦ ᐊᑭᓗᖕᓂᖅᓴᐅᓂᐊᖅᐳᖅ ᓂᕿ ᓂᐅᕕᖅᑕᐅᓗᓂ ᓂᐅᕕᖅᐸᒃᑐᓄᑦ,” ᑎᑎᕋᖅᓯᒪᓚᐅᖅᐳᖅ ᖃᐅᔨᓴᖅᑕᐅᒍᑎᑦ ᓯᓚᑦᑐᖅᓴᕐᕕᒡᔪᐊᖓᓂ ᑐᕌᓐᑐ ᖃᐅᔨᓴᖅᑐᑦ ᐊᑭᓗᒃᓯᒋᐊᕈᑎᓂᒃ ᓂᕿᓄᑦ. ᑭᓯᐊᓂ, “ᖃᐅᔨᓯᒪᕗᒍᑦ ᓂᐅᕕᖅᑎᒃᑯᑦ ᓂᕿᑖᕐᕕᖕᒥ ᐊᑭᓕᖅᑕᐅᒑᖓᑕ ᐊᑭᓗᒃᓯᒋᐊᕈᑎᒃᓴᖓᓄᑦ ᓂᕿᑦ ᐅᓯᔭᐅᓂᖓᓄᑦ, ᓂᐅᕕᖅᐸᒃᑐᑦ ᐊᑭᓖᓪᓗᑎᒃ 67-ᓴᓐᓯᓂᒃ. ᐊᑕᐅᓯᕐᒥᒃ ᓂᕿᑖᕐᕕᖃᖅᑐᑦ ᐅᑭᐅᖅᑕᖅᑐᒥ ᔭᓐᓄᐊᕆ 2019-ᒥ ᐊᑭᑦᑐᕆᐊᖅᐸᒃᖢᑎᒃ ᐃᑲᔪᕈᑎᒃᓴᐃᑦ, ᖃᐅᔨᓪᓗᑕ $1ᑲᓐᓂᕐᒥᒃ ᓂᐅᕕᖅᑎᑦ ᐱᑎᑕᐅᕙᒃᖢᑎᒃ ᓂᐅᕕᖅᐸᒃᑐᑦ ᐊᑭᑭᒡᓕᒋᐊᖅᓯᒪᔪᓂᒃ ᓂᐅᕕᓕᖅᖢᑎᒃ 26ᓴᓐᓯᑐᓐᓇᒥᒃ ᐊᑭᑭᒡᓕᒋᐊᖅᑕᐅᓪᓗᑎᒃ.”
ᑲᓇᑕᐅᑉ ᒐᕙᒪᒃᑯᖏᑦ ᖃᓄᖅ ᐅᓂᒃᑳᕈᑎᖃᖅᓯᒪᓂᖏᑦ
ᓄᓇᕗᒥ ᐱᕙᓪᓕᐊᔪᓕᕆᔨᒃᑯᑦ ᐊᐱᕆᓚᐅᖅᐳᑦ ᓄᓇᒋᑦ.
“ᓂᕿᑦᓯᐊᕙᓕᕆᓂᖅ ᐅᑭᐅᖅᑕᖅᑐᒥ ᐱᓕᕆᐊᖅ ᖃᐅᔨᓴᑐᐃᓐᓇᖃᑦᑕᕐᒪᑕ ᐊᑭᒋᔭᐅᔪᓂᒃ ᒪᑭᑉᐹᓪᓕᕈᑕᐅᔪᓐᓇᖅᑐᓂᒡᓗ ᓂᐅᕕᕐᕕᖕᓄᑦ ᐊᑎᓕᐅᖅᓯᒪᖃᑕᐅᔪᓂᒃ ᐱᓕᕆᐊᒧᑦ,” ᐅᖃᓚᐅᖅᐳᖅ ᐅᖃᖅᑎᒋᔭᐅᔪᖅ CIRNAC−ᑯᓐᓄᑦ ᒦᒐᓐ ᒪᑭᓖᓐ. “ᐊᒥᓱᑦ ᓄᓇᓖᑦ ᓂᐅᕕᕐᕕᖃᖅᑐᑦ ᐱᓕᕆᖃᑎᖃᖃᑦᑕᕐᒪᑕ ᓂᕿᑦᓯᐊᕙᓕᕆᔨᒃᑯᓐᓂᒃ ᐅᑭᐅᖅᑕᖅᑐᒥ ᖃᓪᓗᓈᑦ ᓄᓇᖓᓐᓂᑦ ᓂᕿᓕᕆᔨᓂᑦ ᑎᑭᓴᐃᕙᒃᖢᑎᒃ ᐊᑎᓕᐅᖅᓯᒪᖃᑕᐅᔪᓂᑦ ᓂᕿᑦᓯᐊᕙᓕᕆᔨᒃᑯᓐᓄᑦ. ᑖᒃᑯᐊ CIRNAC ᐱᓕᕆᓪᓚᕆᖃᑎᖃᖃᑦᑕᖅᖢᑎᒃ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᒥᖕᓂᒃ ᖃᐅᔨᓴᖃᑦᑕᖅᖢᑎᒃ ᖃᓄᐃᑉᐸᓪᓕᐊᓕᕐᓂᖓᓄᑦ ᑕᒪᓐᓇ ᕿᓂᖃᑦᑕᖅᖢᑎᒡᓗ ᐃᓚᐅᖃᑕᐅᓂᕐᒧᑦ ᐊᑲᐅᓯᕚᓪᓕᕈᑎᒃᓴᓂᒃ ᐊᐅᓚᓂᕆᔭᖓ ᑐᓴᖅᑕᐅᓯᒪᑦᓯᐊᖏᓐᓇᕋᓗᐊᕐᒪᖔᑦ ᐃᓄᖕᓄᑦ.”
ᑕᒪᓐᓇ ᑭᐅᔭᐅᒍᑕᐅᔪᖅ ᖃᐅᔨᓐᓇᕈᑕᐅᓪᓗᓂ ᑐᓴᐅᒪᑎᑕᐅᒍᑎᒃᓴᐃᑦ ᐃᓚᖏᑦ ᐅᖃᐅᓯᕆᔭᐅᑦᑕᖏᑦᑐᒃᓴᐅᖕᒪᑕ, ᑕᐃᒪᓐᓇ ᑐᓴᖅᑎᑕᐅᒋᐊᓃᑦ ᑮᓇᐅᔭᑦ ᐱᔾᔪᑎᒋᓪᓗᒋᑦ ᓇᓗᓇᐃᔭᖅᑕᐅᓯᒪᒋᐊᖃᕋᓗᐊᕐᒪᑕ ᓇᒧᖓᐅᕙᓪᓕᓂᖏᓐᓄᑦ. ᑕᑯᒃᓴᐅᓪᓚᕆᖏᒻᒪᑦ ᐃᓚᐃᓐᓇᖏᑦ ᐃᓚᐅᑎᓪᓗᒋᑦᓂᐅᕕᕐᕕᑦ ᑕᒪᑐᒧᖓ.
ᒪᑭᓖᓐ ᐅᖃᒃᑲᓐᓂᓚᐅᖅᖢᓂ CIRNAC−ᑯᑦ ᓵᑕᐅᔪᒃᓴᐅᑎᑕᐅᓂᖏᑦ ᐆᒃᑐᕋᖅᑕᐅᓯᒪᖃᑦᑕᖅᓗᓂ.
“ᓂᐅᕕᖅᑎᑦ ᓂᐅᕕᒃᓴᖃᕐᕕᐅᔪᓪᓗ ᑕᒪᕐᒥᒃ ᓵᑕᐅᔪᒃᓴᐅᒋᐊᖃᕋᓗᐊᕐᒪᑕ ᐱᓕᕆᓪᓚᕆᒋᐊᖃᖅᖢᑎᒡᓗ. ᐅᑭᐅᑕᒫᑦ, ᑕᒪᒃᑯᐊ ᓂᐅᕕᕐᕕᑦ ᓂᐅᕕᐊᒃᓴᖃᖃᑦᑕᖅᑐᓪᓗ ᓂᐅᕕᕐᕕᖕᓄᑦ ᓂᕈᐊᖅᑕᐅᖃᑦᑕᕐᒪᑕ ᒪᓕᒃᑲᓗᐊᕐᒪᖔᑕ ᖃᐅᔨᓴᖅᑕᐅᖃᑦᑕᖅᖢᑎᒃ ᒪᓕᒃᑕᐅᒋᐊᖃᖅᑐᓂᒃ ᐊᖏᕈᑎᓕᐅᖅᑕᐅᓯᒪᔪᓂᒃ ᐊᑎᓕᐅᖅᓯᒪᔭᒥᖕᓂᒃ, ᐊᒻᒪ ᐊᑭᑭᓐᓂᖅᓴᒃᑯᑦ ᐊᐅᓪᓚᖅᑎᑎᖃᑦᑕᕋᓗᐊᕐᒪᖔᑕ, ᐊᑭᖏᓐᓂᒡᓗ ᐋᖅᑭᒃᓱᐃᓯᒪᑦᓯᐊᕋᓗᐊᕐᒪᖔᑕ ᓂᐅᕕᐊᒃᓴᐃᑦ ᐊᒻᒪ ᖃᑉᓯᓂᒃ ᑮᓇᐅᔭᓕᐅᕈᑎᖃᓚᐅᕐᒪᖔᑕ.
ᐃᓄᓕᕆᔨᑦ ᐱᓕᕆᖃᑎᖃᓕᖅᖢᑎᒃ ᓂᐅᕕᕐᕕᖕᓂᒃ ᐊᑐᓕᖁᔭᐅᓯᒪᔪᓂᒃ ᐱᖓᔪᒋᔭᐅᔪᓄᑦ ᖃᐅᔨᓴᖅᑎᓂᒃ ᑮᓇᐅᔭᑦ ᖃᓄᐃᓕᐅᖅᑕᐅᓚᐅᕐᒪᖔᑕ ᐋᖅᑭᒃᓱᐃᓂᐊᓕᕌᖓᒥᒃ ᓈᒻᒪᖏᑦᑐᓂᒃ.”
ᒪᑭᓖᓐ ᐅᖃᒃᑲᓐᓂᓚᐅᖅᐳᖅ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᐊᖏᑦ ᓄᓇᓕᖕᓂ ᓲᕐᓗ ᐊᖑᓇᓱᐊᖅᑎᑦ ᓄᓇᓕᖕᓂ ᐃᑲᔪᖅᑕᐅᒍᑎᖏᑦ, ᐊᑐᖅᑕᐅᒋᐊᖃᖅᑐᑦ “ᐃᑲᔪᖅᑕᐅᓂᖏᓐᓄᑦ ᐊᖑᓇᓱᐊᖅᑎᓄᑦ ᐃᑲᔪᕈᑎᒃᓴᐃᑦ ᐱᓕᕆᐊᕆᔭᐅᓂᖏᓐᓄᑦ ᓂᕿᓂᒃ. ᐃᑲᔪᕈᑎᒃᓴᐃᑦ ᐊᖑᓇᓱᐊᖅᑎᒧᑦ ᓴᓇᔭᐅᓚᐅᕐᒪᑦ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑎᒋᔭᐅᔪᓄᑦ ᐃᑲᔪᕈᑕᐅᓪᓗᓂᓗ ᓂᕿᖃᖅᑎᑎᓂᕐᒥᒃ ᓇᖕᒥᓂᖅᓱᖅᐹᓪᓕᕈᑎᒃᓴᓂᒡᓗ.” ᑕᐃᒪᓐᓇᐃᓕᐅᖃᑦᑕᖅᐳᑦ ᓂᕿᑦᓯᐊᕙᓕᕆᔨᒃᑯᑦ ᐅᑭᐅᖅᑕᖅᑐᒥ ᐱᓕᕆᖃᑎᒋᔭᐅᓪᓗᑎᒃ, ᑕᐃᒪᓐᓇ ᐊᑭᑭᓐᓂᖅᓴᒥᒃ ᐊᑭᓕᖃᑦᑕᖁᓪᓗᐱᑦ ᓂᕿᓄᑦ ᐅᑭᐅᖅᑕᖅᑐᒥᐅᑦ.
“ᑮᓇᐅᔭᑦ ᐊᐅᓚᑎᑕᐅᓪᓗᑎᒃ ᓄᓇᖃᖅᑳᖅᓯᒪᔪᑦ ᒐᕙᒪᒃᑯᐃᓐᓄᑦ ᑲᑐᔾᔨᖃᑎᒌᓄᓪᓗ ᐅᑭᐅᖅᑕᖅᑐᒥ ᓂᕿᑦ ᐱᒋᐊᖃᖅᑕᖏᓐᓂᒃ ᓄᓇᓖᑦ ᐃᓕᖁᓯᑐᖃᓕᕆᓂᕐᒧᑦ ᒪᓕᒃᑲᓗᐊᕐᒪᖔᑕ. ᓯᕗᓪᓕᕐᒥ ᐅᑭᐅᒥ ᐱᓕᕆᐊᕆᔭᐅᓕᖅᑎᓪᓗᒍ, ᐃᑲᔪᕈᑎᒃᓴᐃᑦ ᐃᑲᔪᓚᐅᖅᐳᑦ 5,500 ᐅᖓᑖᓄᑦ ᐊᖑᓇᓱᒃᑎᓂᒃ. ᐊᒻᒪ, ᓄᓇᓕᖕᓂ ᓂᕿᑖᕐᓂᕐᒧᑦ ᑮᓇᐅᔭᑦ ᐃᑲᔪᕈᑕᐅᓪᓗᑎᒃ ᓂᕿᓂᒃ ᑕᐅᖅᓰᖃᑦᑕᐅᑎᒍᑎᓂᒃ ᓄᓇᓕᖕᓄᑦ ᐊᑐᓂ, ᓲᕐᓗ ᓂᐅᕕᖃᑦᑕᕐᓂᖅ ᐊᖏᓂᖅᓴᓂᒃ ᐊᒥᓲᓂᖅᓴᓂᒃ, ᐃᓐᓇᑐᖃᐃᑦ ᓂᕆᑎᑕᐅᒍᑎᒃᓴᖏᑦ, ᐃᓕᓐᓂᐊᕐᕕᖕᒥ ᓂᕿᒃᓴᐃᑦ ᐊᓯᖏᓪᓗ… 112ᓂ ᓄᓇᓕᖕᓂ ᐅᖓᓯᒃᑐᒥᐅᓂ.”
ᒪᒃᓖᓐ ᐅᖃᓚᐅᕆᓪᓗᓂ ᓂᕿᑦᓯᐊᕙᓕᕆᓂᖅ ᐅᑭᐅᖅᑕᖅᑐᒥ ᖃᐅᔨᓴᕈᑎᖃᓚᐅᕐᒪᑕ ᓄᑖᒥᒃ ᓂᕿᖃᑦᓯᐊᕋᓗᐊᕐᒪᖔᑕ ᓄᓇᖃᖅᑳᖅᓯᒪᔪᑦ ᐃᑲᔪᕈᑎᒃᑯᑦ ᐅᑭᐅᖅᑕᖅᑐᒥ ᓄᓇᓖᑦ. ᑕᒃᑯᐊ ᐃᑲᔪᕈᑎᒃᓴᐃᑦ ᐃᑲᔪᖃᑦᑕᖅᖢᑎᒃ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂᒃ ᐃᓕᓐᓂᐊᖅᓯᒪᔪᓂᒡᓗ ᓄᓇᖃᖅᑳᖅᓯᒪᔪᑦ ᓂᕿᑖᖅᑎᑎᒍᑎᖏᓐᓂᒃ ᖃᐅᔨᓴᖃᑦᑕᖅᖢᑎᒃ ᖃᓄᑎᒋᓗ ᐊᑭᓕᐅᑎᖃᖃᑦᑕᕐᓂᖏᓐᓄᑦ ᓱᓇᑐᐃᓐᓇᕐᓄᑦ ᐊᑲᐅᓯᕚᓪᓕᕆᐊᖁᔭᐅᖏᓐᓇᕈᑎᒃᓴᖅᓯᐅᖅᖢᑎᒃ ᐃᑲᔪᕈᑎᓄᑦ ᐱᓕᕆᐊᓄᑦ. ᑕᐃᒪ 2022-23−ᒥᓗ, ᑖᒃᑯᑎᒎᓇ ᐃᑲᔪᓯᐊᒃᑯᑦ, ᑖᒃᑯᐊ CIRNACᑯᑦ ᑮᓇᐅᔭᖃᖅᑎᑎᓚᐅᖅᐳᑦ ᑕᓪᓕᒪᓂᒃ ᓄᓇᖃᖅᑳᖅᓯᒪᔪᑦ ᖃᐅᔨᓴᖅᑎᖏᓐᓂᒃ ᖃᐅᔨᓴᖅᑎᓪᓗᒋᑦ ᑭᒃᑯᑦ ᓂᕿᑖᖃᑦᑕᕐᓂᖏᓐᓄᑦ ᐊᔾᔨᒌᖏᑦᑐᒃᑯᑦ ᓂᕿᖃᑦᓯᐊᖅᑎᑕᐅᓂᖏᓐᓄᓪᓗ, ᐊᑭᓕᐅᑎᖃᖅᐸᒃᖢᑎᕐ ᑲᑎᓪᓗᒋᑦ $1.2 ᒥᓕᔭᓐᑖᓚᓂᒃ ᑐᒃᓯᕋᐅᑎᖃᖅᓯᒪᔪᓄᑦ ᐱᑎᑕᐅᔪᓄᑦ.”