ᕋᐃᒪᓐ ᓂᖏᐅᑦᓯᐊᖅ ᐊᖏᕐᕋᖅᑐᖅ ᓴᓪᓕᓄᑦ.
“ᖁᕕᐊᓱᑦᑎᐊᖅᑐᒍᑦ, ᐊᓕᐊᓇᐃᒍᓱᒃᑐᒍᑦ ᐊᒻᒪᓗ ᐅᕿᓪᓕᕚᓪᓕᖅᑐᒍᑦ ᐊᑕᐅᑦᑎᒃᑯᐊᓗᒃ,” ᑕᐃᒪᓐᓇ ᐅᖃᖅᖢᓂ ᓯᐅᓚ ᓇᑦᓯᖅ, ᐸᓂᖓ.
“(ᕋᐃᒪᓐ) ᖁᕕᐊᓱᑦᑎᐊᖅᑐᖅ.”
ᓂᖏᐅᑦᓯᐊᖅ ᐊᑕᐅᓯᕐᒥᒃ ᐅᑭᐅᒥ ᐊᑐᕚᒦᓚᐅᖅᑐᖅ Embassy West-ᒥ ᐃᓐᓇᐅᓯᕝᕕᖕᒥ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᑲᒪᒋᔭᐅᑉᓗᓂ ᐊᒻᒪᓗ ᐳᐃᒍᖅᓴᕋᐃᓗᐊᓕᕐᓂᖓᓄᑦ ᑲᒪᒋᔭᐅᑉᓗᓂ. ᐃᓚᖏᑦᑕ ᐊᖏᕐᕋᖁᕕᒡᔪᐊᓕᓚᐅᖅᑕᖓ, ᑭᓯᐊᓂ ᓄᓇᕗᑦ ᒐᕙᒪᒃᑯᖏᑦᑕ ᐊᖏᕐᕋᖅᑎᑦᑐᓐᓇᓚᐅᙱᑕᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᖏᖅᑕᐅᓯᒪᙱᑎᓪᓗᒍ ᐃᓐᓇᐅᓯᕝᕕᖕᒥ ᐊᓂᔪᓐᓇᖅᓯᓂᖓᓄᑦ.
ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ ᐅᖃᓵᓚᐅᖅᑐᖅ ᖃᕆᑕᐅᔭᒃᑯᑦ ᑎᑎᕋᖅᖢᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᓂᑉᓕᕈᓐᓇᙱᓐᓇᒥᒎᖅ ᐊᑕᐅᓯᕐᒧᑦ ᑐᕌᖓᓂᖃᖅᑐᒃᑯᑦ, ᑭᓯᐊᓂ ᐊᖏᕐᕋᐅᑎᑦᑎᓂᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖏᖅᓯᒪᙱᑎᓪᓗᒋᑦ ᐅᓗᕆᐊᓇᖅᑐᒦᑎᑦᑎᔪᓐᓇᕐᒪᑕ ᐱᔨᑦᓯᕋᖅᑕᐅᔪᒧᑦ ᖃᓄᐃᙱᑦᑐᓐᓇᖁᑉᓗᒍ.”
ᓇᑦᓯᖅ ᐊᒻᒪᓗ ᐃᓚᒌᒃ ᑮᓇᐅᔾᔭᒃᓴᕈᒪᓕᓚᐅᖅᑐᑦ $37,000-ᒥᒃ ᑎᖕᒥᓲᒃᑯᑦ ᑐᐊᕕᕐᓇᖅᑐᒃᑯᑦ ᑎᑭᑎᑕᐅᔪᓐᓇᖁᑉᓗᒍ ᐊᒻᒪᓗ ᐊᑐᕆᐊᖃᕐᓂᐊᖅᑕᖏᓐᓂᒃ ᐱᑖᖅᑎᑕᐅᔪᓐᓇᖁᑉᓗᒍ ᐊᖏᕐᕋᐅᒪᔪᓐᓇᖅᓯᖁᑉᓗᒍ ᓴᓪᓕᓂ. ᐃᓚᒌᑦ ᐊᑎᓕᐅᕆᔭᕆᐊᖃᓚᐅᕐᒥᔪᑦ ᖁᔭᓈᕈᑎᒥᒃ ᓄᓇᕗᑦ ᒐᕙᒪᒃᑯᖏᓐᓄᑦ, ᑐᑭᓯᐅᒪᑉᓗᑎᒃ ᑲᒪᔨᐅᓂᐊᕋᒥᒃ ᖃᓄᐃᙱᑦᑐᓐᓇᕈᑎᖏᓐᓂᒃ. ᐃᓚᒌᑦ ᖁᒻᒧᒃᓯᔾᔪᑎᒥᒃ ᐱᔭᕆᐊᖃᑐᐃᓐᓇᓕᖅᑐᑦ.
ᓂᖏᐅᑦᓯᐊᖅ ᐊᖏᕐᕋᓚᐅᖅᑐᖅ ᕕᕗᐊᕆ 21-ᒥ ᐊᒻᒪᓗ ᒪᒃᑖᖅᑐᖅᖢᓂ, ᑐᒃᑐᑐᖅᖢᓂ ᐊᒻᒪᓗ ᐃᖃᓗᒃᑐᖅᖢᓂ ᐊᖏᕐᕋᑐᐊᕋᒥ, ᑕᐃᒪᓐᓇ ᐅᖃᖅᖢᓂ ᓇᑦᓯᖅ. ᐃᓚᒌᑦ ᑲᑎᓐᓂᐊᖅᑐᑦ 81-ᓂᒃ ᐅᑭᐅᖅᑖᕐᓂᐊᕐᓂᖓᓄᑦ ᓇᓪᓕᐅᒃᑐᒃᐸᑦ ᒫᑦᓯ 11-ᒥ. ᓇᑦᓯᖅ ᐅᖃᖅᖢᓂ ᐊᖏᕐᕋᐅᒪᓂᐊᓕᖅᑐᕉᖅ ᑕᐅᕗᙵᓗᒃᑖᖅ ᐊᓂᕐᓂᖃᕈᓐᓃᖅᑳᕐᓇᓂ.
“ᖁᔭᓕᑐᐃᓐᓇᖅᑐᖓ ᐅᕿᓪᓕᕚᓪᓕᖅᖢᖓᓗ,” ᑕᐃᒪᓐᓇ ᐅᖃᖅᖢᓂ ᓇᑦᓯᖅ ᖁᔭᓕᓪᓗᓂ ᑮᓇᐅᔭᓂᒃ ᑐᓂᓯᓚᐅᖅᑐᓄᑦ. ᐃᓄᐃᑦ ᑐᓂᓯᓚᐅᖅᑐᑦ ᑲᑎᖦᖢᒋᑦ $27,000-ᒥᒃ, ᐊᒥᐊᒃᑯᖓ Wabano Centre-ᒥᙶᖅᖢᓂ ᐊᒻᒪᓗ ᐊᓯᖏᓐᓂᒃ ᓇᖕᒥᓂᓕᖕᓂᒃ.