ᓄᓇᕗᑦ ᐅᓪᓗᖓ ᑎᑭᑉᐸᓪᓕᐊᑎᓪᓗᒍ, ᓱᓕ ᐱᑕᖃᖅᐳᖅ ᐃᓗᐊᖅᓴᙱᓐᓂᐅᔪᒥ ᐊᒥᓱᓄᑦ ᐃᓄᖕᓄᑦ ᓄᓇᕗᒻᒥ ᑕᑯᒃᓴᐅᑎᑦᑎᙱᓐᓂᖏᓐᓂ ᑐᕌᒐᒃᓴᐅᔪᓂ ᐋᖅᑭᒃᑕᐅᓯᒪᔪᓂ ᓄᓇᕗᒻᒥ ᐊᖏᕈᑕᐅᔪᒥ, ᐅᖃᖅᐳᖅ ᐊᓗᑭ ᑰᑦᑎᖅ.
“ᐊᒥᓱᓂ ᑐᕌᒐᕆᓇᓱᐊᓚᐅᖅᑕᑦᑎᓐᓂ ᐅᕝᕙᓘᓐᓃᑦ ᓂᕆᐅᒋᓚᐅᖅᑕᑦᑎᓐᓂ ᐱᓪᓚᕆᙳᓚᐅᙱᓚᑦ. ᐃᓄᐃᑦ ᓱᓕ ᐆᒪᓂᖃᖅᐳᖅ ᐊᒃᓱᕈᕐᓇᕐᔪᐊᖅᑐᒥ ᖃᓄᐃᓕᖓᓂᐅᔪᓂ: ᐆᒪᓪᓗᑎᒃ ᐊᔪᖅᓴᕐᓂᐅᔪᒥ ᐊᑖᓂ, ᐆᒪᓂᖅ ᐸᖕᒥᐅᓗᐊᖅᑐᓂ ᐃᒡᓗᓂᑦ, ᓂᕿᒃᓴᖃᑦᑎᐊᙱᓐᓂᐅᔪᓂ ᐊᖏᕐᕋᓂ. ᐃᓚᑰᓂᖅᑕᖃᕐᔪᐊᖅᐳᖅ ᕿᑎᖅᐸᓯᐊᓂ ᑮᓇᐅᔾᔭᒃᓴᓂᐅᔪᒥ ᐃᓄᖕᓄᑦ ᐊᒻᒪ ᖃᓪᓗᓈᓄᑦ ᓄᓇᕗᒻᒥ ᐊᒻᒪᓗ ᓯᓕᒃᓯᕙᓪᓕᐊᑐᐃᓐᓇᖅᑰᔨᕗᖅ,” ᐅᖃᖅᐳᖅ ᑰᑦᑎᖅ, ᐊᖓᔪᖅᖄᖅ ᓄᓇᕗᒻᒥ ᑐᙵᕕᒃᑯᓐᓄᑦ (NTI). “ᐃᓱᒪᕗᖓ ᐅᓄᕐᓂᖅᓴᓂ ᐃᓄᖕᓂ ᓂᐱᖃᖅᐸᓪᓕᐊᓕᖅᑐᑦ ᖃᓄᖅ ᑭᓱᑐᐃᓐᓇᐃᑦ ᐱᐅᓯᕙᓪᓕᐊᙱᓐᓂᖏᓐᓂ.”
ᐅᖃᐅᓯᖃᖅᐳᖅ ᐱᕈᕐᓂᖃᖅᐸᓪᓕᐊᙱᓐᓂᖓᓐᓂ ᐃᓄᖕᓄᑦ ᐃᖅᑲᓇᐃᔭᕐᓂᐅᔪᒧᑦ ᓄᓇᕗᒻᒥ ᒐᕙᒪᒃᑯᓐᓂ, ᐱᓗᐊᖅᑐᒥ ᐊᐅᓚᑦᑎᔨᒻᒪᕆᐅᔪᓄᑦ.
“ᑕᐃᒫᒃ ᑕᒪᕐᒥᒐᓚᑦ ᐃᓄᖕᓂ ᐃᓱᒪᓕᐅᕆᓂᐅᔪᓂ ᐃᓂᐅᔪᓂ ᓴᓇᓂᕐᒧᑦ ᐊᒻᒪ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᖑᔪᓂ ᐊᒻᒪ ᐱᔨᑦᑎᕋᕐᓂᕐᒧᑦ ᖃᓪᓗᓈᖑᕗᑦ,” ᐅᖃᖅᐳᖅ.
ᑎᒃᑯᐊᕆᒋᕗᖅ ᐃᓄᒃᑐᑦ ᐱᓕᕆᓂᕐᒧᑦ ᐅᖃᐅᓯᐅᙱᓐᓂᖓᓂ ᓄᓇᕗᒻᒥ, ᑐᑭᖃᖅᖢᓂ ᐊᒥᓱᑦ ᐃᓄᐃᑦ ᐱᔪᓐᓇᙱᓚᑦ ᐱᓪᓚᕆᐅᔪᓂ ᒐᕙᒪᒃᑯᓐᓂ ᐱᔨᑦᑎᕋᕐᓂᐅᔪᒥ ᐱᔪᒪᓂᖅᓴᐅᔭᒥᓂᑦ ᐅᖃᐅᓯᕐᒥᓂᑦ. ᖄᒃᑲᓐᓂᐊᒍᑦ, ᐃᓄᒃᑐᑦ ᐅᖃᐅᓯᐅᙱᓚᖅ ᐃᓕᓴᐃᓂᕐᒥ ᑕᐃᑲᓂᓗᒃᑖᖅ ᐃᓕᓐᓂᐊᕐᓂᕐᒧᑦ ᐱᓕᕆᔾᔪᓯᐅᔪᒥ.
“ᐃᓄᐃᑦ ᐊᒥᓱᐊᓗᖕᓂ ᓂᕆᐅᒋᔭᖃᖅᐳᑦ ᐊᒻᒪ ᓂᕆᐅᖕᓂᖃᖅᐳᑦ. ᐃᓱᒪᕗᖓ ᐃᓚᖓᓐᓂ ᓂᕆᐅᒋᔭᖃᕐᓂᐅᔪᒥ ᐅᓇᐅᓚᐅᖅᐳᖅ ᐃᓄᓕᒫᓂ ᒐᕙᒪᖃᕐᓂᕐᒥ ᐃᓄᐃᑦ ᐃᓄᓕᒫᓄᑦ ᐅᓄᕐᓂᖅᓴᐅᑎᓪᓗᒋᑦ, ᐱᓕᕆᓂᐅᔪᒧᑦ ᓱᓕᔪᒥ ᐃᓄᖕᓄᑦ ᓯᕗᓪᓕᐅᔾᔭᐅᖁᔭᐅᔪᓂ ᓯᕗᓪᓕᐅᔾᔭᐅᑎᑕᐅᓇᔭᖅᐳᖅ ᐃᓄᓕᒫᓄᑦ ᒐᕙᒪᐅᔪᓄᑦ. ᑭᓯᐊᓂ ᐃᓱᒪᕗᖓ ᐊᑯᓂᐅᓂᐅᔪᒥ ᐊᕐᕌᒍᓄᑦ 22–ᓄᑦ, ᐅᔾᔨᕆᓯᒪᕗᒍᑦ ᐊᒥᓱᑦ ᓯᕗᓪᓕᐅᔾᔭᐅᖁᔭᐅᔪᑦ ᐃᓄᖕᓄᑦ–ᑐᕌᖓᓂᖃᙱᓚᑦ,” ᐅᖃᖅᐳᖅ.
ᐅᑯᓄᖓ ᐱᔾᔪᑕᐅᔪᓄᑦ ᓄᓇᕗᒻᒥ ᑐᙵᕕᒃᑯᑦ ᕿᒥᕐᕈᐊᖅᐳᑦ ᓇᖕᒥᓂᖅᓱᕐᓂᕐᒥ–ᒐᕙᒪᐅᔪᓄᑦ ᓂᕈᐊᒐᒃᓴᐅᔪᓂ, ᓲᕐᓗ ᐱᕙᓪᓕᐊᑎᑦᑎᓂᕐᒥ ᓇᖕᒥᓂᖅ ᐃᒻᒥᒃᑰᖅᑐᓂ ᐱᓕᕆᐊᖑᔪᓂ ᐱᔨᑦᑎᕋᕐᓂᕐᒧᑦ ᐃᓄᖕᓂ ᐅᕝᕙᓘᓐᓃᑦ ᓴᓇᓗᑎᒃ ᓄᑖᓂᒃ ᑕᐃᒎᓯᓂᑦ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒻᒥ ᒐᕙᒪᒃᑯᓐᓄᑦ ᐅᕘᓇ ᐊᔾᔨᒌᙱᑦᑐᓂᒃ ᒐᕙᒪᐅᔪᓂ ᐱᔨᑦᑎᕋᕐᓂᐅᔪᒥ ᐊᖏᕈᑎᒥᒃ. ᐃᓱᒪᓕᐊᖑᔪᓂ ᓂᕆᐅᙱᓚᑦ ᑭᓯᐊᓂ ᓄᓇᕗᒻᒥ ᑐᙵᕕᒃᑯᑦ ᐊᕐᕌᒍᑕᒫᒥ ᑕᒪᐃᑎᒍᑦ ᑲᑎᒪᓂᐅᓛᖅᑐᒥ ᐅᒃᑐᐱᕆᒥ, ᐅᖃᖅᐳᖅ ᑰᑦᑎᖅ, ᓂᕈᐊᖅᑕᐅᒃᑲᓐᓂᓚᐅᖅᑐᒥ ᕕᕈᐊᕆᒥ 69 ᐳᓴᓐᑎᒥ ᓂᕈᐊᕐᓂᐅᔪᒥ.
ᐅᒃᑐᐱᕆ ᓇᒃᓴᕐᓂᐊᕆᕗᖅ ᓂᕈᐊᕐᓂᐅᔪᒥ ᓄᓇᕗᒻᒧᑦ ᒐᕙᒪᒃᑯᓐᓄᑦ. ᐊᐱᕆᔭᐅᒐᒥ ᑭᓱᒥᒃ ᐅᖃᐅᔾᔨᓂᖃᕋᔭᕐᒪᖔᑦ ᓄᓇᕗᒻᒧᑦ ᒪᓕᒐᓕᐅᖅᑎᙳᕐᓂᐊᖅᑐᓄᑦ, ᑰᑦᑎᖅ ᑭᐅᓚᐅᖅᐳᖅ, “ᐃᓱᒪᓗᑎᑦ ᖃᓄᐃᒻᒪᑦ ᓄᓇᕗᑦ ᓴᓇᔭᐅᓚᐅᕐᓂᖓᓂ. ᐃᓱᒪᓗᑎᑦ ᑭᒃᑯᓐᓂ ᑭᒡᒐᖅᑐᐃᓂᐊᕐᓂᖏᓐᓂ ᐊᒻᒪᓗ ᐆᒻᒪᑎᖕᓂ ᐱᓕᕆᑎᓪᓗᑎᑦ ᐱᓕᕆᐊᒃᓴᕆᔭᕐᓂ ᒪᓕᒐᓕᐅᖅᑎᐅᓂᕐᒧᑦ.
“ᐃᓱᒪᕗᖓ ᐱᓕᕆᓂᖅᑕᖃᖅᐳᖅ ᐃᓄᓕᒫᓄᑦ ᒐᕙᒪᐅᔪᑦ ᐃᓄᖕᓄᑦ–ᑐᕌᖓᓂᖅᓴᐅᓂᕐᒧᑦ ᐊᒻᒪᓗ ᐊᑐᖔᖏᓪᓗᑎᒃ ᐅᖃᐅᓯᕐᒥ ‘ᐃᓄᓕᒫᓄᑦ ᒐᕙᒪᐅᕗᒍᑦ’ ᐃᓄᓕᒫᓄᑦ ᐊᑐᐊᒐᓕᐅᖅᑎᓪᓗᒋᑦ, ᐱᐅᔪᒥ ᐊᒃᑐᐃᓂᖃᕋᔭᖅᑐᒥ ᐃᓄᓕᒫᓄᑦ ᑕᒪᕐᒥᒐᓚᖕᓂ ᐊᒻᒪ ᑕᒪᑦᑕ ᓯᕗᒻᒧᑦ ᐃᖏᕐᕋᔪᓐᓇᕋᔭᖅᐳᒍᑦ ᐊᒻᒪ ᖃᐅᔨᒪᓗᑕ ᐱᔭᕆᐊᖃᖅᑕᕗᑦ ᑭᐅᔭᐅᓂᖏᓐᓂ ᐃᓅᓪᓗᑕ.”
ᐅᖃᐅᓯᕐᒧᑦ ᐱᔪᓐᓇᕐᓂᕆᔭᐅᔪᑦ
ᐋᑐᕚᒥ, ᓄᓇᕗᒻᒥ ᐃᓚᒋᔭᐅᔪᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᒧᒥᓛᖅ ᖃᖅᑲᖅ ᓴᖅᑭᑎᑦᑎᓯᒪᕗᖅ ᐱᖁᔭᒃᓴᖅ C-309–ᒥ, ᒪᓕᒐᐅᔪᖅ ᐃᓚᒋᐊᖅᓯᓂᕐᒥ ᑲᓇᑕᒥ ᓂᕈᐊᕐᓂᕐᒧᑦ ᒪᓕᒐᖓᓐᓂ, ᐃᓕᓯᓇᔭᖅᑐᒥ ᐃᓄᒃᑐᑦ ᓂᕈᐊᕈᑎᒃᓴᓄᑦ ᒐᕙᒪᑐᖃᒃᑯᓐᓄᑦ ᓂᕈᐊᕐᓂᐅᔪᓂ. ᐃᖏᕐᕋᓂᐅᕗᖅ ᓄᓇᕗᒻᒥ ᑐᙵᕕᒃᑯᑦ ᐃᑲᔪᖅᓱᐃᔭᖓᓂ.
“ᖃᓄᒃᑲᓐᓂᖅ ᐃᓄᐃᑦ ᐃᓚᐅᖃᑕᐅᔪᓐᓇᖅᐸᑦ ᒐᕙᒪᒋᔪᒪᔭᒥᒃ ᓂᕈᐊᕈᓐᓇᕐᓂᕐᒧᑦ ᐱᓕᕆᓂᐅᔪᒥ ᑐᑭᓯᐅᒪᙱᒃᑯᑎᒃ ᐊᒻᒪ ᐅᖃᓕᒫᕈᓐᓇᙱᓪᓗᑎᒃ ᖃᓪᓗᓈᑎᑐᑦ ᐅᐃᕖᑎᑐᓪᓘᓐᓃᑦ, ᒪᕐᕉᓪᓗᑎᒃ ᐃᓕᓴᕆᔭᐅᓯᒪᔪᓂ ᐅᖃᐅᓯᐅᔪᓂ ᑲᓇᑕᒥ?” ᐊᐱᕆᕗᖅ ᑰᑦᑎᖅ.
ᐊᔭᐅᕆᓚᐅᕆᕗᖅ ᒐᕙᒪᑐᖃᒃᑯᓐᓂ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ ᒥᓂᔅᑕᖓᓂ ᒥᓚᓂ ᔪᐊᐃ ᑐᓂᓯᓂᕐᒥ ᐃᓄᒃᑐᑦ ᑕᒪᒃᑭᐅᒪᔪᒥ ᓇᖏᕐᓂᖃᕐᓂᖓᓂ ᓄᓇᕗᒻᒥ ᐋᖅᑭᒋᐊᖅᓯᓂᐅᔪᒥ ᑲᓇᑕᒥ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᒧᑦ ᒪᓕᒐᕐᒥ.
“ᐃᓕᓴᖅᓯᔭᕆᐊᖃᖅᐳᑦ ᓄᓇᕗᒻᒥ, ᑕᒪᒃᑭᑦ ᐃᓕᓴᕆᔭᐅᓯᒪᔪᑦ ᐅᖃᐅᓯᐅᔪᑦ ᑲᓇᑕᒥ ᐅᓄᙱᓐᓂᖅᓴᐅᔪᓄᑦ ᐅᖃᐅᓯᐅᕗᑦ. ᓇᓕᒧᓐᓂᖃᕆᐊᖃᖅᐳᖅ, ᑕᐃᒪᐃᓪᓗᐊᖅᑎᑕᐅᓂᕐᒥ ᑐᓂᔭᐅᓂᐅᔪᒥ ᐃᓄᒃᑐᑦ ᐊᒻᒪ ᐃᓄᒃᑐᑦ ᐃᓕᓴᕆᔭᐅᔭᕆᐊᖃᖅᐳᖅ ᐃᓕᓴᕆᔭᐅᓯᒪᔪᒥ ᐅᖃᐅᓯᐅᓂᕐᒥ ᑲᓇᑕᒥ ᓄᓇᕗᒻᒥ. ᐃᓱᒪᓂᐅᔪᖅ ᑖᔅᓱᒧᖓ ᐱᔪᓐᓇᖅᑎᑦᑎᓇᔭᕐᒪᑦ ᐃᑲᔪᕈᑎᒃᓴᓂ ᐊᒻᒪ ᐃᑲᔪᖅᓱᐃᓂᐅᔪᓂ ᐱᔪᓐᓇᖅᑎᑕᐅᓂᖓᓂ ᑕᐃᒪᐃᓪᓗᐊᖅᑎᑕᐅᓂᕐᒥ ᐃᓄᒃᑐᒻᒧᑦ ᑕᐃᒪᐃᓐᓇᑎᑐᑦ ᐊᓯᖏᓐᓄᑦ ᐅᖃᐅᓯᐅᔪᓂ ᐃᓄᑭᓐᓂᖅᓴᐅᔪᓄᑦ. ᐃᓱᒪᕗᖓ ᐃᓄᒃᑐᑦ ᓇᒥᑐᐃᓐᓇᐅᔭᕆᐊᖃᓪᓚᕆᒃᐳᖅ ᓄᓇᕗᒻᒥ.”
ᓄᓇᕗᑦ ᐅᓪᓗᖓ
ᓄᓇᕗᑦ ᐅᓪᓗᖓ ᖁᕕᐊᓱᒍᑕᐅᓪᓗᓂ ᖃᓄᐃᓐᓂᐅᓲᖑᒐᔪᒃᐳᖅ ᓄᓇᕗᒻᒥ ᑭᓯᐊᓂ ᑰᑦᑎᖅ ᐅᖃᖅᐳᖅ ᑕᒪᑐᒪᓂ ᐊᕐᕌᒎᔪᒥ ᐊᒥᓱᓂ ᓇᒃᓴᖅᓯᒪᕗᖅ ᐃᓱᒪᒃᓴᖅᓯᐅᕆᓂᕐᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐊᓯᔾᔩᓯᒪᖕᒪᑦ ᐃᓅᓯᐅᔪᓂ ᐊᒻᒪᓗ ᓇᓂᓯᓂᐅᔪᓂ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓄᑦ ᐃᓗᕕᐅᔪᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐃᓕᓐᓂᐊᕐᕕᓂᑦ ᖃᓪᓗᓈᑦ ᓄᓇᖓᓐᓂ ᐱᑎᑦᑎᓯᒪᕗᖅ “ᑲᑎᖅᓱᖅᓯᒪᔪᓂ ᖃᐱᓚᓇᕐᓂᐅᔪᒥ.”
“ᐃᓱᒪᕗᖓ ᐅᓪᓗᑦᑎᐊᕙᐅᓇᔭᖅᐳᖅ ᐃᒻᒥᓂᒃ ᓂᑲᒋᓗᓂ ᐊᒻᒪᓗ ᐃᓄᖕᓄᑦ ᖃᓂᒋᔭᑦᑎᓐᓂ, ᐊᒻᒪᓗ ᓇᒡᓕᒍᓱᖕᓂᖃᕐᓗᑕ ᐊᒻᒪᓗ ᖁᕕᐊᓱᒍᑎᖃᕐᓗᑕ ᐃᓄᑭᑦᑑᑕᐅᔪᓂ ᐃᓚᒌᖑᔪᓂᑦ, ᑭᓯᐊᓂ ᐱᓕᕆᓗᑕ ᓴᙱᒃᑎᒋᐊᖅᓯᓂᕐᒥ ᓇᓗᓇᖅᑐᐊᓗᖕᒥ ᐱᓕᕆᖃᑎᒌᖕᓂᐅᔪᓂ ᐊᐅᖃᑎᒌᖕᓂᐅᔪᒥ ᐱᓕᕆᔾᔪᓯᐅᔪᓂ ᐱᖃᕐᓂᑦᑎᓐᓂ ᐃᓅᓪᓗᑕ. ᐃᓱᒪᕗᖓ, ᐃᓱᐊᓂ, ᐃᓚᕗᑦ, ᑲᓱᖃᑎᒌᖕᓂᐅᔪᑦ ᐱᕙᒃᐳᒍᑦ ᓴᙱᓂᑦᑎᓐᓂ.
“ᒫᓐᓇᐅᔪᒥ, ᖁᕕᐊᓱᒍᑎᖃᕋᓗᐊᖅᑎᓪᓗᑕ ᓄᓇᕗᒻᒥ, ᐃᖅᑲᐅᒪᔭᕆᐊᖃᖅᐳᒍᑦ ᐃᓄᖕᓂ ᐊᒃᓱᕈᖅᖢᑎᒃ ᐱᓕᕆᓚᐅᖅᑐᓂ ᓄᓇᕗᑖᕋᓱᖕᓂᕐᒧᑦ, ᓇᑭᙶᕐᓂᑦᑎᓐᓂ ᐊᒻᒪ ᐊᑐᖅᓯᒪᔭᑦᑎᓐᓂ ᑎᑭᐅᑎᓂᕐᒧᑦ ᓇᒦᓕᕐᓂᑦᑎᓐᓂ ᐅᓪᓗᒥ.”