ᕕᕗᐊᕆ 1–ᒥ ᑎᓴᒪᓂ ᒪᒃᑯᒃᑐᓂ ᐃᖃᓗᖕᒥᐅᑕᓂ ᑐᓂᓯᓚᐅᖅᐳᑦ ᕿᒥᕐᕈᓂᐅᔪᒥ ᓄᓇᕘᑉ ᐊᔾᔨᒌᙱᑦᑐᓂ ᐱᓕᕆᔨᐅᔪᓂ ᑐᓴᐅᒪᑎᑦᑎᓂᐅᔪᒥ ᒪᓕᒋᐊᓕᖏᓐᓂ (IISP) ᖃᔪᖅᑐᕐᕕᒃ ᓄᓇᓕᖕᓂ ᐊᔪᖅᓴᖅᑐᓄᑦ ᓂᕿᑖᕐᕕᖓᓂ, ᓴᓇᓪᓗᑎᒃ ᐊᑐᐊᒐᓂ ᐊᒻᒪ ᐊᑐᓕᒪᓂᐅᔪᓂ ᐊᑐᖁᔭᐅᓇᔭᖅᑐᓂ ᒪᓕᒐᐅᔪᓄᑦ ᒪᒃᑯᒃᑐᓂ–ᐊᐅᓚᑕᐅᔪᓂ ᐃᓱᒪᒋᔭᐅᓂᐅᔪᓂ.
ᐊᔾᔨᒌᙱᑦᑐᓂ ᐱᓕᕆᔨᐅᔪᓂ ᑐᓴᐅᒪᑎᑦᑎᓂᐅᔪᒥ ᒪᓕᒋᐊᓕᖏᓐᓂ ᐱᕙᓪᓕᐊᑎᑕᐅᓚᐅᖅᐳᖅ ᑭᐅᓂᕐᒧᑦ ᐊᑐᖁᔭᐅᓇᔭᖅᑐᓂ ᓄᓇᕘᑉ ᐃᒻᒥᓃᖅᑕᐃᓕᒪᑎᑦᑎᓂᕐᒥ ᐸᕐᓇᒍᑎᖓᓂ ᖃᓄᐃᓕᐅᕐᓂᐅᔪᑦ ᐸᕐᓇᐅᑎᒥᒃ (ᐃᓅᓯᕗᑦ ᐊᓐᓂᕐᓇᖅᑐᖅ) ᐃᑲᔪᕐᓂᕐᒧᑦ ᑭᐅᓂᕐᒧᑦ ᓄᓇᕘᑉ ᖁᑦᑎᒃᑐᒥ ᐅᓄᕐᓂᐅᔪᓂ ᐃᒻᒥᓃᕐᓂᐅᔪᓄᑦ ᐱᔪᓐᓇᖅᑎᑦᑎᓪᓗᓂ ᐱᓕᕆᕝᕕᐅᔪᓂ ᐊᔪᕐᓇᙱᓐᓂᖅᓴᒥ ᐅᖃᐅᓯᖃᕐᓂᖏᓐᓂ ᑐᓴᒐᒃᓴᐅᔪᓂ ᑭᓇᑐᐃᓐᓇᖅ ᐃᒻᒥᓃᕈᒪᑐᐃᓐᓇᕆᐊᖃᖅᑎᓪᓗᒍ. ᐅᓇ ᐃᑲᔪᖅᓱᐃᓲᖑᕗᖅ ᓈᒻᒪᒃᑐᒥ ᓄᖅᑲᖅᑎᑦᑎᓂᖃᕐᓂᕐᒥ ᐱᓕᕆᓂᐅᔪᒥ.
ᒪᒃᑯᒃᑐᑦ ᐃᓚᐅᖃᑕᐅᓚᐅᖅᐳᑦ 7–ᖑᔪᓂ ᐃᓚᐅᖃᑕᐅᓂᐅᔪᓂ ᑲᑎᒪᓂᐅᔪᓂ ᒪᓕᒐᓕᖕᒥ ᐅᖃᓕᒫᖅᑎᓪᓗᒋᑦ ᐊᒻᒪ ᓴᓇᓚᐅᖅᐳᑦ ᐊᑐᖁᓇᔭᖅᑕᖏᓐᓂ ᑐᙵᕕᖃᖅᑐᓂ ᐅᑯᓂᖓ ᓇᓂᔭᐅᓂᐅᔪᓂ. ᕿᒥᕐᕈᓚᐅᕆᕗᑦ ᐊᓯᖏᓐᓂ ᐆᒃᑑᑎᐅᔪᓂ ᑕᑯᓇᓱᐊᕐᓂᕐᒧᑦ ᑭᓱᑦ ᐱᓕᕆᑦᑎᐊᕈᓐᓇᕐᓂᖏᓐᓂ ᐊᒻᒪ ᑭᓱᑦ ᐱᓕᕆᑦᑎᐊᙱᓐᓂᐅᔪᓂ, ᐃᓚᖃᖅᑐᒥ ᓄᓇᕘᑉ ᐃᓅᓯᕗᑦ ᐊᓐᓂᕐᓇᖅᑐᖅ ᐊᒻᒪ PEI–ᑯᑦ ᐃᑳᕈᑎᐅᔪᒥ ᐆᒃᑐᕋᐅᑎᖓᓐᓂ, ᑲᑎᑎᕆᔪᒥ ᒐᕙᒪᐅᔪᓂ ᐊᒻᒪ ᒐᕙᒪᐅᙱᑦᑐᓂ ᐱᓕᕆᔨᐅᔪᓂ ᑕᐃᑯᖓᓪᓚᕆᒃ ᐃᓄᖕᓄᑦ ᐊᒻᒪ ᐃᓚᒌᖑᔪᓄᑦ ᐃᓱᒪᒋᔭᐅᓂᐅᔪᓂ ᖁᑦᑎᒃᑐᒥ ᐅᓗᕆᐊᓇᕐᓂᐅᔪᒥ ᓱᔪᐃᓂᐅᔪᒥ.
“ᑕᐃᒃᑯᓂᖓᓕᒫᖅ ᑲᑎᒪᓂᐅᔪᓂ ᐋᖅᑭᒃᓱᐃᓚᐅᖅᐳᑦ ᐊᑐᖁᔭᐅᓇᔭᖅᑐᓂ ᑕᑯᔭᕐᓂ ᐅᓪᓗᒥᒥ,” ᐅᖃᓚᐅᖅᐳᖅ ᐱᓕᕆᐊᒃᓴᐅᑉ ᒪᒃᑯᒃᑐᓂ ᐱᓕᕆᔨ ᑕᐃᕕᑦ ᖁᐊᒐᖅ.
ᐊᑕᐅᓯᐅᔪᖅ ᐅᑯᓇᓂ ᐊᑐᖁᔭᐅᓇᔭᖅᑐᓂ ᐃᓚᖃᖅᐳᑦ ᐱᓕᕆᒃᑲᓐᓂᕐᓂᕐᒥ ᖃᓄᐃᑎᑦᑎᓂᐅᔪᒥ ᑐᕌᒐᕆᔭᐅᔪᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᓴᓇᔨᖃᐃᓐᓇᕐᓂᕐᒥ ᓄᓇᕗᒻᒥ.
“ᐋᖅᑭᒍᑎᒃᓴᕗᑦ ᐃᓚᖃᖅᐳᑦ ᐊᑐᐃᓐᓇᖃᖅᑎᑦᑎᓂᕐᒥ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᖁᑕᐅᔪᓂ ᐊᒻᒪ ᑐᓂᓗᒍ ᑕᐃᒃᑯᓄᖓ ᑎᓕᔭᐅᓯᒪᔪᒧᑦ ᐊᔾᔨᒌᙱᑦᑐᓂ ᐱᓕᕆᔨᐅᔪᓂ ᑐᓴᐅᒪᑎᑦᑎᓂᐅᔪᒥ ᒪᓕᒋᐊᓕᖏᓐᓂ,” ᐅᖃᓚᐅᖅᐳᖅ ᐸᓚᐃᒃ ᑎᒪᐃᔪ, ᐊᑕᐅᓯᐅᔪᒥ ᒪᒃᑯᒃᑐᓂ ᐃᓚᐅᖃᑕᐅᔪᓂ ᐱᓕᕆᐊᒃᓴᐅᔪᒥ.
ᐊᓯᖓᓂ ᑲᑎᙵᓂᐅᔪᒥ ᐃᓚᒋᔭᐅᔪᖅ, ᔮᔅᒥᓐ ᐃᕕᒃ, ᐅᖃᖅᐳᖅ ᐃᓄᐃᑦ ᐃᒃᓯᓐᓇᑰᖅᑯᔨᕗᑦ ᑖᖅᑐᒥ ᐃᓗᖏᖅᓱᓚᐅᖅᑎᓪᓗᒋᑦ ᐱᔭᕆᐅᖅᓴᐃᔨᐅᔪᒧᑦ ᐅᕝᕙᓘᓐᓃᑦ ᐃᓅᓯᓕᕆᔨᐅᔪᒧᑦ ᐅᑎᕐᓂᐊᖅᑐᒧᑦ ᖃᓪᓗᓈᑦ ᓄᓇᖓᓐᓄᑦ ᑕᑯᔭᐅᒃᑲᓐᓂᔾᔮᕈᓐᓃᖅᖢᑎᒃ.
ᑲᑎᙵᓂᐅᔪᑦ ᐊᑐᖁᔨᓇᔭᕆᕗᑦ ᐱᑕᖃᖅᑎᑦᑎᓂᖓᓂ ᐃᓄᒃᑎᑐᑦ ᐅᖃᖅᑎᐅᔪᓂ, ᑕᐅᑐᒃᖢᒍ ᓯᕗᓪᓕᖅᐹᖑᓪᓗᓂ ᐅᖃᐅᓯᐅᒐᔪᖕᒪᑦ ᐊᒥᓱᓂ ᓄᓇᕗᒻᒥᐅᓂ ᐃᓄᑭᓐᓂᖅᓴᐅᔪᓂ ᓄᓇᓕᐅᔪᓂ ᐃᖃᓗᐃᑦ ᓯᓚᑖᓂ.
“ᐊᒥᓱᑦ ᓱᕈᓰᑦ ᐊᒻᒪ ᒪᒃᑯᒃᑐᑦ ᓴᖅᑭᑎᑦᑎᓲᖑᕗᑦ ᐃᒃᐱᒋᔭᒥᓂ ᐃᓄᒃᑎᑐᑦ ᐱᐅᓂᖅᓴᒻᒪᕆᐅᔪᒥ ᖃᓪᓗᓈᑎᑑᕐᓂᐅᔪᒥ,” ᐃᕕᒃ ᐃᓚᒋᐊᖅᓯᓚᐅᖅᐳᖅ, “ᐃᑲᔪᕋᔭᖅᑰᖅᑐᖅ ᒪᒃᑯᒃᑐᓂ ᐅᓂᒃᑳᕐᓂᖏᓐᓂ ᖃᓄᐃᓕᐅᕐᓂᐅᔪᓂ ᐃᓅᓯᖏᓐᓂ.”
ᐃᕕᒃ ᐅᖃᓚᐅᖅᐳᖅ ᑕᑯᔪᒪᓇᔭᖅᐳᖅ ᓄᓇᕗᒻᒥ “ᒐᕙᒪᐅᔪᓂ ᐱᓕᕆᖃᑎᒌᒃᑲᓐᓂᕐᓂᖏᓐᓂ ᐋᔩᖃᑎᖃᕐᓂᖅᑕᖃᙱᒻᒪᑦ ᐱᓕᕆᕝᕕᐅᔪᓂ.” ᐅᖃᖅᐳᖅ ᐱᕚᓪᓕᕈᑎᖃᕋᔭᑦᑎᐊᖅᐳᖅ ᒪᒃᑯᒃᑐᓄᑦ, ᒫᓐᓇᐅᔪᒥ ᐃᖏᕐᕋᓂᕆᔭᖓᓂ “ᐊᔪᕐᓇᕐᓂᖅᓴᐅᑎᑦᑎᖕᒪᑦ ᑭᒃᑯᓕᒫᓄᑦ ᑐᑭᓯᐅᒪᖃᑦᑕᐅᑎᓂᕐᒧᑦ.”
ᐊᔾᔨᒌᙱᑦᑐᓂ ᐱᓕᕆᔨᐅᔪᓂ ᑐᓴᐅᒪᑎᑦᑎᓂᐅᔪᒥ ᒪᓕᒋᐊᓕᖏᑦ ᐊᑎᓕᐅᖅᑕᐅᓚᐅᖅᐳᖅ ᐃᓄᓕᕆᔨᒃᑯᓐᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ, ᒪᓕᒐᓕᕆᔨᒃᑯᓐᓂ, ᐃᓕᓐᓂᐊᖅᑐᓕᕆᔨᒃᑯᓐᓂ, ᑲᓇᑕᒥ ᐸᓖᓯᒃᑯᓐᓂ ᐊᒻᒪ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ. ᐅᑯᐊ ᐱᓕᕆᕝᕕᐅᔪᑦ ᖃᐃᖁᔭᐅᓚᐅᖅᐳᑦ ᑕᑯᒃᓴᐅᑎᑦᑎᓂᐅᔪᒧᑦ, ᑭᓯᐊᓂ ᑭᒡᒐᖅᑐᐃᔨᐅᔪᑦ ᐃᓄᓕᕆᔨᒃᑯᓐᓂ ᐊᒻᒪ ᑲᓇᑕᒥ ᐸᓖᓯᒃᑯᓐᓂ ᐅᐸᒃᓯᒪᓚᐅᖅᐳᑦ ᕕᕗᐊᕆ 1–ᒥ.
ᐃᕕᒃ ᐅᖃᓚᐅᖅᐳᖅ ᖁᔭᓕᓚᐅᖅᐳᖅ ᑕᐃᒃᑯᐊ ᒪᕐᕉᔪᓂ ᐱᓕᕆᖃᑕᐅᔪᓂ ᐃᓚᐅᓂᖏᓐᓂ ᐱᓕᕆᓂᑦᑎᐊᕙᐅᖕᒪᑦ ᑐᓴᖅᑕᐅᓂᕐᒧᑦ, ᑲᑎᙵᓂᐅᔪᑦ ᑕᑯᔪᒪᓇᔭᖅᐳᑦ ᐱᓕᕆᓂᖅᓴᐅᔪᓂ ᓄᓇᕗᒻᒥ ᒐᕙᒪᒃᑯᓐᓂ ᖃᓄᖅ ᐅᖃᐅᓯᒃᓴᖃᕐᓂᖏᓐᓂ.
ᖁᐊᒐᖅ, ᐃᓚᒋᔭᐅᖃᑕᐅᔪᖅ ᔭᐃᓐ ᒐᓛᔅᑯ ᐅᑭᐅᖅᑕᖅᑐᒥ ᐱᓕᕆᖃᑎᒌᖕᓂᐅᔪᒥ, ᐃᑲᔪᓚᐅᖅᐳᖅ ᐱᒋᐊᖅᑎᑦᑎᓂᕐᒥ ᐆᒥᖓ ᑕᑯᒃᓴᐅᑎᑦᑎᓂᐅᔪᒥ ᐃᑲᔪᖅᓱᐃᓂᖅᑖᖅᖢᓂ ᒍᐊᑕᓐ ᑐᙵᕕᐅᔪᒥ, ᐊᔪᖅᓴᖅᑐᓄᑦ ᑐᓂᓯᕙᒃᑐᓄᑦ ᑮᓇᐅᔭᓕᐅᕋᓱᐊᖅᑎᐅᙱᑦᑐᓄᑦ ᑲᔪᖏᖅᓴᐃᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᖁᔭᓕᓚᐅᖅᐳᖅ ᑲᑐᔾᔨᖃᑎᒌᖑᔪᒥ ᑐᓂᓯᓂᕐᒥ “ᐃᓕᑦᑎᕐᔪᐊᕐᓂᐅᔪᒥ ᒪᒃᑯᒃᑐᓄᑦ ᐅᑭᐅᖅᑕᖅᑐᕐᒥᐅᓄᑦ.”
6-ᒥᓂᑦᒥ ᑕᕐᕆᔭᓕᐊᖑᔪᒥ ᑕᑯᒃᓴᐅᑎᑕᐅᓂᐅᔪᒥ ᑎᒪᐃᔪᒧᑦ, ᐃᕕᒃ, ᔭᓇᕗ ᐅᐃᓕᐊᒻᔅ ᐊᒻᒪ ᕌᑯ ᑲᓂᐅᓪᒧᑦ ᓴᓇᔭᐅᓚᐅᖅᐳᖅ ᓇᐃᓈᕆᓂᕐᒥ ᐅᑯᓂᖓ ᐊᑐᓕᖁᔭᐅᓇᔭᖅᑐᓂ, ᑕᕐᕆᔭᓕᐊᖑᔪᖅ ᓇᓂᔭᐅᔪᓐᓇᖅᐳᖅ YouTube–ᑯᑦ ᑕᐃᔭᐅᔪᒥ ᐋᔩᖃᑎᒌᖕᓂᐅᔪᒥ ᐱᒻᒪᕆᐅᕗᖅ: ᒪᒃᑯᒃᑐᓂ-ᐊᐅᓚᑕᐅᔪᒥ ᐊᑐᐊᒐᕐᒥ ᐊᓯᔾᔨᕐᓂᐅᔪᒥ ᐱᓕᕆᐊᒃᓴᖅ.