ᐱᓇᓱᐊᕈᓯᐅᓚᐅᖅᑐᒥ ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᒥᓂᔅᑕᖓ ᒫᒃ ᒥᓗᕐ ᐃᖃᓗᖕᓄᐊᓚᐅᖅᐳᖅ ᐅᖃᐅᓯᖃᕆᐊᖅᑐᖅᖢᓂ ᑎᑭᑉᐸᓪᓕᐊᔪᒥ ᖃᐃᖁᔨᓂᐅᔪᒥ ᑐᒃᓯᕋᐅᑎᓂᒃ ᓄᓇᖃᖅᑳᖅᓯᒪᔪᓄᑦ ᐅᖅᑯᐊᖑᔪᓄᑦ ᑲᓇᑕᒥ, ᓴᓂᓕᖓᓂ ᓄᓇᕗᒻᒥ ᑐᙵᕕᒃᑯᑦ (NTI) ᐊᖓᔪᖅᑳᖓᓂ ᐊᓗᑭ ᑰᑦᑎᕐᒥ.
ᐋᓐᓂᐊᓕᕇᒃᑯᓯᓂ ᐅᓄᕐᓂᖏᓐᓂ ᐅᓄᖅᓯᕙᓪᓕᐊᓂᖏᓐᓂ ᑲᓇᑕᓕᒫᒥ ᐊᒻᒪ ᐅᓄᕐᓂᖅᓴᐅᔪᓂ ᑲᓇᑕᐅᑉ ᐊᕕᒃᑐᖅᓯᒪᓂᐅᔪᓂ ᒪᑐᐃᖅᐸᓪᓕᐊᓂᖏᓐᓂ ᒥᓗᕐ ᖁᕕᐊᓱᑐᐃᓐᓇᖅᐳᖅ ᑲᑎᖃᑎᖃᒃᑲᓐᓂᓕᕐᓂᖓᓂ ᐃᓄᖕᓂ ᐊᓱᐃᓛᒃ.
“ᐊᔪᖅᓯᓯᒪᕗᖓ ᐋᑐᕚᒥ ᑕᖅᑭᓄᑦ 15, 16–ᓄᑦ, ᐆᒃᑑᑎᐅᓂᖓᓂ ᐋᖅᑭᒃᓯᓯᒪᓪᓗᓂ ᐃᖅᑲᓇᐃᔭᕐᓂᕐᒧᑦ ᑐᐊᕕᕐᓇᖅᑐᒥ ᐱᓕᕆᓂᐅᔪᒥ ᑭᓯᐊᓂ ᐃᖅᑲᓇᐃᔮᓐᓂ ᐱᓕᕆᑦᑎᐊᕈᓐᓇᙱᓚᖓ ᐊᓂᙱᒃᑯᒪ ᐊᒻᒪ ᐃᓄᖕᓂ ᐅᐸᒃᓯᓯᒪᙱᓪᓗᖓ … ᐱᓕᕆᔪᓐᓇᙱᓚᐃᑦ ᐃᒃᓯᕙᐅᑕᒥ ᐃᒃᓯᕚᕐᓗᓂ ᐋᑐᕚᒥ.”
ᐳᓚᕋᖅᑎᓪᓗᒍ ᐃᒃᓯᕚᖃᑎᖃᓚᐅᖅᐳᖅ ᖃᔅᓯᒐᓚᖕᓂ ᓯᐊᒻᒪᖅᑎᑦᑎᔨᐅᔪᓂ ᐃᖃᓗᖕᓂ Black Heart ᑳᐱᑐᕐᕕᖓᓂ, ᐃᓚᖃᖅᑐᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓂ, ᐅᖃᓪᓚᐅᓯᖃᓚᐅᖅᖢᓂ ᐅᖃᐅᓯᒃᓴᓕᐊᖑᔪᒥ ᐊᒻᒪᓗᑦᑕᐅᖅ ᖃᔅᓯᒐᓚᖕᓂ ᐊᓯᖏᓐᓂ ᐊᑲᐅᙱᓕᐅᕈᑕᐅᔪᓄᑦ.
‘ᐊᑭᖓᓂ ᐊᑭᑦᑐᕆᐊᖅᑎᑕᐅᓗᐊᕐᓂᖓ ᓈᒻᒪᙱᓚᖅ’
ᓂᕿᒃᓴᖃᖅᑎᑦᑎᑦᑎᐊᕐᓂᕐᒧᑦ ᐊᑯᓂᐊᓗᖕᒥ ᐊᑲᐅᙱᓕᐅᕈᑕᐅᓯᒪᕗᖅ ᓄᓇᕗᒻᒥ. ᐊᑕᐅᓯᐅᔪᒥ ᒐᕙᒪᑐᖃᒃᑯᑦ ᐃᓕᓯᓯᒪᓂᖏᓐᓂ ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ, ᐃᑲᔪᖅᓱᐃᓂᕐᒥ ᐊᓯᖏᓐᓂ ᑐᓂᓯᓂᐊᖅᑐᓄᑦ ᓇᖕᒥᓂᖅ ᓄᓇᓕᖕᓂ ᐃᑲᔪᖅᓱᐃᓂᐅᔪᓂ.
“ᐱᔪᓐᓇᙱᒃᑯᕕᑦ ᑭᓱᑐᐃᓐᓇᒥ ᐱᐅᔪᒥ ᓄᓇᕐᔪᐊᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ, ᓇᓗᓇᐃᖅᓯᓂᐅᕗᖅ ᐃᓄᐃᑦ ᖃᐅᔨᒪᓛᖑᔪᓂ ᐃᓄᖁᑎᖏᓐᓂ ᐊᑦᑕᓇᔾᔭᐃᖅᓯᓯᒪᓂᖏᓐᓂ, ᐱᓗᑎᒃ ᐃᑲᔪᕈᑎᒃᓴᖏᓐᓂ ᐱᔭᕆᐊᓕᖏᓐᓂ ᐃᓄᖕᓂ ᐊᑦᑕᓇᔾᔭᐃᖅᓯᓯᒪᓂᖏᓐᓂ,” ᐅᖃᓚᐅᖅᐳᖅ ᒥᓗᕐ.
“ᐅᓂᒃᑳᓕᐊᖅ ᑐᓂᔭᐅᓚᐅᖅᑐᒥ ᐃᓄᐃᑦ ᑕᐱᕇᑦ ᑲᓇᑕᒥ, ᐊᖅᑯᑎᑦᑎᐊᕚᓗᒃ ᑐᕌᖓᓂᖃᑦᑎᐊᖅᑐᒥ ᐱᔾᔪᑎᖃᑐᐃᓐᓇᙱᒻᒪᑦ ᐅᑭᐅᖅᑕᖅᑐᒥ ᓂᐅᕕᕐᕕᖕᒥ ᐱᒻᒪᕆᐅᓪᓗᓂ, ᐱᔾᔪᑎᖃᖅᐳᖅ ᖃᓄᖅ ᐋᖅᑭᒃᓱᐃᓲᖑᓂᖏᓐᓂ ᓂᕿᒃᓴᖃᖅᑎᑦᑎᑦᑎᐊᕐᓂᕐᒧᑦ, ᓄᓇᓂ ᓂᕈᐊᕐᓂᐅᔪᓂ ᐊᒻᒪ ᑭᓱᑐᐃᓐᓇᓂ ᒪᑭᒪᔾᔪᑕᐅᔪᓐᓇᖅᑐᓄᑦ.”
ᒫᓐᓇᓕᓴᐅᔪᒥ ᐃᓄᐃᑦ ᑕᐱᕇᑦ ᑲᓇᑕᒥ ᐅᓂᒃᑳᓕᐊᖓᓂ ᐅᖃᖅᐳᖅ ᑭᓲᕗᖅ ᐃᒻᒥᓂᒃ, ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕᖓ ᑖᓂᐅᓪ ᕚᓐᑎᐅᓪ ᐊᒻᒪ ᑯᐃᓐᒧᑦ-ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᒥ ᒥᓂᔅᑕᖓ ᑳᓚᐃᓐ ᐸᓂᑦ ᐱᓕᕆᐊᖃᖅᓯᒪᓂᖏᓐᓂ.
ᓂᕆᐅᒃᐳᖅ “ᓴᖅᑭᑎᑦᑎᔪᒪᓂᖓᓂ ᑭᓱᑐᐃᓐᓇᒥᒃ ᑕᑯᒃᓴᐅᑎᑦᑎᔪᒥ ᑕᐃᔅᓱᒥᖓ ᐅᓂᒃᑳᓕᐊᒥ,” ᓇᓗᓇᐃᖅᓯᓪᓗᓂ ᐱᐅᙱᓐᓂᐅᔪᓂ ᓇᓂᔭᐅᔪᓂ ᓂᕿᑦᑎᐊᕙᓕᕆᓂᕐᒥ ᐅᑭᐅᖅᑕᖅᑐᒥ ᐊᖅᑯᑎᖓᓂ ᒥᒃᖠᒋᐊᖅᑎᑦᑎᓂᕐᒧᑦ ᓂᕿᑦ ᐊᑭᖏᓐᓂ ᓄᓇᕗᒻᒥ ᐊᒥᓱᓂ ᓂᐅᕕᕐᕕᓂᑦ ᐊᑭᖏᓐᓂ ᖁᕝᕙᕆᐊᖅᑎᑦᑎᑐᐃᓐᓇᖅᐸᒃᑎᓪᓗᒋᑦ ᐃᓱᒪᒋᓇᒍ ᐃᑲᔫᓯᖅᑕᐅᓂᐅᔪᓄᑦ.
“ᐊᑭᖓᓂ ᐊᑭᑦᑐᕆᐊᖅᑎᑕᐅᓗᐊᕐᓂᖓ ᓈᒻᒪᙱᓚᖅ, ᓇᓗᓇᙱᓚᖅ ᐅᖓᓯᖕᓂᕆᔭᖓᓄᑦ ᐊᐅᓚᑕᐅᓂᐅᕗᖅ,” ᐅᖃᓚᐅᖅᐳᖅ ᒥᓗᕐ.
“ᐅᖃᓪᓚᖕᓂᐅᕗᖅ ᓂᕿᑦᑎᐊᕙᓕᕆᓂᕐᒥ ᐅᑭᐅᖅᑕᖅᑐᒥ ᐱᓕᕆᐊᖑᔪᖅ ᐋᖅᑭᐊᓂᒃᓴᒥᙱᓐᓂᖏᓐᓂ ᐊᒻᒪᓗ ᐃᓱᒪᕗᖓ ᐊᑯᓂᒐᓚᐅᔪᒥ ᐋᖅᑭᒃᑕᐅᓇᓱᐊᕐᓂᐊᖅᐳᖅ ᐱᔾᔪᑎᖃᕐᒪᑦ ᑮᓇᐅᔾᔭᒃᓴᒍᑕᐅᔪᒥ ᐆᒃᑑᑎᐅᔪᒥ, ᓇᓗᓇᙱᓚᖅ ᑮᓇᐅᔾᔭᒃᓴᓂᕐᒧᑦ ᐆᒃᑑᑎᐅᔪᖅ ᐱᓕᕆᑦᑎᐊᙱᓚᖅ.”
ᓇᖕᒥᓂᖅᓱᕐᓂᕐᒥ ᒐᕙᒪᖃᕐᓂᕐᒥ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ
ᒫᔾᔨᒥ ᓄᓇᕗᒻᒥ ᑐᙵᕕᒃᑯᑦ ᑲᑎᒪᔨᐅᔪᓄᑦ ᑲᑎᒪᓂᖓᓂ ᖃᒪᓂᑦᑐᐊᕐᒥ, ᑲᑐᔾᔨᖃᑎᒌᖑᔪᑦ ᐅᖃᓪᓚᖕᓂᖃᓚᐅᖅᐳᑦ ᓇᖕᒥᓂᖅᓱᕐᓂᕐᒥ–ᒐᕙᒪᖃᕐᓂᕐᒥ ᐊᒻᒪ ᖃᓄᐃᑦᑐᓂ ᓂᕈᐊᒐᒃᓴᐅᔪᓂ ᐱᖃᕋᔭᕐᓂᖏᓐᓂ ᐱᓇᓱᐊᕈᓂᔾᔪᒃ. ᒥᓗᕐ ᐅᖃᓚᐅᖅᐳᖅ ᐃᓗᐊᓃᑉᐳᑦ ᐱᔪᓐᓇᕐᓂᕆᔭᖏᓐᓂ ᑕᐃᒪᐃᓐᓂᕐᒧᑦ ᐊᒻᒪᓗ ᓱᖏᐅᑎᓯᒪᓂᕋᙱᖦᖢᓂ . ᑲᒪᑎᔨᕐᔪᐊᖑᓂᐅᔪᓂ ᐊᕙᓗᓯᓯᒪᔪᒥ ᓄᓇᕗᒻᒥ
“ᓇᖕᒥᓂᖅᓱᕐᓂᕐᒥ–ᒐᕙᒪᖃᕐᓂᕐᒥ ᐅᖃᓪᓚᖕᓂᐅᔪᑦ ᐊᔪᕐᓇᙱᑦᑐᑯᓘᔪᓐᓇᙱᓚᑦ, ᓇᖕᒥᓂᖅ–ᐃᓱᒪᓕᐅᕆᓂᐅᔪᒥ ᐅᖃᓪᓚᖕᓂᐅᔪᑦ ᐊᔪᕐᓇᖅᑐᑯᓘᔪᓐᓇᙱᓚᑦ, ᐱᓗᐊᖅᑐᒥ ᐊᑐᖅᓯᒪᓂᖃᕈᕕᑦ ᐱᔪᓐᓇᙱᑎᑕᐅᓂᕐᒥ ᐱᔪᓐᓇᕐᓂᕆᔭᕐᓂᑦ,” ᐅᖃᓚᐅᖅᐳᖅ ᒥᓗᕐ.
ᒫᓐᓇᓕᓴᐅᔪᓂ ᑕᖅᑭᐅᔪᓂ ᕿᓂᖅᓴᕐᓂᖃᐃᓐᓇᖅᓯᒪᕗᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᓄᓇᖁᑎᖏᓐᓂ ᑲᓇᑕᓕᒫᒥ, ᑕᒪᓐᓇ ᐃᖅᑲᐅᒪᓂᕐᓂ ᐅᑎᖅᑎᑦᑎᓯᒪᔪᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑲᓇᑕᒥ, ᐃᓄᖕᓄᑦ ᐊᒻᒪᓗ ᐊᓪᓚᐃᑦ ᑕᒪᒃᑭᑦ, ᒥᓗᕐ ᐅᖃᓚᐅᖅᐳᖅ ᒐᕙᒪᑐᖃᒃᑯᑦ ᑕᐃᑲᓃᑉᐳᑦ ᐃᑲᔪᖅᓱᐃᓂᕐᒥ ᐱᔪᒪᑐᐊᕐᓂᕈᑎᒃ.
“ᑕᐃᑲᓃᓐᓂᐊᖅᐳᒍᑦ ᓄᓇᓕᐅᔪᒧᑦ ᐱᓕᕆᔪᒪᔪᓂ ᐊᔪᕐᓇᖅᑐᐊᓗᖕᒥ ᐃᓱᒪᓕᐅᕆᓂᐅᔪᒥ ᕿᓂᖅᓴᕐᓂᕐᒧᑦ,” ᐅᖃᓚᐅᖅᐳᖅ ᒥᓗᕐ, ᐋᖅᑭᒃᓯᒪᓂᐅᒍᓂ ᑮᓇᐅᔭᑎᒍᑦ ᐃᑲᔪᖅᑕᐅᓂᕐᒥ ᕿᓂᕐᓂᐅᔪᓄᑦ, ᐅᕝᕙᓘᓐᓃᑦ ᐃᑦᑕᕐᓂᓴᓕᕆᓂᕐᒧᑦ ᐅᕝᕙᓘᓐᓃᑦ ᐊᐃᕙᐅᑕᐅᔪᓐᓇᖅᑐᓄᑦ ᐃᑲᔪᖅᓱᐃᓂᐅᔪᓄᑦ.
“ᓇᓚᐅᑦᑐᒥ ᑕᒻᒪᖅᓯᒪᔪᒥᓪᓗ ᐊᖅᑯᑎᑕᖃᙱᓚᖅ, ᐃᑲᔪᖅᓱᐃᕗᒍᑦ ᓄᓇᓕᖕᓂ ᐊᒻᒪᓗ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒋᖕᓂᐅᔪᒥ ᐅᓂᒃᑳᓕᐊᖓ ᐅᕙᑦᑎᓐᓂ ᐅᖃᐅᔾᔨᔪᓂ ᑕᐃᑲᓃᖁᔨᓪᓗᑎᒃ ᓄᓇᓕᐅᔪᓄᑦ ᐊᒻᒪᓗ ᑮᓇᐅᙱᒃᑲᓗᐊᕐᓗᑎᒃ.”
ᓇᒡᒐᔾᔭᐅᒥ, ᑲᓇᑕᐅᑉ ᓯᕗᓪᓕᖅᐹᖓᓂ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐃᓅᓪᓗᓂ ᑯᐃᑉ ᑭᒡᒐᖅᑐᖅᑎᖓᓂ ᑲᓇᑕᒥ, ᒥᐊᕆ ᓴᐃᒥᓐ ᐊᖏᖅᑎᑕᐅᓚᐅᖅᐳᖅ.
“ᑭᒃᑯᓕᒫᓄᑦ ᑲᔪᖏᖅᓴᐃᔨᐅᕗᖅ, ᓄᓇᕗᒻᒧᑦ ᐱᓗᐊᖅᑐᒥ, ᑭᓯᐊᓂ ᑲᓇᑕᓕᒫᒧᑦ. ᐊᑐᖅᑕᐅᓚᐅᖅᓯᒪᙱᑦᑐᓂ ᐱᓱᖕᓂᖃᖅᓯᒪᕗᖅ ᐊᒻᒪᓗ ᑭᒃᑯᓕᒫᓄᑦ ᐆᒃᑑᑎᑦᑎᐊᕙᐅᕗᖅ,” ᐅᖃᓚᐅᖅᐳᖅ ᒥᓗᕐ.
“ᐃᓱᒪᕗᖓ ᓅᑎᑦᑎᔪᓐᓇᕐᓂᐊᕐᓂᖓᓂ ᒥᖅᑯᒻᒥ ᖃᔅᓯᒐᓚᖕᓄᑦ ᐅᖃᓪᓚᖕᓂᐅᔪᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ, ᐱᓗᐊᖅᑐᒥ ᐊᔪᕐᓇᕐᓂᐅᔪᓂ ᖃᖓᐅᓂᖓᓂ ᐅᑯᓇᑎᑐᑦ.”