ᑲᖏᖅᖠᓂᕐᒥ Hᐊᒻᓚᒃᑯᑦ ᑲᑎᒪᔨᖏᑦ ᐅᖃᖃᑎᒌᒃᖢᑎᒃ ᓄᕙᒡᔪᐊᕐᓂᐅᑉ ᒥᒃᓵᓄᑦ ᐃᓱᒪᒋᔭᖏᑦ ᐊᔾᔨᒌᙱᑦᑑᑕᐅᓚᐅᖅᑐᑦ.
ᐊᑕᐅᓯᖅ ᑲᑎᒪᔨ ᑕᓂᐅᓪ ᖃᐅᒻᒪᒃ ᐅᖃᖅᖢᓂ ᑲᖏᖅᖠᓂᕐᒥᒎᖅ ᓄᕙᒡᔪᐊᕐᓂᖅᑕᖃᓕᖅᑐᑦ ᐊᒥᓲᓂᖏᑦ ᐃᓱᒫᓘᑎᒋᓕᕋᒥᒋᑦ, ᐊᒻᒪᓗ ᐅᖃᖅᖢᓂ ᐃᓕᓐᓂᐊᕐᕕᒃᑯᒡᒎᖅ ᒪᓕᒃᑕᐅᔭᕆᐊᓖᑦ ᐃᓚᒋᐊᖅᑕᐅᓇᔭᕐᒪᑕ.
“ᐃᓱᒫᓘᑎᒋᒐᑉᑭᑦ ᓄᑕᕋᑯᓗᒃᐳᑦ ᐅᑉᓗᑕᒫᒃᑯᑦ ᐃᓕᓐᓂᐊᕆᐊᖅᑎᑕᐅᓕᖅᑎᓪᓗᒋᑦ, ᐱᓗᐊᖅᑐᒥ ᓄᕙᒡᔪᐊᕐᓂᖅ ᓴᖅᑭᑉᐸᓪᓕᐊᔪᐊᓘᓕᖅᑎᓪᓗᒍ ᒫᓐᓇᐅᔪᖅ,” ᑕᐃᒪᓐᓇ ᐅᖃᖅᖢᓂ. “ᐱᓗᐊᓕᒃᑲᓐᓂᕐᓂᐊᖅᑐᖅ.”
ᐅᖃᖅᖢᓂᓗ ᒐᕙᒪᒃᑯᑦ ᐅᔾᔨᖅᑐᕆᐊᖃᓕᕐᒪᑕ ᐃᓕᓐᓂᐊᖅᑎᑦᑎᒃᑲᓐᓂᕐᓗᑎᒡᓗ ᐃᓄᖕᓂᒃ.
“ᐊᓕᐊᓇᐃᙱᑦᑐᐊᓗᒃ ᐃᓚᐃᖅᖢᓂ ᓄᕙᒡᔪᐊᕐᓂᒃᑯᑦ,” ᑕᐃᒪᓐᓇ ᐅᖃᖅᖢᓂ.
ᖃᐅᒻᒪᒃ ᐅᖃᖅᖢᓂ ᐃᓕᓐᓂᐊᖅᑐᓄᒡᒎᖅ, “ᐊᖏᕐᕋᒥ ᐃᓕᓐᓂᐊᖅᑎᑕᐅᔪᓐᓇᕐᓂᖏᑦ ᓈᒻᒪᒐᔭᕐᒪᑕ,” ᐃᔪᕈᓱᓕᖅᖢᓂ ᑲᑎᒪᔨ ᑭᓕ ᑲᓛᒃ–ᓕᓐᑎᐅᓪ.
ᐅᖃᖅᖢᓂ ᑲᓛᒃ–ᓕᓐᑎᐅᓪ ᑐᑭᓯᐅᒪᔪᕉᖅ ᐊᒥᓲᓕᕐᒪᑕ ᓄᕙᒡᔪᐊᕐᓂᖅᑕᓖᑦ ᒫᓐᓇᐅᔪᖅ, “ᑭᓯᐊᓂ ᓄᑕᕋᕆᔭᑦ ᐊᖏᕐᕋᖅᓯᒪᑎᓪᓗᒋᑦ ᐊᒥᓱᓂᒃ ᐱᓇᓱᐊᕈᓯᕐᓂᒃ ᐊᒻᒪᓗ ᐊᖓᔪᖅᑳᑦ ᐱᓕᕆᐊᒥᓂᒃᑕᐅᖅ ᑲᒪᑎᓪᓗᒋᑦ ᐊᒻᒪᓗ ᐃᓕᓐᓂᐊᕈᑎᓕᕆᔭᕆᐊᖃᕋᔭᖅᐸᑕ, ᐊᒻᒪᓗ ᓄᑕᖅᑲᑦ ᖃᓄᐃᓕᐅᖅᑎᕈᓘᔭᕋᓱᒋᐊᖃᖅᑎᓪᓗᒋᑦ – ᑕᒪᓐᓇ ᐊᔪᕐᓇᖅᑐᖅ.”
ᐅᖃᖅᖢᓂ ᐃᓄᐃᒡᒎᖅ ᐅᔾᔨᖅᑐᕆᐊᓖᑦ ᐊᒻᒪᓗ ᐊᖏᕐᕋᐅᒪᖃᑦᑕᕐᓗᑎᒃ ᐋᓐᓂᐊᕌᖓᒥᒃ, ᑭᓯᐊᓂ ᐅᖃᖅᖢᓂᓗ ᑕᒪᕐᒥᒃ ᑲᐱᔭᐅᓯᒪᔪᑦ ᑲᐱᔭᐅᓯᒪᙱᑦᑐᓪᓗ ᐋᓐᓂᐊᓕᖃᑦᑕᓕᕐᒪᑕ.
“ᖃᓄᖅ ᐊᑯᓂᐅᑎᒋᔪᖅ ᐊᑐᓯᒪᑎᑦᑎᓂᐊᖅᐱᑕ ᐃᓅᓇᓱᐊᖅᑐᓪᓗ ᓄᖅᑲᖓᑎᓪᓗᒋᑦ?” ᑕᐃᒪᓐᓇ ᐅᖃᖅᖢᓂ ᑲᓛᒃ–ᓕᓐᑎᐅᓪ. “ᒪᕐᕉᖕᓂᒃ ᐅᑭᐅᓂᒃ ᓄᕙᒡᔪᐊᕐᓂᖅᑕᖃᓕᕐᒪᑦ.”
ᐅᖃᖅᖢᓂ ᐃᓄᐃᑦ ᑮᓇᐅᔭᓕᐅᕈᒪᖕᒪᑕ, ᐸᕐᓇᐃᔪᒪᖕᒪᑕ ᐊᐅᓪᓚᕈᒫᕐᓂᐊᕐᓂᕐᒧᑦ ᐊᒻᒪᓗ ᐃᓕᓐᓂᐊᕆᐊᕈᒪᔪᑦ. “ᓱᓇᓗᒃᑖᑦ ᒪᑐᔭᐅᒃᐸᑕ ᐊᔪᕐᓂᐊᖅᑐᖓ,” ᑕᐃᒪᓐᓇ ᐅᖃᖅᖢᓂ ᑲᑎᒪᔨ.
ᖃᐅᒻᒪᒃ ᑭᐅᑉᓗᓂ ᐃᒪᓐᓇ, “ᑕᐃᑉᓱᒪᓂᑐᖃᖅ, ᐊᖓᔪᖅᑳᖑᓚᐅᖅᓯᒪᔪᖓᑦᑕᐅᖅ,” ᐊᒻᒪᓗ ᐅᖃᖅᖢᓂ ᑐᑭᓯᐅᒪᒐᒥ ᑲᓛᒃ–ᓕᓐᑎᐅᓪᒥᒃ.
ᑭᓯᐊᓂ ᐊᔭᐅᖅᑐᐃᒃᑲᓐᓂᖅᖢᓂ ᐃᓕᓐᓂᐊᖅᑐᑦ 50%-ᒦᑦᑕᕆᐊᖃᕋᓱᒋᖕᒪᒋᑦ ᐅᑉᓘᑉ ᐃᓗᐊᓂ, ᖃᐅᒻᒪᒃ ᐅᖃᖅᖢᓂ ᑕᐃᒪᓐᓇᒎᖅ ᐃᓱᒪᒋᔭᒥᓂᒃ ᐅᖃᐅᓯᖃᑐᐃᓐᓇᖅᑐᖅ.
Hᐊᒻᓚᒃᑯᑦ ᑐᑭᒧᐊᒃᑎᑦᑎᔨᖓ ᑎᐅᕆᓐ ᕕᓕᓐ ᐅᖃᖅᖢᓂ ᓄᕙᒡᔪᐊᕐᓂᖅ ᐊᒃᑐᖅᓯᓯᒪᖕᒪᑦᑕᐅᖅ ᓴᓇᔨᒥᓄᑦ Hᐊᒻᓚᒃᑯᓐᓂᒃ. ᓇᓗᓇᐃᔭᐃᑉᓗᓂᓗ ᑭᒃᑯᑦ ᐊᓂᑦᑕᐃᓕᔭᕆᐊᖃᖅᓯᒪᖕᒪᖔᑕ ᑕᐃᑲᓂ ᐅᑉᓗᕐᒥ, ᐊᒻᒪᓗ ᖃᑉᓯᑲᓪᓚᑦ ᐳᑭᖅᑕᓕᙳᐊᖑᔪᓂᒃ ᐊᒻᒪᓗ ᑮᓇᐅᔭᓕᕆᔨᒃᑯᓐᓂᒃ.
ᒪᕐᕉᒃ ᓴᓇᔩᒃ ᓴᓇᑎᑕᐅᓚᐅᖅᑑᒃ, ᐊᖏᕐᕋᒥᓂᒃ ᓄᕙᒡᔪᐊᕐᓂᖅᑕᖃᖅᑐᖃᖅᑎᓪᓗᒍ, ᑭᓯᐊᓂ ᓴᓇᑎᑕᐅᔪᓐᓇᖅᖢᑎᒃ ᓴᓇᕝᕕᖕᒥᓄᑦ ᑐᕌᓪᓚᑦᑖᖃᑦᑕᖅᐸᑕ ᐊᒻᒪᓗ ᓴᓈᓂᒃᑳᖓᒥᒃ ᐊᖏᕐᕋᒥᓄᑦ ᑐᕌᓪᓚᑦᑖᖃᑦᑕᕐᓗᑎᒃ ᑭᓇᑐᐃᓐᓇᕐᒥᒃ ᐃᓅᖃᑎᖃᙱᓪᓗᑎᒃ. ᑕᐃᑉᑯᐊᒃ ᓴᓇᔩᒃ ᐊᖏᕐᕋᐅᔭᕆᐊᖃᖃᑦᑕᓚᐅᖅᑑᒃ ᐊᓇᕐᕕᓕᐊᕆᐊᖃᕌᖓᒥᒃ ᒪᓕᒐᐅᑉ ᐊᑖᒍᑦ. ᕕᕗᐊᕆ 14-ᒥ ᐱᒋᐊᖅᖢᒍ ᑲᑎᒪᔩᑦ ᑲᑎᒪᑎᓪᓗᒋᑦ, ᑖᑉᑯᐊᒃ ᒪᕐᕉᒃ ᓴᓇᔩᒃ ᐊᖏᕐᕋᖓᓂ ᓄᕙᒡᔪᐊᕐᓂᖅᑕᖃᖅᑐᖃᖅᑎᓪᓗᒋᒃ, ᑕᒪᕐᒥᒃ ᓄᕙᒡᔪᐊᕐᓂᖅᑖᖅᓯᒪᙱᑦᑑᒃ. ᕕᓕᓐ ᐅᖃᖅᖢᓂᓗ ᓄᓇᕗᑦ ᒐᕙᒪᒃᑯᖏᑦᑕ ᓄᕙᒡᔪᐊᕐᓂᖅᑕᖃᖅᑐᑦ ᖃᑉᓯᐅᓂᖏᓐᓄᑦ ᐃᓚᖓᒍᑦ ᒪᓕᑦᑎᐊᖅᓯᒪᖃᑦᑕᙱᓯᒪᖕᒪᑕ ᓄᕙᒍᓐᓃᖅᐸᓪᓕᐊᔪᑦ ᓇᓗᓇᐃᖅᑕᐅᑲᐅᑎᒋᖃᑦᑕᙱᓐᓂᖏᓐᓄᑦ ᐊᒻᒪᓗ ᖃᐅᔨᓴᖅᑕᐅᙱᓗᐊᕐᓂᖏᓐᓄᑦ. ᒫᓐᓇᑲᐅᑎᒋ ᖃᐅᔨᓴᐅᑏᑦ ᐊᑐᐃᓐᓇᐅᓕᖅᐸᑕ ᐊᖏᕐᕋᕆᔭᐅᔪᓂᒃ ᓄᓇᕗᒥ, ᕕᓕᓐ ᐃᓱᒪᔪᖅ 1000-ᖏᓐᓃᑦᑐᓐᓇᕐᒪᑕ ᓄᕙᒡᔪᐊᕐᓂᖃᕐᓂᕋᖅᑕᐅᔪᑦ.
ᑕᒪᕐᒥᒃ Hᐊᒻᓚᒃᑯᑦ ᓴᓇᔨᖏᑦ ᑲᐱᔭᐅᓯᒪᔪᑦ, ᑭᓯᐊᓂ ᑕᒪᕐᒥᒃ ᐊᑭᓕᖅᑐᖅᑕᐅᓇᑎᒃ ᐃᑲᔪᓲᑦ ᑲᐱᔭᐅᓯᒪᓗᒃᑖᙱᖦᖢᑎᒃ, ᑕᐃᒪᓐᓇ ᐅᖃᖅᖢᓂ.
ᑲᑎᒪᔨ ᔭᔅᑕᓐ ᒥᐅᕆᑦ ᐅᖃᖅᖢᓂ Omicron ᓄᕙᒡᔪᐊᕐᓂᐅᔫᑉ ᖃᐅᔨᓴᕈᑕᐅᓯᒪᓂᖓ ᓇᓗᓇᐃᖅᓯᓯᒪᔫᔭᕐᒪᑦ ᓯᐊᒻᒪᒃᓴᕋᐃᓐᓂᖅᓴᐅᓂᖓᓄᑦ ᑭᓯᐊᓂ ᓄᖑᓴᕋᐃᓐᓂᖅᓴᐅᑉᓗᓂ, ᐊᒻᒪᓗ ᐱᐅᓂᖅᓴᐅᔪᕉᖅ ᒪᒃᑯᒃᑐᑦ ᐃᓕᓐᓂᐊᖏᓐᓇᖅᐸᑕ ᐱᙳᐊᖃᑦᑕᕐᓗᑎᒡᓗ.
“ᐅᖃᙱᑦᑐᖓ ᑐᖁᔪᖃᔾᔮᙱᓐᓂᖓᓄᑦ,” ᑕᐃᒪᓐᓇ ᐅᖃᖅᖢᓂ, ᒥᑭᓪᓕᑎᕆᑉᓗᓂᓗ ᒪᓕᒐᕐᒥᒃ ᓄᓇᕗᒥᐅᑦ ᐅᔭᕋᖕᓂᐊᕐᕕᖕᒥ ᓴᓇᔨᒋᔭᐅᔪᑦ ᐊᖏᕐᕋᐅᑎᑕᐅᓂᖏᓐᓄᑦ ᖃᑉᓗᓈᓂ ᓴᓇᔨᓂᒃ ᐃᓇᖏᖅᑕᐅᑉᓗᑎᒃ.
ᒥᐅᕆᑦ ᐅᖃᖅᖢᓂ ᐃᓄᐃᒡᒎᖅ ᓴᓇᔭᖅᑐᕆᐊᓕᐅᒐᓗᐊᑦ.
“ᓴᓇᑉᓗᓂ ᓱᓇᐅᔫᔭᕐᓇᕐᒪᑦ,” ᑕᐃᒪᓐᓇ ᐅᖃᖅᖢᓂ ᒥᐅᕆᑦ.
ᑭᓯᐊᓂ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᖅ ᐃᖢᐊᖅᓴᐃᔨ ᒪᐃᑯ ᐹᑐᓴᓐ “ᐃᒃᐱᒍᓱᙱᒻᒪᑦ,” ᑕᐃᒪᓐᓇ ᐅᖃᒃᑲᓐᓂᖅᖢᓂ, ᐅᖃᖅᖢᓂᓗ ᓄᓇᕗᒥᒎᖅ ᐃᖢᐊᖅᓴᐃᔨᓂᒃ ᐊᖓᔪᖅᑳᖅ ᑮᓇᐅᔭᓕᐅᖅᑎᑕᐅᓗᐊᖅᑐᖅ.
“ᑕᖃᒋᑦᑎᐊᓕᖅᑕᒃᑲ ᐃᖃᓗᖕᒥᐅᑦ ᐅᕙᑉᑎᓐᓂᒃ ᐃᒪᓐᓈᖅᑐᐃᔪᑦ,” ᑕᐃᒪᓐᓇ ᐅᖃᖅᖢᓂ.
ᒥᐅᕆᑦ ᐅᖃᖅᖢᓂ ᒪᓕᒃᑑᔭᙱᒻᒪᒡᒎᖅ ᒐᕙᒪᒃᑯᑦ ᓯᕗᓕᖅᑎᖓᑕ ᒪᓕᒐᖏᓐᓂᒃ ᓄᓇᕗᒥ, ᑭᓯᐊᓂ ᑭᓯᐊᓂᓕ “ᐃᓱᒪᑕᕐᔪᐊᑉ ᐸᑐᓴᓐ,” ᑕᐃᒪᓐᓇ ᑕᐃᒍᖅᖢᓂᐅᒃ.
ᒪᐃᔭ Hᐊᕆ ᑕᐅᑐᙱ ᐅᖃᖅᖢᓂ ᑐᓴᖃᑦᑕᕋᒥᒎᖅ ᐃᓄᖕᓂᒃ ᒐᕙᒪᒃᑯᑦ ᑲᒪᒋᔭᖃᓕᕋᔭᕐᒪᑕ ᓄᕙᒡᔪᐊᕐᓂᕐᒥᒃ ᓄᕙᑐᐃᓐᓇᖅᑐᑎᑐᑦ, ᐊᒻᒪᓗ ᐃᓄᐃᑦ ᐃᓱᒫᓗᒃᐸᑕ, ᑲᐱᔭᐅᔪᓐᓇᖅᑐᑦ.
“ᖃᐅᔨᒪᙱᑦᑐᖓ ᓱᖕᒪᑦ ᑲᑉᐸᓱᒃᑐᐊᓘᔭᕆᐊᖃᕐᒪᖔᑉᑕ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᐸᒡᕕᒍᓱᒃᑲᒥ ᐃᓱᒪᔪᖃᖅᑎᓪᓗᒍ ᒪᒃᑯᒃᑐᑦ ᐃᖢᐊᙱᑦᑐᒃᑰᖅᑎᑕᐅᔭᕆᐊᖃᕐᓂᖏᓐᓄᑦ ᒪᓕᒐᑦ ᓴᖅᑭᑎᑕᐅᕙᓪᓕᐊᑎᓪᓗᒋᑦ.
ᕕᓕᓐ ᐅᖃᖅᖢᓂ ᑲᖏᖅᖠᓂᕐᒥ ᑲᐱᔭᐅᓯᒪᔪᑦ ᖃᐅᔨᓴᖅᑎᖓ ᐊᑐᕈᓐᓃᕋᔭᕐᒪᑦ ᒐᕙᒪᒃᑯᑦ ᓇᓗᓇᐃᖅᓯᒃᐸᑕ ᑐᐊᕕᕐᓇᖅᑐᖃᕈᓐᓃᕐᓂᖓᓄᑦ.