ᐅᐃᓐ ᖁᓖᑦ ᑯᓱᒐᖅ ᓯᐊᕐᕆᔮᕈᑎᓂᒃ ᐃᐱᒃᓴᐃᖃᑦᑕᕆᐊᓕᓚᐅᖅᑐᖅ ᓄᑕᕋᐅᑉᓗᓂ, ᐊᒻᒪᓗ ᐊᓕᐊᓇᐃᒋᓪᓚᕆᓚᐅᖅᖢᓂᐅᒃ. “ᑕᒪᓐᓇ ᐊᒃᓱᕉᑎᒌᓐᓇᖅᓯᒪᔭᕋ,” ᑕᐃᒪᓐᓇ ᐅᖃᖅᖢᓂ ᑯᓱᒐᖅ, ᒪᑐᐃᖅᓯᓚᐅᖅᑐᖅ ᓯᐊᕐᕆᔭᐅᑎᓂᒃ ᐃᐱᒃᓴᐃᕝᕕᖕᒥ ᐊᒡᓂᒍ ᐃᒍ ᓯᐊᕐᕆᔮᕐᕕᒃᑖᓵᖓᓂᒃ 2019-ᒥ.
“ᑕᒪᓐᓇ ᐱᒋᐊᓚᐅᖅᑐᖅ ᐅᑭᐅᖃᖅᖢᖓ 8-ᓂᒃ 9-ᓂᒡᓘᓐᓃᑦ . ᐊᒃᑲᒐ ᖁᐊᓴ ᓂᐅᕕᕐᕕᐊᓛᖃᓚᐅᖅᓯᒪᖕᒪᑦ ᐊᖑᓇᓱᒍᑎᓂᒃ ᐃᖃᓗᒐᓱᒍᑎᓂᒡᓗ ᐊᒻᒪᓗ Hᐊᑭᕈᑎᓂᒃ. Hᐊᑭᕐᓂᕐᒧᑦ ᐊᓇᐅᑕᕐᓂᒃ ᓂᐅᕕᐊᒃᓴᖃᖃᑦᑕᓚᐅᖅᖢᓂ ᐊᒻᒪᓗ ᓴᕕᒐᐅᔭᒃᑯᑦ ᓯᐊᕆᔭᐅᑎᓂᒃ ᐃᐱᒃᓴᐃᔾᔪᑎᖃᖃᑦᑕᓚᐅᖅᖢᓂ. ᑕᐃᒪᙵᓂ ᑕᒪᓐᓇ ᐊᓕᐊᓇᐃᒋᓯᒪᔭᕋ.”
ᑲᖏᖅᖠᓂᖅ ᓄᑖᒥᒃ ᓯᐊᕐᕆᔮᕐᕕᒃᑖᓵᕐᒪᑦ, ᒪᑐᐃᖅᓯᓚᐅᖅᑐᖅ ᓯᐊᕐᕆᔭᐅᑎᓂᒃ ᐃᐱᒃᓴᐃᕝᕕᖕᒥ ᐊᒻᒪᓗ Hᐊᑭᔾᔪᑎᓂᒃ ᐊᓐᓄᕌᖅᑖᕐᕕᖕᒥ ᐊᓯᐊᓂᒃ ᓴᓇᕝᕕᖃᒃᑲᓐᓂᖅᖢᓂ.
ᓯᐊᕐᕆᔭᐅᑎᓂᒃ ᐃᐱᒃᓴᐃᓲᖅ, ᐋᖅᑭᒃᓱᐃᓲᖅ, ᓂᐅᕕᐊᒃᓴᖃᓲᖅ Hᐊᑭᒍᑎᓂᒃ ᐊᒻᒪᓗ ᐊᒥᓱᓂᒃ Hᐊᑭᓐᓂᕐᒧᑦ ᐱᖁᑎᓂᒃ ᐱᑕᓕᒃ – ᑕᒪᓐᓇ ᑕᒡᕙ ᖁᕕᐊᒋᔭᖓ.
“ᐱᕈᖅᓴᖅᖢᖓ, ᓄᑖᑦ ᓴᖅᑭᑉᐸᓪᓕᐊᔪᑦ ᐅᔾᔨᕐᓇᖃᑦᑕᓚᐅᕐᒪᑕ, ᐊᑐᕆᐊᖃᖅᑕᒃᑲᓗ Hᐊᑭᕐᓂᒃᑯᑦ ᓴᖅᑭᑉᐸᓚᐅᖅᖢᑎᒃ,” ᑕᐃᒪᓐᓇ ᐃᖅᑲᐅᒪᔪᖅ ᑯᓱᒐᖅ. “ᑕᒪᓐᓇ ᑕᒡᕙ ᖁᕕᐊᓇᕐᓂᕆᔭᖓ, ᐃᓄᐃᑦ ᖃᐃᔭᕌᖓᑕ ᐃᒪᓐᓇᓗ ᐅᖃᖅᖢᑎᒃ, ‘ᓱᓇᓂᒃ ᓄᑖᓂᒃ ᓴᖅᑭᑦᑐᖃᖅᓯᒪᕙ ᓂᐅᕕᐊᒃᓴᕆᕙᒃᑕᕐᓂᒃ?’ ᖃᐅᔨᒪᒐᒪ ᖃᓄᖅ ᐃᒃᐱᖕᓇᖅᑎᒋᖕᒪᖓᑦ. Hᐊᑭᖅᑎᐅᑉᓗᖓ, ᓇᒧᙵᐅᖃᑦᑕᕆᐊᖃᕐᒪᖔᑉᑕ, ᐊᓯᖏᓐᓂᒃ ᓄᓇᓕᖕᓂᒃ, ᓯᐊᕆᔮᕈᑎᓂᒃ ᓂᐅᕕᐊᒃᓴᖃᖃᑦᑕᖅᑐᓄᙵᐅᖃᑦᑕᕋᑉᑕ, ᖃᐅᔨᓇᓱᒃᖢᑕ ᓱᓇᓂᒃ ᓂᐅᕕᐊᒃᓴᖃᖃᑦᑕᕐᒪᖔᑕ.”
ᑭᓯᐊᓂ ᐊᑯᓂᐅᓗᐊᙱᑦᑐᖅ ᓂᐅᕕᕐᕕᓂ ᐊᐅᓪᓛᓚᐅᖅᑐᖅ ᓄᕙᒡᔪᐊᕐᓂᖅ ᓱᓇᓗᒃᑖᓂᒃ ᒪᑐᓯᓚᐅᖅᑎᓪᓗᒍ ᒫᑦᓯ 2020-ᒥ. ᐱᖁᑎᓂᒃ ᓂᐅᕕᑲᑕᓚᐅᖅᑳᖅᖢᓂ Hᐊᑭᕕᒡᔪᐊᕐᓂᐊᖅᑐᓄᑦ ᐊᑐᖅᑐᒃᓴᓂᒃ, ᓂᐅᕕᕐᕕᖓ ᓂᐱᐅᑎᖃᑦᑎᐊᓕᖅᖢᓂ, ᕿᓚᕈᑎᖃᑦᑎᐊᓕᖅᖢᓂ ᓯᐊᕐᕆᔭᐅᑎᓄᑦ, ᐃᒥᕈᑎᖃᑦᑎᐊᓕᖅᖢᓂ ᐊᒻᒪᓗ ᐊᒥᓱᒃᑲᓐᓂᕐᓂᒃ.
“ᐊᒥᓱᓂᒃ ᑎᑭᓴᐃᓚᐅᖅᓯᒪᔪᖓ Hᐊᑭᕕᒡᔪᐊᕐᓂᐊᖅᑐᓄᑦ, ᒪᑐᔭᐅᑉᓗᑕᓗ,” ᑕᐃᒪᓐᓇ ᐅᖃᖅᖢᓂ.
ᓂᐅᕕᐊᒃᓴᑦ ᖁᓕᕈᐊᕐᒦᑐᐃᓐᓇᓕᓚᐅᖅᑐᑦ ᐊᒥᓱᓂᒃ ᑕᖅᑭᓂᒃ, ᑭᓯᐊᓂ ᓯᐊᕐᕆᔮᕐᕕᒃ ᒪᑐᐃᓚᐅᐱᓪᓚᖕᒪᑦ ᐅᑭᐅᑉ ᓄᙳᐊᓂ, ᑕᐃᑲᙵᑦ ᐱᒋᐊᖅᖢᒍ ᒪᑐᐃᓚᐅᐱᓪᓚᐃᓐᓇᖅᑐᖅ ᓄᕙᒡᔪᐊᕐᓂᒃᑯᑦ ᒪᓕᒋᐊᓖᑦ ᑕᐃᒪᐅᑎᓪᓗᒋᑦ.
ᓄᕙᒡᔪᐊᕐᓂᖅ ᐊᒃᑐᖅᓯᓯᒪᑐᐃᓐᓇᙱᑦᑐᖅ ᒪᑐᐃᖓᑎᑦᑎᓇᔭᕐᓂᖓᓄᑦ ᐊᒻᒪᓗ ᐱᔨᑦᓯᕋᕋᔭᕐᓂᖓᓄᑦ Hᐊᑭᕕᒡᔪᐊᖅᑐᓂᒃ, ᑭᓯᐊᓂᓕ ᓂᐅᕕᕈᓐᓇᕐᓂᖓ ᐱᖁᑎᑖᕐᕕᖕᓂᒃ ᐊᒃᑐᖅᑕᐅᓯᒪᖕᒥᔪᖅ.
“ᐃᓄᐃᑦ ᑎᑭᓴᐃᒐᔪᒃᑐᑦ Hᐊᑭᕐᓂᕐᒧᑦ ᐊᓇᐅᑕᕐᓂᒃ ᐊᒻᒪᓗ ᐱᖁᑎᓂᒃ ᐅᕙᒻᓂᒃ, ᑎᑭᓴᐃᔾᔪᑎᔪᓐᓇᓚᐅᙱᑕᒃᑲ,” ᑕᐃᒪᓐᓇ ᐅᖃᖅᖢᓂ ᑯᓱᒐᖅ, ᐅᖃᖅᖢᓂ ᑕᒪᓐᓇ ᐃᖢᐊᖏᓕᐅᕈᑕᐅᑐᐃᓐᓇᙱᒻᒪᑦ ᑲᖏᖅᖠᓂᕐᒧᑦ. “ᓂᐅᕕᕐᕕᒋᖃᑦᑕᖅᑕᖏᑦᑕᐅᖅ ‘ᐱᖁᑕᐃᕈᑎᓯᒪᓂᕋᖃᑦᑕᓚᐅᖅᑐᑦ.’ CCM-ᑯᑦ ᐱᑕᖃᙱᖦᖢᑎᒃ, Bauer-ᑯᑦ ᐱᑕᖃᙱᖦᖢᑎᒃ.”
Hᐊᑭᕕᒡᔪᐊᖅᑐᖃᖅᑎᓪᓗᒍ ᑯᓱᒐᐅᑉ ᑮᓇᐅᔭᓕᐅᕐᓂᕆᕙᖕᒪᒍ ᓇᖕᒥᓂᕆᔭᒃᑯᑦ, ᑕᐃᒪᐃᒻᒪᑦ ᐃᓄᖃᕈᓐᓇᐃᓪᓕᓂᖅ ᐊᒻᒪᓗ ᐊᐅᓪᓚᖅᑕᕈᓐᓇᐃᓪᓕᓂᖅ ᐊᒃᑐᖅᓯᓯᒪᓪᓚᕆᒃᑐᖅ ᑐᓗᖅᑕᕈᑎᖃᕈᑕᐅᑉᓗᓂ ᐱᕈᖅᐸᓪᓕᐊᓂᕆᓇᔭᖅᑕᖓᓄᑦ.
“ᑮᓇᐅᔭᓕᐅᕐᓂᕆᕙᒃᑕᕋ ᑕᒡᕙ ᓯᐊᕐᕆᔭᐅᑎᓂᒃ ᐃᐱᒃᓴᐃᑉᓗᖓ,” ᑕᐃᒪᓐᓇ ᐅᖃᖅᖢᓂ ᑯᓱᒐᖅ. “$10.00-ᑐᕐᒪᑦ ᐃᐱᒃᓴᐃᑉᓗᓂ. ᑕᒪᓐᓇ ᐃᓱᒪᒋᒍᖕᓂ, 17-ᓂᒃ 20-ᓄᑦ ᐊᒥᓲᑎᒋᕙᖕᒪᑕ Hᐊᑭᖅᑏᑦ ᐱᙳᐊᖃᑎᒌᒃᑏᑦ, ᒪᕐᕉᓕᖓᔪᒃᑯᑦ ᐊᕕᒃᑐᖅᓯᒪᕙᒃᖢᑎᒃ ᐱᙳᐊᖃᑎᒌᒃᑏᑦ. ᑕᒪᒃᑯᐊ ᓈᓴᕈᒃᑎᒃ, ᐊᒥᓲᔪᑦ. ᓈᓴᐅᓯᕆᔨᐅᙱᓐᓇᒪ ᑭᓯᐊᓂ ᑮᓇᐅᔭᓕᐅᕐᓇᖅᑐᖅ.”
Hᐊᑭᕕᒡᔪᐊᕌᖓᑕ ᓲᕐᓗ ᑎᐅᕆᓐ ᑐᑐ ᐃᖅᑲᐅᒪᑉᓗᒍ Hᐊᑭᕕᒡᔪᐊᖅᑐᑦ ᑮᓇᐅᔭᓕᐅᕈᑎᒋᔪᓐᓇᖅᑕᖓ $5,000-ᓂᒃ, ᑕᐃᒪᓐᓇ ᓇᓚᐅᑦᑖᖅᓯᒪᔪᒃᑯᑦ. ᑕᒪᒃᑯᐊ ᑕᒡᕙ ᑮᓇᐅᔭᑦ ᓯᕗᓂᒃᓴᒥ ᐱᖁᑎᑖᕈᑎᒋᔪᓐᓇᖅᑕᖏᑦ ᐊᒻᒪᓗ ᐱᕈᖅᑎᓪᓗᒍ ᓇᖕᒥᓂᕆᔭᖓ ᓯᕗᓂᒃᓴᒥ ᐱᙳᐊᕕᔨᔪᐊᕈᒫᕐᒥᔪᓄᑦ, ᓯᕗᒻᒧᑦ ᐊᒻᒪᓗ ᓯᕗᒻᒧᑦ.
ᓯᕗᓂᒃᓴᒥ, ᑯᓱᒐᖅ ᒪᑐᐃᖅᓯᔪᒪᔪᖅ ᐃᓗᐃᑦᑐᒃᑯᑦ ᓂᐅᕕᕐᕕᒃᓴᒥᒃ, ᐅᑭᐅᓗᒃᑖᒥ ᓂᐅᕕᕐᕕᐅᔪᓐᓇᕐᓗᓂ ᕿᑎᒍᑎᓄᑦ ᑲᖏᖅᖠᓂᕐᒥ. ᕿᑎᒍᑎᓂᒃ ᓂᐅᕕᐊᒃᓴᖃᓕᕈᒪᔪᒫᖅᑐᖅ ᐊᖅᓴᕐᓂᕐᒧᑦ ᐊᑐᖅᑕᐅᕙᒃᑐᓂᒃ, Volleyball-ᕐᓂᒃᑯᓪᓗ, ᐊᓇᐅᓕᖔᕐᓂᒃᑯᓪᓗ, badminton-ᓂᒃᑯᓪᓗ ᐊᒻᒪᓗ ᐊᓯᖏᑦᑎᒍᑦ ᕿᑎᒍᑕᐅᕙᒃᑐᒃᑯᑦ ᑭᕙᓪᓕᕐᒥ.
“ᓱᓇᓗᒃᑖᑦ ᖃᓄᐃᓐᓂᕆᓚᐅᖅᑕᖏᓐᓄᑦ ᐅᑎᖁᔭᕋᓗᐊᒃᑲ,” ᑕᐃᒪᓐᓇ ᐅᖃᖅᖢᓂ ᑯᓱᒐᖅ. “ᐸᕐᓇᐃᓯᒪᔪᖓ ᐊᖏᔪᓂᒃ, ᑭᓯᐊᓂ ᓴᖅᑭᑉᐸᓪᓕᐊᔪᒃᑯᑦ ᐱᓕᕆᐊᕆᕙᓪᓕᐊᔭᕆᐊᖃᖅᑕᒃᑲ.”