ᓴᖅᑭᑎᑕᐅᓵᑦᑎᐊᖅᑐᒥ ᐃᒻᒥᒃᑯᑦ ᑐᓴᕐᓈᒐᒃᓴᒥ ᐃᓅᒐᑉᑕ, ᐊᕐᕕᐊᕐᒥᐅᑕᖅ ᔭᐃᑯᑉ ᐅᑲᑦᓯᐊᖅ ᓯᕗᒻᒧᑦ ᐃᓴᕐᔪᐊᖅᐳᖅ ᓂᔾᔮᑎᑦᑎᓂᖓᓂ ᐃᖅᑲᓇᐃᔮᕆᔪᒪᔭᒥᓂ.
ᐅᑲᑦᓯᐊᖅ ᒫᓐᓇᓕᓴᐅᔪᒥ ᐅᑎᓚᐅᖅᐳᖅ ᖁᙱᐊᖅᑕᐅᓂᖓᓂ ᐳᕙᕐᓂᖅᑐᒥ ᐊᐳᒻᒥ ᖁᕕᐊᓱᒍᑕᐅᔪᒥ ᓄᓇᕕᖕᒥ ᐱᓕᕆᖃᑎᒋᔭᒥᓂ ᐊᕐᕕᐊᕐᒥᐅᑕᒥ rapper−ᒥ ᑯᕆᓯᐅᕐ ᒥᑮᐅᓂᐊᒃ ᐅᓪᓗᕐᒥ ᐊᑕᐅᓯᑐᐊᒥ ᐊᖏᕐᕋᖅᓯᒪᓪᓗᓂ, ᐅᑎᖅᐸᓪᓕᐊᓚᐅᖅᐳᖅ ᐊᖅᑯᒻᒧᑦ ᐱᙳᐊᕆᐊᖅᑐᖅᖢᓂ ᐊᑏ ᐊᖑᑏᑦ ᐱᓕᕆᐊᖑᔪᒧᑦ ᑕᓗᕐᔪᐊᒥ ᐃᓚᖃᖅᖢᓂ ᐊᕐᕕᐊᕐᒥᐅᑕᖅ ᐊᐃᑉᕋᕼᐋᒻ ᐄᑕᒃ, ᐊᑐᓲᖑᔪᒥ ᐊᒑᖅᑐᕐᒥ.
ᑕᒪᓐᓇ ᖄᖓᓃᑉᐳᖅ ᓄᑕᕋᓛᒃᓴᖃᖅᖢᖓ ᑕᒪᑐᒪᓂ ᐊᐅᔭᐅᔪᒥ ᐃᓅᔪᒃᓴᐅᑕᐅᓪᓗᓂ 23-ᓂ-ᐅᑭᐅᓕᒃ ᐅᑲᑦᓯᐊᖅ, ᐊᒃᓱᕈᖅᖢᓂ ᓇᓕᒧᑎᑦᑎᓇᓱᐊᖅᖢᓂ ᖁᕝᕙᒃᐸᓪᓕᐊᔪᒥ ᐃᖅᑲᓇᐃᔮᕆᔪᒪᔭᖓᓐᓂ ᐊᒻᒪ ᐃᓚᒌᖑᔪᓄᑦ ᐱᔭᕆᐊᓕᖕᓂ.
“ᑭᓱᓕᒫᑦ ᐊᓕᐊᓇᐃᓚᐅᖅᐳᑦ, ᐱᓗᐊᖅᑐᒥ ᒪᑐᐃᖅᓯᓂᕐᒧᑦ Northern Haze−ᑯᓐᓄᑦ,” ᐅᖃᓚᐅᖅᐳᖅ ᐅᑲᑦᓯᐊᖅ ᖁᕕᐊᓱᒍᑕᐅᔪᒥ ᐳᔭᖕᓂᖅᑑᒥ, ᐃᒻᒥᓂᒃ ᐊᒻᒪ ᒥᑮᐅᓂᐊᒃ ᐱᙳᐊᓚᐅᖅᐳᑦ ᐱᖓᓱᐃᖅᓱᖅᖢᑎᒃ ᑲᑎᙵᓂᐅᔪᓂ ᐅᓪᓗᓄᑦ ᑎᓴᒪᓄᑦ.
ᓯᕗᓪᓕᖅᐹᖓᓂ ᑲᑎᙵᓂᐅᔪᒥ, ᐅᑲᑦᓯᐊᖅ ᐅᖃᓚᐅᖅᐳᖅ ᐃᓄᒋᐊᖕᓃᖃᑕᐅᓚᐅᖅᐳᖅ ᓯᕗᓂᐊᓂ ᐊᒻᒪ ᖃᐅᔨᒪᔭᐅᓗᐊᕈᒪᙱᖦᖢᓂ ᑕᐃᒫᒃ ᖁᙱᐊᕐᕕᖕᒧᐊᕋᒥ, ᑐᓴᕐᓂᕈᓱᒃᑏᑦ ᑲᒪᓚᐅᖅᐳᑦ ᐅᔾᔨᕆᓂᕐᒥ ᑭᓇᐅᓂᖓᓂ.
“ᖁᙱᐊᕐᕕᖕᒧᐊᕋᒥ ᐊᒻᒪ ᐅᖃᕋᒪ, ‘ᔭᐃᑯᑉ ᐅᑲᑦᓯᐊᖑᕗᖓ, ᐃᙱᕐᓂᐊᖅᐳᖓ Fly High−ᒥ,’” ᐃᖅᑲᐅᒪᓚᐅᖅᐳᖅ. “ᑭᒃᑯᓕᒫᑦ ᑐᑮᕈᑎᓚᐅᖅᐳᑦ.”
Fly High, ᐃᙱᐅᓯᐅᔪᒥ ᐊᓯᐅᔨᓚᐅᖅᑕᖓᓄᑦ ᐱᖃᓐᓇᕆᓚᐅᖅᑕᖓᓂ ᐅᑲᑦᓯᐊᑉ ᖃᐅᔨᒪᔭᐅᓛᖑᔪᒥ ᐃᙱᐅᓯᐅᕗᖅ. ᐅᖃᓚᐅᖅᐳᖅ ᐃᓄᒋᐊᑦ ᐃᙱᓚᐅᖅᐳᑦ ᐅᑎᖅᑕᕐᓂᖓᓂ ᐃᒻᒥᓂᒃ ᒪᕐᕈᖓᓂ ᐃᙱᕐᓂᖓᓂ.
“ᑕᒪᓐᓇ ᐅᕙᓐᓄᑦ ᑲᒪᓇᓚᐅᖅᐳᖅ,” ᐅᖃᓚᐅᖅᐳᖅ ᐅᑲᑦᓯᐊᖅ, ᐃᓚᒋᐊᖅᓯᓪᓗᓂ ᐊᓕᐊᓇᐃᑦᑎᐊᓚᐅᖅᐳᖅ ᑲᑎᖃᑎᖃᑲᑕᒃᖢᓂ ᑐᓴᕐᓂᕈᑐᒃᑐᓂ ᑕᑯᒃᓴᐅᑎᑕᐅᓂᐅᔫᑉ ᓯᓚᑖᓂ, ᑐᓂᐅᖅᑲᐃᓂᕐᒥ ᐱᖁᑎᓂ ᐊᒻᒪ ᑲᑎᖃᑎᖃᕐᓂᕐᒥ ᐃᓄᖕᓂ. “ᐊᖏᕐᕋᖅᓯᒪᔫᔮᑦᑎᐊᓚᐅᖅᐳᖓ ᑕᒪᒃᑭᓂ ᑐᓴᕐᓂᕈᓱᒃᑐᓂ.”
ᒥᑮᐅᓂᐊᒃ ᐊᖏᖃᑎᖃᓚᐅᖅᐳᖅ.
“ᐊᐳᒻᒥ ᖁᕕᐊᓱᒍᑕᐅᔪᖅ ᑲᒪᓇᕐᔪᐊᒪᐅᖅᐳᖅ,” ᐅᖃᐅᔾᔨᓚᐅᖅᐳᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ. ᐃᓱᒪᓚᐅᖅᐳᖓ ᑕᐅᕗᙵᕐᓂᐊᕐᓂᓐᓂ, ᐃᙱᕐᓗᖓ ᖃᔅᓯᐊᕐᔪᖕᓂ ᐃᙱᐅᓯᓂᑦ ᐊᒻᒪ ᐱᙳᐊᕐᓗᖓ ᐱᙳᐊᕈᑎᓂ, ᑭᓯᐊᓂ ᑲᑎᖃᑎᖃᓚᐅᖅᐳᖓ ᓄᓇᓕᖕᓂ. ᐊᑕᐅᓯᐅᔪᒥ ᓇᓗᓇᖅᓯᓂᕆᔭᕋ ᑭᖑᓪᓕᖅᐹᒥ ᐅᓐᓄᖓᓂ ᐊᑎᓕᐅᕌᓂᒍᓐᓇᐃᓪᓕᓪᓗᑕ ᐊᑎᓕᐅᕈᓯᑦᑎᓐᓂ ᐊᒻᒪ ᐊᔾᔨᓕᐅᖅᑕᐅᑲᑕᒃᖢᑕ.”
ᐊᒻᒪ ᐊᒑᖅᑐᖅ ᐅᔾᔨᕆᓯᒪᕗᖅ ᐊᒃᑐᐃᓂᖃᕐᓂᖓᓂ Fly High ᐃᓄᖕᓄᑦ.
“ᓂᔾᔮᑎᑦᑎᓂᖅ ᐊᓯᔾᔨᖅᓯᔪᓐᓇᖅᐳᖅ ᐃᓱᒪᓂᐅᔪᒥ ᐊᑕᐅᓯᐅᔪᒥ ᐊᓯᐊᓄᑦ,” ᐅᖃᓚᐅᖅᐳᖅ.
“ᑕᒪᒃᑭᑦ ᐅᑯᐊ ᐃᓄᐃᑦ ᓄᓇᓕᖕᓂ, ᐊᒥᓱᓂ ᖃᓄᐃᓕᐅᕐᓂᖃᖅᐳᑦ ᐃᓅᓯᖓᓐᓂ. ᐃᙱᐅᓯᐅᔪᒥ ᓲᕐᓗ Fly High ᓴᖅᑭᑉᐳᖅ ᐊᒻᒪ ᐊᓯᔾᔨᖅᓯᕗᖅ ᐃᓱᒪᒋᔭᖃᖅᐸᓚᐅᕐᓂᖏᓐᓂ ᐱᐅᔪᒥ ᐱᓕᕆᓂᐅᔪᒥ ᐊᒻᒪ ᐊᒃᑐᐃᓂᖃᓪᓚᕆᒃᐳᖅ ᐃᓅᑉ ᐃᓅᓯᖓᓂ. ᓂᔾᔮᑎᑦᑎᓂᖅ ᐱᔪᓐᓇᕐᓂᖃᖅᐳᖅ.”
ᐊᖅᑯᒻᒥ, ᐊᒑᖅᑐᖅ ᐃᑲᔪᖅᐳᖅ ᐅᑲᑦᓯᐊᕐᒥ ᐃᖏᕐᕋᓂᖓᓂ ᐱᓕᕆᑦᑎᐊᕐᓂᖓᓂ ᐊᒻᒪ ᐃᓚᖏᑕ ᐱᔭᕆᐊᓕᖏᓐᓂ, ᐊᑐᖅᓯᒪᓪᓗᓂᐅᒃ ᐃᒻᒥᓂᒃ ᓂᔾᔮᑎᑦᑎᓂᖓ ᖁᕝᕙᕆᐊᓕᖅᑎᓪᓗᒍ ᐊᕐᕌᒍᑦ ᖁᓕᑲᓴᐅᓕᖅᑐᒥ.
“ᐊᑐᕆᐊᖃᓚᐅᖅᐸᕋ ᐃᓕᑦᑎᓂᖃᕐᓂᕐᒧᑦ, ᐊᒻᒪ ᐃᓕᑦᑎᕐᔪᐊᓚᐅᖅᐳᖓ ᓯᕗᓪᓕᖅᐸᐅᒧᓂ ᖃᔅᓯᐊᕐᔪᖕᓂ ᐊᕐᕌᒎᔪᓂ ᕿᑐᕐᙵᖃᕐᓂᖓᓂ ᐊᒻᒪ ᐊᖅᑯᒻᒦᖦᖢᓂ ᖃᖓᑕᓪᓗᓂᓘᓐᓃᑦ,” ᐅᖃᓚᐅᖅᐳᖅ ᐊᒑᖅᑐᖅ. “ᓇᓕᒧᓐᓂᖃᓚᐅᙱᓚᖅ ᐱᒋᐊᕐᓂᖓᓂ. ᐊᐅᓪᓛᖅᐸᓗᐊᓚᐅᖅᐳᖓ ᐊᒻᒪ ᐃᓚᓐᓃᙱᓗᐊᓚᐅᖅᐳᖓ. ᑕᒪᓐᓇ ᐊᒃᓱᕈᕐᓇᓚᐅᖅᐳᖅ.”
ᐊᓱᐃᓛᒃ, ᑎᑭᐅᑎᓚᐅᖅᐳᖅ ᐃᓱᒪᓕᐅᕆᐊᖃᕐᓂᖓᓂ ᓂᔾᔮᑎᑦᑎᓂᕐᒥ ᐃᖅᑲᓇᐃᔮᕆᔪᒪᔭᒥᓂ ᐊᒻᒪ ᐃᓚᖏᓐᓂ.
“ᐃᓱᒪᓕᐅᕆᐊᖃᓚᐅᖅᐳᖓ ᓇᓕᐊᒃᑎᒎᕐᓂᐊᕐᓂᓐᓂ ᐊᒻᒪ ᓂᕈᐊᓚᐅᖅᐳᖓ ᐊᖏᕐᕋᖅᓯᒪᓂᕐᒥ ᐃᓚᓐᓂᑦ,” ᐅᖃᓚᐅᖅᐳᖅ. “ᖃᔅᓯᐊᕐᔪᖕᓄᑦ ᐊᕐᕌᒍᓄᑦ, ᐊᖏᖅᐸᓚᐅᙱᓚᖓ ᑕᒪᒃᑭᓄᒃᑖᓂ ᑕᑯᒃᓴᐅᑎᑕᐅᓂᐅᔪᓂ, ᑕᒪᒃᑭᑦ ᐱᕕᒃᓴᖃᕐᓂᐅᔪᓂ ᐅᕙᓐᓄᐊᓚᐅᖅᑐᓄᑦ.”
