ᐅᖃᓕᒫᒐᓕᐅᖅᖢᓂ ᐊᑯᓂᐊᓗᒃ ᐱᓕᕆᐊᕆᓐᓇᓚᐅᖅᑐᖅ, ᑭᓯᐊᓂ ᐃᓕᓐᓂᐊᕐᓂᓕᖕᒥᒃ 4-ᒥ ᐃᓕᓐᓂᐊᓚᐅᖅᓯᒪᔪᑦ ᓕᐅ ᐅᓴᒃ ᐃᓕᓐᓂᐊᕐᕕᖕᒥ ᐃᖕᒥᓂᒃ ᑕᐃᓯᔪᓐᓇᖅᓯᔪᑦ ᐅᖃᓕᒫᒐᓕᐅᖅᑎᐅᓂᕋᕐᓗᑎᒃ ᐅᖃᓕᒫᒐᓕᐅᓚᐅᖅᑎᓪᓗᒋᑦ Three Little Pigs-ᒥ ᔪᓚᐃ 19-ᒥ.
“ᐅᓂᑉᑳᓕᐊᖑᔪᖅ ᐱᖓᓲᑉᓗᑎᒃ ᐊᖑᓇᓱᒃᑏᑦ ᓯᕗᓪᓕᖅᐹᒥ ᓇᑦᑎᖅᓯᐅᕋᓱᒃᖢᑎᒃ,” ᑕᐃᒪᓐᓇ ᑐᑭᓯᑎᑦᑎᒋᐊᖅᖢᓂ ᕋᐃᒪᓐ ᔨᐊᓐᕗᕆᔅᑯ, ᓕᐅ ᐅᓴᒃ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᑦᑎᔨᐅᓚᐅᖅᑐᖅ ᐃᓱᒪᑕᐅᑉᓗ ᑐᖏᓕᕆᓚᐅᖅᓯᒪᔭᖓ ᑲᖏᖅᖠᓂᕐᒥ ᐊᕐᕕᓂᓕᖕᓂᒃ ᐅᑭᐅᓂᒃ.
ᐅᖃᓕᒫᒐᖅ ᒪᓕᒃᑐᖅ ᓄᑕᖅᑲᓄᑦ ᐅᓂᑉᑳᖅᑐᐊᒥᒃ The Three Little Pigs-ᒥᒃ. ᐊᒪᕈᕐᓄᑦ ᐃᒡᓗᓕᐊᖑᓯᒪᔪᖅ ᓱᐱᔭᐅᙱᖔᖅᖢᓂ, ᐅᖃᓕᒫᒐᖅ ᐃᓗᓕᖃᖅᑐᖅ ᐱᖅᓯᖅᑐᒥᒃ ᑲᑉᐱᐊᓱᓕᖅᑎᑦᑎᓯᒪᔪᓂᒃ ᐊᖑᓇᓱᒃᑏᑦ ᐃᒡᓗᖃᕋᓱᒃᑎᓪᓗᒋᑦ.
ᐃᓕᓐᓂᐊᕐᓂᓖᑦ 4-ᒥ ᑲᑎᑦᑎᓯᒪᔪᑦ ᐱᔫᒥᓇᖅᑐᓂᒃ ᐅᖃᓕᒫᒐᓕᐊᖑᓯᒪᔪᒃᑯᑦ ᐊᒻᒪᓗ ᓄᓇᓕᕆᓂᒃᑯᑦ ᐃᓕᓐᓂᐊᕈᑎᒃᑯᑦ ᓱᖏᐅᑎᔪᓐᓇᖅᓯᓂᕐᒧᑦ.
“ᐱᓕᕆᓚᐅᖅᑐᒍᑦ ᐊᕐᕕᓂᓕᖕᓂᖃᐃ ᐊᕐᕕᓂᓕᖕᓂᒃ − ᐃᒻᒪᖄ ᐃᑲᕐᕋᐅᑉ ᐊᑯᓐᓂᖓᓂᒃ ᐅᑉᓗᕈᒥᑕᖅᑳᖅᖢᑕ − ᐅᖃᐅᓯᖃᖅᖢᑕ ᐅᓂᒃᑳᖅᑐᐊᒥᒃ, ᑎᑎᕋᖅᖢᒍ, ᑎᑎᕋᒃᑲᓐᓂᖅᖢᒍ, ᐋᖅᑭᒃᓱᖅᖢᒍ, ᑭᓯᐊᓂ ᑎᑭᐅᑎᒐᑉᑕ ᖁᕕᐊᒋᔭᑉᑎᓐᓄᑦ ᓈᒻᒪᒐᓱᒋᔭᑉᑎᓐᓄᑦ,” ᑕᐃᒪᓐᓇ ᐅᖃᖅᖢᓂ ᔨᐊᓐᕗᕆᔅᑯ. “ᐊᖏᕐᕋᐅᑎᑎᖦᖢᒋᑦ ᐅᓂᒃᑳᖅᑐᐊᒥᒃ ᑕᐃᑉᓱᒪᓂ, ᐊᒻᒪᓗ ᐱᐅᔪᐊᓘᓇᓱᒋᓚᐅᖅᑕᕋ, ᐊᐅᓪᓚᖅᑎᖦᖢᒍᓗ Inhabit Media-ᑯᓐᓄᑦ ᐊᒻᒪ ᐱᐅᒃᓴᖅᖢᑎᒃᑕᐅᖅ.”
2019-ᒦᓚᐅᖅᑐᖅ, ᑭᓯᐊᓂ ᖃᑉᓯᑲᓪᓚᖕᓂᒃ ᐅᑭᐅᓂᒃ ᐅᖃᓕᒪᒐᙳᖅᑎᓚᐅᖅᑕᖅᐳᑦ. ᔨᐊᓐᕗᕆᔅᑯ ᐃᓐᓇᐃᑦ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑎᑦᑎᔨᙳᓚᐅᕐᒪᑦ ᐅᔭᕋᖕᓂᐊᕐᕕᖕᒥ ᓕᐅ ᐅᓴᒃ ᐃᓕᓐᓂᐊᕐᕕᖕᒥ ᕿᒪᐃᒐᒥ ᑕᐃᑲᓂ ᐅᑭᐅᒥ, ᐅᑎᕐᕕᒋᕙᒃᖢᒋᑦ Inhabit Media-ᑯᑦ ᑐᓴᖅᑎᒃᑲᓐᓂᖅᐸᒃᖢᒋᑦ ᖃᓄᐃᓕᖓᓕᕐᒪᖔᑦ ᐅᖃᓕᒫᒐᖅ.
“ᐊᑯᓂ ᐱᓕᕆᐊᕆᓚᐅᖅᑕᖅᐳᑦ ᐳᐃᒍᒐᓚᒻᒪᕆᒃᖢᖓ,”ᑕᐃᒪᓐᓇ ᐅᖃᖅᖢᓂ ᔨᐊᓐᕗᕆᔅᑯ. “ᒫᓐᓇᑳᓪᓚᒻᒪᕆᐊᓗᒃ, ᑲᔪᓯᒋᐊᕈᑎᒋᔪᓐᓇᖅᓯᑉᓗᑎᒍᑦ ᐊᒻᒪᓗ ᑎᑎᕋᐅᔭᖅᓯᒪᔪᓂᒃ ᑕᑯᑎᑕᐅᔪᓐᓇᖅᓯᑉᓗᖓ, ᑕᒡᕙᐅᓕᖅᐳᒍᑦ.”
ᐅᖃᓕᒫᒐᖅ ᐋᖅᑭᒃᓱᖅᓯᒪᔪᖅ ᐃᓄᐃᑦ ᓄᓇᓕᖕᓄᑦ ᓅᑕᐅᓚᐅᖅᑳᖅᑎᓐᓇᒋᑦ, ᐃᓕᓐᓂᐊᖅᑐᑦ ᐃᓕᓐᓂᐊᓚᐅᕐᒪᑕ ᐃᓄᖕᓂᒃ ᐊᑯᓂ. ᔨᐊᓐᕗᕆᔅᑯ ᐅᖃᖅᖢᓂ ᑕᒪᓐᓇ ᐱᓕᕆᐊᖑᓚᐅᕐᓂᖓᓄᑦ ᐱᓕᕆᖃᑎᒌᖕᓂᒃᑯᑦ ᐃᓕᓐᓂᐊᖅᑐᓪᓗ.
“ᑎᑎᕋᓚᐅᖅᑕᖅᐳᑦ ᑕᒪᑉᑕ,” ᑕᐃᒪᓐᓇ ᐅᖃᖅᖢᓂ. “ᐃᒃᓯᕙᖃᑦᑕᓚᐅᖅᑐᒍᑦ, ᐊᓕᓚᔪᒥᒃ ᐊᖏᔪᒥᒃ ᐱᓯᒪᑉᓗᑕ ᑎᑎᕋᕐᕕᒋᔭᑉᑎᓐᓂᒃ. ᑎᑎᕋᖅᖢᑕ ᐊᒻᒪᓗ ᑎᑎᕋᒃᑲᓐᓂᓕᖅᐸᒃᖢᑕ.”
ᐅᖃᓕᒫᒐᓕᐊᖑᓯᒪᔪᖅ ᐊᑐᐃᓐᓇᐅᔪᖅ Inhabit Media-ᑯᓐᓃᑦᑐᖅ. ᔨᐊᓐᕗᕆᔅᑯ ᐅᖃᖅᖢᓂ ᑮᓇᐅᔭᓕᐊᖑᔪᑦ ᓇᑉᐸᖏᑦ ᓕᐅ ᐅᓴᒃ ᐃᓕᓐᓂᐊᕐᕕᖕᒧᙵᐅᓂᐊᖅᑐᑦ ᐊᒻᒪᓗ ᐃᖕᒥᓂᒃ ᑮᓇᐅᔭᓕᐅᕈᑎᒋᓇᔭᖅᑕᖏᑦ Inhabit-ᑯᓐᓂᒃ ᑐᓂᕐᕈᑎᒋᓂᐊᖅᖢᓂᒋᑦ ᐃᑯᕐᕋᖅ ᓂᕿᑖᕐᕕᖕᒧᑦ.
“ᑮᓇᐅᔭᓕᐅᕈᑕᐅᓂᐊᖅᑐᓂᒃ ᐱᑕᖃᕐᓂᐊᕐᒪᖔᑦ ᖃᐅᔨᒪᙱᑦᑐᖓ, ᑕᐃᒪᓐᓇ ᐅᖃᖅᖢᓂ. “ᐃᒪᐃᓕᓇᓱᒃᑐᖓ ᐊᒥᓱᐊᓗᖕᓂᒃ ᓂᐅᕕᖅᑐᖃᔾᔮᙱᑦᑐᒃᓴᐅᔪᖅ ᐅᖃᓕᒫᒐᓂᒃ ᐅᕝᕙᓘᓐᓃᑦ ᓱᓇᑐᐃᓐᓇᕐᓂᒃ.”
ᔨᐊᓐᕗᕆᔅᑯ ᖃᐅᔨᒪᔭᐅᖁᔨᔪᖅ ᑕᒪᐃᓐᓂᒃ ᐃᑲᔪᖅᓯᒪᔪᓂᒃ.
ᖁᑦᑎᖕᓂᓕᖕᒥᒃ 4-ᒥ ᐅᖃᓕᒫᒐᓕᐅᖅᓯᒪᔪᑦ ᐅᑯᐊᖑᔪᑦ: ᐃᕗᕋ, ᐊᓐᑐᕈ, ᒪᐃᑯ, ᐳᔭ, ᑎᓵᓐ, ᑲᐃᕇᓐ, ᕋᐳᑦ, Hᐃᓕ, ᐃᖃᓗᒃ, ᓱᓗ, ᑎᓕᓐ, ᐊᑐᐊᑦ, ᔪᓯᐱ, ᓄᓕᓐ ᐊᒻᒪ ᓕᓯ.
ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑐᓂᒃ ᐅᖃᐅᔾᔨᒋᐊᖅᑎ ᓄᐊ ᑎᒃᑕᖅ ᐱᒻᒪᕆᐊᓗᒃᑯᑦ ᐃᑲᔪᕐᓂᖃᓚᐅᕐᒥᖕᒪᑦ, ᐊᒻᒪᓗ ᑐᕈᑎ ᐳᕉᔅ. ᐅᖃᓕᒫᒐᖅ ᓴᓇᔭᐅᓚᐅᖅᑐᖅ Thamires Paredes−ᒧᑦ ᐊᒻᒪᓗ ᐃᓗᓕᖃᖅᖢᓂ ᐃᓄᒃᑎᑑᓕᖓᔪᓂᒃ ᐅᖃᓕᒫᒐᒃᑯᑦ ᐊᑐᖅᑕᐅᔪᓂᒃ.