Skip to content

ᓯᓚᐅᑉ ᒪᑐᔭᐅᓂᖓᓄᑦ ᑲᓱᑦᑕᐅᑎᙳᐊᓄᑦ ᐊᐃᕙᓂᖅ

ᓯᓚᑲᒻᒪᐅᓕᕋᐃᒻᒪᑦ ᑭᕙᓪᓕᕐᒧᑦ, ᐃᔨᓕᒫᕗᑦ ᕙᐃᔅᐳᒃᑯᑦ, ᐊᒻᒪᓗ ᓈᓚᐅᑎᓕᒫᑦ, ᖃᐅᔨᓇᓱᐊᖅᑐᑎᒃ ᓇᓪᓕᐊᑦ ᐃᓪᓗᐃᑦ ᒪᑐᔭᐅᓂᐊᕐᒪᖔᑕ ᐊᒻᒪᓗ ᓇᓪᓕᐊᑦ ᒪᑐᔭᐅᔾᔮᖏᒻᒪᖔᑕ.

ᓯᓚᑲᒻᒪᐅᓕᕋᐃᒻᒪᑦ ᑭᕙᓪᓕᕐᒧᑦ, ᐃᔨᓕᒫᕗᑦ ᕙᐃᔅᐳᒃᑯᑦ, ᐊᒻᒪᓗ ᓈᓚᐅᑎᓕᒫᑦ, ᖃᐅᔨᓇᓱᐊᖅᑐᑎᒃ ᓇᓪᓕᐊᑦ ᐃᓪᓗᐃᑦ ᒪᑐᔭᐅᓂᐊᕐᒪᖔᑕ ᐊᒻᒪᓗ ᓇᓪᓕᐊᑦ ᒪᑐᔭᐅᔾᔮᖏᒻᒪᖔᑕ.

ᐃᓛᓐᓂᒃᑯᑦ, ᑕᒪᒃᑯᐊ ᐃᓱᒪᓕᐅᕈᑕᐅᔪᑦ ᓴᖅᑭᖃᑦᑕᕐᒪᑕ ᐅᐊᑦᑎᐊᕈᒃᑲᓐᓂᐅᓕᖅᑎᓪᓗᒍ, ᓇᓗᓕᕈᑕᐅᓕᖃᑦᑕᕐᒪᑕ ᐊᒻᒪᓗ ᐸᕐᓇᓐᓂᐅᔪᑦ ᐃᓚᖓ ᓄᓇᓕᐅᔪᖅ ᒪᑐᓯᒪᑎᓪᓗᒍ ᑭᓯᐊᓂᓕ ᐊᓯᐊ ᑕᐃᒪᐃᙱᒻᒪᑦ.

ᑕᐃᕕᑦ ᑲᑯᖅᑎᓐᓂᖅ ᓄᑲᖅᖠᖅ ᑕᑯᓯᒪᔪᖅ ᐅᓂᒃᑳᖅᓯᒪᔪᖅ ᐊᑕᐅᓯᐊᙱᖦᖢᓂ ᖃᖓᑦᑎᐊᓵᒃᑯᑦ ᐊᑐᖅᑕᐅᓂᑯᓂ ᐊᒻᒪ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓄᑦ ᐊᔭᐅᖅᑐᐃᓪᓗᓂ ᓄᑖᒥᒃ ᐊᑐᖃᑦᑕᖅᑐᒥᒃ ᓯᓚᑦᑎᐊᕙᐅᔪᓐᓃᖅᑎᑦᑎᓪᓗᓂ.

“ᖃᓄᐃᓕᖓᓂᖏᑦ ᐊᐱᖅᑯᑕᐅᔪᓐᓇᕌᖓᑕ, ᐃᓄᐃᑦ ᐅᑕᖅᑭᓗᑎᒃ ᐅᑕᖅᑭᓗᑎᒡᓗ ᑐᓴᕋᓱᒃᓗᑎᒃ ᓄᑖᙳᕆᐊᖅᓯᒪᔪᓂᒃ ᓇᓕᐊᖕᓂᑐᐃᓐᓇᖅ ᕼᐋᒻᒪᓚᒃᑯᓐᓂ ᐅᕝᕙᓘᓐᓃᑦ ᓄᓇᕗᑦ ᒐᕙᒪᒃᑯᓐᓂ (ᓄᓇᕗᑦ ᒐᕙᒪᒃᑯᑦ),” ᐅᖃᖅᐳᖅ ᑲᑯᒃᑎᓐᓂᖅ ᓄᑲᖅᖠᖅ “ᐱᕕᒃᓴᐅᒐᔪᖕᓂᖅᓴᑦ ᑖᒃᑯᓇᓂ ᐊᐱᖅᑯᑎᓂᒃ, ᐃᓄᐃᑦ ᑭᖑᕙᖃᑦᑕᖅᐳᑦ. ᐱᐅᓇᔭᖅᐳᖅ ᖃᐅᔨᒪᓗᓂ ᒪᑐᐃᙶᕐᒪᖔᑕ ᒪᑐᓯᒪᖕᒪᖔᑕᓘᓐᓃᑦ.”

ᓇᓂᓯᓯᒪᔪᖅ ᐃᑲᔪᖅᓱᐃᓂᕐᒥᑦ ᐃᓄᖕᓄᑦ ᑐᓴᐅᒪᔾᔪᑎᓄᑦ ᐃᓄᖕᓂᑦ ᐅᓚᕕᑕᐅᓯᒪᔪᓂᒃ ᐋᖅᑭᒃᓯᓇᓱᖕᓂᕐᒧᑦ ᐱᕙᓪᓕᐊᓂᖓᓂ.

“ᐃᓄᐃᑦ ᐃᓱᒪᓕᐅᕆᔪᑦ, ᓄᓇᓯᐅᑎᒥᒃ ᐊᖁᓲᑦ ᐊᑭᓕᖅᑕᐅᔪᒥᒃ,” ᐅᖃᖅᑐᕕᓂᖅ ᖃᑯᒃᑎᓐᓂᖅ ᓄᑲᖅᖠᖅ “ᐊᑭᓖᕙᙱᑦᑐᑦ ᐊᐅᓚᑦᑎᔾᔪᑎᓄᑦ ᐅᕝᕙᓘᓐᓃᑦ ᓴᓇᔭᐅᔾᔪᑎᓄᑦ ᐊᑭᖏᓐᓄᑦ. ᑕᐃᒪᓕ ᐃᖅᑲᓇᐃᔭᓕᖅᑕᓯ ᐃᓚᖃᑐᐃᓐᓇᕆᐊᖃᖅᑐᑎᒃ ᐃᓚᒥᓂᒃ ᑲᒪᔪᓐᓇᖅᑐᓂᒃ ᐊᒻᒪᓗ ᐸᐃᕆᔨᓯᐅᕆᐊᖃᖅᑐᑎᒃ ᐅᓪᓗᖏᓐᓂᒃ ᑕᒪᒃᑯᐊ ᐃᓕᓐᓂᐊᕐᕕᐅᔪᑦ ᒪᑐᓯᒪᑎᓪᓗᒋᑦ ᑭᓯᐊᓂᓕ ᕼᐊᒪᓚᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᒪᑐᐃᖓᓪᓗᑎᒃ, ᐊᒻᒪᓗ ᐃᓄᓐᓂᒃ ᐱᓱᕋᔭᑦᑐᓂᒃ ᐱᑕᖃᖅᑐᓂ (ᓄᓇᓕᐅᑉ ᐃᓱᐊᓄᑦ ᑎᓴᒪᐃᕋᖅᑐᑎᒃ ᐅᓪᓗᕐᒥ ᐃᖅᑲᓇᐃᔭᕆᐊᕐᓗᑎᒃ ᐊᒻᒪᓗ ᐃᖅᑲᓇᐃᔭᕆᐊᕐᓗᑎᒃ, ᐅᓪᓛᒃᑯᑦ ᐅᓐᓄᒃᓴᒃᑯᓪᓗ 60−ᓂᒃ ᑐᖔᓂ ᓂᒡᓚᓱᖕᓂᖅᓴᐅᓗᓂᓘᓐᓃᑦ. ᑖᒃᑯᐊ ᐃᓄᐃᑦ ᐊᒃᑐᖅᑕᐅᓂᖅᐹᖑᔪᑦ ᐊᒻᒪ ᑖᒃᑯᐊ ᐅᖃᐅᓯᕆᕙᒃᑲ.”

ᓄᓇᕗᑦ ᒐᕙᒪᒃᑯᑦ ᐊᑐᓲᖑᕗᑦ ᑎᓕᓯᔾᔪᑎᒥᒃ, ᐊᑐᐊᒐᐅᙱᑦᑐᒥᒃ, ᖃᐅᔨᓇᓱᒃᖢᑎᒃ ᖃᑯᒍ ᓯᓚ ᐱᔾᔪᑕᐅᓗᓂ ᐊᐅᓚᓂᕆᔭᐅᔪᑦ ᒪᑐᔭᐅᓇᔭᕐᒪᖔᑦ, ᐅᖃᓚᐅᖅᐳᖅ ᐃᐅᕆᐋᓇ ᕼᐊᕋᒥᓐᓯᒃ, ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖓ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ, ᐃᕐᖐᓐᓈᖅᑕᐅᒃᑯᑦ. ᐊᑖᓃᑦᑐᑦ ᐱᔾᔪᑎᑦ ᐃᑲᔪᖅᑐᖅ ᑐᓴᖅᑎᑦᑎᓂᕐᒥᒃ ᐋᖅᑭᒃᑕᐅᔪᒥᒃ: ᑕᑯᒃᓴᐅᓂᖓ ᑐᖔᓂ 200 ᒦᑕᑦ; ᐊᓄᕆᐅᑉ ᓱᒃᑲᓂᖓ 60 ᑭᓛᒥᑕᔅ ᐅᖓᑖᓄᑦ ᐃᑲᕐᕋᒧᑦ; ᐊᓄᕆᒨᖅᑐᑦ ᑎᑎᕋᖅᓯᒪᔪᑦ -50 C ᐅᖓᑖᓄᓪᓘᓐᓃᑦ; ᖃᓄᐃᓕᖓᓂᖓ ᐊᖅᑯᑎᑦ ᓴᓕᒍᖅᑕᐅᓂᖏᑦ ᕼᐋᒻᒪᓚᒃᑯᓪᓗ ᐋᖅᑭᒃᑕᖏᑦ ᐲᔭᖅᑕᐅᓗᑎᒃ ᐊᖅᑯᑎᑦ ᐊᖅᑯᑎᓂᑦ; ᐊᒻᒪ ᑖᒃᓯᓂᒃ ᐊᑐᐃᓐᓇᐅᔪᖃᖅᐸᑦ ᐅᕝᕙᓘᓐᓃᑦ ᐊᓯᖏᓐᓂᒃ ᐃᓄᖕᓄᑦ ᓄᒃᑕᐅᑎᓄᑦ ᐱᔨᑦᑎᕋᐅᑎᓂᒃ ᓄᓇᓕᖕᓂ. ᓄᓇᓕᖕᓂ ᒐᕙᒪᒋᔭᐅᔪᖅ ᓇᓗᓇᐃᖅᓯᒃᐸᑦ ᐊᖅᑯᑎᖓ ᒪᑐᓯᒪᓂᖓᓂᒃ, ᓄᓇᓕᖕᓂᓕᒫᖅ ᒪᑐᔭᐅᓕᕐᓂᐊᖅᐳᖅ ᓄᓇᕗᑦ ᒐᕙᒪᒃᑯᓐᓄᑦ.

“ᑐᑭᒧᐊᕈᑎ ᐊᔾᔨᒌᖃᑦᑕᖏᑦᑐᖅ ᓄᓇᓕᒃᑎᒍᑦ,” ᐅᖃᖅᑐᖅ ᕼᐊᕋᒻᓯᒃ. “ᒪᑐᓯᒪᓃᑦ ᑐᙵᕕᖃᕐᓂᐊᖅᑐᑦ ᓯᓚᒥᒃ ᓄᓇᓕᖕᒥ ᐊᕕᒃᑐᖅᓯᒪᓂᓕᒫᒨᙱᑦᑐᖅ. ᐃᓱᒪᓕᐅᕐᓂᖅ ᒪᑐᓂᕐᒧᑦ ᓇᓗᓇᐃᖅᑕᐅᖃᑦᑕᖅᑐᖅ ᖃᐅᑕᒫᑦ.”

ᐊᐱᕆᓚᐅᖅᑐᖅ ᐅᖃᐅᓯᖃᖁᔨᓪᓗᓂ ᕼᐋᒻᒪᓚᒃᑯᑦ ᑲᖏᖅᖠᓂᕐᒥ ᐊᑐᐊᒐᖓᓂᒃ ᓯᓚ ᐱᔾᔪᑕᐅᓪᓗᓂ ᖃᒥᑕᐅᖃᑦᑕᖅᑐᓄᑦ, ᕼᐋᒻᒪᓚᒃᑯᑦ ᐊᐅᓚᑦᑎᔨᖓ ᑎᐅᕋᓐ ᕕᓕᓐ ᑭᐅᓚᐅᖅᐳᖅ ᐃᕐᖐᓐᓈᖅᑕᐅᒃᑯᑦ ᑎᑎᕋᖅᖢᓂ ᐱᕙᒌᔭᖅᓯᒪᙱᖦᖢᓂ ᐅᖃᐅᓯᕆᔭᕆᐊᒃᓴᖅ ᕕᕗᐊᕆ 22-ᒥ, ᐅᖃᐅᓯᕆᖅᑳᕐᓂᐊᕐᒪᒍ ᑲᑎᒪᔨᓄᑦ.

ᓕᐅᓂ ᐸᒥᐅᓕᒃ, ᕼᐋᒻᒪᓚᒃᑯᑦ ᐊᐅᓚᑦᑎᔨᖓ ᓴᓪᓕᕐᒥᐅᓄᑦ, ᐅᖃᐅᔾᔨᓚᐅᖅᐳᖅ ᑭᕙᓪᓕᕐᒥ ᐱᕙᓪᓕᐊᔪᓂᒃ ᓯᓚᑦᑎᐊᕙᐅᔪᓐᓃᕌᖓᑦ ᓄᓇᓕᖕᓄᑦ, ᐅᖃᐅᓯᖃᖅᖢᓂ ᒪᐃᔭᒥᒃ ᐊᒻᒪ ᓄᓇᓕᖕᓂ ᐊᑐᖅᑕᐅᕙᒃᖢᓂ ᓯᓚ ᐱᔾᔪᑕᐅᓪᓗᓂ ᒪᑐᔭᐅᔪᓄᑦ ᐊᑐᐊᒐᖅ ᐊᔾᔨᐸᓗᒋᓪᓗᓂᐅᒃ ᓄᓇᕗᑦ ᒐᕙᒪᒃᑯᑦ.

ᓴᓪᓕᖅ ᒪᑐᓯᓚᐅᕐᒪᑦ ᕼᐋᒻᓚᒃᑯᑦ ᐊᓪᓚᕝᕕᖓᓂᒃ ᐃᒃᑮᓇᖅᑐᐊᓗᑎᓪᓗᒍ. ᐸᒥᐅᓕᒃ ᐅᖃᖅᖢᓂ ᐊᒥᓱᑦ ᑎᑎᕋᕐᕕᖕᒥ ᐃᖅᑲᓇᐃᔭᖅᑏᑦ ᓄᓇᖃᖅᐳᑦ ᐊᑭᐊᓂ ᓄᓇᓕᖕᓂ ᑕᐃᒪᙵᓪᓗ ᐃᓕᓐᓂᐊᕐᕕᒃ ᒪᑐᓯᒪᓕᓚᐅᕐᓂᖓᓄᑦ, ᕿᑐᕐᙵᖏᑦ ᐊᖏᕐᕋᖅᓯᒪᓪᓗᑎᒃ ᐃᒃᓯᕚᕐᕕᖃᙱᖦᖢᑎᒃ.

“ᑕᒪᕐᒥᑦᑎᐊᖅ ᑕᒪᒃᑯᐊ ᑕᑯᔭᕆᐊᖃᕐᒥᔭᕗᑦ ᓂᒡᓚᓱᓗᐊᕌᖓᑦ,” ᑕᐃᒪᓐᓇ ᐅᖃᖅᖢᓂ.

“ᓴᓪᓕᕐᒥ, ᓂᒡᓚᓱᒃᑐᐊᓘᒐᓗᐊᖅᐸᑦ, ᓄᓇᕗᑦ ᒐᕙᒪᒃᑯᑦ ᒪᑐᔾᔮᙱᑦᑐᑦ, ᑭᓯᐊᓂ ᕼᐋᒻᒪᓚᒃᑯᑦ ᓄᖅᑲᖅᑎᑦᑎᒃᐸᑕ ᕼᐋᒻᒪᓚᒃᑯᑦ ᐱᔨᑦᑎᕋᐅᑎᖏᓐᓂᒃ.”

ᐅᖃᖅᖢᓂ ᕼᐋᒻᓚᑦᑯᑦ ᐅᒃᑯᐃᖓᔪᒪᒃᐸᑕ, ᐃᖅᑲᓇᐃᔭᖅᑎᑦ ᓄᖅᑲᖓᔪᓐᓇᖅᑐᑦ ᐊᑦᑕᖕᓇᖅᑕᐃᓕᒪᓗᑎᒃ ᐃᖏᕐᕋᔾᔪᑎᓂᒡᓗ ᐱᔾᔪᑎᖃᕐᓗᑎᒃ. ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᒥᓂᒃ ᐊᑐᕈᓐᓇᖅᑎᑦᑎᒋᕗᑦ ᓄᖅᑲᖓᔪᓐᓇᐅᑎᒥᓂᒃ ᓯᓚ ᐱᔾᔪᑕᐅᓗᓂ ᑲᑉᐱᐊᓱᒃᑯᑎᒃ.

ᐱᑕᖃᕈᓐᓃᖅᑎᓐᓂᐊᕐᓗᒍ ᓇᓗᓕᕈᑕᐅᕙᒃᑐᖅ ᐊᑕᐅᑦᑎᒃᑰᙱᑦᑐᕐᓘᓐᓃᑦ ᐋᖅᑭᒃᓯᒪᓕᖅᑎᑕᐅᔪᑦ, ᑲᑯᒃᑎᓐ ᓄᑲᖅᖠᖅ ᐃᓱᒪᕗᖅ ᐃᒻᒥᓂᒃ ᐊᐅᓚᔪᓂᒃ ᐊᑐᖅᑕᐅᕙᒃᑐᒥᒃ ᐊᑐᓕᖅᑎᑦᑎᔪᖃᓪᓗᐊᕐᓂᖓᓂᒃ, ᑕᒪᓐᓇᓗ ᑕᐃᒪᐃᑎᑦᑎᙱᖦᖢᓂ ᐱᙳᐊᕐᓂᕆᔭᒥᓂᒃ.

ᐅᖃᐅᓯᖃᓚᐅᖅᐳᖅ ᖃᔅᓯᑲᓪᓚᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐊᔾᔨᑲᓴᖏᓐᓂᒃ ᐊᑐᖅᑕᐅᔪᓂᒃ ᒫᓐᓇ ᐃᓚᖃᕈᓐᓇᕐᓂᖏᓐᓂᒃ ᖃᔅᓯᐅᓂᕆᔭᖏᓐᓄᑦ ᒪᓕᒃᑐᖃᖅᖢᓂ ᖃᓄᖅ ᐱᕐᔪᐊᖑᑎᒋᓂᖏᓐᓄᑦ ᑕᒪᐃᑕ ᐊᑐᓂᑦ ᐱᔾᔪᑕᐅᕙᒃᑐᑦ. ᑕᐃᒪᓕ, ᓂᓪᓚᓱᓐᓂᖅᓴᐅᕗᖅ, ᐊᒥᓲᓂᖅᓴᐅᔪᑦ ᓈᓴᖅᑕᐅᒐᔭᖅᑐᑦ, ᐊᒻᒪᓗ ᓱᑲᓐᓂᕐᓴᒃᑯᑦ ᐊᓄᕆᒃᑯᑦ, ᐊᒥᓲᓂᖅᓴᐅᔪᑦ ᑲᑎᖃᑦᑕᖅᑐᑦ, ᐊᓯᖏᓪᓗ.