ᓄᓇᕗᒥ ᓯᓚᑦᑐᖅᓴᕐᕕᒃ ᑲᖏᖅᖠᓂᕐᒥ ᖁᕕᐊᓲᑎᖃᓚᐅᖅᑐᖅ ᒪᕐᕉᖕᓄᑦ ᐅᑭᐅᓄᑦ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᓯᒪᔪᓂᒃ ᐱᓇᓱᐊᕈᓯᐅᓚᐅᖅᑐᒥ.
ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ ᐊᕐᕌᓂ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᔪᑦ ᖁᕕᐊᓱᖃᑎᒋᔭᐅᒐᓗᐊᖅᖢᑎᒃ ᑲᑎᖃᑎᒋᔭᐅᓚᐅᙱᓐᓂᖏᓐᓄᑦ 2020-ᒥ, ᓯᓚᑦᑐᖅᓴᕐᕕᒃ ᐃᓱᒪᓕᐅᓚᐅᖅᑐᖅ ᖃᐃᖁᔨᓂᐊᕐᓂᕐᒧᑦ ᐃᓕᓐᓂᐊᕌᓂᓚᐅᖅᓯᒪᔪᓂᒃ ᒫᓐᓇᐅᔪᖅ ᐱᐊᓂᒃᑐᓂᒃ ᖁᕕᐊᓱᖃᑎᒋᔭᐅᖁᑉᓗᒋᑦ ᔫᓐ 7-ᒥ.
ᓯᓚᑦᑐᖅᓴᕐᕕᒃ ᖃᐃᖁᔨᓚᐅᕐᒥᔪᖅ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᔪᓂᒃ ᐱᐊᓂᒃᓯᓚᐅᖅᑐᓂᒃ ᐃᖃᓗᖕᓂ ᐊᒻᒪᓗ ᐃᖃᓗᒃᑑᑦᑎᐊᕐᒥ.
ᒪᑎᐊᓯ ᐃᐅᕐᔅ, ᐊᖓᔪᖅᑳᑉ ᑐᖏᓕᖓ ᑭᕙᓪᓕᕐᒥ ᓯᓚᑦᑐᖅᓴᕐᕕᖕᒥ, ᐅᖃᓚᐅᖅᑐᖅ ᐃᖢᐊᑦᑎᐊᓚᐅᕐᒪᒡᒎᖅ ᑕᒪᕐᒥᒃ ᐃᓕᑕᕆᔭᐅᓂᖃᖅᑎᓪᓗᒋᑦ ᑕᒪᕐᒥᒃ ᐊᒃᓱᕈᕐᓇᖅᑐᒃᑰᓚᐅᖅᑎᓪᓗᒋᑦ ᓱᖏᐅᑎᔭᕆᐊᖃᕐᓂᕐᒧᑦ ᓄᕙᒡᔪᐊᕐᓂᕐᒥᒃ.
“ᑕᑯᑎᑦᑎᓯᒪᔪᑦ ᐱᓇᓱᐊᒃᑲᐅᓂᖏᓐᓄᑦ ᐃᓕᓐᓂᐊᖅᑐᑦ ᑲᔪᓯᑎᑦᑎᑦᑎᐊᑐᐃᓐᓇᙱᖦᖢᑎᒃ ᐃᓕᓐᓂᐊᕈᑎᒥᓂᒃ ᑭᓯᐊᓂᓕ ᐱᕚᓪᓕᖅᓯᒪᑉᓗᑎᒃ ᐃᓕᓐᓂᐊᕆᐊᖃᓚᐅᕋᓗᐊᖅᑎᓪᓗᒋᑦ ᖃᕆᑕᐅᔭᒃᑯᑦ ᐊᒻᒪᓗ ᐃᓕᓐᓂᐊᖅᑎᑦᑎᔨᒥᓂᒃ ᐱᓕᕆᖃᑎᖃᕐᓂᒃᑯᑦ ᐊᒻᒪᓗ ᓄᓇᓕᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᒪᓕᒃᑕᐅᔭᕆᐊᓖᑦ ᑕᐃᒪᐅᓚᐅᖅᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ. “ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᖢᓂ ᐱᓕᕆᖃᑎᒌᒋᐊᖃᕐᓇᕋᔪᖕᒪᑦ ᐊᒻᒪᓗ ᐃᓄᐃᑦ ᓵᖓᓂᒃ ᐅᖃᓪᓚᒋᐊᖃᕐᓇᕋᔪᖕᒪᑦ, ᑕᐃᒪᐃᒻᒪᑦ ᐃᓕᓐᓂᐊᖅᑐᖁᑎᕗᑦ ᓄᑖᓂᒃ ᐃᓕᓐᓂᐊᕐᓂᕐᒧᑦ ᑐᕌᖓᔪᓂᒃ ᓱᖏᐅᑎᔭᕆᐊᖃᓚᐅᖅᑐᑦ.”
ᑲᑎᖦᖢᒋᑦ 25 ᐱᐊᓂᒃᓯᓚᐅᖅᑐᑦ ᒪᕐᕉᒃ ᐅᑭᐅᑦ ᐃᓗᐊᓂ ᐃᓕᓐᓂᐊᕈᑎᓂᒃ ᓲᕐᓗ ᐃᓄᓕᕆᔨᐅᓂᕐᒧᑦ, ᐃᓕᓐᓂᐊᖅᑎᑦᑎᔨᐅᓂᕐᒧᑦ, ᐊᖓᔪᖅᑳᙳᖅᓴᓂᕐᒧᑦ, ᐊᒻᒪᓗ ᐊᔾᔨᒌᙱᑦᑑᑕᐅᔪᒃᑯᑦ ᓱᓇᙳᖅᓴᓂᕐᒧᑦ ᓴᓇᑐᓕᓴᕐᕕᖕᒥ.
ᐱᔾᔪᑎᒋᑉᓗᒋᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᒪᓕᒃᑕᐅᔭᕆᐊᓖᑦ, ᓯᓚᑦᑐᖅᓴᕐᕕᒃ ᐃᓕᑕᕆᔭᐅᔾᔪᑎᒥᒃ ᒪᕐᕉᓕᖓᔪᒃᑯᑦ ᑲᒪᒋᐊᖃᓚᐅᖅᑐᖅ.
ᑖᑉᑯᐊ ᒪᕐᕉᒃ ᐃᓕᓐᓂᐊᕌᓂᖃᑎᒌᒃᑐᑦ ᓴᓇᑦᑕᐃᓕᒥ ᐅᑉᓗᒃᑯᑦ ᐱᐅᓴᐃᓚᐅᖅᑐᑦ ᐱᙳᐊᕐᕕᖕᒥᒃ ᐊᑐᖅᑕᐅᓂᐊᖅᑐᒥᒃ.
“ᐸᕐᓇᒃᓯᒪᒐᑎᒃ ᖁᕕᐊᓱᖃᑎᒌᓚᐅᖅᑐᑦ ᑲᑎᖦᖢᑎᒃ ᐱᐅᓴᖅᖢᒍᓗ ᑲᑎᕝᕕᒋᓂᐊᖅᑕᖓ. ᓴᕆᒪᒋᑦᑎᐊᓚᐅᖅᑕᒃᑲ ᐱᓕᕆᖃᑎᒌᖕᓂᖏᑦ ᐊᒻᒪᓗ ᑕᑯᑉᓗᒋᑦ ᑕᒪᕐᒥᒃ ᐱᓕᕆᖃᑎᒌᒃᑐᑦ ᐊᑕᐅᓯᕐᒥᒃ ᑐᕌᒐᖃᖅᖢᑎᒃ ᐅᑭᐅᓗᒃᑖᖅ ᓴᖅᑭᓚᐅᑎᒃᑐᒥᒃ,” ᑕᐃᒪᓐᓇ ᐅᖃᖅᖢᓂ ᐃᐅᕐᔅ.
ᖃᑉᓯᑲᓪᓚᑦ ᐃᓕᑕᕆᔭᐅᓚᐅᖅᑐᑦ ᖁᑦᑎᖕᓂᖅᐹᒃᑯᑦ ᐊᔪᙱᓐᓂᖃᕐᓂᖏᓐᓄᑦ, ᖃᑉᓯᑲᓪᓚᑦ ᐃᑲᔫᑏᑦ ᑐᓂᐅᖅᑲᐅᑕᐅᓚᐅᖅᑐᑦ.
ᒋᐅᓪ ᐊᖑᑎᐊᓗᒃ ᐊᖓᔪᖅᑳᙳᖅᓴᓂᕐᒧᑦ ᐃᓕᑕᕆᔭᐅᔾᔪᑎᑖᓚᐅᖅᑐᖅ 2020-ᒥ ᐊᒻᒪᓗ ᖁᑦᑎᖕᓂᖅᓴᒥ ᐅᑭᐅᖅ, ᓵᓚᒃᓴᓚᐅᖅᑐᖅ ᓕᔅᑕ ᓛᓐᑕᐅᑉ ᑮᓇᐅᔭᓕᕆᓂᕐᒧᑦ ᐃᓕᑕᕆᔭᐅᔾᔪᑎᒥᒃ ᖁᑦᑎᖕᓂᖅᐹᒥ ᐃᓕᓐᓂᐊᕈᑎᒥᒍᑦ ᓈᓴᐅᑎᑖᓚᐅᕐᒪᑦ ᑮᓇᐅᔭᓕᕆᓂᒃᑯᑦ ᐊᒻᒪᓗ ᐃᓚᒌᒃᑯᑦ ᐃᓕᑕᕆᔭᐅᔾᔪᑎᒥᒃ ᖁᑦᑎᖕᓂᖅᐹᒥ ᐃᓕᑕᕆᔭᐅᔾᔪᑎᑖᓚᐅᕐᓂᖓᓄᓪᓗ ᑕᒪᐃᓐᓂᒃ ᐊᑦᑎᖕᓂᖅᓴᒃᑯᑦ ᖁᑦᑎᖕᓂᖅᓴᒃᑯᓪᓗ ᐃᓕᑕᕆᔭᐅᔾᔪᑎᒃᑯᑦ ᐊᖓᔪᖅᑳᙳᖅᓴᓂᕐᒧᑦ ᐃᓕᓐᓂᐊᕈᑎᒃᑯᑦ.
“ᒋᐅᓪ ᑕᒪᐃᓐᓂᒃ ᓵᓚᒃᓴᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ ᐃᐅᕐᔅ.
ᐅᖃᐅᓯᐅᔭᕆᐊᖃᕐᒥᔪᖅᑕᐅᖅ ᓂᐅᓴᓐ ᒪᐅᑕᕿᑦᓈᖅ, ᐱᓇᓱᐊᒃᑲᐅᓂᕐᒧᑦ ᐃᓕᑕᕆᔭᐅᓚᐅᖅᑐᖅ ᓱᓇᙳᖅᓴᓂᒃᑯᑦ ᓴᓇᑐᓕᓴᕐᕕᖕᒥ ᑕᒪᓐᓇ ᐃᑲᔫᓯᐊᒥᒃ ᑐᓂᕐᕈᐊᖅᑖᖑᖃᑦᑕᖅᑐᖅ ᑳᓕᓐ ᐊᒻᒪᓗ ᓵᓐᑎ ᓂᐱᐊᒥᙶᖅᑐᒥᒃ, ᐃᓕᑕᕆᔭᐅᓚᐅᕐᒥᔪᖅ ᖁᑦᑎᖕᓂᖅᐹᒃᑯᑦ ᐊᔪᙱᓛᖑᖃᑕᐅᓂᖓᓄᑦ.
“ᓂᕆᐅᓚᐅᙱᑦᑐᖓ ᐱᓇᓱᐊᒃᑲᐅᓂᕐᒧᑦ ᐃᓕᑕᕆᔭᐅᓂᐊᕐᓂᕋᓄᑦ ᐊᒻᒪᓗ ᖁᑦᑎᖕᓂᖅᐹᒃᑯᑦ ᐊᔪᙱᓛᖑᖃᑕᐅᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᒪᐅᑕᕿᑦᓈᖅ. “ᖃᑉᓯᑲᓪᓚᐅᓚᐅᕐᒪᑕ ᐊᔪᙱᑦᑎᐊᖅᑐᑦ ᓱᓇᙳᖅᓴᓂᕐᒧᑦ ᐱᒋᐊᕈᑎᒃᑯᑦ ᐃᓕᓐᓂᐊᖃᑕᐅᔪᓂᒃ. ᐊᔭᐅᖅᑐᑦᑎᐊᓚᐅᕋᒪ ᐅᕙᒻᓂᒃ ᖃᐅᔨᒪᑉᓗᖓ ᐊᔪᙱᑦᑐᐊᓘᓂᖏᓐᓄᑦ. ᐃᖅᑲᐅᒪᐃᓐᓇᖃᑦᑕᕋᒪ ᖃᓄᖅ ᐊᑖᑕᒐ ᐅᕙᒻᓂᒃ ᐅᖃᐅᔾᔨᓚᐅᖅᓯᒪᓂᖓᓄᑦ: ᐃᒪᓐᓇ ᐅᖃᓚᐅᕐᒪᑦ, “ᐃᓐᓂᑯᓘᒃ, ᐱᓇᓱᐊᑦᑎᐊᖃᑦᑕᕆᑦ ᖃᓄᓗᒃᑖᖅ ᐱᓇᓱᐊᖅᑎᓪᓗᑎᑦ.”
ᑭᖑᓪᓕᖅᐹᒃ ᒪᕐᕉᒃ ᐅᑭᐅᑦ ᐃᓕᓐᓂᐊᕐᓂᐅᔪᑦ ᐊᒃᓱᕈᕐᓇᖃᑦᑕᓚᐅᖅᑑᒃ, ᒪᐅᑕᕿᑦᓈᖅ ᑕᐃᒪᓐᓇ ᐅᖃᖅᖢᓂ. ᓄᕙᒡᔪᐊᕐᓂᖅ ᓴᖅᑭᔮᖅᑎᓪᓗᒍ, ᐊᖏᕐᕋᒥᓄᑦ ᐅᑎᓚᐅᖅᓯᒪᔪᖅ ᐊᖏᕐᕋᒥᓂᒃ ᖃᒪᓂ’ᑐᐊᕐᒥ ᐃᓕᓐᓂᐊᓕᖅᖢᓂ. ᐅᑎᓚᐅᖅᑐᖅ ᑲᖏᖅᖠᓂᕐᒧᑦ ᐊᐃᑉᐸᒥᓄᙵᐅᑉᓗᓂ.
“ᒫᓐᓇᐅᔪᖅ ᐱᖃᑎᒪ ᐊᖓᔪᖅᑳᒃᑯᖓᓂᒃ ᐃᒡᓗᖃᖃᑕᐅᔪᒍᒃ,” ᑕᐃᒪᓐᓇ ᐅᖃᖅᖢᓂ.
ᒪᐅᑕᕿᑦᓈᖅ ᐱᓕᕆᕐᔪᐊᖃᑦᑕᖅᓯᒪᓂᖓ ᐃᑲᔪᖅᓯᒪᔪᖅ. ᐊᑕᐅᓯᖅ ᐱᓇᓱᐊᕈᓯᖅ ᐱᐊᓂᓵᖅᑎᓪᓗᒍ ᐃᓕᓐᓂᐊᕐᓂᖓᓄᑦ ᑖᒻᓇ ᐃᒡᓗᓂᒃ ᐋᖅᑭᐅᒪᑎᑦᑎᓂᕐᒧᑦ ᐃᓕᓐᓂᐊᕈᑎᒥᒃ ᐱᐊᓂᒃᓯᓚᐅᖅᑐᖅ ᒪᐃ ᐱᒋᐊᓕᓵᕐᓂᖓᓂᒃ, ᒪᐅᑕᕿᑦᓈᖅ ᐊᐅᔭᐅᔪᒥ ᓴᓇᔪᒪᖕᒪᖔᑦ ᖃᐅᔨᒋᐊᕐᕕᐅᓚᐅᖅᑐᖅ ᓴᒃᑯᒃᑯᓐᓄᑦ.
“ᓴᓇᑎᑕᐅᓕᖅᑐᖓ ᐃᓕᓐᓂᐊᕈᑎᒋᓯᒪᔭᒃᑯᑦ, ᐃᒡᓗᓂᒃ ᐋᖅᑭᐅᒪᑎᑦᑎᓂᒃᑯᑦ,” ᑕᐃᒪᓐᓇ ᐅᖃᖅᖢᓂ.