ᑲᖏᖅᖠᓂᕐᒥᐅᑕᖅ ᐊᖑᑎ ᐃᓕᐅᖅᑲᐃᖅᑳᖅᖢᓂ ᓯᕿᓂᒃᑯᑦ ᐅᖁᖅᓴᕈᑎᓂᒃ ᐃᒡᓗᕋᓛᕐᒥᓄᑦ, ᐃᖕᒥᓂᒃ ᐊᐱᕆᓚᐅᖅᑐᖅ ᓱᖕᒪᑦ ᑕᐃᒪᐃᓕᐅᑲᐅᑎᒋᓚᐅᙱᒻᒪᖔᕐᒥ.
ᔮᒃᓴᓐ ᓕᓐᑎᐅᓪ ᑕᐃᒪᓐᓇ ᐃᓱᒪᓕᓚᐅᖅᑐᖅ ᑐᓴᖅᑎᑕᐅᖅᑳᖅᖢᓂ ᓄᓇᖅᑲᑎᒥᓄᑦ, ᐊᒻᒪᓗ ᐱᓕᕆᒃᑲᐅᑉᓗᓂ ᖃᐅᔨᔪᒪᒃᑲᐅᑉᓗᓂᓗ ᓇᖕᒥᓂᖃᖅᑎ, ᖃᐅᔨᒋᐊᓕᓚᐅᖅᑐᖅ ᑕᐃᒪᐃᑦᑐᓕᖅᑐᐃᔪᒪᑉᓗᓂ ᐃᒡᓗᕋᓛᕐᒥᓂᒃ.
“ᐅᕙᒻᓂᒃ ᑐᑭᓯᒋᐊᖅᑎᑦᑎᓚᐅᖅᑐᖅ ᖃᓄᖅ ᑲᒪᒋᔭᐅᖃᑦᑕᕐᓂᖏᓐᓄᑦ ᐊᒻᒪᓗ ᑕᑯᑎᖦᖢᓂᖓ ᖃᓄᖅ ᐊᔪᕐᓇᙱᑎᒋᖕᒪᖔᑕ ᐃᒡᓗᕋᓛᕐᒧᑦ ᐃᓕᐅᖅᑲᐃᑉᓗᓂ ᐃᓱᒪᓕᓚᐅᖅᑐᖓ, ᐊᑏ, ᓱᖕᒪᑦ ᑲᒪᒋᐊᙱᓚᖓ ᓱᓕ?” ᑕᐃᒪᓐᓇ ᐅᖃᖅᖢᓂ ᓕᓐᑎᐅᓪ.
“ᓇᓂᓯᓕᓚᐅᖅᑐᖓ ᒥᑭᔪᒥᒃ ᐊᑐᖅᑐᒃᓴᒥᒃ, ᐸᑕᓖᖅᑖᖅᖢᖓ ᐊᒻᒪᓗ ᐃᒡᓗᕋᓛᒻᓄᑦ ᐃᓕᐅᖅᑲᖅᖢᒋᑦ. ᒫᓐᓇᑲᐅᑎᒋ ᐊᑐᓕᓚᐅᖅᑐᖅ. ᐸᑕᓖᖅ ᓈᒻᒪᒃᓯᖕᒪᑦ ᐃᓕᐅᖅᑲᖅᖢᒍ ᐃᒡᓗᕋᓛᒻᓄᑦ ᐊᒻᒪᓗ ᐊᑐᓕᖅᖢᓂ, ᖃᐅᒻᒪᖅᑯᑎᖃᓕᓚᐅᖅᑐᒍᑦ ᐃᑯᒪᓅᕈᑎ ᐊᑐᕐᓇᒍ. ᐃᓱᒪᓕᓚᐅᖅᑐᖓᓘᓐᓃᑦ ᓱᖕᒪᑦ ᑕᐃᒪᐃᓕᐅᖅᓯᒪᙱᒻᒪᖔᕐᒪ ᖁᓕᓂᒃ ᐅᑭᐅᓂᒃ ᖄᖏᓵᖅᑐᓂᒃ ᐊᒻᒪᓗ ᖃᖓᓂᑕᖅᑎᑐᑦ ᐱᓕᕆᓯᒪᖕᒪᖔᕐᒪ.”
ᑕᐃᒪᐃᓚᐅᖅᑐᖅ 2018-ᒥ, ᐊᒻᒪᓗ ᑕᐃᒪᙵᓂ ᐱᓕᕆᐊᖃᕈᒪᓪᓚᕆᒃᓯᒪᓕᖅᑐᖅ ᖃᐅᒻᒪᖅᑯᑐᓕᕆᓂᕐᒥᒃ ᑮᓇᐅᔭᖅᑐᓗᐊᙱᑦᑐᒃᑯᑦ ᐊᒻᒪᓗ ᐃᑲᔪᖅᑐᐃᓯᒪᓪᓚᕆᒃᑐᖅ “ᓄᓇᒥᙶᖅᑐᓂᒃ” ᐊᑐᖔᕐᓗᓂ ᐅᖁᖅᓴᕈᓐᓇᕈᒪᓂᕐᒧᑦ ᐃᒡᓗᕋᓛᒃᑯᑦ.
ᐃᒡᓗᕋᓛᑦ ᖃᐅᒻᒪᖅᑯᑎᖃᕆᐊᖃᖃᑦᑕᕐᒪᑕ, ᑕᒪᓐᓇ ᐅᖃᖅᖢᓂ; ᐅᖃᓘᑎᕋᓛᓂᒃ ᖃᕆᑕᐅᔭᕋᓛᓂᒃ ᐊᑐᕈᓐᓇᖅᑎᑦᑎᔪᒪᓂᕐᒧᑦ, ᐃᑭᑦᑕᖅᑐᖃᕈᒪᓂᕐᒧᑦ ᐊᒻᒪᓗ ᐊᑐᕈᓐᓇᕈᒪᓂᕐᒧᑦ ᑕᓚᕕᓴᓂᒃ ᐊᒻᒪᓗ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᑐᕆᐊᓕᖕᓂᒃ.
ᓯᕿᓂᕐᒧᑦ ᖃᐅᒻᒪᖅᑯᑎᓕᐅᕈᑎ ᐸᑕᓖᖓ ᐊᑑᑎᖃᓲᖅ ᑕᒪᒃᑯᓄᙵᓗᒃᑖᖅᑲᔭᖅ, ᖃᓄᖅ ᖃᐅᒻᒪᖅᑯᑎᖃᕆᐊᖃᕐᓂᖏᑦ ᒪᓕᒃᖢᒋᑦ ᐅᑉᓗᑕᒫᒃᑯᑦ.
“ᐃᑯᒪᓅᕈᑎ ᐊᐅᓪᓛᖅᑎᓚᐅᐱᓪᓚᒋᐊᖃᕋᔭᖅᑐᒃᓴᐅᔪᖅ, ᑭᓯᐊᓂ ᐋᖅᑭᐅᒪᓂᖓ ᑕᒪᑐᒪ ᐸᑕᓖᒃᑯᑦ ᖃᐅᒻᒪᖅᑯᑎᖃᕈᑎᖓ ᐊᒻᒪᓗ ᐃᑯᒪᓅᕈᑎᒃᑯᑦ ᐊᑕᐅᓯᕐᒨᓕᖓᓲᑦ,” ᑕᐃᒪᓐᓇ ᑐᑭᓯᑎᑦᑎᒋᐊᖅᖢᓂ ᓕᓐᑎᐅᓪ. “ᐊᔪᕐᓇᙱᑦᑐᑯᓗᒃ ᐱᓇᓱᐊᖅᖢᓂ ᐊᑕᐅᓯᕐᒥ ᐱᖃᑎᖓᓄᑦ.”
ᐃᒡᓗᕋᓛᑦ ᐊᑐᖅᑕᐅᖃᑦᑕᙱᑦᑑᒐᓗᐊᑦ ᐅᑭᐅᒃᑯᑦ, ᓯᕿᓂᒃᑯᑦ ᐸᑕᓖᖅᑖᕈᑏᑦ ᖃᐅᒻᒪᖅᑯᑎᑖᕈᑕᐅᔪᓐᓇᖃᑦᑕᖅᑐᑦ ᓯᕿᓂᖄᕐᔪᖕᓂᒃᑯᑦ, ᑕᐃᒪᓐᓇ ᐅᖃᖅᖢᓂ.
ᐃᒡᓗᕋᓛᖓ ᑲᖏᖅᖠᓂᐅᑉ ᓯᓚᑖᓃᑦᑐᖅ ᐊᒻᒪᓗ ᐊᑐᕆᐊᖃᕋᔪᒃᑐᖅ. ᐊᓯᐊᒍᑦᑕᐅᖅ ᐃᑲᔫᑎᖃᕐᓂᖓ ᓕᓐᑎᐅᓪ ᖃᐅᔨᓯᒪᔭᖓ ᐊᑐᓕᖅᑎᕆᓯᒪᑎᓪᓗᒍ ᓯᕿᓂᒃᑯᑦ ᖃᐅᒻᒪᖅᑯᑎᓕᕆᔾᔪᑎᒥᒃ ᐅᔾᔨᖅᑐᕐᓂᖅᓴᐅᓕᖅᑐᖅ ᖃᐅᒻᒪᖅᑯᑎᓕᕆᔾᔪᑎᓂᒃ ᖃᓄᕐᓗ ᐊᑐᑦᑎᐊᖃᑦᑕᕆᐊᖃᕐᓂᕐᒧᑦ.
“ᑕᒪᓐᓇ ᐃᓕᑦᑎᓐᓇᖅᑐᒻᒪᕆᐊᓗᒃ ᖃᓄᖅ ᐊᑐᓗᐊᖅᑕᐅᓕᒪᓇᔭᕐᓂᕐᒧᑦ ᖃᒻᒪᖅᑯᑎᓂᒃ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᕿᑎᒃᑐᑎᑐᑦ ᐱᓕᕆᓇᓱᒃᑑᔭᕐᓇᕐᒪᑦ ᐊᐅᓚᑦᑎᓂᒃᑯᑦ ᖃᐅᒻᒪᖅᑯᑎᓂᒃ ᐊᑐᑦᑎᐊᕈᒪᓂᒃᑯᓪᓗ. “ᐃᓕᑦᑎᐊᓚᓐᓇᒻᒪᕆᒃᑐᖅ ᖃᒥᑎᕆᖃᑦᑕᕆᐊᖃᕐᓂᕐᒧᑦ ᐊᑐᙱᑦᑐᓂᒃ ᐃᑭᑦᑕᖅᑐᓂᒃ,” ᐊᒻᒪᓗ ᑲᑉᐳᔾᔭᐃᖃᑦᑕᕆᐊᖃᕐᓂᖏᓐᓄᑦ ᐊᑐᙱᑦᑐᓂᒃ.
ᐃᖕᒥᓄᑦ, ᑕᒪᓐᓇ ᐊᒃᓱᕉᑎᒋᓕᖅᑕᖓ.
“ᑕᐃᒪᐃᑦᑐᓕᕆᓪᓚᑦᑖᓕᖅᖢᓂ, ᕿᓂᖃᑦᑕᓕᕐᓇᖅᑐᖅ ᖃᓄᖅ ᐊᑐᑦᑎᐊᕐᓂᖅᓴᐅᔪᒪᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᓕᓐᑎᐅᓪ, ᐊᓯᔾᔩᓯᒪᔪᖅᑕᐅᖅ ᓲᕐᓗ ᐊᑐᖔᓕᖅᖢᓂ tungsten-ᓂᒃ ᓴᙲᓐᓂᖅᓴᓄᑦ ᐃᑭᑦᑕᖅᑐᓄᑦ.
“ᕿᑎᒍᑎᒋᓕᕐᓇᖅᑐᑦ, ᐊᒻᒪᓗ ᐱᓕᕆᐊᕆᔪᒪᓕᕐᓇᖅᑐᑦ ᖃᐅᔨᓇᓱᒃᖢᓂ ᖃᓄᖅ ᐊᑐᑦᑎᐊᒃᑲᓐᓂᕋᔭᕐᓂᕐᒧᑦ. ᐊᒻᒪᓗ ᑕᐃᒪᓐᓇᑐᐃᓐᓇᐅᙱᑦᑐᖅ: ᖃᐅᔨᕙᓪᓕᐊᓐᓇᖅᑐᖅ ᖃᓄᖅ ᐱᔭᕆᐊᑐᒋᙱᓐᓂᖅᓴᐅᖕᒪᖔᑦ. ᑐᑭᓯᕙᓪᓕᐊᑉᓗᓂ ᖃᓄᐃᓕᐅᕈᑎᒃᓴᓂᒃ, ᖃᐅᔨᓐᓇᖅᑐᖅ ᓇᐅᒃᑯᑦ ᐃᓚᕙᓪᓕᐊᔪᓐᓇᕐᒪᖔᑕ ᐅᕝᕙᓘᓐᓃᑦ ᐃᑯᒪᓅᕈᑎᒃᑯᑦ ᖃᓄᖅ ᐱᓂᖅᓴᐅᔪᓐᓇᕐᓂᕐᒧᑦ. ᑕᒪᒃᑯᐊ ᐊᓕᐊᓇᐃᑦᑐᓪᓚᕇᑦ ᐃᓅᓯᒃᑯᑦ ᐱᕚᓪᓕᖅᑎᑦᑎᓂᖅᓴᐅᔫᔭᕐᓇᖅᑐᖅ.”
ᐃᒡᓗᒥᓄᑦ ᐃᓕᐅᖅᑲᐃᓯᒪᙱᑦᑐᖅ ᓱᓕ ᐱᔭᕆᐊᑐᓂᖅᓴᐅᖕᒪᑦ; ᑭᓯᐊᓂᓕ ᓂᐅᕕᐊᒃᓴᖃᖃᑦᑕᓕᖅᑐᖅ ᐃᓕᐅᖅᑲᐃᔾᔪᑎᒃᓴᓂᒃ ᐃᒡᓗᕋᓛᓄᑦ. ᓂᐅᕕᖅᑎᑦᑎᓚᐅᖅᑐᖅ 8-ᓂᒃ ᖁᓕᓂᒡᓘᓐᓃᑦ ᑲᖏᖅᖠᓂᕐᒥ ᐊᒻᒪᓗ ᐅᖃᖅᖢᓂ ᐊᑭᖃᖃᑦᑕᕐᓂᖏᓐᓄᑦ ᐃᒻᒪᖄ $2,000-ᓂᒃ ᒥᑭᓂᖅᓴᒃᑯᑦ.
ᓄᓇᕗᑦ ᒐᕙᒪᒃᑯᖏᑦ ᑐᓴᖅᑎᑦᑎᓵᓚᐅᖅᑐᑦ ᑐᓂᓯᔪᓐᓇᖅᓯᓯᒪᓂᕐᒧᑦ ᐃᑲᔫᑎᓂᒃ ᐃᓕᐅᖅᑲᖅᑕᐅᔪᓐᓇᖅᑐᓂᒃ ᖃᐅᒻᒪᖅᑯᑎᓕᕆᔾᔪᑎᓂᒃ ᐃᒡᓗᕋᓛᓄᑦ ᐊᖏᕐᕋᕆᔭᐅᔪᓄᓪᓗ. ᐃᒡᓗᓖᑦ ᐃᒡᓗᕋᓛᓖᑦ ᐆᒃᑐᕈᓐᓇᖅᑐᑦ ᒐᕙᒪᒃᑯᑦ ᐊᕙᑎᓕᕆᔨᒃᑯᖏᓐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑎᑎᕋᕐᕕᖕᒥ ᐊᑕᐅᓰᕐᓗᑎᒃ ᑐᓂᓯᔪᓐᓇᖃᑦᑕᖅᑐᑦ $5,000-ᒧᑦ ᐃᓕᐅᖅᑲᐃᔾᔪᑎᒃᓴᓂᒃ ᓯᕿᓂᒃᑯᑦ ᐅᕝᕙᓘᓐᓃᑦ ᐊᓄᕆᒃᑯᑦ ᖃᐅᒻᒪᖅᑯᑎᑖᕈᑎᓂᒃ. ᐃᒡᓗᖃᖅᑐᑦ ᐆᒃᑐᕈᓐᓇᖅᑐᑦ ᑕᒪᑐᒥᙵ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᐊᑕᐅᓰᕐᓗᑎᒃ ᑐᓂᔭᐅᔪᓐᓇᕐᓂᕐᒧᑦ ᓇᑉᐸᖓᓂᒃ ᐊᑭᒋᔭᐅᕙᒃᑐᒃᑯᑦ – ᖁᑦᑎᖕᓂᖅᐹᒃᑯᑦ $30,000-ᒥᒃ – ᓯᕿᓂᒃᑯᑦ ᖃᐅᒻᒪᖅᑯᑎᓕᕆᔾᔪᑎᒃᑯᑦ.
ᐃᓕᐅᖅᑲᕐᓂᐊᕐᓗᒋᑦ ᐊᖏᕐᕋᕆᔭᕐᒥ, ᐃᒡᓗᖁᑎᓖᑦ ᐊᖏᖅᑕᐅᖃᑦᑕᕆᐊᓖᑦ ᖁᓪᓕᖅ ᖃᐅᒻᒪᖅᑯᑎᓕᕆᔨᒃᑯᓐᓄᑦ ᐃᓚᐅᖃᑕᐅᔪᓐᓇᖅᓯᓂᕐᒧᑦ Net Metering ᐃᑲᔫᑎᒃᑯᑦ, ᖃᐅᒻᒪᖅᑯᑎᑖᕈᑎᒃᑯᑦ ᐃᑲᔫᓯᐊᖅᑖᕈᑎ ᖃᐅᒻᒪᖅᑯᑎᓕᐅᕈᑎᓂᒃ ᐃᓕᓯᔪᓐᓇᖅᓯᓂᕐᒧᑦ ᖃᐅᒻᒪᖅᑯᑎᓕᕆᔨᒃᑯᑎᒍᑦ.
ᐃᓕᑦᑎᒃᑲᓐᓂᕈᒪᒍᕕᑦ ᑐᓂᕐᕈᑎᒃᓴᐅᑉ ᒥᒃᓵᓄᑦ, ᑕᑯᒋᐊᕐᓗᒍ ᐅᓇ climatechangenunavut.ca ᐅᕝᕙᓘᓐᓃᑦ ᐅᓇ nunavuthousing.ca.