ᐊᕐᕕᐊᕐᒥᐅᑕᖅ ᓱᓴᓐ ᐊᒡᓘᒃᑲᖅ ᐃᓕᑕᕆᔭᐅᔾᔪᑎᑖᖅᓯᒪᓂᑯᒻᒪᕆᐊᓗᒃ, ᐊᑕᐅᓯᕐᒥᒃ ᐃᓕᑕᕆᔭᐅᔾᔪᑎᑖᒃᑲᓐᓂᖅᑐᖅ ᑕᐃᒪᐅᑎᓪᓗᒋᑦ – ᑯᐃᓐ ᐃᓕᑕᕆᔭᐅᔾᔪᑎᖓᓂᒃ ᐱᓯᒪᑉᓗᓂ, ᖃᑉᓯᑲᓪᓚᖕᓂᒃ Juno-ᑯᑦ ᐃᓕᑕᕆᔭᐅᓯᒪᑉᓗᓂ, ᑯᐃᓐ ᑭᒡᒐᖅᑐᐃᔨᖓᑕ ᐃᓕᑕᕆᓯᒪᑉᓗᓂᐅᒃ ᐃᒻᖏᖅᑎᐅᓂᖓᓄᑦ – ᐃᓚᒋᐊᑐᐃᓐᓇᖅᑑᔭᖅᑐᑦ, ᑭᓯᐊᓂ ᑭᖑᓪᓕᖅᐹᖅ ᐃᓕᑕᕆᔭᐅᔾᔪᑎᑖᕈᑎᖓ ᐃᒃᐱᒋᓪᓚᕆᒃᑕᖓ. “ᐊᔾᔨᐅᙱᑦᑑᔪᖅ ᐊᒻᒪᓗ ᐅᐱᒋᓪᓚᕆᒃᑕᕋ, ᐃᓗᐃᑦᑐᕈᖅᑑᔭᖅᑐᖓᓘᓐᓃᑦ,” ᑕᐃᒪᓐᓇ ᐅᖃᖅᖢᓂ ᐊᒡᓘᒃᑲᖅ ᑐᓂᔭᐅᓂᐊᖅᑎᓪᓗᒍ 2022-ᒥ ᐃᓅᖃᑎᒥᓂᒃ ᐃᒃᐱᒍᓱᑦᑎᐊᖃᑦᑕᕐᓂᕐᒧᑦ ᐃᓕᑕᕆᔭᐅᔾᔪᑎᒥᒃ ᑐᓂᔭᐅᑎᓪᓗᒍ ᑲᓇᑕᒥ ᐃᒻᖏᐅᑎᓕᐅᖅᑎᒃᑯᓐᓄᑦ 51-ᒋᔭᖓᓂᒃ JUNO-ᑯᑦ ᐃᓕᑕᖅᓯᑲᑕᖕᓂᐊᖅᑎᓪᓗᒋᑦ.
ᓯᕗᓪᓕᖅᐹᖅ ᓂᐱᓕᐊᕆᓚᐅᖅᑕᖓ ᐃᒪᓐᓇ ᑕᐃᒎᓯᖃᓚᐅᖅᑐᖅ Arctic Rose, ᓯᕗᓪᓕᖅᐹᖅ ᐃᒻᖏᖅᑕᖓ ᑕᐃᒪᓐᓇ ᑕᐃᒎᓯᖃᖅᖢᓂ ᐅᖃᐅᓯᖃᖅᑐᖅ ᖃᓄᖅ ᐃᒃᐱᒍᓱᓚᐅᕐᒪᖔᕐᒥ ᐃᓚᐃᖅᖢᓂ ᐃᓅᓯᕐᒥᓂᒃ ᑭᐱᓯᔪᒃᑯᑦ.
“30 ᐅᑭᐅᑦ ᖄᖏᖅᓯᒪᓕᖅᑎᓪᓗᒋᑦ, ᓴᖅᑭᑎᑦᑎᔪᓐᓇᖅᓯᓚᐅᕋᒪ ᐃᑲᔫᑎᒃᓴᒥᒃ ᐃᒪᓐᓇ ᑕᐃᒎᓯᓕᖕᒥᒃ Arctic Rose Foundation-ᒥᒃ, ᑕᒡᕘᓇ ᐃᓄᐃᑦ ᐊᔪᙱᑕᒥᓂᒃ ᓴᖅᑭᑎᑦᑎᔪᓐᓇᖃᖅᑕᖅᖢᑎᒃ ᐊᒻᒪᓗ ᐃᖕᒥᓂᒃ ᐅᒃᐱᕈᓱᒍᓐᓇᖅᓯᓂᕐᒧᑦ ᐊᒻᒪᓗ ᓂᕆᐅᒃᑲᓐᓂᕈᓐᓇᖅᓯᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᐊᒡᓘᒃᑲᖅ.
Arctic Rose ᐃᑲᔫᑎ ᐱᒋᐊᖅᑎᓚᐅᖅᑕᖓ 2012-ᒥ, ᐊᑎᓕᐅᖅᑕᐅᖃᑕᐅᓯᒪᓕᖅᖢᒍ ᐃᑲᔪᕆᐊᕈᑕᐅᔪᓐᓇᖁᑉᓗᒍ ᑕᐃᒎᓯᖃᖅᖢᓂ ᐃᒪᓐᓇ Arctic Rose Foundation 2016-ᒥ ᐊᒻᒪᓗ ᐊᑐᓕᖅᑎᖅᓯᒪᓕᖅᖢᒍ 2020-ᒥ. ᑕᒪᓐᓇ ᐃᑲᔫᑕᐅᔪᖅ ᐅᑭᐅᖅᑕᖅᑐᒥ ᐃᓄᖕᓄᑦ, ᐃᖅᑭᓕᖕᓄᑦ ᐊᒻᒪᓗ ᐊᓪᓚᖓᔪᑦ ᒪᒃᑯᒃᑐᖏᓐᓄᑦ ᓴᖅᑭᑎᑕᐅᓯᒪᑉᓗᓂ ᓄᓇᖃᖅᑳᖅᓯᒪᔪᓄᑦ, ᐊᔪᙱᑕᒥᓂᒃ ᐊᑐᖅᖢᑎᒃ ᐱᕙᓪᓕᐊᑎᑦᑎᖃᑦᑕᕈᓐᓇᖁᑉᓗᒋᑦ ᐃᓕᓐᓂᐊᕌᓂᒃᑳᖓᒥᒃ.
ᐆᒃᑐᖅᑕᐅᖅᑳᓚᐅᖅᑐᖅ ᑲᖏᖅᖠᓂᕐᒥ ᔭᓄᐊᕆ 2017-ᒥ, ᐃᓕᓐᓂᐊᖅᑐᑦ ᐃᓗᐃᑦᑐᒃᑯᑦ ᐃᓕᓐᓂᐊᓕᖅᑎᓪᓗᒋᑦ ᑕᐃᑲᓂ ᐊᒻᒪᓗ ᐊᕐᕕᐊᓂ 2018-19-ᒥ.
ᑕᒪᓐᓇ ᐃᑲᔫᑎ ᖃᕆᑕᐅᔭᒃᑯᑦ ᐃᓕᓐᓂᐊᕈᑕᐅᖔᓕᓚᐅᕐᒥᔪᖅ ᓄᕙᒡᔪᐊᕐᓂᖅᑕᖃᓕᖅᑎᓪᓗᒍ, ᐃᓕᓐᓂᐊᕈᑕᐅᑉᓗᓂ ᐃᖃᓗᒃᑑᑦᑎᐊᕐᒥ ᐊᒻᒪᓗ ᐃᒃᐱᐊᕐᔪᖕᒥ.
“ᑕᐃᒪᐅᒐᓗᐊᖅᑎᓪᓗᒍ ᓄᕙᒡᔪᐊᕐᓂᖅ, ᓱᖏᐅᑎᕙᓪᓕᐊᖏᓐᓇᖅᑐᒍᑦ,” ᑕᐃᒪᓐᓇ ᐅᖃᖅᖢᓂ ᐊᒡᓘᒃᑲᖅ, ᐅᖃᖅᖢᓂᓗ ᓴᓂᑭᓗᐊᕐᒥ ᓴᖅᑭᓐᓂᐊᓚᐅᖅᑑᒐᓗᐊᖅ ᑭᓯᐊᓂ ᓄᕙᒡᔪᐊᕐᓂᖅ ᓴᖅᑭᒻᒪᑦ ᓄᕙᒡᔪᐊᕐᓂᖅᑕᓖᓪᓗ ᐃᓚᕚᓪᓕᖅᓯᒪᑎᓪᓗᒋᑦ ᐱᔪᓐᓇᐃᓪᓕᓚᐅᖅᑐᑦ. “ᐃᑲᔫᑎᒥᒃ ᐊᑐᕈᒪᔪᑦ ᐊᒥᓲᔪᑦ.”
ᖁᕕᐊᓱᒃᑐᖅ ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓖᑦ ᖃᓱᒋᐊᖅᑕᐅᓕᕋᔭᕐᓂᖏᓐᓄᑦ ᐊᒻᒪᓗ ᐃᓄᐃᑦ ᐅᐸᓪᓚᑦᑖᕐᓗᓂᒋᑦ ᐃᓕᓐᓂᐊᖅᑎᑦᑕᖅᑐᕈᓐᓇᕈᒫᕈᒪᑉᓗᒋᑦ, ᑕᐃᒪᐃᑦᑕᕆᐊᖃᖅᓯᒪᒐᓗᐊᕐᒪᑕ.
“ᐃᓕᓐᓂᐊᕐᕕᑦ ᑎᑭᑦᑐᓐᓇᖅᓯᓂᕋᐃᓕᖅᐸᑕ, ᑎᑭᑦᑐᒫᖅᑐᒍᑦ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᐃᓕᓐᓂᐊᖅᑐᑦ ᐊᔪᙱᓐᓂᕆᔭᒥᓂᒃ ᓴᖅᑭᑎᑦᑎᓪᓚᕆᖃᑦᑕᕐᒪᑕ.
ᐊᒡᓘᒃᑲᖅ ᑐᓂᔭᐅᓂᐊᖅᑐᖅ ᐃᓕᑕᕆᔭᐅᔾᔪᑎᒥᓂᒃ JUNO-ᑯᓐᓄᑦ ᒪᐃᒥ. ᒫᓐᓇᓕ ᐃᒻᖏᖃᑦᑕᖅᑕᒥᓂᒃ ᓴᖅᑭᑎᑦᑎᓯᒪᓕᕐᒥᔪᖅ ᐃᒪᓐᓇ ᑕᐃᒎᓯᖃᖅᖢᓂ The Crossing ᓴᖅᑭᑦᑐᒫᖅᑐᖅ ᐊᐃᕆᓕ 29-ᒥ, ᐱᓕᕆᐊᖃᐃᓐᓇᖅᑐᖅ ᐃᓄᐃᑦ ᐊᔪᑎᓐᓂᕐᒥᓂᒃ ᓴᖅᑭᑎᑦᑎᕙᓪᓕᐊᔪᓐᓇᖁᑉᓗᒋᑦ ᐊᑐᐊᒐᖓᓂᒃ, ᓴᖅᑭᓐᓇᔭᖅᑐᖅ ᐅᑭᐊᒃᓵᖅ.
ᐃᓕᑕᖅᓯᔪᒪᔪᖅ ᓄᓇᓕᖕᓂᒃ ᐱᓕᕆᖃᑎᒋᔭᒥᓂᒃ ᑲᖏᖅᖠᓂᕐᒥ ᐃᑲᔪᖅᑐᐃᖏᓐᓇᕐᒪᑕ ᑕᒪᑐᒥᙵ ᐃᑲᔫᑎᒥᒃ ᓴᖅᑭᑎᑦᑎᕙᒃᑎᓪᓗᒍ, ᐅᑯᐊᖑᔪᑦ ᐃᓚᒌᒃᓴᒃᑯᑦ, ᑳᒻ ᐃᐊᒃᑯᑦ ᑎᖕᒥᓲᓕᕆᔨᒃᑯᑦ, ᑲᓇᐃᑎᔭᓐ ᓄᐊᑦᑐᒃ ᑎᖕᒥᓲᓕᕆᔨᒃᑯᑦ, ᒫᓂ ᐅᓗᔪᒃ ᐃᓕᓐᓂᐊᕐᕕᒃ ᐊᒻᒪᓗ ᒪᒃᑯᒃᑐᑦ ᐱᓕᕆᖃᑎᒋᕙᒃᑕᖏᑦ.