Skip to content

ᓴᓪᓕᓂ ᐃᓕᓴᐃᔨᓄᑦ ᐊᖓᔪᖅᑳᖓ ᐱᕗᖅ ᐃᓄᖕᓂ ᑲᒪᑦᑕᐊᕋᓱᐊᕐᓂᖓᓂ ᓵᓚᖃᐅᓯᐊᒥᒃ

ᓯᒨᓐ ᑎ ᒑᓂᔅ, ᐃᓕᓴᐃᔨᓄᑦ ᐊᖓᔪᖅᑳᖓ ᓴᓪᓕᓂ ᓴᒃᑯ ᐃᓕᓐᓂᐊᕐᕕᖓᓂ, ᐊᔾᔨᒌᙱᑦᑐᓂ ᐃᒃᐱᒍᓱᖕᓂᖃᓚᐅᖅᐳᖅ ᑐᓴᕋᒥ ᐱᓂᐊᕐᓂᖓᓂ ᐃᓄᖕᓂ ᑲᒪᑦᑕᐊᕋᓱᐊᕐᓂᖓᓂ ᓵᓚᖃᐅᓯᐊᒥᒃ ᓄᓇᕗᒻᒥ ᑲᒥᓴᓇ ᐄᕙ ᖃᒪᓂᖅ ᐋᕆᐊᕐᒥ.
31272178_web1_221212-KIV-INUKcoralawards_1
ᓴᒃᑯ ᐃᓕᓐᓂᐊᕐᕕᖓᓂ ᐃᓕᓴᐃᔨᓄᑦ ᐊᖓᔪᖅᑳᖓ ᓯᒨᓐ ᑎ ᒑᓂᔅ, ᓴᐅᒥᖕᒥ, ᐱᕗᖅ ᐃᓄᖕᓂ ᑲᒪᑦᑕᐊᕋᓱᐊᕐᓂᖓᓂ ᓵᓚᖃᐅᓯᐊᒥᒃ ᐄᕙ ᖃᒪᓂᖅ ᐋᕆᐊᕐᒥ, ᓄᓇᕗᒻᒥ ᑲᒥᓴᓇᖓᓐᓂ.

ᓯᒨᓐ ᑎ ᒑᓂᔅ, ᐃᓕᓴᐃᔨᓄᑦ ᐊᖓᔪᖅᑳᖓ ᓴᓪᓕᓂ ᓴᒃᑯ ᐃᓕᓐᓂᐊᕐᕕᖓᓂ, ᐊᔾᔨᒌᙱᑦᑐᓂ ᐃᒃᐱᒍᓱᖕᓂᖃᓚᐅᖅᐳᖅ ᑐᓴᕋᒥ ᐱᓂᐊᕐᓂᖓᓂ ᐃᓄᖕᓂ ᑲᒪᑦᑕᐊᕋᓱᐊᕐᓂᖓᓂ ᓵᓚᖃᐅᓯᐊᒥᒃ ᓄᓇᕗᒻᒥ ᑲᒥᓴᓇ ᐄᕙ ᖃᒪᓂᖅ ᐋᕆᐊᕐᒥ.

“ᐃᒃᐱᒍᓱᓚᐅᙱᓚᖓ ᓯᕗᓪᓕᖅᐹᒥ,” ᐅᖃᓚᐅᖅᐳᖅ ᑎ ᒑᓂᔅ ᖃᓄᐃᓐᓂᖓᓂ, ᑲᒥᓴᓇ ᐱᓕᕆᐊᖃᖅᑎᓪᓗᒍ ᖁᕕᐊᓱᒍᑕᐅᔪᒥ ᓵᓚᖃᐅᓯᐊᓄᑦ ᓴᓪᓕᓂ ᓇᒡᒐᔾᔭᐅ, ᑎᓯᐱᕆ 5−ᒥ.

“ᐊᑎᕋ ᖃᔅᓰᖅᓱᒐᓚᒃᖢᒍ ᐅᖃᐅᓯᐅᔪᖅ ᑐᓴᕋᒃᑯ, ᖃᐅᔨᒪᓚᐅᖅᐳᖓ ᐊᑎᕆᒐᒃᑯ, ᐊᒻᒪ ᓴᓇᖃᑎᓐᓂ ᖁᖓᑦᑐᖃᖅᖢᓂ ᐊᒻᒪ ᐅᖃᓚᐅᖅᐳᖅ, ‘ᐄ, ᐃᕝᕕᑦ, ᓯᒨᓐ.’ ᐊᓱᐃᓛᒃ ᑎᑭᖦᖢᓂ ᖁᖓᔮᕐᔪᐊᕐᓂᐅᔪᖅ ᖃᓂᕋ ᒪᑐᔪᓐᓇᐃᓪᓕᓪᓗᓂ.”

ᐅᖃᖅᑎᐅᔪᖅ ᖁᕕᐊᓱᒍᑕᐅᔪᒥ ᐅᖃᕐᒪᑦ ᓈᒻᒪᒃᓯᓂᖓᓂ ᑐᓂᓯᓂᕐᒥ ᐃᓄᖕᓂ ᑲᒪᑦᑕᐊᕋᓱᐊᕐᓂᖓᓂ ᓵᓚᖃᐅᓯᐊᓂᑦ, ᑎ ᒑᓂᔅ ᐃᔨᖏᑦ ᖁᕝᕕᐅᓕᓚᐅᖅᐳᑦ.

“ᐃᖅᑲᓇᐃᔮᓐᓂ ᐱᓕᕆᑐᐃᓐᓇᖅᐳᖓ ᐱᔪᓐᓇᕐᓂᓕᒫᓐᓂ, ᖃᐅᔨᒪᓂᓐᓂ ᐊᒻᒪ ᐊᑐᓕᒪᓂᕐᓂᑦ,” ᐅᖃᓚᐅᖅᐳᖅ ᒥᒃᖠᑎᖅᑐᕐᒥ ᐃᓕᓴᐃᔨᓄᑦ ᐊᖓᔪᖅᑳᖓ. “ᐱᔨᑦᑎᕋᑐᐃᓐᓇᓲᖑᕗᖓ ᐃᓕᓐᓂᐊᖅᑎᓂᑦ. ᐅᕙᓂ ᐃᖏᕐᕋᓂᐅᔪᒥ ᑕᐃᔭᐅᔪᒥ ᐃᓅᓯᕐᒥ, ᐃᓅᕙᒃᐸᕗᑦ ᐅᕝᕙᓘᓐᓃᑦ ᐊᓂᒍᑐᐃᓐᓇᓲᖑᕗᒍᑦ ᑕᒪᐅᓇ ᐊᑕᐅᓯᐊᑐᐃᓐᓇᖅᖢᑕ.”

ᐱᓕᕆᓂᖓ ᐃᓕᓴᐃᔨᓄᑦ ᐊᖓᔪᖅᑳᖑᓂᖓᓂ ᓯᕗᓂᐊᓂ ᐃᓕᓴᕆᔭᐅᓯᒪᒋᕗᖅ, ᐃᓚᖃᖅᑐᒥ ᐱᓂᖓᓂ ᕆᒃ ᕼᐋᓐᓯᓐ ᑐᙵᕕᐅᔪᒥ ᐃᓕᓐᓂᐊᕐᕕᖕᒧᑦ ᐱᓕᕆᐊᖑᔪᒥ ᐊᔾᔨᐅᙱᑎᑦᑎᔨᐅᔪᒧᑦ ᐊᕐᕌᒍᒥ ᓵᓚᖃᐅᓯᐊᒥᒃ ᖃᖓᒃᑲᓐᓂᖅ ᑕᒪᑐᒪᓂ ᐊᕐᕌᒎᔪᒥ.

ᐱᒋᐊᓚᐅᖅᐳᖅ ᓴᒃᑯ ᐃᓕᓐᓂᐊᕐᕕᖓᓂ 2020−ᒥ, ᐱᓕᕆᐊᒃᓴᖃᖅᖢᓂ ᑕᑯᓂᕐᒥ ᐊᒻᒪ ᑲᒪᒋᔭᖃᖅᐸᒡᓗᓂ ᐊᑐᓂ ᓱᕈᓯᐅᔪᒥ ᓲᕐᓗ ᓇᖕᒥᓂᕆᓂᖏᓐᓄᑦ.

“ᐅᓇ ᑐᕌᒐᕆᔭᐅᔪᖅ ᐅᕙᓐᓂ ᐱᔪᓐᓇᖅᑎᑦᑎᕗᖅ ᐃᓯᕐᓂᖓᓂ ᓄᓇᕐᔪᐊᖓᓄᑦ, ᐊᐅᓪᓛᖃᑎᒋᓗᒋᑦ, ᐃᓕᑦᑎᕝᕕᒋᓗᒋᑦ ᐊᒻᒪ ᐱᕈᖃᑎᒋᓗᒋᑦ ᐃᑲᔫᔮᕐᔪᒃᑎᓪᓗᖓ ᐋᖅᑭᒃᓱᐃᓂᕐᒥ ᐊᑐᓂ ᐃᓄᖕᒥ ᑕᒪᒃᑭᐅᒪᔪᒥ ᐱᔪᓐᓇᕐᓂᕆᔭᖓᓂ,” ᐅᖃᓚᐅᖅᐳᖅ ᑎ ᒑᓂᔅ.

“ᐃᑲᔪᖅᓱᐃᓂᖅ ᐊᒻᒪ ᐊᔭᐅᕆᓂᕐᒥ ᐃᓄᐃᑦ ᐱᖅᑯᓯᑐᖃᖏᓐᓂ, ᐃᓕᖅᑯᓯᖓᓐᓂ, ᐅᖃᐅᓯᕐᒥ ᐊᒻᒪ ᐃᓅᓯᕆᕙᒃᑕᖏᓐᓂ ᐃᓚᖃᒐᓛᒃᑐᒥ ᐃᓕᓐᓂᐊᕐᓂᐅᔪᒥ — ᓴᓇᕗᒍᑦ ‘ᐃᓗᐃᑦᑑᔪᓂ’ ᐃᓄᖕᓂ. ᑕᐃᒪᐃᑦᑐᒥ ᖃᓄᐃᑦᑑᓂᖓᓂ ᓇᓗᓇᐃᖅᓯᓂᐅᔪᒥ ᐅᕙᓐᓂ ᐅᔾᔨᖅᑐᐃᓐᓇᕐᓇᖅᐳᖅ ᐊᒻᒪ ᑕᑯᒃᓴᐅᑎᑦᑎᓂᖃᖅᖢᓂ ᐱᓕᕆᑦᑎᐊᕐᓂᓐᓂ; ᐱᑕᖃᙱᑎᓪᓗᒍ, ᓱᓖᓐᓇᓲᖑᕗᖓ ᑕᐃᒃᑯᓄᖓ ᐱᔨᑦᑎᕋᖅᑕᓐᓄᑦ ᑐᓂᓯᓪᓗᖓ ᑭᓱᓕᒫᕆᔭᓐᓂ.”

ᐅᖃᐅᓯᖃᓚᐅᖅᐳᖅ ᖁᔭᓕᓂᖓᓂ ᓄᓇᓕᖕᓄᑦ ᓴᓪᓕᓄᑦ ᓂᕈᐊᖅᑕᐅᓂᖓᓂ ᐊᒻᒪᓗ ᑲᒥᓴᓇᐅᑉ ᑎᑎᕋᕐᕕᖓᓄᑦ ᐊᒻᒪ ᑲᑎᙵᓂᐅᔪᒥ ᑐᓂᓯᔪᓂ ᓵᓚᖃᐅᓯᐊᒥᒃ.

“ᐅᖃᕈᓐᓇᖅᐳᖓ ᐱᒋᐊᓕᑐᐃᓐᓇᕐᓂᑦᑎᓐᓂ,” ᐅᖃᓚᐅᖅᐳᖅ ᑎ ᒑᓂᔅ, “ᓴᒃᑯ ᐃᓕᓐᓂᐊᕐᕕᖓᓂ, ᓴᓪᓕᓂᑦ, ᐃᓯᒐᕗᑦ ᓄᓇᒦᑏᓐᓇᖅᐸᕗᑦ ᐃᓴᒃᓯᒪᐃᓐᓇᖅᑎᓪᓗᑕ ᕿᓚᖕᒧᑦ.”

ᐊᓯᖏᑦ ᐱᓚᐅᕆᕗᑦ ᓵᓚᖃᐅᓯᐊᓂᑦᑕᐅᖅ, ᐃᓚᖃᖅᑐᒥ ᖃᔅᓯᒐᓚᖕᓂ ᖃᐅᔨᒪᓂᕐᒧᑦ−ᐸᖅᑭᔨᐅᔪᓄᑦ, ᑲᑉᐱᐊᑦᑕᐃᓐᓂᕐᒧᑦ, ᒪᒃᑯᒃᑐᓄᑦ ᐊᒻᒪ ᐊᒥᓱᒃᑲᓐᓂᕐᓂ.

ᐃᓕᓴᐃᔨ ᓇᓕ ᐃᐅᓪ ᐱᓚᐅᖅᐳᖅ ᐃᓄᖕᓂ ᑲᒪᑦᑕᐊᕋᓱᐊᕐᓂᖓᓂ ᓵᓚᖃᐅᓯᐊᒥᒃ, ᐅᓂᒃᑳᕆᔪᒥ ᐃᖅᑲᓇᐃᔭᕐᓂᖓᓂ ᑕᖃᓱᐃᑦᑑᓪᓗᓂ “ᐊᒥᓱᓄᑦ ᐊᕐᕌᒍᓄᑦ ᐊᔭᐅᕆᓂᕐᒥ ᐃᓕᑦᑎᓂᕐᒥ ᐱᓕᕆᑦᑎᐊᕈᓐᓇᕐᓂᖓᓂ ᐃᓕᓐᓂᐊᖅᑎᖏᓐᓂ ᐊᒻᒪ ᐱᕙᓪᓕᐊᑎᑦᑎᓂᕐᒥ ᓴᙱᔪᓂ ᐱᓕᕆᖃᑎᖃᕐᓂᐅᔪᒥ ᐃᓕᓴᐃᔨᐅᖃᑎᒥᓂᑦ.”

31272178_web1_221212-KIV-INUKcoralawards_2
ᐊᔭᐅᓇ ᐃᒥᒃᑕᐅᑦ, ᓴᐅᒥᖕᒥ, ᐱᕗᖅ ᑲᒥᓴᓇᐅᑉ ᓵᓚᖃᐅᓯᐊᖓᓐᓂ ᖃᐅᔨᒪᓂᕐᒧᑦ ᐸᖅᑭᔨᐅᔪᓄᑦ ᐄᕙ ᖃᒪᓂᖅ ᐋᕆᐊᕐᒥ, ᓄᓇᕗᒻᒥ ᑲᒥᓴᓇᖓᓐᓂ.
31272178_web1_221212-KIV-INUKcoralawards_3
ᑕᐃᕕᑦ ᓴᕕᐊᕐᔪᒃ, ᑕᓕᖅᐱᖕᒥ, ᐱᕗᖅ ᑲᒥᓴᓇᐅᑉ ᓵᓚᖃᐅᓯᐊᖓᓐᓂ ᑲᑉᐱᐊᑦᑕᐃᓐᓂᕐᒧᑦ ᖃᑦᑎᕆᔨᓄᑦ ᐊᖓᔪᖅᑳᖑᓪᓗᓂ ᓴᓪᓕᓂᑦ ᐄᕙ ᖃᒪᓂᖅ ᐋᕆᐊᕐᒥ, ᓄᓇᕗᒻᒥ ᑲᒥᓴᓇᖓᓐᓂ.
31272178_web1_221212-KIV-INUKcoralawards_4
ᑲᐃᑎ ᐊᖑᑎᐊᓗᒃ, ᑕᓕᖅᐱᖕᒥ, ᐱᕗᖅ ᑲᒥᓴᓇᐅᑉ ᓵᓚᖃᐅᓯᐊᖓᓐᓂ ᒪᒃᑯᒃᑐᓄᑦ ᐃᓕᓴᕆᔭᐅᓂᖓᓂ ᐄᕙ ᖃᒪᓂᖅ ᐋᕆᐊᕐᒥ, ᓄᓇᕗᒻᒥ ᑲᒥᓴᓇᖓᓐᓂ.