Skip to content

ᓴᓪᓕᕐᒥᐅᑦ ᓄᓇᓕᑦᑎᔪᑦ ᐊᕐᕙᒃᑕᒥᓂᒃ

ᐊᖑᓇᓱᒃᑏᑦ ᓴᓪᓕᓂ ᐊᕐᕙᓚᐅᖅᑐᑦ 10 ᒦᑕᓂᒃ ᑕᑭᓂᓕᖕᒥᒃ (33-foot) ᔪᓚᐃ 10-ᒥ.
25866025_web1_210721-kiv-bowhead-whale_1
Hunters from Coral Harbour butcher the 33-foot bowhead whale they harvested on July 10. It was the second bowhead the community has harvested since landing its first one in 2018. Photo courtesy of Edna Hamilton-Nakoolak ᐊᖑᓇᓱᒃᑏᑦ ᓴᓪᓕᓂ ᐱᓚᒃᑐᑦ 33-foot-ᓂᒃ ᑕᑭᓂᓕᖕᒥᒃ ᐊᕐᕕᕐᒥᒃ ᐊᕐᕙᓚᐅᖅᑕᖓᓂᒃ ᔪᓚᐃ 10-ᒥ. ᑖᒻᓇ ᑐᒡᓕᕆᔭᐅᔪᖅ ᐊᕐᕙᒃᑕᐅᖃᑦᑕᖅᓯᒪᔪᓂᒃ ᓴᓪᓕᓂ ᓯᕗᓪᓕᖅᐹᖅ 2018-ᒥ ᐊᕐᕙᒃᑕᐅᓚᐅᖅᑐᖅ.

ᐊᖑᓇᓱᒃᑏᑦ ᓴᓪᓕᓂ ᐊᕐᕙᓚᐅᖅᑐᑦ 10 ᒦᑕᓂᒃ ᑕᑭᓂᓕᖕᒥᒃ (33-foot) ᔪᓚᐃ 10-ᒥ.

“ᒪᒃᑕᒻᒪᕆᐊᓗᐃᑦ. ᓈᒻᒪᒡᓚᒃᑐᕐᓘᓐᓃᑦ ᑕᒪᐃᓐᓄᖅᑲᔭᖅ ᓄᓇᖅᑲᑎᒌᖕᓄᑦ,” ᑕᐃᒪᓐᓇ ᐅᖃᖅᖢᓂ ᒍᒋᕆ ᓂᖏᐅᑦᓯᐊᖅ, ᓇᐅᓕᒃᓯᖃᑕᐅᓚᐅᖅᑐᖅ ᐊᕐᕙᒃᑕᐅᔪᒥᒃ.

ᓯᕗᓕᖅᑎᒋᔭᐅᓚᐅᖅᑐᖅ ᒪᐃᔭ ᐅᐃᓕ ᓇᑯᓛᖅ, 15-ᖑᑉᓗᑎᒃ ᐊᖑᑎᑦ ᐊᒻᒪᓗ ᐊᑕᐅᓯᖅ ᓄᑲᑉᐱᐊᑯᓗᒃ ᐊᐅᓪᓚᓚᐅᖅᓯᒪᔪᑦ ᓄᓇᓕᖕᒥ ᐅᑉᓘᑉ ᕿᑎᕈᔪᐊᓂᒃ. ᓂᒋᐊᓄᑦ ᐊᐅᓪᓛᖅᖢᑎᒃ ᓯᒡᔭᒃᑯᑦ, ᑎᑭᐅᑎᓯᒪᓕᖅᖢᑎᒃ 40 ᑭᓛᒥᑕᓂᒃ ᐅᖓᓯᖕᓂᓕᖕᒥᒃ ᓴᓪᓕᐅᑉ ᓂᒋᐊᓄᑦ.

ᐊᕐᕙᒐᓱᒃᑐᑦ ᐊᕕᒃᑐᖅᓯᒪᓚᐅᖅᑐᑦ ᐊᖑᑎᑦ ᑕᓪᓕᒪᓂᒃ ᐅᒥᐊᓃᖦᖢᑎᒃ. ᖃᑉᓰᓐᓇᐅᔪᓪᓗ ᓯᑕᒪᓕᒃᑰᖅᖢᑎᒃ ᑎᒃᑯᐊᖅᑐᖅᑎᐅᑉᓗᑎᒃ ᑕᑯᔭᕌᖓᒥᒃ ᐊᕐᕕᕐᒥᒃ, ᑕᑯᓇᓱᒃᖢᑎᒃ ᐊᕐᕕᕐᓂᒃ ᓄᓇᒦᖦᖢᑎᒃ.

ᐅᑉᓘᔪᒥ, ᐊᓄᕌᓕᓚᐅᖅᑐᖅ ᐊᓄᕆᖓ ᓴᙱᒃᑎᑉᐸᓪᓕᐊᑉᓗᓂ. ᐊᓕᐊᓇᐃᓪᓘᓐᓃᑦ, ᓄᓇᒦᑦᑐᑦ ᕿᓚᒻᒥᐅᔪᒃᑯᑦ ᑕᑯᔪᓐᓇᖅᓯᓚᐅᕐᒪᑕ ᐊᕐᕕᕐᒥᒃ ᓯᑯᖃᕐᕕᐅᔫᑉ ᖃᓂᒋᔭᖓᓂᒃ. ᐅᒥᐊᖅᑐᖃᑕᐅᔪᒧᑦ ᑕᑯᔭᐅᑉᓗᓂ ᐊᕐᕕᖅ, ᓇᐅᓕᒃᑕᐅᓇᓱᓕᖅᖢᓂ. ᐱᖓᓱᑦ ᓇᐅᓪᓕᒃᓯᖅᑳᕆᐊᓚᐅᖅᑐᑦ ᐅᓂᐅᖅᖢᑎᒃ, ᑭᓯᐊᓂ ᑕᐱᐊ ᓴᕕᐊᕐᔪᒃ ᓇᐅᓕᒃᓯᔪᓐᓇᖅᓯᓚᐅᖅᑐᖅ ᓯᑕᒪᒋᔭᐅᑉᓗᓂ.

“ᓇᐅᓕᒃᓯᒐᒥ ᐊᕐᕕᕐᒥᒃ, ᑲᐃᕕᑲᑕᓕᖅᖢᓂ. ᓇᓗᓇᙱᑦᑐᖅ ᐃᒃᐱᒍᓱᓚᐅᖅᑐᖅ ᐊᕐᕕᖅ ᓇᐅᓕᒃᑕᐅᒐᒥ,” ᑕᐃᒪᓐᓇ ᐅᖃᖅᖢᓂ ᓂᖏᐅᑦᓯᐊᖅ.

ᐊᓯᖓ ᓇᐅᓕᒃᓯᓕᕆᑉᓗᓂ.

“ᐱᖓᔪᒋᔭᐅᑉᓗᖓ ᓇᐅᓕᒃᓯᓕᓚᐅᖅᑐᖓ,” ᓂᖏᐅᑦᓯᐊᖅ ᑕᐃᒪᓐᓇ ᐅᖃᖅᖢᓂ, “ᐊᒻᒪᓗ ᕿᑭᖅᑕᐅᖃᑦᑕᓕᖅᖢᓂ. ᓱᑲᐃᓪᓕᕙᓪᓕᐊᔫᔭᙱᒻᒪᑦ ᖁᑭᐅᑎᒥᒃ ᖄᖅᑕᖅᑐᓕᖕᒥᒃ ᐊᑐᓕᓚᐅᖅᑐᒍᑦ. ᐅᖃᐅᓯᑉᑎᒍᑦ ᐃᒪᓐᓇ ᑕᐃᔭᐅᔪᖅ ᖃᔫ.”

ᖃᔫ ᖄᕐᒪᑦ, ᓂᖏᐅᑦᓯᐊᖅ ᖃᐅᔨᓚᐅᖅᑐᖅ ᐊᕐᕕᕐᒧᑦ ᐃᒃᐱᒋᔭᐅᓂᖓᓄᑦ.

“ᑐᖁᖅᑲᔭᑦᑎᐊᖅᖢᓂ. ᒪᕐᕉᒃ ᒥᓂᑦᔅ ᐱᐊᓂᖕᒪᑎᒃ, ᓴᖅᐱᐊᖏᑦ ᑕᒃᐸᐅᙵᕆᐊᖅᑳᖅᖢᓂᒋᑦ ᑐᓄᒥᓄᑦ ᓇᓪᓚᓕᓚᐅᖅᑐᖅ. ᑕᐃᒪᓐᓇ ᖃᐅᔨᓚᐅᖅᑕᖅᐳᑦ ᑐᖁᖓᓕᕐᓂᖓᓄᑦ,” ᑕᐃᒪᓐᓇ ᐅᖃᖅᖢᓂ ᓂᖏᐅᑦᓯᐊᖅ. “ ᑕᒪᑉᑕ ᐃᕆᐊᓛᓕᓚᐅᖅᑐᒍᑦ ᖁᕕᐊᓱᒃᖢᑕ. ᐊᓕᐊᓇᐃᑦᑐᐊᓘᓚᐅᖅᑐᖅ.”

ᓂᖏᐅᑦᓯᐊᖅ ᐃᓚᐅᖃᑕᐅᓚᐅᖅᑐᖅ ᓯᕗᓪᓕᖅᐹᓂ ᐊᕐᕙᒐᓱᓚᐅᖅᓯᒪᔪᓂᒃ 2018-ᒥ. ᐅᖃᖅᖢᓂ ᑖᒻᓇᒎᖅ ᐊᕐᕙᒐᓱᖕᓂᐅᔪᖅ ᐱᒻᒪᕆᐅᑎᓚᐅᖅᑕᓂ ᐃᕐᓂᓕᔭᓚᐅᕋᒥ ᖁᓕᓂᒃ ᐅᑭᐅᓕᑯᓗᖕᒥᒃ.

“ᐊᖑᑎᑦ ᐃᕐᓂᓕᔭᕋᔪᙱᒻᒪᑕ. ᐊᖓᔪᖅᑳᕆᔭᐅᔪᖅ ᐊᕐᕙᒐᓱᒃᑐᓂᒃ ᐃᓚᐅᖃᑕᐅᑎᑦᑎᔪᓐᓇᓚᐅᕐᒪᑦ ᐃᕐᓂᖓᓂᒃ. ᑐᑭᓯᐅᒪᓚᐅᕐᒪᑦ ᓱᖕᒪᑦ ᐱᒻᒪᕆᐊᓘᖕᒪᖔᑦ. ᐅᒥᐊᕆᔭᕋᓃᖃᑕᐅᓚᐅᖅᑐᖅ ᐊᕐᕙᒐᓱᒃᑐᓂᒡᓗ ᐃᓚᐅᖃᑕᐅᑉᓗᓂ,” ᑕᐃᒪᓐᓇ ᐅᖃᖅᖢᓂ. “ᐊᓕᐊᓇᐃᑦᑐᐊᓘᓚᐅᖅᑐᖅ. ᑕᒪᓐᓇ ᐳᐃᒍᓚᐅᖅᓯᒪᔾᔮᙱᑕᖓ ᐃᓅᓯᓗᒃᑖᒥᓂᒃ.”

100-ᖏᓐᓃᑦᑐᑦ ᐃᓄᐃᑦ ᓯᒡᔭᒧᙵᐅᓚᐅᖅᑐᑦ ᑐᙵᓱᒃᑎᑦᑎᔭᖅᑐᖅᖢᑎᒃ ᐊᕐᕙᒃᑐᓂᒃ.

“ᓄᓇᒧᑦ ᑎᑭᐅᑎᒐᑉᑎᒍᑦ, ᐃᓄᐃᑦ ᓄᓇᖅᑲᑎᕗᑦ ᐅᑕᖅᑭᓕᐊᓂᓚᐅᖅᑐᑦ. 200 ᐅᖓᑖᓃᑦᑐᑦ ᐃᓄᐃᑦ, ᐃᒻᒪᖄᓘᓐᓃᑦ 300–ᖑᓚᐅᖅᑐᑦ,” ᑕᐃᒪᓐᓇ ᐅᖃᖅᖢᓂ ᓂᖏᐅᑦᓯᐊᖅ.

ᐊᕐᕙᒃᑐᑦ ᐱᓚᓕᕐᒪᑕ ᐃᒪᐅᑉ ᖃᓂᒋᔭᖓᓂᒃ, ᓄᓇᒃᑰᕈᑎᕐᔪᐊᕐᒥ ᐊᑯᑦᑐᒥᒃ ᖃᐃᔪᖃᓚᐅᖅᑐᖅ ᓄᓱᒃᓯᒃᑲᓐᓂᕆᐊᖅᑐᖅᖢᓂ ᓄᓇᒧᑦ ᐊᒥᓲᓂᖅᓴᑦ ᐃᓄᐃᑦ ᐃᑲᔪᕈᓐᓇᖁᑉᓗᒋᑦ.

“ᐊᑯᓂᕐᓚᒃ ᐱᓚᓚᐅᖅᑕᖅᐳᑦ,” ᑕᐃᒪᓐᓇ ᐅᖃᖅᖢᓂ ᓂᖏᐅᑦᓯᐊᖅ.