ᐅᑭᐅᖅᑕᖅᑐᒥ ᐊᒋᐊᒐᕐᓂᕐᒧᑦ ᖃᐅᔨᒪᔭᐅᕐᔪᐊᖅᑐᖅ ᑳᓕᓐ ᐋᔾᔪᓐ ᐃᓅᔪᓐᓃᓚᐅᖅᐳᖅ ᑎᓯᐱᕆ 3–ᒥ, ᑭᓯᐊᓂ ᕿᒪᐃᓂᕆᔭᖓ ᐆᒪᐃᓐᓇᕐᓂᐊᖅᐳᖅ ᐊᖏᕐᕋᖓᓂ ᓄᓇᓕᖓᓂ ᖁᕐᓗᖅᑑᒥ ᐊᒥᓱᓂ ᐱᓕᕆᓂᐅᔪᓂ.

ᖁᕐᓗᖅᑑᒥ ᕼᐋᒻᓚᒃᑯᑦ ᑲᑎᒪᔨᖏᑦ ᐊᑦᑎᖅᓯᔪᒪᓕᓚᐅᖅᐳᑦ ᓄᓇᓕᖕᓂ ᐱᙳᐊᕐᕕᖓᓂ ᐋᔾᔪᓐᒥ ᐊᒻᒪ ᓂᕈᐊᓚᐅᖅᐳᑦ ᓵᓚᖃᐅᓯᐊᕐᓂᖓᓂ ᐅᐱᒋᔭᐅᓂᕐᔪᐊᖑᔪᒥ ᑮᒥ ᓄᓇᓕᖕᓄᑦ ᐃᓅᔪᓐᓃᓛᓕᖅᑎᓪᓗᒍ, ᐅᖃᓚᐅᖅᐳᖅ ᓴᐃᒪᓐ ᑯᓕᒃᑖᓇ, ᓄᓇᓕᐅᑉ ᒪᐃᔭᖓ ᐊᒻᒪ ᑎᑕᒃᑎᐅᖃᑎᖓ ᐱᙳᐊᖃᑎᖃᓚᐅᖅᑐᒥ ᐋᔾᔪᓐᒥ ᐊᒥᓱᐃᖅᓱᖅᖢᓂ.

ᑎᑭᑉᐸᓪᓕᐊᔪᓂ ᑕᖅᑭᐅᔪᓂ, ᐅᓪᓗᕐᒥ ᓴᓂᕐᕙᐃᓯᒪᓂᐊᖅᐳᑦ ᐃᖅᑲᐅᒪᓂᖃᕐᓂᕐᒧᑦ ᓇᒡᓕᒋᔭᐅᕐᔪᐊᖅᑐᒥ ᑎᑕᒃᑎᐅᔪᒧᑦ, ᐃᓚᒋᐊᖅᓯᓚᐅᖅᐳᖅ.

“ᓄᓇᓕᕗᑦ ᐊᓯᐅᔨᕐᔪᐊᖅᐳᑦ,” ᑯᓕᒃᑖᓇ ᐅᖃᓚᐅᖅᐳᖅ.

ᐋᔾᔪᓐ, 77, ᖃᐅᔨᒪᔭᐅᓚᐅᖅᐳᖅ ᐊᒋᐊᒐᖅᑎᐅᓂᖓᓂ ᐅᑭᐅᖅᑕᖅᑐᒥ. ᖃᔅᓯᒐᓚᖕᓂ ᓂᔾᔮᑎᑦᑎᓂᐅᔪᓂ ᓂᐱᓕᐅᕆᓯᒪᓪᓗᓂ, ᑐᓂᔭᐅᓚᐅᖅᐳᖅ ᑯᐃᓐ ᐃᓕᓴᐱᐅᑉ II Diamond Jubilee ᐅᔭᒥᖓᓐᓂ 2012–ᒥ ᐃᑲᔪᖅᓱᐃᓂᖓᓂ ᑎᑕᒃᑎᐅᓂᖓᓂ.

“ᐊᑕᐅᓯᐅᔪᒥ ᖁᕐᓗᖅᑑᒥ, ᒧᒥᕈᒻᒫᓘᕗᑦ, ᒪᕐᕈᐃᓐᓇᐅᓪᓗᑎᒃ ᒧᒥᕈᒻᒫᓘᕗᑦ, ᐃᓄᒃᑎᑐᑦ ᒧᒥᕈᒻᒫᓘᕗᑦ, ᐊᒻᒪ ᑕᑯᔪᓐᓇᖅᐸᐃᑦ ᑕᐃᑲᙵᓗᒃᑖᖅ ᓱᕈᓯᓛᓂᑦ, ᒧᒥᕋᓱᓲᖑᕗᑦ,” ᐅᖃᓚᐅᖅᐳᖅ ᑯᓕᒃᑖᓇ. “ᒪᐃᕕᔅ ᐅᖃᐅᑎᓚᐅᖅᐸᕋ (ᐋᔾᔪᓐ ᓄᓕᐊᖓ) ᑳᓕᓐ ᐱᒋᐊᖅᑎᑦᑎᓚᐅᕐᓂᖓᓂ ᐃᓕᖅᑯᓯᐅᔪᒥ… ᐃᓱᒪᕗᖓ ᕿᒪᖕᓂᐊᖅᑕᖓ ᖁᕐᓗᖅᑑᒥ. ᓴᖅᑭᑎᑦᑎᓯᒪᕗᖅ ᐊᓕᐊᓇᐃᒋᔭᖃᕐᔪᐊᕐᓂᐅᔪᒥ ᒧᒥᕐᓂᕐᒥ, ᐊᓕᐊᓇᐃᒋᔭᖃᕐᔪᐊᕐᓂᕐᒥ ᐃᓄᒃᑎᑐᑦ ᒧᒥᕐᓂᕐᒥ ᐊᒻᒪ ᐊᓕᐊᓇᐃᒋᔭᖃᕐᔪᐊᕐᓂᕐᒥ ᒪᕐᕈᐃᓐᓇᐅᓪᓗᑎᒃ ᒧᒥᕐᓂᕐᒥ. ᕿᒪᐃᓯᒪᕗᖅ ᐊᒃᑐᐃᓂᐅᔪᒥ ᓄᓇᓕᑦᑎᓐᓂ, ᑭᓯᐊᓂ ᓄᓇᓕᑦᑎᓐᓂᑐᐊᖑᙱᑦᑐᖅ, ᕿᑎᕐᒥᐅᓂ ᐊᒻᒪ ᐅᑭᐅᖅᑕᖅᑐᓕᒫᒥ.”

ᔭᓗᓇᐃᕝᒥ ᐊᒋᐊᒐᖅᑎ ᓖ ᒫᓐᑎᕕᐅᓪ ᑕᑯᓯᒪᕗᖅ ᐋᔾᔪᓐ ᐊᓕᐊᓇᐃᒋᔭᖃᕐᔪᐊᕐᓂᖓᓂ ᒧᒥᕐᓂᕐᒧᑦ ᐃᓚᖃᖅᑐᒥ ᐃᔅᓴᒃᓯᓂᖓᓂ ᐃᓕᓐᓂᐊᖅᑎᑦᑎᓂᖓᓂ ᐊᒋᐊᒐᖅᑎᐅᓪᓗᓂ.

“ᑕᖃᓴᕋᐃᙱᓐᓂᖓ ᑲᒪᓇᓚᐅᖅᐳᖅ. ᖁᙱᐊᖅᑕᐅᕕᖕᒦᖃᑦᑕᓚᐅᖅᐳᖅ ᑎᑕᒃᖢᓂ ᑭᒃᑯᓕᒫᓄᑦ ᐊᒻᒪ ᐊᓯᐊᓂ ᐊᒋᐊᒐᕐᒥ ᑎᒍᓯᔪᖃᕋᒥ, ᒧᒥᕆᐊᖅᑐᖅᐸᓚᐅᖅᐳᖅ ᐊᒻᒪ ᐊᐃᑉᐸᖃᖅᖢᓂ. ᐊᓕᐊᓇᐃᒋᑦᑎᐊᓚᐅᖅᑕᖓ,” ᐅᖃᓚᐅᖅᐳᖅ. “ᐊᓯᐊᓂ ᑕᑯᓚᐅᖅᓯᒪᖅᑰᙱᓚᖓ ᐊᓕᐊᓇᐃᒋᔭᖃᕐᔪᐊᖅᑐᒥ ᐃᓄᒃᑎᑐᑦ ᒧᒥᕐᓂᕐᒥ ᑕᐃᔅᓱᒥᖓᑎᑐᑦ.”

ᒫᓐᑎᕕᐅᓪ 9–ᑐᐃᓐᓇᐅᓚᐅᖅᐳᖅ ᓯᕗᓪᓕᖅᐹᒥ ᑕᑯᒐᒥ ᐋᔾᔪᓐᒥ ᑎᑕᒃᑎᓪᓗᒍ ᖃᓂᒋᔭᖓᓂ ᐊᕐᕌᒍᓄᑦ 35–ᓄᑦ ᖄᖏᖅᓯᒪᓕᖅᑐᓂ.

“ᑲᒪᒋᕐᔪᐊᓚᐅᖅᐸᕋ ᐱᓕᕆᖃᑎᖃᖅᐸᖕᓂᖓᓂ ᖁᙱᐊᖅᑐᓂ ᐊᔾᔨᐅᙱᕐᔪᐊᓚᐅᕐᒪᑦ … ᐃᓄᐃᑦ ᒧᒥᕐᔪᐊᓚᐅᖅᐳᑦ. ᐅᕙᓐᓂ ᐃᓕᓯᓚᐅᖅᐳᖅ ᐱᔪᒪᓂᕐᔪᐊᕌᓗᖕᒥ, ᑕᐃᒪᓐᓇᒐᓚᒃ ᐱᓕᕆᔪᒪᓚᐅᖅᐳᖓ,” ᐃᖅᑲᐅᒪᕗᖅ. “ᐆᒻᒪᕆᒃᖢᓂ ᐃᓅᓚᐅᖅᐳᖅ.”

ᐊᒻᒪ ᒫᓐᑎᕕᐅᓪ ᑕᐃᒪᐃᓪᓚᕆᓚᐅᖅᐳᖅ ᐊᕐᕌᒍᑦ ᑎᓴᒪᐃᑦ ᐊᓂᒍᑐᐃᓐᓇᖅᑎᓪᓗᒋᑦ, ᐱᓇᓱᐊᖅᖢᓂ ᐊᓕᐊᓇᐃᒋᕐᔪᐊᖅᑕᒥᓂ ᓂᔾᔮᑎᑦᑎᓂᕐᒧᑦ ᐅᑭᐅᖃᖅᖢᓂ 13–ᓂ, ᐃᑲᔪᖅᓯᖅᑕᐅᓪᓗᓂ ᐋᔾᔪᓐᒧᑦ.

“ᑲᔪᖏᖅᓴᐃᖏᓐᓇᓚᐅᖅᐹᖓ ᑕᐅᕗᖓᓕᒫᖅ. ᐃᓄᑦᑎᐊᕙᒻᒪᕆᐊᓘᓚᐅᖅᐳᖅ, ᑐᓂᓯᒃᑲᐅᓪᓗᓂ. ᓂᔾᔮᑎᑦᑎᓂᖓᓂ ᑐᓂᓯᓚᐅᖅᐳᖅ. ᐅᕙᓐᓂ ᐃᓕᓐᓂᐊᖅᑎᑦᑎᓚᐅᖅᐳᖅ ᖃᔅᓯᐊᕐᔪᖕᓂ ᐊᒋᐊᒐᕐᓂᐅᔪᓂ. ᑐᓴᕐᓂᕆᕐᔪᐊᓚᐅᖅᐸᒃᑲ Faded Love ᐊᒻᒪ Red River Jig,” ᐅᖃᓚᐅᖅᐳᖅ.

ᑲᑎᖃᑎᖃᖅᐸᓚᐅᖅᐳᖅ ᐊᔪᙱᓐᓂᖏᓐᓂ ᖁᙱᐊᖅᑕᐅᕕᖕᓂ ᐊᒥᓱᐃᖅᓱᖅᖢᑎᒃ ᐊᕐᕌᒍᒐᓴᓂ, ᑕᐃᒪᓐᓇᑎᑐᑦ ᐋᔾᔪᓐ ᑕᐃᒪᐃᓚᐅᕐᓂᖓᓂ ᐃᕐᓂᖓᓄᑦ, ᒐᔅᑎᓐᒥ.

“ᐃᕐᓂᖓ ᑕᑯᓗᒍ ᐊᒻᒪ ᐊᔾᔨᑦᑎᐊᖓ, ᐊᒻᒪ ᖁᖓᕐᔪᐊᒃᑳᓗᒃ ᐊᑖᑕᒥᑎᑐᑦ,” ᒫᓐᑎᕕᐅᓪ ᐅᖃᓚᐅᖅᐳᖅ. “ᑕᐃᒪᑐᖅ (ᒐᔅᑎᓐ) ᑲᔪᓰᓐᓇᕐᓂᐊᖅᐳᖅ (ᐊᒋᐊᒐᕐᓂᕐᒥ).”

ᑯᓕᒃᑖᓇ ᐱᙳᐊᖃᑎᖃᖅᐸᓕᓚᐅᖅᐳᖅ ᐋᔾᔪᓐᒥ 1990–ᕿᑎᖅᐸᓯᐊᓂ. ᑭᖑᓂᑦᑎᐊᖓᒍᑦ ᐊᐅᓪᓛᖃᑎᒌᓚᐅᖅᐳᑦ ᑲᑎᙵᓪᓗᑎᒃ, ᑐᖦᖢᑎᒃ ᕗᐊᑦ ᒪᒃᕘᓴᓐᒥ Midway ᓂᔾᔮᑎᑦᑎᓂᕐᒧᑦ ᖁᕕᐊᓱᒍᑕᐅᔪᒥ.

“ᑲᒪᕐᔪᐊᓚᐅᖅᐳᖓ ᖃᓄᑎᒋ ᐊᒥᓲᔪᓂ ᐊᔾᔨᒌᙱᑦᑑᑎᓂ ᐃᓕᖅᑯᓯᐅᔪᓂ ᖃᐅᔨᒪᓚᐅᕐᓂᖏᓐᓂ. ᐅᕙᓐᓂ ᑕᑯᑎᑦᑎᓚᐅᖅᐳᖅ (ᐅᕘᓇ) ᓂᔾᔮᑎᑦᑎᓂᕐᒧᑦ ᐊᔪᙱᓐᓂᕐᔪᐊᖓᓂ, ᑲᑎᙵᓂᖃᕐᔪᐊᕐᓂᖓᓂ,” ᐃᖅᑲᐅᒪᕗᖅ, ᐃᓚᒋᐊᖅᓯᓪᓗᓂ ᐊᖓᔪᖅᑳᖏᑦ ᓈᓚᒃᐸᓚᐅᕐᓂᖏᓐᓂ ᐋᔾᔪᓐ ᓂᔾᔮᑎᑕᖏᓐᓂ, ᐊᒻᒪᓗᑦᑕᐅᖅ ᕿᑐᕐᙵᖏᑦ ᐊᒻᒪ ᐃᕐᙳᑕᖏᑦ. “ᐋᒃᑳᕈᓐᓇᓚᐅᙱᑦᑐᖅ ᐊᐱᕆᔭᐅᒐᒥ ᐱᙳᐊᖁᔭᐅᓪᓗᓂ, ᑕᐃᒪᐃᓚᐅᖅᐳᖅ ᑳᓕᓐ.”

Leave a comment

Your email address will not be published. Required fields are marked *