Skip to content

ᓴᖅᑭᑎᑦᑎᕙᓪᓕᐊᓂᖅ ᐊᖑᑎᓄᑦ ᐃᑲᔫᑎᒃᓴᓂᒃ

ᐃᑲᔫᑎᒃᓴᑦ ᒪᒃᑯᒃᑐᓄᑦ ᐊᖑᑎᓄᑦ ᖃᓄᐃᑦᑑᔭᕆᐊᖃᖅᐸᑦ ᑭᕙᓪᓕᕐᒥ?
27844775_web1_220119-KIV-mensmeetings_3
Sam Tutanuak speaks to community members at an Atii Angutiit gathering in Chesterfield Inlet last December. Photo courtesy of Atii Angutiit ᓵᒻ ᑐᑕᓐᓄᐊᖅ ᐅᖃᓪᓚᒃᑐᖅ ᓄᓇᖅᑲᑎᒌᖕᓄᑦ ᐊᑏ ᐊᖑᑏᑦ ᑲᑎᒪᔨᖏᑦ ᑲᑎᓐᓂᖃᖅᑎᓪᓗᒋᑦ ᐃᒡᓗᓕᒑᕐᔪᖕᒥ ᑎᓯᐱᕆᐅᓚᐅᖅᑐᒥ.

ᐃᑲᔫᑎᒃᓴᑦ ᒪᒃᑯᒃᑐᓄᑦ ᐊᖑᑎᓄᑦ ᖃᓄᐃᑦᑑᔭᕆᐊᖃᖅᐸᑦ ᑭᕙᓪᓕᕐᒥ?

ᑕᒡᕙ ᐊᐱᖅᑯᑕᐅᓚᐅᖅᑐᖅ ᐊᑏ ᐊᖑᑏᑦ ᑲᑎᒪᔨᖏᓐᓄᑦ ᓴᖅᑭᑎᑕᐅᓯᒪᑉᓗᓂ ᓄᓇᓕᖕᓂᒃ ᐳᓚᕋᖅᑎᓪᓗᒋᑦ ᑎᓯᐱᕆᒥ. ᑖᑉᑯᐊ ᐊᖑᑏᑦ ᐱᖓᓱᐃᓐᓇᕐᓄᑦ ᓄᓇᓕᖕᓄᑦ ᑎᑭᐅᑎᓚᐅᕋᓗᐊᖅᑎᓪᓗᒋᑦ ᐱᖅᓯᓕᓚᐅᕐᒪᑦ ᐊᒻᒪᓗ ᓄᕙᒡᔪᐊᕐᓂᖅ ᓴᖅᑭᒃᑲᓐᓂᓚᐅᖅᑎᓪᓗᒍ ᓄᓇᓕᖕᓄᑦ ᑎᑭᑦᑐᓐᓇᕐᓂᖏᓐᓂᒃ ᐊᔪᓕᖅᑎᑦᑎᓯᒪᓚᐅᕐᒪᑎᒃ, ᖃᓄᐃᓕᐅᕈᑕᐅᖁᔭᐅᓯᒪᔪᑦ 100-ᖏᓐᓃᓕᐊᓂᓚᐅᖅᑐᑦ.

“ᓄᓇᓕᖕᓄᑦ ᑎᑭᓚᐅᕋᑉᑕ ᑐᓴᕈᒪᑦᑎᐊᖅᖢᑕ,” ᑕᐃᒪᓐᓇ ᐅᖃᖅᖢᓂ ᓵᒻ ᑐᑕᓐᓄᐊᖅ, ᐊᖓᔪᖅᑳᖅ ᐅᖃᐅᔾᔨᒋᐊᖅᑎᓂᒃ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓄᑦ, ᐃᒻᖏᖅᑎ ᐊᒻᒪᓗ ᑲᑎᒪᔨᐅᖃᑕᐅᔪᖅ ᐊᑏ ᐊᖑᑏᑦ ᐳᓚᕋᖅᑎᖏᓐᓂᒃ. “ᖃᐅᔨᒪᙱᑦᑎᐊᓚᐅᖅᑐᒍᑦ ᖃᓄᖅ ᐅᖃᐅᑎᔭᐅᓂᐊᕐᒪᖔᑉᑕ. ᓇᐅᒃᑰᕐᓂᕆᓚᐅᖅᑕᖅᐳᑦ ᓂᕆᐅᒋᓚᐅᙱᑕᖅᐳᑦ.”

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖏᑦ ᐱᓕᕆᖃᑎᖃᖅᑐᑦ ᐳᓛᕐᕕᒃ ᖃᑉᓗᒃᑯᓐᓂᒃ ᑲᑎᑦᑎᕙᓪᓕᐊᑉᓗᑎᒃ ᐅᖃᐅᓯᒃᓴᕆᔭᐅᔪᓂᒃ ᒪᒃᑯᒃᑐᓄᑦ ᐊᖑᑎᓄᑦ ᑭᕙᓪᓕᕐᒥ ᖃᓄᐃᑦᑐᓂᒃ ᐃᑲᔫᑎᒃᓴᓂᒃ ᑕᑯᔪᒪᖕᒪᖔᑕ. ᐊᑏ ᐊᖑᑏᑦ ᑲᑎᒪᑎᑦᑎᕙᒃᑎᓪᓗᒋᑦ ᐃᓕᓐᓂᐊᖅᑎᑦᑎᓲᑦ, ᐅᖃᖃᑎᒌᒃᑎᑦᑎᓲᑦ ᐊᒻᒪᓗ ᐃᒻᖏᓲᑦ. ᐃᓄᒃ ᐃᒻᖏᖅᑎ Hyper-T, ᓂᐅᓴᓐ ᑕᒍᕐᓈᖅ ᐊᒻᒪᓗ ᐊᓯᖏᑦ ᐃᑲᔪᓲᑦ ᐃᒻᖏᖅᑎᑦᑎᓂᒃᑯᑦ ᑲᑎᒪᔪᓂᒃ.

ᓄᓇᖅᑲᑎᒌᑦ ᐃᓱᒪᒋᔭᖃᑦᑎᐊᓚᐅᖅᑐᑦ ᑕᐃᒪᓐᓈᓗᒃ ᑐᓴᕐᓂᐊᕋᓱᒋᓚᐅᙱᒃᑲᓗᐊᖅᑐᒍᑦ, ᓲᕐᓗ ᐅᖃᐅᓯᖃᓚᐅᕐᒪᑕ ᐃᓕᖅᑯᓯᑐᖃᑎᒍᑦ ᐊᖑᓇᓱᒋᐊᖃᑦᑕᕈᒪᓂᕋᖅᑐᓂᒃ ᐊᒻᒪᓗ ᓴᓇᕐᕈᑎᓕᐅᖃᑦᑕᕈᒪᔪᓂᒃ ᐊᒻᒪᓗ ᐃᓕᓐᓂᐊᕈᒪᔪᑦ ᖃᓄᖅ ᐃᖕᒥᓂᒃ ᓴᐳᓐᓂᐊᖃᑦᑕᕋᔭᕐᓂᕐᒧᑦ, ᐃᓕᑦᑎᔪᒪᔪᓪᓗ ᖃᓄᖅ ᐃᓄᐃᑦ ᓵᖓᓂ ᐅᖃᓪᓚᒍᓐᓇᖅᓯᓂᕐᒧᑦ ᐊᒻᒪᓗ ᐊᔾᔨᓕᐅᕆᔪᓐᓇᖅᓯᔪᒪᔪᑦ.

“ᓄᓇᓕᖕᓂᙶᖅᑐᑦ ᑕᒡᕙ ᓄᓇᖅᑲᑎᒌᖕᓂᒃ, ᐊᓯᖏᓐᓂᐅᙱᑦᑐᖅ,” ᑕᐃᒪᓐᓇ ᐅᖃᖅᖢᓂ ᑐᑕᓐᓄᐊᖅ.

ᐳᓚᕌᓂᒃᐸᑕ, ᐳᓛᕐᕕᒃᑯᑦ ᑎᑎᕋᕐᓂᐊᖅᑐᑦ ᐅᓂᒃᑳᓕᐊᕐᒥᒃ ᐃᓱᒪᒋᔭᐅᓯᒪᔪᑦ ᑎᑎᕋᖅᓯᒪᓗᒋᑦ ᐊᒻᒪᓗ ᖃᓄᖅ ᓴᖅᑭᑎᑕᐅᓪᓚᑦᑖᕋᔭᕐᒪᖔᑕ.

ᑐᑕᓐᓄᐊᖅ ᖁᕕᐊᓱᓚᐅᖅᑐᖅ ᑕᑯᔪᓐᓇᓚᐅᕋᒥ ᒪᒃᑯᒃᑐᓂᒃ ᐊᒻᒪᓗ ᑐᓴᕐᕕᒋᔪᓐᓇᓚᐅᕐᒪᒋᑦ. ᒪᒃᑯᒃᑑᔪᓐᓃᕋᓗᐊᖅᖢᓂ, ᑭᕙᓪᓕᕐᒥ ᐃᒻᖏᖅᑎ ᐅᖃᓚᐅᖅᑐᖅ ᑐᑭᓯᐅᒪᔪᕉᖅ ᐃᑲᔫᑎᒃᓴᓂᒃ ᐱᑕᖃᕆᐊᖃᕐᓂᖓᓄᑦ ᓄᓇᕗᒥ ᒪᒃᑯᒃᑐᓄᑦ ᐊᖑᑎᓄᑦ.

“ᐊᖑᑎᑦ ᐊᖑᑕᐅᖃᑎᒥᓄᑦ ᐅᖃᓪᓚᒍᓐᓇᖅᓯᔭᕆᐊᖃᕐᒪᑕ ᐃᒃᐱᒋᔭᒥᓂᒡᓗ ᐅᖃᐅᓯᖃᕈᓐᓇᖅᓯᓗᑎᒃ ᐊᒻᒪᓗ ᑐᑭᓯᐅᒪᓗᑎᒃ ᖃᓄᖅ ᐃᒃᐱᖕᓂᐊᓂᖃᖃᑦᑕᕐᒪᖔᑕ ᐅᑉᓗᑕᒫᒃᑯᑦ,” ᑕᐃᒪᓐᓇ ᐅᖃᖅᖢᓂ. “ᐊᑖᑕᖃᖅᑑᔭᓕᕈᓐᓇᖁᑉᓗᒋᑦ ᑕᐃᑉᑯᐊ ᐊᑖᑕᓕᔭᕈᓐᓃᖅᑐᑦ ᐅᕝᕙᓘᓐᓃᑦ ᐊᖏᕐᕋᒥᓂᒃ ᐊᑖᑕᖃᙱᑦᑐᑦ, ᑕᐃᒪᐃᑦᑐᖃᕆᐊᓕᒃ.”

ᑐᑕᓐᓄᐊᖅ ᐊᑖᑕᐃᓚᐅᖅᓯᒪᔪᖅ ᒪᒃᑯᒃᑑᑉᓗᓂ.

“ᐃᓕᖅᑯᓯᑐᖃᕋᓂᒃ ᐊᓯᐅᔨᓯᒪᔫᔭᖅᑐᖓ, ᓄᓇᒥ ᐃᓅᓇᓱᐊᕈᓐᓇᕐᓂᕐᒧᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᓴᓇᕐᕈᑎᓕᐅᕈᓐᓇᕐᓂᕐᒥᒃ, ᐊᑖᑕᖃᙱᓐᓇᒪ,” ᑕᐃᒪᓐᓇ ᐅᖃᖅᖢᓂ. “ᐊᖓᔪᖃᓚᐅᖅᑐᖓ ᓇᔭᖃᖅᖢᖓᓗ, ᑭᓯᐊᓂ ᓄᑕᕋᖅᑖᕋᒥᒃ ᐃᖕᒥᓂᒃᑕᐅᖅ ᐃᓅᖃᑎᒌᓕᓚᐅᕐᒪᑕ.”

ᐅᐃᕆᓯᒪᖃᑦᑕᖅᓯᒪᓂᑰᔪᖅᑕᐅᖅ, ᑕᐃᒪᐃᒻᒪᑦ ᐃᑲᔪᖃᑦᑕᕈᒪᓯᒪᓕᖅᑐᖅ ᓴᓇᖃᑎᒥᓂᒃ, ᐃᓚᓐᓈᕐᒥᓂᒃ ᐊᒻᒪᓗ ᓄᓇᖅᑲᑎᒥᓂᒃ ᓇᓂᓯᓇᓱᒍᓐᓇᖁᑉᓗᒋᑦ ᐃᓅᓯᑦᑎᐊᕙᐅᓂᖅᓴᒥᒃ ᐊᒻᒪᓗ ᐃᓅᓯᕆᓚᐅᖅᑕᒥᑐᑦ ᐊᔪᓕᑐᐃᓐᓇᖁᓇᒋᑦ.

“ᖃᐃᖃᑕᐅᓯᒪᔪᖃᓚᐅᖅᑐᖅ (ᑲᑎᒪᔪᓂᒃ) ᐅᖃᖅᑐᖅ ᑕᒪᒃᑯᐊᒎᖅ ᐃᑲᔫᑎᑦ ᐱᓇᓱᐊᕈᓯᐅᑉ ᓄᙳᐊᓂ ᐱᓕᕆᐊᖑᖃᑦᑕᖅᐸᑕ ᐃᖢᐊᕋᔭᖅᑐᖅ ᐊᖓᔮᕐᓇᖅᑐᓄᑦ ᓵᙵᑐᐃᓐᓇᕈᒪᓇᓂ,” ᑕᐃᒪᓐᓇ ᐅᖃᖅᖢᓂ ᑐᑕᓐᓄᐊᖅ. “ᑕᒪᓐᓇ ᐃᓱᒪᑦᑎᐊᕐᓂᐅᔪᖅ Hᐃᓖ?”

ᑖᑉᑯᐊ ᐳᓚᕋᕐᓂᐊᖅᑐᑦ ᑲᔪᓯᑎᑦᑎᔪᒪᔪᑦ ᐳᓚᕋᕐᓂᕆᔪᒫᖅᑕᒥᓂᒃ ᕕᕗᐊᕆᒥ ᐊᒻᒪᓗ ᒫᑦᓯᒥ, ᐊᐅᓪᓚᖃᑦᑕᕈᓐᓇᖅᓯᔪᒫᕐᓂᖏᑦᑕ ᒪᓕᒐᖏᑦ ᒪᓕᒡᓗᒋᑦ.

ᑐᑕᓐᓄᐊᖅ ᒪᒃᑯᒃᑐᓂᒃ ᐊᖑᑎᓂᒃ ᐅᔾᔨᖅᑐᖁᔨᔪᖅ ᐳᓛᕐᕕᒃᑯᑦ Facebook-ᖓᓂᒃ ᓴᓇᔭᒃᓴᖃᓕᕈᓐᓇᕐᓂᖓᓄᑦ ᑲᒪᔨᐅᓂᕐᒧᑦ ᑖᑉᑯᑎᒎᓇᖅ ᓯᕗᓂᒃᓴᒥ ᐃᑲᔫᑎᒃᓴᒃᑯᑦ.