ᓄᕕᐱᕆ 2022−ᒥ, ᐊᕐᕕᐊᓂ ᕼᐋᒻᓚᒃᑯᑦ ᑲᑎᒪᔨᖏᑦ ᐊᒃᓱᕈᕋᓱᐊᓚᐅᖅᐳᑦ ᓄᖅᑲᖅᑎᑦᑎᓂᕐᒥ ᐋᓐᓂᖅᓯᕆᓂᐅᔪᒥ, ᐱᒋᐊᕐᓂᐊᕐᓂᕋᐃᔪᓂ, ᐱᑦᑎᐊᙱᓐᓂᐅᔪᓂ ᐊᒻᒪ ᐃᒥᐊᓗᖕᒥ ᐃᓄᓕᒫᓄᑦ ᐃᒡᓗᖁᑎᒋᔭᐅᔪᓂ.
ᐊᑐᐊᒐᖅ ᐅᖃᖅᓯᒪᕗᖅ ᑭᓇᑐᐃᓐᓇᖅ ᐊᑐᖅᑐᒥ ᐅᕝᕙᓘᓐᓃᑦ ᓂᐅᕕᐊᒃᓴᖃᖅᑐᒥ ᐃᒥᐊᓗᖕᒥ ᕼᐋᒻᓚᒃᑯᑦ ᐃᒡᓗᖁᑎᖓᓐᓂ ᐊᓂᖁᔭᐅᑲᐅᑎᒋᓇᔭᖅᐳᖅ ᐊᒻᒪ ᑐᙵᓱᒃᑎᑕᐅᒃᑲᓐᓂᕐᓗᓂ ᐃᑲᕐᕋᑦ 24 ᐊᓂᒍᖅᐸᑦ. ᐅᖃᐅᓯᒃᑯᑦ ᐱᑦᑎᐊᕈᓐᓃᖅᐸᑕ, ᐅᕝᕙᓘᓐᓃᑦ ᐋᓐᓂᖅᓯᕆᓂᖃᕐᓗᑎᒃ ᓴᖑᔭᐅᔾᔪᑏᑦ ᐱᓂᖅᓴᐅᓇᔭᖅᐳᑦ.
ᑭᓇᑐᐃᓐᓇᖅ ᐃᓚᐅᖃᑕᐅᔪᒥ ᐅᖃᐅᓯᒃᑯᑦ ᐱᑦᑎᐊᙱᓐᓂᐅᔪᒥ ᐊᑐᖅᑎᐅᔪᓂ ᕼᐋᒻᓚᒃᑯᑦ ᐃᒡᓗᖁᑎᖓᓐᓂ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᓄᑦ ᐃᓯᖅᑎᑕᐅᑦᑕᐃᓕᒪᓂᐊᖅᐳᑦ ᕼᐋᒻᓚᒃᑯᑦ ᐃᒡᓗᖁᑎᖏᓐᓂ ᐅᓪᓗᓄᑦ 30−ᓄᑦ, ᐊᒻᒪ ᑭᓇᑐᐃᓐᓇᖅ ᐃᓚᐅᖃᑕᐅᔪᒥ ᐋᓐᓂᖅᓯᕆᓂᐅᔪᒥ ᐃᓗᐊᓂ ᓄᓇᖓᓐᓂᓪᓘᓐᓃᑦ ᐊᕙᓗᓯᒪᔪᒥ ᕼᐋᒻᓚᒃᑯᑦ ᐃᒡᓗᖁᑎᖏᓐᓂ ᓵᙵᔪᓐᓇᖅᐳᑦ ᐅᓪᓗᓂ 90−ᓂ ᐃᓯᖅᑎᑕᐅᑦᑕᐃᓕᒪᓂᐅᔪᒥ. ᑕᐃᒃᑯᐊ ᐃᓚᐅᔪᓂ ᐋᓐᓂᖅᓯᕆᓂᐅᔪᒥ ᐅᐸᒋᐊᖃᖅᐳᑦ ᑲᑎᒪᔨᓄᑦ ᑲᑎᒪᓂᐅᔪᒥ ᐊᒻᒪ ᐅᖃᐅᓯᖃᕐᓗᑎᒃ ᖃᓄᐃᓕᐅᕐᓂᕆᓚᐅᖅᑕᒥᓂᑦ ᑲᑎᒪᔨᓄᑦ ᐊᒻᒪ ᐊᑐᐃᓐᓇᖃᕐᓗᑎᒃ ᒪᒥᐊᓐᓂᐅᔪᒥ ᐃᓯᖅᑎᑕᐅᒃᑲᓐᓂᓚᐅᖅᑳᕋᑎᒃ.
ᑕᒪᓐᓇ ᐊᑐᐊᒐᖅ ᐊᑐᕐᓂᖃᖅᐳᖅ ᑕᒪᒃᑭᓄᑦ ᓱᕈᓯᕐᓄᑦ ᐊᒻᒪ ᐃᓐᓇᕐᓄᑦ – ᐊᒻᒪ ᓱᕈᓯᖅ ᐃᓯᖅᑎᑕᐅᑦᑕᐃᓕᒪᒍᓂ, ᐊᖓᔪᖅᑳᖏᑦ ᐊᒻᒪ ᐸᖅᑭᔨᖏᑦᑕᐅᖅ ᐃᓯᖅᑎᑕᐅᑦᑕᐃᓕᒪᓂᐊᕆᕗᑦ.
ᒫᓐᓇᒧᑦ ᑎᑭᖦᖢᒍ, ᐊᕐᕕᐊᑦ ᒪᐃᔭ ᔫ ᓴᕕᑲᑖᖅ ᓄᑲᖅᖠᖅ ᐅᖃᓚᐅᖅᐳᖅ 12−ᓂ ᐃᓄᖕᓂ ᓵᙵᕗᑦ ᐊᔾᔨᒌᙱᑦᑑᑎᓂ ᑕᑭᓂᐅᔪᓂ ᑕᐃᒪᙵᓂ ᐊᑐᐊᒐᖅ ᐊᑐᓕᖅᑎᑕᐅᓚᐅᕐᓂᖓᓂ. ᐊᕐᕕᐊᓂ ᓈᓚᐅᑎᒃᑰᓚᐅᖅᐳᖅ ᕕᕗᐊᕆ 9−ᒥ ᐅᖃᐅᓯᖃᕐᓂᕐᒧᑦ ᐊᒻᒪ ᐃᓚᖏᓐᓂ ᐃᓱᒫᓘᑕᐅᔪᓂ ᐊᕙᓗᓯᒪᔪᒥ ᓄᑖᖑᔪᓂ ᒪᓕᒐᐅᔪᓂ.
ᐊᑎᓕᐅᖅᓯᒪᔪᑦ ᑐᒃᓯᕋᐅᑎᒥᒃ ᑐᓂᐅᖅᑲᖅᑕᐅᔪᒥ ᐊᕐᕕᐊᓂ ᐊᒻᒪ ᖃᕋᓴᐅᔭᑎᒍᑦ ᐊᐱᕆᕗᑦ ᑲᑎᒪᔨᓂ ᐃᓱᒪᒃᓴᖅᓯᐅᕆᒃᑲᓐᓂᕐᓂᕐᒥ ᐊᑐᐊᒐᕐᒥ.
“ᐃᓐᓇᐃᑦ ᐊᒻᒪ ᓱᕈᓰᑦ ᐊᔾᔨᒌᙱᓚᑦ,” ᐅᖃᓕᒫᕐᓂᖃᖅᐳᖅ ᖃᕋᓴᐅᔭᑎᒍᑦ ᐊᑎᓕᐅᖅᓯᒪᔪᑦ ᑐᒃᓯᕋᐅᑎ, ᐱᒋᐊᖅᑕᐅᔪᒥ ᒨᓇ ᑕᑎᒧᑦ. “ᖃᓄᐃᓐᓂᐅᔪᑦ ᐊᔾᔨᒌᓪᓗᐊᙱᑉᐳᑦ. ᑐᑭᖃᙱᓚᖅ ᐱᔮᖅᑯᖅᑕᐅᖏᑦᑐᒧᑦ ᓱᒋᐊᖅᑕᐅᓂᑦ ᐅᑭᐅᑭᓗᐊᖅᑐᓂ ᐊᔾᔨᖓᓂ ᐃᓐᓇᖅᑎᑐᑦ. ᐃᒪᐃᖁᔨᓇᔭᖅᐳᒍᑦ ᕼᐋᒻᓚᒃᑯᑦ ᐊᕐᕕᐊᓂ ᐃᓇᖏᖅᓯᓂᖏᓐᓂ ᖃᓄᐃᓐᓂᐅᔪᓂ.”
ᐊᑎᓕᐅᖅᓯᒪᔪᑦ ᑐᒃᓯᕋᐅᑎ ᑐᓂᔭᐅᕝᕕᒃᓴᖃᖅᐳᖅ ᑲᑎᒪᔨᓄᑦ ᐃᓱᒪᒃᓴᖅᓯᐅᕆᔭᐅᓂᖓᓄᑦ ᕕᕗᐊᕆ 14−ᒥ ᑲᑎᒪᔨᒃᑯᓐᓂ ᑲᑎᒪᓂᐅᔪᒥ. ᐊᑕᐅᓯᕐᒥ ᐃᑲᔪᖅᓱᐃᔨᐅᒧᒥ ᐊᑎᓕᐅᖅᓯᒪᔪᑦ ᑐᒃᓯᕋᐅᑎᒥᒃ ᐅᖃᓪᓚᖃᑎᖃᕈᒪᓚᐅᙱᓚᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᑭᓯᐊᓂ ᐱᔭᕇᕌᓂᒃᐸᑦ.
ᓴᕕᑲᑖᖅ ᐅᖃᐅᔾᔨᓚᐅᖅᐳᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᑐᕌᒐᒃᓴᕆᔭᖓ ᐊᑐᐊᒐᕐᒥ ᓄᖅᑲᖅᑎᑦᑎᓂᕐᒥ ᐸᕖᓵᕆᓂᐅᔪᒥ ᐊᒻᒪ ᐊᑦᑕᓇᔾᔭᐃᖅᓯᓯᒪᓂᕐᒥ ᐊᕙᑎᐅᔪᒥ ᑭᒃᑯᓕᒫᓄᑦ.
“ᐊᑭᕋᖅᑐᖅᐳᒍᑦ ᐋᓐᓂᖅᓯᕆᓂᐅᔪᒥ, ᐊᑭᕋᖅᑐᖅᐳᒍᑦ ᐅᓇᑕᖅᑐᓂ, ᐊᑭᕋᖅᑐᖅᐳᒍᑦ ᑕᒪᒃᑭᓕᒫᓂᑦ,” ᐅᖃᓚᐅᖅᐳᖅ. “ᐊᑭᕋᖅᑐᙱᓚᒍᑦ ᑭᓇᑐᐃᓐᓇᒥᒃ (ᓵᙵᓂᖃᙱᓚᒍᑦ ᑭᓇᑐᐃᓐᓇᒥᒃ).”
ᐅᖃᓚᐅᖅᐳᖅ “ᐊᖏᐸᓗᒃᑐᒥ” ᐱᑦᑎᐊᙱᓐᓂᖃᓚᐅᖅᐳᖅ ᐊᔾᔨᒌᙱᑦᑑᑕᐅᔪᓂ ᐋᖅᑭᒃᓯᒪᓂᐅᔪᓂ ᐱᓕᕆᐊᖑᔪᓂ, ᐱᒋᐊᖅᑎᑦᑎᓚᐅᖅᑐᒥ ᑲᑎᒪᔨᓂ ᐊᑐᐊᒐᓕᐅᕐᓂᕐᒥ ᓄᕕᐱᕆᐅᑉ ᓄᙳᐊᓂ.
ᑕᐃᒪᙵᓂ, “ᑕᑯᓲᖑᕗᒍᑦ ᐊᑐᕐᓂᖅᓴᐅᓂᐅᔪᓂ, ᐅᓄᕐᓂᖅᓴᓂ ᐃᓄᖕᓂ ᐱᙳᐊᕐᕕᓕᐊᖅᑐᓂ ᐊᒻᒪ ᐊᓐᓂᑭᑕᕐᕕᖕᒧᑦ ᒫᓐᓇᐅᔪᒥ,” ᐅᖃᓚᐅᖅᐳᖅ ᓴᕕᑲᑖᖅ. “ᐃᓄᐃᑦ ᐅᖃᑲᑕᓕᖅᐳᑦ ᐊᑦᑕᓇᙱᑦᑐᒧᑦ ᐃᓕᓂᓕᐊᖅᐸᓕᕐᓂᖏᓐᓂ ᓇᐅᑦᑎᖅᓱᖅᑎᖃᓕᕐᒪᑕ ᐃᓕᓯᒪᔪᒥ, ᐊᒻᒪ ᑭᒃᑯᓕᒫᑦ ᐊᑦᑕᓇᖅᑐᒦᑦᑑᔮᕈᓐᓃᖅᐳᑦ.”
ᐃᓚᒋᐊᖅᓯᓚᐅᖅᐳᖅ ᓇᓕᐊᑐᐃᓐᓇᓂ ᖃᓄᐃᓐᓂᐅᔪᒥ, ᐊᔪᕐᓇᖅᐳᖅ ᑭᒃᑯᓕᒫᓂ ᓈᒻᒪᒃᓴᓕᕐᓂᖓᓂ.
“ᐃᓄᖕᓂ ᖁᕕᐊᓱᙱᓐᓂᖃᖅᑐᖃᖅᐳᖅ ᐆᒪᙵᑦ,” ᐅᖃᓚᐅᖅᐳᖅ, ᐃᓚᒋᐊᖅᓪᓗᓂ ᐃᓚᖏᑦ ᐱᕐᔪᐊᖑᓗᐊᕐᓂᖓᓂ.
ᓴᕕᑲᑖᖅ ᐅᖃᓚᐅᖅᐳᖅ ᑭᒃᑯᓕᒫᑦ ᐱᔪᓐᓇᕐᓂᖃᖅᐳᑦ ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᔪᓐᓇᖅᐳᑦ ᐊᒻᒪ ᐱᒋᐊᖅᑎᑦᑎᓗᓂ ᐊᑎᓕᐅᖅᓯᒪᔪᑦ ᑐᒃᓯᕋᐅᑎᓂ, ᑭᓯᐊᓂ ᐱᓕᕆᔭᐅᑦᑎᐊᕆᐊᖃᖅᐳᑦ.
“ᑭᓇᑐᐃᓐᓇᖅ ᓂᕈᐊᖅᑕᐅᓯᒪᔪᓄᑦ ᑲᑎᒪᔨᓄᐊᕈᓐᓇᖅᐳᑦ ᐅᖃᐅᓯᖃᕐᓂᕐᒥᓂ ᐃᓱᒫᓘᑎᖏᓐᓂ ᐅᕝᕙᓘᓐᓃᑦ ᐅᖃᐱᓗᒡᓗᑎᒃ, ᐅᕝᕙᓘᓐᓃᑦ ᐃᓄᓕᒫᓄᑦ ᑲᑎᓴᑎᑦᑎᓗᑎᒃ,” ᐅᖃᓚᐅᖅᐳᖅ. “ᑕᒪᒃᑯᐊᓕᒫᑦ ᖃᓄᐃᙱᓚᑦ. ᐅᖃᙱᓚᖓ ᐃᒪᐃᓚᐅᕐᓂᖓᓂ, ᑭᓯᐊᓂ ᑕᒻᒪᕐᓂᐅᔪᑦ ᐱᓕᕆᓂᐅᔪᑦ (ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᓂᐅᔪᒥ) ᐱᑦᑎᐊᙱᓐᓂᐅᔪᒥ ᐅᕝᕙᓘᓐᓃᑦ ᐊᔭᐅᕆᓂᖏᓐᓂ ᐊᓯᖏᓐᓂ ᐊᑎᓕᐅᕆᓂᖏᓐᓂ ᐊᑎᓕᐅᖅᓯᒪᔪᑦ ᑐᒃᓯᕋᐅᑎᓂ, ᐊᓯᔾᔩᓂᕐᒥ ᐊᑎᓕᐅᖅᓯᒪᔪᑦ ᑐᒃᓯᕋᐅᑎᓂ ᓱᓕᓂᐅᔪᒥ ᐊᒻᒪᓗ ᐃᓄᖕᓂ ᐊᑎᓕᐅᕆᖁᔨᓗᑎᒃ ᑲᑉᐱᐊᓵᕆᔭᐅᓗᑎᒃ ᐱᔪᒪᙱᑎᓪᓗᒋᑦ.”
ᐅᖃᓚᐅᖅᐳᖅ ᐊᑭᕋᖅᑐᙱᓚᖅ ᐃᓄᖕᓂ ᐊᑎᓕᐅᕆᓂᖏᓐᓂ ᐊᑎᓕᐅᖅᓯᒪᔪᑦ ᑐᒃᓯᕋᐅᑎᒥᒃ ᐊᕐᕕᐊᓂ, ᐊᒻᒪ ᑭᒃᑯᓕᒫᑦ ᐃᓯᕈᓐᓇᐃᓪᓕᑎᑎᑕᐅᓯᒪᔪᓂ ᑐᙵᓱᒃᑎᑕᐅᒃᑲᓐᓂᕐᓂᐊᖅᐳᑦ ᐃᓯᕈᓐᓇᐃᓪᓕᑎᑕᐅᓂᖓ ᐃᓱᓕᑉᐸᑦ.
“ᑭᒃᑯᓕᒫᑦ ᐱᔪᓐᓇᕐᓂᖃᖅᐳᑦ ᐊᑦᑕᓇᙱᑦᑐᒥ ᐊᕙᑎᒦᓐᓂᖏᓐᓂ,” ᐅᖃᓚᐅᖅᐳᖅ ᓴᕕᑲᑖᖅ. “ᑕᒪᓐᓴ ᑕᒪᑐᒥᖓ ᑐᑭᖃᖅᐳᖅ. ᐊᑭᕋᖅᑐᐃᔪᐃᓐᓇᐅᕗᒍᑦ ᐱᑦᑎᐊᙱᓐᓂᐅᔪᒥ, ᐊᑭᕋᖅᑐᖅᐳᒍᑦ ᐃᒻᒥᓃᕐᓂᕐᒥ, ᑕᒪᒃᑯᐊᓕᒫᑦ ᐊᑭᕋᖅᑐᖅᐸᕗᑦ.”