ᑭᕙᓪᓕᕐᒥ ᖃᐅᔨᓚᐅᑦᑐᑦ ᑕᕐᕆᔭᐅᑎᑎᑑᖅᑐᑎᑐᑦ Homeward Bound-ᖑᓂᕋᖅᑕᐅᔪᑎᑐᑦ ᑕᖅᑭᖅ ᐱᒋᐊᓕᓵᖅᑎᓪᓗᒍ ᕿᒻᒥᕆᔭᐅᔪᖅ 70 ᑭᓛᒥᑕᓂᒃ ᓄᓇᒃᑰᓚᐅᖅᑎᓪᓗᒍ ᐃᓚᒥᓄᙵᐅᑉᓗᓂ.
ᐊᑕᒻᔅᑯᑦ ᐃᓚᒌᒃ ᐊᐅᓪᓚᖅᑎᓕᖅᖢᑎᒃ ᑲᖏᖅᖠᓂᕐᒥ ᑎᑭᕋᕐᔪᐊᕐᒧᑦ ᑐᓴᖅᑳᖅᖢᑎᒃ ᐃᓚᐃᓂᕐᒥᓄᑦ ᒪᐃ 2-ᒥ.
ᑎᖕᒥᓲᑦ ᖃᖓᑕᔾᔮᙱᓕᖅᖢᑎᒃ ᖃᐅᑐᐃᓐᓇᖅᑎᓪᓗᒍ, ᑎᑭᕋᕐᔪᐊᓕᐊᓕᓚᐅᖅᑐᑦ ᓯᑭᑑᒃᑯᑦ ᖃᐅᑐᐊᕐᒪᑦ ᐅᑉᓛᒃᑯᑦ.
ᐸᕐᓇᒃᑎᓪᓗᒋᑦ, ᐃᓚᒌᑦ ᐅᔾᔨᕈᓱᓚᐅᖅᑐᑦ ᖁᓕᓂᒃ ᐅᑭᐅᓂᒃ ᕿᒻᒥᕆᓕᖅᑕᓂ ᐸᐸ ᐅᐃᒪᔮᖅᑎᓪᓗᒍ ᐃᓚᐅᔪᒪᑉᓗᓂ. ᕿᒻᒥᕆᔭᐅᔪᖅ ᑕᐃᒪᐃᒐᔪᙱᖦᖢᓂ, ᐃᓐᓇᐅᓗᐊᓕᖅᖢᓂ ᑐᓵᑦᑎᐊᕈᓐᓃᖅᖢᓂᓗ ᐊᒻᒪᓗ ᐅᑉᓗᓗᒃᑖᖅᑲᔭᖅ ᓯᓂᖃᑦᑕᓕᖅᖢᓂ. ᓄᓇᒧᙵᐅᖃᑕᐅᔪᒪᓂᖓ ᓱᖏᐅᓐᓇᓚᐅᙱᑦᑐᖅ ᕿᒻᒥᕆᔭᐅᔪᖅ ᓄᓇᒧᙵᐅᓚᐅᖅᓯᒪᔪᓐᓃᖅᑎᓪᓗᒍ 8-ᓂᒃ ᐅᑭᐅᓂᒃ ᖁᒃᓴᓪᓚᒍᑎᖃᓚᐅᖅᓯᒪᑎᓪᓗᒋᑦ.
“ᓇᒧᙵᐅᓱᐃᑦᑑᓕᖅᑐᖅ. ᐳᑭᖅᑕᓕᙳᐊᕐᓘᓐᓃᑦ ᐃᓱᒪᔪᓐᓇᐃᓪᓕᔪᖅ ᕿᒻᒥᕐᒥᒃ,” ᐊᓈᓇᒋᔭᐅᔪᖅ ᑕᓇ ᐊᑕᒻᔅ ᐅᖃᖅᖢᓂ, ᐅᖃᐅᔾᔨᓪᓗᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ.
ᑭᓯᐊᓂᓕ, ᐃᓚᒌᑦ ᐊᑕᒻᔅᑯᑦ ᕿᒃᓵᖕᓇᖅᑐᒃᑰᖅᑎᓪᓗᒋᑦ ᐃᓚᐃᓵᕐᓂᕐᒧᑦ, ᑕᓇ ᐅᖃᖅᖢᓂ ᕿᒻᒥᓂ ᐸᐸ ᐱᔫᒥᒍᓱᖕᓂᖅᓴᐅᔫᔭᓚᐅᕐᒪᑦ ᐃᒃᐱᒍᓱᒃᑑᔭᖅᖢᓂᓗ.
“ᖁᒃᓴᓪᓚᒃᓯᒪᓚᐅᕋᑉᑕ ᐊᒃᓱᕈᕐᓇᖅᑐᒃᑰᖅᖢᑕ ᐊᒻᒪᓗ ᕿᒃᓵᒃᖢᑕ ᕿᒻᒥᐅᑉ ᐃᒃᐱᒋᓚᐅᖅᑕᖓ, ᐃᓚᐅᖃᑕᐅᔪᒪᔪᒻᒪᕆᐊᓘᓚᐅᕐᒪᑦ. ᖃᒧᑎᒧᓪᓘᓐᓃᑦ ᒥᓯᒃᖢᓂ,” ᑕᐃᒪᓐᓇ ᐅᖃᖅᖢᓂ ᐊᑕᒻᔅ. “ᑕᒪᓐᓇ ᑐᕌᖓᑎᑕᕋ ᖃᐅᔨᒪᓚᐅᕐᒪᑦ ᓈᒻᒪᙱᑦᑐᖃᕐᓂᖓᓄᑦ ᐊᒻᒪᓗ ᐊᓕᐊᓇᐃᙱᑦᑐᒃᑰᕐᓂᑉᑎᓐᓂᒃ ᖃᐅᔨᒪᓚᐅᖅᑐᖅ ᕿᒃᓵᖕᓂᑉᑎᓐᓄᓪᓗ ᑕᐃᑲᓂ ᐅᑉᓗᖓᓂᒃ. ᐅᕙᑉᑎᓐᓂᒃ ᕿᒪᐃᔪᒪᙱᑦᑎᐊᓚᐅᖅᑐᖅ.”
ᐃᓚᒌᑦ ᐊᐅᓪᓚᑕᐃᓐᓇᕐᒪᑕ, ᐸᐸ ᒪᓕᒐᓱᓚᐅᖅᑐᖅ ᖃᒧᑎᒥᒃ ᑭᓯᐊᓂ ᐊᖏᕐᕋᒧᑦ ᐅᑎᓕᓚᐅᖅᑐᖅ ᐊᑕᒻᔅᑯᑦ ᐸᓂᖓ ᓄᑲᖅᖠᖅᐹᖓ ᐊᖏᕐᕋᐅᒪᖕᒪᑦ.
ᖃᐅᖕᒪᑦ, ᐸᓂᒋᔭᐅᔪᖅ ᑎᖕᒥᓲᒃᑯᑦ ᑎᑭᕋᕐᔪᐊᓕᐊᓕᓚᐅᖅᑐᖅ ᐃᓚᒥᓄᙵᐅᑉᓗᓂ, ᕿᒪᒃᖢᒍ ᐸᐸ ᐊᖏᕐᕋᒥ.
ᐃᓗᕕᖅᓯᐊᓂᒃᑎᓪᓗᒋᑦ ᖃᐅᖕᒪᑦ, ᐊᑖᑕᐅᔪᖅ ᐅᐃᓕ ᐊᑕᒻᔅ ᑲᖏᖅᖠᓂᕐᒧᑦ ᐅᑎᓕᓚᐅᖅᑐᖅ ᓯᑭᑑᒃᑯᑦ ᐃᕐᓂᕐᒥᓂᒃ ᐊᖓᔪᖅᖠᖅᐹᕐᒥᒃ ᐱᖃᑎᖃᖅᖢᓂ ᓴᓇᔭᕆᐊᖃᕐᒪᑦ. ᐊᖏᕐᕋᕐᒪᑎᒃ, ᖁᕕᐊᓱᒍᓐᓃᓚᐅᖅᑐᑦ ᐸᐸ ᐊᖏᕐᕋᖅᓯᒪᙱᒻᒪᑦ. ᓄᓇᓕᐅᑉ ᐃᓗᐊᓂ ᕿᒻᒥᖅ ᕿᓂᓚᐅᐱᓪᓚᒃᖢᒍ ᑭᓯᐊᓂ ᓇᓂᔪᓐᓇᕐᓇᒍ.
ᑕᓇ ᐅᖃᖅᖢᓂ ᕿᒃᓵᖕᓇᖅᑐᒃᑰᓕᐊᓂᖕᒪᑕᒎᖅ ᐃᓚᒌᒃ ᐃᓚᐃᕐᓂᕐᒧᑦ ᐊᖏᖃᑎᒌᑐᐃᓐᓇᓕᓚᐅᖅᑐᑦ ᐸᐸ ᐅᑎᔾᔮᕈᓐᓃᕐᓂᖓᓄᑦ.
“ᑕᒪᓐᓇ ᓯᕗᓪᓕᖅᐸᐅᑎᓯᒪᓚᐅᙱᓐᓇᑉᑎᒍᑦ. ᓴᑉᑯᑐᐃᓐᓇᓚᐅᖅᑕᖅᐳᑦ. ᖁᕕᐊᓱᓚᐅᙱᑦᑐᒍᑦ ᑭᓯᐊᓂ ᐅᖁᒪᐃᑦᑐᒃᑰᖅᓯᒪᓚᐅᕋᑉᑕ,” ᑕᐃᒪᓐᓇ ᐅᖃᖅᖢᓂ.
ᖃᑉᓯᑲᓪᓚᑦ ᐅᑉᓗᑦ ᐱᐊᓂᖕᒪᑕ, ᐊᖑᓇᓱᒃᑎ ᐃᖏᕐᕋᔪᖅ ᑎᑭᕋᕐᔪᐊᑉ ᑲᖏᖅᖠᓂᐅᑉᓗ ᐊᑯᓐᓂᖓᓂᒃ ᐅᖃᐅᔾᔨᑉᓗᓂ ᐊᑕᒻᔅᑯᓐᓂᒃ ᑕᑯᓇᓱᒋᖅᑲᐅᑉᓗᓂ ᕿᒻᒥᖓᑕ ᐊᔾᔨᖓᓂᒃ ᓄᓇᒥ.
“ᐃᓱᒪᓕᓚᐅᖅᑐᒍᑦ ᐅᑎᔾᔮᕈᓐᓃᒻᒪᕆᒐᓱᒋᑉᓗᒍ. ᓄᓇᒧᙵᐅᖕᒪᑦ ᓄᓇᒥᓗ ᐊᒪᕈᖃᕋᔪᓕᖅᖢᓂ ᐊᒻᒪᓗ ᐃᓄᐃᑦ ᐃᖏᕐᕋᔭᖃᑦᑕᖅᑐᒻᒪᕆᐊᓘᓕᕐᒪᑕ ᓄᓇᓖᑦ ᐊᑯᓐᓂᖓᒍᑦ ᐅᑭᐅᑉ ᐃᓗᐊᓂ ᑕᐃᒪᐃᓕᖅᑎᓪᓗᒍ,” ᑕᓇ ᐅᖃᖅᖢᓂ.
ᐅᐃᓕ ᑲᖏᖅᖠᓂᕐᒦᓕᖅᖢᓂ, ᑕᓇ ᑎᑭᕋᕐᔪᐊᕐᒦᖦᖢᓂ ᐸᓂᓂᓗ ᓄᑲᖅᖠᖅ ᐊᒻᒪᓗ ᐃᕐᖑᑕᓂ ᐃᓚᒥᓃᖦᖢᑎᒃ ᐱᓇᓱᐊᕈᓯᐅᑉ ᐃᓗᐊᓂ.
ᒪᐃ 10-ᒥ, ᑕᓇ ᐃᕐᖑᑕᕐᒥᓂᒃ ᓇᒃᓴᖅᖢᓂ ᕿᑎᒃᑐᓄᙵᐅᔫᒃ Hᐊᒻᓚᒃᑯᑦ ᐅᑉᓗᖏᓐᓂᒃ ᕿᑎᒃᑎᑦᑎᔪᓄᑦ.
ᓯᑯᒧᙵᐅᕙᓪᓕᐊᑉᓗᓂ ᕿᑎᒃᑐᓄᑦ, ᐸᓂᓂ ᑕᑯᔭᖓ ᐅᓪᓚᒃᑐᖅ ᐃᖕᒥᓄᑦ ᔭᐸᓂ ᓰᒃᑕᖅᑐᖅᓯᒪᙱᖦᖢᓂᐅᒃ ᐅᖃᓘᑎᐊᓛᒥᓂᒡᓗ ᑎᒍᒥᐊᖅᖢᓂ.
ᑲᑎᒻᒪᑎᒃ, ᐸᓂᖓᑕ ᐅᖃᐅᑎᑉᓗᓂᐅᒃ ᐸᐸᒎᖅ ᓄᓇᓕᖕᒦᖅᑰᖅᑐᖅ. ᐅᖃᖅᖢᓂ ᒪᓕ ᐅᑲᓕᕉᖅ, ᓄᓇᓕᖕᒥ ᕿᑎᒃᑐᓕᕆᔨ, ᐊᔾᔨᒥᒃ ᓇᒃᓯᐅᔾᔨᖅᑲᐅᖕᒪᑦ ᕿᒻᒥᖓᑕ ᐊᔾᔨᖓᓂᒃ ᓄᓇᓕᖕᒥ ᐸᖓᓕᑲᑕᒃᑐᒥᒃ.
ᓱᒃᑲᒃᑎᖦᖢᑎᒃ ᐃᖏᕐᕋᔭᓕᖅᖢᑎᒃ ᓄᓇᓕᖕᒥ, ᐃᕆᐊᓛᖅᖢᑎᒡᓗ ᐊᑎᖓᓂᒃ. ᑕᐃᒪᓕ ᑐᐊᒡᓕᓯᒪᔪᖅ ᕿᒻᒥᖅ ᓴᖅᑭᓕᓚᐅᖅᑐᖅ ᐃᒻᒥᕆᔫᔭᖅᖢᓂᐅᒃ.
ᐸᐸ ᐃᓕᑕᖅᓯᒐᒥ ᐃᓄᖁᑎᒥᓂᒃ, ᒥᓯᓕᓚᐅᖅᑐᖅ ᑕᓇᐅᑉ ᑕᓕᖏᓐᓄᑦ.
“ᐃᒡᒑᒃᑲᒡᓘᓐᓃᑦ ᐱᒃᓯᖅᑲᔭᖅᖢᑎᒃ ᒥᓯᖕᒪᑦ,” ᑕᐃᒪᓐᓇ ᐅᖃᖅᖢᓂ ᑕᓇ. “ᐃᓅᓯᒻᓂᒃ ᕿᐊᓯᑳᓪᓚᓚᐅᖅᓯᒪᖅᑰᙱᑦᑐᖓ ᑕᐃᒪᓐᓇ.
“ᖁᕕᐊᓱᓗᒃᑖᓕᓚᐅᖅᑐᒍᑦ ᐊᒻᒪᓗ ᓴᕆᒪᒋᑉᓗᒍ. ᓱᑲᖓᔪᓐᓃᓚᐅᖅᑐᒍᑦ ᕿᒻᒥᑯᓗᒃᐳᑦ ᐅᑎᕐᒪᑦ.”