ᐊᒥᓱᑦ ᐃᓄᐃᑦ ᐃᓱᒪᕗᑦ ᐋᕗᕆᑲ ᓄᓇᐅᓂᖓᓂ, ᐊᖏᕐᒧᐊᖅᑐᒥ ᓄᓇᐅᑎᓪᓗᒍ, ᐅᖃᓚᐅᖅᐳᖅ ᒫᓂ ᐅᓗᔪᒃ ᐃᓕᓐᓂᐊᕐᕕᖓᑕ ᐃᓕᓴᐃᔨᓄᑦ ᐊᖓᒧᖅᑳᖑᔪᖅ ᐅᓗᓱᒐ ᑐᒧᓗᔪ.
“ᐃᓄᐃᑦ ᐊᐱᕇᓐᓇᐅᔭᖅᐳᑦ ᐋᕗᕆᑲᐅᑉ ᒥᒃᓵᓄᑦ,” ᐃᒡᓚᓚᐅᖅᐳᖅ ᐃᓚᒌᖑᔪᓄᑦ ᐊᒻᒪ ᐃᓕᖅᑯᓯᒥ ᐅᓐᓅᔪᒥ ᑲᖏᖅᖠᓂᕐᒥ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ ᕿᑎᖅᑰᑦ, ᒫᔾᔨ 9−ᒥ.
ᑐᒧᓗᔪ ᐅᓂᒃᑳᓚᐅᖅᐳᖅ ᐱᓇᖕᓇᖓᓂ ᐃᓚᖓᓐᓂᙶᖅᐳᖅ ᓇᐃᔨᐅᕆᐊᒥ, ᖃᐅᔨᒪᔭᐅᔪᒥ ᔪᕉᐸᒥ, ᐊᒻᒪ ᐊᓐᓄᕌᖅᓯᒪᓚᐅᖅᐳᖅ ᐱᖅᑯᓯᑐᖃᑎᒍᑦ ᐊᓐᓄᕌᖏᓐᓂ ᐃᓕᖅᑯᓯᖓᓐᓂ.
ᖃᓄᐃᓐᓂᐅᔪᖅ ᓯᕗᓪᓕᖅᐸᐅᓚᐅᖅᐳᖅ ᐃᓕᓐᓂᐊᕐᕕᖕᒧᑦ ᐊᒻᒪ ᑕᑯᒃᓴᐅᑎᑦᑎᓚᐅᖅᐳᖅ ᐃᓄᖕᓂ ᕿᓚᐅᔾᔭᖅᑐᓂ, ᐃᓕᓐᓂᐊᕐᓂᐅᔪᓂ ᓴᓇᓂᕐᒧᑦ ᓇᖕᒥᓂᖅ ᕿᓚᐅᑎᓂᑦ, ᐊᓄᕌᓄᑦ ᑕᑯᒃᓴᐅᑎᑦᑎᓂᐅᔪᒥ ᐱᔭᕇᖅᓯᒪᔪᒥ ᐳᔫᖅᑎᑦᑎᔾᔪᑕᐅᔪᒥ, ᓂᕿᓂᑦ ᐊᔾᔨᒌᙱᑦᑐᓂ ᐃᓕᖅᑯᓯᐅᔪᓂ ᐊᒻᒪ ᐃᓄᖕᓄᑦ ᐱᙳᐊᕈᑕᐅᔪᓂ.
“ᑲᖏᖅᖠᓂᖅ ᐱᕈᖅᐸᓪᓕᐊᕗᖅ,” ᐅᖃᓚᐅᖅᐳᖅ ᑐᒧᓗᔪ. “ᐱᑕᖃᖅᐳᖅ ᑕᐃᔭᑦᑎᓐᓂ ᐊᑕᐅᓯᐅᓂᐅᔪᒥ ᐊᔾᔨᒌᙱᓐᓂᐅᔪᓂ. ᐃᓛᓐᓂᒃᑯᑦ ᖃᐅᔨᒪᙱᓚᒍᑦ ᐊᔾᔨᒌᙱᑦᑐᓂ ᐃᓕᖅᑯᓯᖃᕐᓂᑦᑎᓐᓂ ᐅᕙᓂ, ᑭᒃᑯᓕᒫᑦ ᐃᖅᑲᓇᐃᔭᕆᐊᓲᖑᕗᑦ ᐊᒻᒪ ᐅᑎᖅᐸᒃᖢᑎᒃ.”
ᐃᓱᒪᓕᖅᑎᑦᑎᓚᐅᖅᐳᖅ ᖃᓄᖅ ᑐᓂᓯᓂᕐᒥ ᓄᓇᓕᐅᔪᓂ ᑕᑯᒃᓴᐅᑎᑦᑎᓂᕐᒥ ᐊᔾᔨᒌᙱᓐᓂᐅᔪᓂ, ᑐᕌᖅᑎᑦᑎᓚᐅᖅᑐᒥ ᐃᓕᖅᑯᓯᒧᑦ ᐊᒻᒪ ᐃᓚᒌᓄᑦ ᐅᓐᓅᔪᒥ.
“ᐅᕙᙵᑦ ᐱᒋᐊᕈᑕᐅᔪᖅ ᑎᑭᓚᐅᖅᐳᖅ,” ᐅᖃᓚᐅᖅᐳᖅ ᑐᒧᓗᔪ. “ᑕᐃᕙᕗᑦ ᐃᓚᒌᓄᑦ ᐊᒻᒪ ᐃᓕᖅᑯᓯᐅᔪᒥ ᐅᓪᓗᖓᓂ. ᖃᐃᒋᑦ ᐊᒻᒪ ᑕᑯᒃᓴᐅᑎᑦᑎᓗᑎᑦ ᐃᓕᖅᑯᓯᖕᓂᑦ ᐊᒻᒪ ᑭᒃᑯᑐᐃᓐᓇᓂ ᐊᐱᖅᓱᕈᓐᓇᖅᑎᓪᓗᒋᑦ ᐃᓕᖅᑯᓯᕆᔭᕐᓂ.”
ᕋᐃᓕ ᑭᐊᓐᑦ, 13, ᐃᓕᓐᓂᐊᖅᑎᐅᕗᖅ ᒫᓂ ᐅᓗᔪᒃ ᐃᓕᓐᓂᐊᕐᕕᖓᓂ ᐊᒻᒪ ᖃᐅᔨᓴᖅᓯᒪᕗᖅ ᐃᓚᖏᓐᓂ ᐃᓚᖏᑕ ᓇᑭᙶᕐᓂᖏᓐᓂ ᓴᐃᓇᒧᑦ. ᐊᓐᓄᕌᖅᓯᒪᓚᐅᖅᐳᖅ Han ᓴᐃᓃᓯᓂ ᐊᓐᓄᕌᖏᓐᓂ, ᑕᑯᖅᑯᔾᔨᓪᓗᓂ ᐱᓱᒃᑎᓪᓗᒍ ᐱᓱᒡᕕᐅᔪᒥ ᐊᓐᓄᕌᓄᑦ ᑕᑯᒃᓴᐅᑎᑦᑎᓂᐅᔪᒥ. Han ᓴᐃᓃᓯᑦ ᑲᓇᖕᓇᕐᒥ ᐊᐃᑕᒥ ᐃᓄᖕᓂ ᑲᑎᙵᓂᐅᔪᓂ ᓴᐃᓇᒥ ᐊᒻᒪ ᐅᓄᓛᖑᓪᓗᑎᒃ ᑲᑎᙵᓂᐅᔪᓂ ᓄᓇᕐᔪᐊᓕᒫᒥ, ᐋᖅᑭᒃᓱᐃᓪᓗᓂ 18 ᐳᓴᓐᑎᐸᓗᖕᒥ ᓄᓇᕐᒧᐊᓕᒫᒥ ᐃᓄᒋᐊᖕᓂᐅᔪᓂ.
“ᐊᓈᓇᒐ ᓇᑉᐸᓪᓗᐊᖓᓂ−ᓴᐃᓃᓯᐅᕗᖅ,” ᐅᖃᓚᐅᖅᐳᖅ ᑭᐅᓐᑦ ᐊᐱᕆᔭᐅᒐᒥ ᓇᑭᙶᕐᓂᖓᓂ, ᐅᓂᒃᑳᕆᓪᓗᓂ ᐊᓐᓄᕌᖓ ᐊᑐᖅᑕᐅᒐᔪᒃᐳᖅ ᖁᕕᐊᓱᒍᑕᐅᔪᓂᑐᐊᐸᓗᒃ.
ᑐᒧᓗᔪ ᖁᕕᐊᓚᐅᖅᐳᖅ ᐅᐸᒃᑐᓄᑦ ᐊᒻᒪ ᐅᖃᓚᐅᖅᐳᖅ ᑕᐃᒪᑐᖅ ᖃᓄᐃᓐᓂᐅᔪᖅ ᑕᐃᒪᐃᒐᔪᖕᓂᐊᖅᐳᖅ ᐊᒻᒪ ᐱᕈᖅᐸᓪᓕᐊᖏᓐᓇᕐᓗᓂ.
“ᖃᐅᔨᒪᖃᑦᑕᐅᑎᓇᓱᐊᓚᐅᖅᑕ ᐃᓕᖅᑯᓯᑦᑎᓐᓂ, ᖁᔭᒋᔭᖃᓚᐅᖅᑕ ᐊᔾᔨᐊᙱᓐᓂᕆᔭᑦᑎᓐᓂ ᐊᒻᒪ ᖁᕕᐊᓱᖃᑎᒌᓚᐅᖅᑕ ᐃᒻᒥᖕᓂᑦ,” ᐅᖃᓚᐅᖅᐳᖅ.