ᐋᑐᕚᒥ-ᑐᙵᕕᓕᖕᒥ ᐃᓄᒃ ᐃᙱᖅᑎ ᖃᑦᑑ ᐃᕕᒃ ᓴᖅᑭᑎᑦᑎᕗᖅ ᓯᕗᓪᓕᖅᐹᖓᓂ ᐊᑕᐅᓯᐅᓪᓗᓂ ᐃᓄᑑᓪᓗᓂ ᐃᙱᖅᑎᐅᓪᓗᓂ.
ᐸᓂᑯᓘᒃ, ᐅᕙᙶᖅᑐᖅ ᐃᓄᒃᑎᑐᑦ ᐅᖃᐅᓯᕐᒥ “little daughter,” ᓴᖅᑭᑎᑕᐅᓚᐅᖅᐳᖅ ᔭᓄᐊᕆ 4−ᒥ.
ᖃᑦᑑᑉ ᓯᕗᓪᓕᖅᐸᐅᓪᓗᓂ ᐊᑕᐅᓯᐅᔪᖅ ᑎᑭᑉᐸᓪᓕᐊᔪᒥ ᓂᔾᔮᑎᑕᒃᓴᓂ Midnight Sun−ᒥ, ᓴᖅᑭᑎᑕᐅᔪᒃᓴᐅᔪᒥ ᖃᖓᒃᑲᓐᓂᖅ ᑕᒪᑐᒪᓂ ᐊᕐᕌᒎᔪᒥ.
ᐅᖃᐅᓯᐅᓂᐅᔪᒥ ᐊᓈᓇᐅᓂᕐᒥ, ᐃᙱᐅᓯᖅ ᐱᒋᐊᖅᐳᖅ ᐊᓈᓇᐅᑉ ᐆᒻᒪᑎᖓᓂ ᑎᒡᓕᕐᓂᐅᔪᒥ ᑏᕖᒃᑯᑦ ᖃᐅᔨᓴᖅᑕᐅᓂᐅᔪᒥ, ᒪᓕᒃᑕᐅᔪᒥ ᖃᑦᑑᑉ ᑲᑕᔾᔭᕐᓂᖓᓂ, ᐃᓄᐃᑦ ᕿᓚᐅᑎᖏᓐᓂ ᐊᒻᒪ ᑯᑭᑦᑕᐹᖅᑐᒥ.
“ᑎᑎᕋᓚᐅᖅᑕᕋ ᐅᓴ ᐱᓯᖅ ᐸᓂᓐᓄᑦ ᑎᓴᒪᓂ ᐅᑭᐅᓕᖕᒥ, ᐅᓇ ᐱᓯᕋ ᐸᓂᓐᓄᑦ. ᐊᒃᑐᐃᕐᔪᐊᕐᓇᖅᐳᖅ, ᕿᐊᓱᙳᓇᖅᖢᓂ ᐱᓯᐅᕗᖅ,” ᐅᖃᓚᐅᖅᐳᖅ ᖃᑦᑑ.
ᑐᓴᖅᓴᐅᖕᒥᔪᖅ ᐱᓯᕐᒥ ᓂᐱᓕᐊᖑᓯᒪᒐᓚᒃᑐᓂ ᐃᙱᖅᑎᐅᑉ ᐸᓂᖓᓂ, ᒪᕐᕉᖕᓂ ᐅᑭᐅᖃᖅᑎᓪᓗᒍ.
“ᑕᒪᓐᓇ ᐱᐅᒋᕐᔪᐊᖅᐸᕋ, ᑐᓵᓪᓗᓂ ᓂᐱᖓᓂ ᑕᐃᑲᓂ,” ᐅᖃᓚᐅᖅᐳᖅ ᖃᑦᑑ. “ᐊᖓᔪᖅᑳᙳᖅᖢᓂ ᑭᓱᓕᒫᑦᑎᐊᒥ ᐊᓯᔾᔩᓚᐅᖅᐳᖅ, ᐊᔭᐅᕆᕗᖅ ᑭᓱᓕᒫᓂ ᓂᔾᔮᑎᑦᑎᓂᕐᒥ. ᑕᐃᒪᙵᓂ ᖃᐅᔨᒐᒪ ᓯᖓᐃᔪᖓ ᓄᓇᕐᔪᐊᓕᒫᕋ ᐊᓯᔾᔨᓚᐅᖅᐳᖅ ᐊᒻᒪ ᐊᓕᐊᓇᐃᒋᑦᑎᐊᖅᐸᕋ.
“ᐊᓯᔾᔩᓚᐅᖅᐳᖅ ᑕᒪᒃᑭᓗᒃᑖᒥ ᓴᐅᑦᑐᕆᔭᓐᓂ ᖃᓄᖅ ᑭᓱᑐᐃᓐᓇᐃᑦ ᐱᓐᓇᕆᔭᓐᓂ, ᑭᒃᑯᓐᓂ ᐅᐸᒃᓯᒪᖃᑦᑕᕈᒪᓂᓐᓂ, ᐸᓂᓐᓄᑦ ᐅᐱᕆᓂᐊᖅᑕᖓᓂ.”
ᐸᓂᑯᓘᒃ ᑐᓐᓂᖅᑯᓯᐅᒋᕗᖅ ᖃᑦᑑᑉ ᐊᓈᓇᖓᓄᑦ.
“ᐅᖃᖃᑎᖃᓚᐅᖅᐳᖓ ᐊᐅᓚᑦᑎᔨᒐ ᓴᖅᑭᑎᑕᐅᓂᖓᓂ ᐅᓪᓗᖓᓂ. ᐅᖃᓚᐅᖅᐳᖓ ᔭᓄᐊᕆ 4 ᐊᓈᓇᒪ ᓇᓪᓕᐅᓐᓂᖅᓯᐅᕐᕕᒋᖕᒪᒍ.
“ᐅᓇ ᐱᓯᖅ ᐸᓂᓐᓅᕗᖅ ᑭᓯᐊᓂ ᑐᓐᓂᖅᑯᑕᐅᒋᕗᖅ ᐊᓈᓇᓐᓄᑦ. ᐊᑕᐅᓯᐅᓪᓗᓂ ᓇᓪᓕᐅᑎᓂᖓᓄᑦ ᖁᕕᐊᓲᓯᐊᖑᕗᖅ, ᖁᔭᓐᓇᒦᕈᑎᒐᓚᐅᕗᖅ.”
ᑐᓂᓯᓂᕐᒥ ᐅᖃᐅᔾᔨᓂᐅᔪᒥ ᐃᙱᖅᑎᐅᔪᒪᓇᔭᖅᑐᓄᑦ, ᖃᑦᑑ ᐊᔭᐅᕆᓚᐅᖅᐳᖅ ᐊᓯᖏᓐᓂ ᓇᓂᓯᓂᖏᓐᓂ ᓇᖕᒥᓂᖅ ᓂᐱᖓᓐᓂ.
“ᐊᔾᔨᖃᕋᓱᙱᓪᓗᑎᒃ ᐊᓯᖕᓂᑦ, ᐃᕝᕕᐅᓗᑎᑦ. ᓴᙱᔪᐊᓘᕗᑎᑦ ᓇᖕᒥᓂᖅ ᐱᓕᕆᓂᕐᓂ ᐊᒻᒪ ᐃᓄᖕᓄᑦ ᐱᐅᒋᔭᐅᕐᔪᐊᕐᓂᐊᖅᑐᖅ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐅᖓᓯᒃᑐᓗᐊᕌᓗᒋᐊᖃᙱᓚᑦ ᓇᓂᓯᓂᕐᒥ ᑲᔪᖏᖅᓴᐃᓂᕐᒥ.
“ᑭᓱᑐᐃᓐᓇᐃᑦ ᖃᓂᑦᑐᓄᑦ ᐊᒻᒪ ᐆᒻᒪᑎᖕᓄᑦ ᐊᒃᑐᐃᓂᖃᖅᑐᓄᑦ. ᐅᓇ ᐱᓯᖅ ᑎᑎᕋᓚᐅᖅᑕᕋ ᐸᓂᓐᓄᑦ. ᓂᔾᔮᑎᑦᑎᓂᐅᔪᒥ ᓴᖅᑭᓐᓂᐊᖅᑐᒥ, ᑎᑎᕋᓚᐅᖅᐳᖓ ᐱᓯᕐᒥ ᐊᑖᑕᓐᓂ. ᑭᓱᑐᐃᓐᓇᐃᑦ ᓯᕗᓂᖕᓃᑦᑐᓄᑦ, ᑎᑎᕋᕈᓐᓇᖅᐳᑎᑦ ᐱᓯᕐᒥ — ᐊᒃᓱᕈᓗᐊᕌᓗᒋᐊᖃᙱᓚᑎᑦ ᓇᓂᓯᓂᕐᒥ ᐊᓕᐊᓇᐃᒋᕐᔪᐊᖅᑕᕐᓂ.”
ᐸᖕᓂᖅᑑᕐᒥᐅᑕᓪᓚᕆᐅᓪᓗᓂ, ᖃᑦᑑ ᐋᓐᑎᐊᕆᐅᒥ-ᑐᙵᕕᖃᖅᖢᓂ ᐃᓅᓪᓗᓂ ᑲᑕᔾᔭᖅᑎᐅᕗᖅ ᖃᐅᔨᒪᔭᐅᓯᒪᓪᓗᓂ ᐃᓚᒋᔭᐅᓂᖓᓂ ᓂᔾᔮᑎᑦᑎᔨᐅᔪᓂ ᑲᑎᙵᓂᐅᔪᒥ ᓯᓚ ᐊᒻᒪ ᕋᐃᔅᒥ ᑕᐃᑯᖓ 2022−ᒧᑦ. ᑕᐃᑲᙵᑦ, ᐃᓄᑑᓕᓇᐅᖅᐳᖅ ᐃᙱᖅᑎᐅᓪᓗᓂ, ᐃᙱᖅᓯᒪᓪᓗᓂ ᓄᓇᕐᔪᐊᕐᒥ ᖁᙱᐊᕐᕕᐅᔪᓂ ᕗᕌᓐᔅᒥ, ᐱᐅᓪᔨᐊᒻ ᐊᒻᒪ ᕕᓕᐲᓐᔅᓂ.
ᖃᑦᑑ ᐅᖃᖅᐳᖅ ᑲᑕᔾᔭᖅᑎᙳᕐᓂᕐᒥ ᐃᑲᔪᖅᓯᒪᕗᖅ ᑲᓱᖃᑎᖃᕐᓂᕐᒥ ᐃᓄᐃᑦ ᐃᓕᖅᑯᓯᖓᓐᓂ ᐱᓕᕆᓂᐅᔪᓂ ᐱᓇᔭᓚᐅᙱᑕᖏᓐᓂ.
“ᑲᑕᔾᔭᕌᖓᒪ ᓴᙱᔪᐊᓘᔮᖅᐸᒃᐳᖓ. ᐅᕙᓐᓄᑦ ᑐᙵᓂᖃᖅᑎᐊᖅᑑᔮᖅᐳᖓ. ᑲᑎᙵᓂᖃᕐᔪᐊᖅᑑᔮᖅᐳᖓ ᓯᕗᕚᑦᑎᓐᓂ ᐱᓕᕆᓂᐅᔪᒥ ᑕᐃᒪᐃᑉᐸᙱᓐᓂᓐᓂ ᑲᑕᔾᔭᙱᒃᑳᖓᒪ.”
ᐸᓂᑯᓘᒃ ᓴᖅᑭᑎᑕᐅᓚᐅᖅᐳᖅ ᓄᓇᕗᒻᒥ-ᑐᙵᕕᖃᖅᑐᒥ ᓂᐱᓕᐅᕆᓂᐅᔪᒥ ᓂᐱᙵᑕᖓᓂ Hitmakerz−ᓂ. ᐊᑐᐃᓐᓇᐅᕗᖅ ᓂᐅᕕᕐᓂᕐᒧᑦ Apple iTunes−ᑯᑦ ᐊᒻᒪ ᓈᓚᒍᓐᓇᕆᕙᐃᑦ ᖃᕋᓴᐅᔭᒃᑯᑦ ᐱᓕᕆᕝᕕᐅᔪᓂ ᓲᕐᓗ Spotify ᐊᒻᒪ YouTube−ᒥ.