Skip to content

ᖃᒪᓂ’ᑐᐊᕐᒥᐅᑕᑦ ᐸᕐᓇᒃᑐᑦ ᐊᕐᕙᒐᓱᒍᒫᕐᓂᕐᒧᑦ

ᐸᕐᓇᒃᐸᓪᓕᐊᔪᑦ ᖃᒪᓂ’ᑐᐊᕐᒥ ᓯᕗᓪᓕᖅᐹᒥ ᐊᕐᕙᒐᓱᒍᒫᖅᑎᓪᓗᒋᑦ ᐊᐅᔭᒃᑲᓐᓂᖅ.
25719833_web1_210707-kiv-bowhead-hunt_1
Baker Lake’s team for a bowhead whale hunt scheduled to take place later this summer comprises, front row, from left, John Avaala, Philip Putumiraqtuq, Charlie Tautuaqyuk and Casey Tulurialik. Middle row, from left, Martin Kreelak, Mike Nukapiak, Kenny Avaala, Sam Qarliksaq and James Kalluq. Back row, from left, Patrick Attungala, Warren Nagyougalik, Joe Uqayuittuq and Timothy Iviuq. Photo courtesy of Philip Putumiraqtuq ᖃᒪᓂ’ᑐᐊᕐᒥᐅᑦ ᐊᕐᕙᒐᓱᖕᓂᐊᖅᑐᑦ ᐊᐅᔭᒃᑲᓐᓂᖅ ᐅᑯᐊᖑᔪᑦ, ᓯᕗᓂᐊᓃᑦᑐᑦ, ᓴᐅᒥᖅᖠᕐᒥ, ᔮᓐ ᐊᕚᓚ, ᕕᓕᐱ ᐳᑐᒥᕋᖅᑐᖅ, ᓴᕐᓕ ᑕᐅᑐᐊᕐᔪᒃ ᐊᒻᒪᓗ ᑭᓯ ᑐᓗᕆᐊᓕᒃ. ᕿᑎᐊᓃᑦᑐᑦ, ᓴᐅᒥᖅᖠᕐᒥ, ᒪᕐᑎᓐ ᕿᓚᒃ, ᒪᐃᒃ ᓄᑲᑉᐱᐊᖅ, ᑭᓂ ᐊᕚᓚ, ᓵᒻ ᖃᕐᓕᒃᓴᖅ ᐊᒻᒪᓗ ᔭᐃᒻᔅ ᑲᓪᓗᖅ. ᑐᓄᐊᓃᑦᑐᑦ, ᓴᐅᒥᖅᖠᕐᒥ, ᐸᑐᓕᒃ ᐊᑕᖓᓛᖅ, ᐅᐊᕆᓐ ᓇᒡᔪᒐᓕᒃ, ᔫ ᐅᖃᔪᐃᑦᑐᖅ ᐊᒻᒪᓗ ᑎᒧᑎ ᐃᕕᐅᖅ.

ᐸᕐᓇᒃᐸᓪᓕᐊᔪᑦ ᖃᒪᓂ’ᑐᐊᕐᒥ ᓯᕗᓪᓕᖅᐹᒥ ᐊᕐᕙᒐᓱᒍᒫᖅᑎᓪᓗᒋᑦ ᐊᐅᔭᒃᑲᓐᓂᖅ.

“ᐱᓕᕆᕙᓪᓕᐊᔪᒍᑦ. ᑕᒪᕐᒥᒃ ᐸᕐᓇᑦᑎᐊᖅᓯᒪᓕᖅᑐᑦ,” ᐊᖑᓇᓱᖕᓂᐊᖅᑐᓂᒃ ᐊᖓᔪᖅᑳᕆᔭᐅᔪᖅ ᕕᓕᐱ ᐳᑐᒥᕋᖅᑐᖅ ᐅᖃᖅᖢᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ.

ᐊᕙᑎᑦ ᐊᖑᓇᓱᒃᑏᑦ ᐊᒻᒪᓗ 7 ᐅᒥᐊᑦ ᓂᕈᐊᖅᑕᐅᓯᒪᓕᖅᑐᑦ ᐃᓚᐅᖃᑕᐅᓂᐊᕐᓂᖏᓐᓄᑦ ᐊᕐᕙᒐᓱᒃᑐᓂᒃ.

ᐱᓇᓱᐊᕈᓯᐅᓚᐅᖅᑐᒥ, ᖃᒪᓂ’ᑐᐊᕐᒥᐅᑦ ᐊᕐᕙᒐᓱᖕᓂᐊᖅᑐᑦ ᐊᖏᖅᑕᐅᓚᐅᖅᑐᑦ ᑭᕙᓪᓕᕐᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ. ᐸᕐᓇᒃᓯᒪᖅᑳᓚᐅᖅᑐᑦ ᐅᒥᐊᒃᑯᑦ ᐃᖏᕐᕋᓂᐊᖅᖢᑎᒃ ᕿᑭᖅᑖᓗᖕᒧᑦ, ᓴᓪᓕᐅᑉ ᖃᓂᒋᔭᖓᓄᑦ. ᑭᓯᐊᓂᓕ, ᓯᑯᖃᓗᐊᕐᓂᖓᓄᑦ ᑕᓯᕐᔪᐊᕐᒥ, ᐊᓯᐊᒎᖔᕐᓂᐊᓕᖅᑐᑦ.

“ᒫᓐᓇᐅᔪᕐᓕ ᖃᓂᓐᓂᖅᓴᐅᓂᐊᓕᖅᑐᒃᓴᐅᔪᒍᑦ ᓇᐅᔮᓄᑦ. ᖃᓂᓛᖑᓂᐊᖅᑑᔭᓚᐅᖅᑐᖅ ᕿᑭᖅᑕᑦ, ᐅᖓᓯᖕᓂᓕᒃ 45 ᒥᓂᑦᓂᒃ ᓇᐅᔮᓄᑦ. ᑐᒡᓕᖓ ᐊᑐᕈᓐᓇᖅᑕᖅᐅᑦ ᓇᐅᔮᓄᑦ ᖃᓂᓐᓂᖅᓴᐅᔪᖅ,” ᑕᐃᒪᓐᓇ ᐅᖃᖅᖢᓂ ᐳᑐᒥᕋᖅᑐᖅ.

ᓇᓃᓪᓚᑦᑖᕐᓂᐊᕐᓂᕐᒥᓂᒃ ᐃᓱᒪᓕᐅᖅᓯᒪᓕᖅᐸᑕ, ᑕᐅᕗᙵᐅᒋᐊᕈᒫᖅᑐᑦ ᐊᒻᒪᓗ ᓄᓇᒦᖃᑦᑕᕐᓗᑎᒃ ᓄᓇᒦᑦᑕᕆᐊᖃᕌᖓᒥᒃ ᐅᑕᖅᑭᑎᓪᓗᒋᑦ ᐊᕐᕙᖕᓂᐊᖅᑕᒥᓂᒃ.

ᓱᓇᐅᓕᖅᐸᑦ ᐅᑉᓗᖅ ᐊᐅᓪᓚᕈᒫᕐᓂᐊᕐᓂᖏᑦ ᓇᓗᓇᕈᓐᓃᕐᓂᐊᖅᑐᖅ ᓯᑯᑦ ᖃᓄᐃᓐᓂᖏᑦ ᒪᓕᒡᓗᒋᑦ, ᑭᓯᐊᓂ ᐳᑐᒥᕋᖅᑐᖅ ᐅᖃᖅᓯᒪᔪᖅ ᐊᕐᕙᒐᓱᖕᓂᐊᖅᑐᑦ ᐊᐅᓪᓚᕈᒪᖕᒪᑕ ᔪᓚᐃ ᓄᙳᐊᓂ ᐅᕝᕙᓘᓐᓃᑦ ᐊᒐᓯᐅᑉ ᐱᒋᐊᕐᓂᖓᓂᒃ.

ᐳᑐᒥᕋᖅᑐᖅ, ᑲᒪᔨᐅᖃᑕᐅᔪᖅ ᐊᖑᓇᓱᒃᑎᒃᑯᑦ ᑲᑎᒪᔨᖏᓐᓂᒃ ᐊᒻᒪᓗ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ, ᓂᕈᐊᖅᑕᐅᓚᐅᖅᑐᖅ ᐊᖓᔪᖅᑳᖑᖁᔭᐅᑉᓗᓂ ᐊᕐᕙᒐᓱᖕᓂᐊᖅᑐᓂᒃ ᐊᖑᓇᓱᒃᑎᐅᖃᑎᖏᓐᓄᑦ ᒪᐃᒥ. ᐊᕐᕙᒐᓱᒃᓯᒪᓂᑰᓇᓂᓘᓐᓃᑦ, ᑭᓯᐊᓂ ᐊᖑᓇᓱᒃᑎᓪᓚᕆᒃ.

“ᖃᓄᖅ ᐃᒃᐱᒋᔭᕆᐊᒃᓴᖅ ᓇᓗᓕᐅᖅᑲᓯᒪᔪᖓ. ᑭᓯᐊᓂ ᖁᕕᐊᓱᒃᑐᖓ,” ᑕᐃᒪᓐᓇ ᐅᖃᖅᖢᓂ. “ᐃᓕᑦᑎᕙᓪᓕᐊᓂᐅᓂᐊᖅᑐᖅ.”

ᐳᑐᒥᕋᖅᑐᖅ ᐅᖃᖅᖢᓂ ᖃᒪᓂ’ᑐᐊᕐᒥᐅᑕᑦ ᐊᕐᕙᒐᓱᖕᓂᐊᖅᑐᑦ ᑕᒪᑐᒥᙵ ᐋᖅᑭᒃᓱᐃᓯᒪᖕᒪᑕ ᐱᓕᕆᖃᑎᖃᖅᖢᑎᒃ ᐊᕐᕙᒐᓱᖃᑦᑕᖅᓯᒪᔪᓂᒃ ᓇᐅᔮᕐᒥᐅᓂᒃ ᓴᓪᓕᕐᒥᐅᑕᓂᒡᓗ.

“ᐊᕐᕙᒐᓱᖃᑦᑕᖅᓯᒪᔪᑦ ᓇᐅᔮᕐᒥᐅᑕᑦ ᐃᒪᓐᓈᖅᑐᐃᖃᑦᑕᖅᓯᒪᔪᑦ, ᑕᒪᓐᓇ ᐃᑲᔫᑎᓕᒻᒪᕆᐊᓗᒃ. ᐅᖃᖅᓯᒪᔪᑦ ᓱᓇᓂᒃ ᐅᔾᔨᖅᑐᕆᐊᖃᕋᔭᕐᒪᖔᑉᑕ, ᖃᓄᕐᓗ ᐱᒻᒪᕆᐊᓘᑎᒋᓂᐊᕐᒪᖔᑦ,” ᑕᐃᒪᓐᓇ ᐅᖃᖅᖢᓂ ᐳᑐᒥᕋᖅᑐᖅ.

ᐃᓱᒫᓘᑎᒋᓂᖅᐹᕆᖃᑕᐅᔭᖅᐳᑦ ᓇᓄᖃᕐᓂᐊᕐᓂᖓ ᑕᑯᔭᐅᔪᖃᖃᑦᑕᖅᓯᒪᖕᒪᑦ ᓇᓄᕐᓂᒃ ᑕᐅᕙᓂ ᐊᖑᓇᓱᒡᕕᐅᖃᑦᑕᖅᑐᒥ.

“ᐋᖅᑭᒃᓱᐃᓇᓱᒃᓯᒪᔪᒍᑦ ᐊᖑᓇᓱᒡᕕᖕᒥ ᓇᓄᖃᓗᐊᕋᔭᙱᑦᑐᒥᒃ,” ᑕᐃᒪᓐᓇ ᐅᖃᖅᖢᓂ ᐳᑐᒥᕋᖅᑐᖅ.

ᐊᒃᓱᓪᓘᓐᓃᑦ, ᐆᒪᔪᓕᕆᔨᒥᒃ ᑎᑭᕋᕐᔪᐊᕐᒥ ᑕᐅᕗᙵᐅᖃᑎᖃᕈᒪᔪᖃᕐᒪᑦ ᓇᓄᕐᓂᒃ ᖃᐅᔨᓴᖅᑎᐅᓗᓂ.

“ᑐᓴᖅᓯᒪᖕᒪᑦ ᐊᕐᕙᒐᓱᖕᓂᐊᕐᓂᑉᑎᓐᓄᑦ ᐃᑲᔪᕈᒪᓂᕋᖅᑐᖅ. ᖁᒃᓴᓇᙱᓐᓂᖅᓴᐅᓂᐊᓕᖅᑐᖅ,” ᐳᑐᒥᕋᖅᑐᖅ ᑕᐃᒪᓐᓇ ᐅᖃᖅᖢᓂ.

ᓄᓇᖅᑲᑎᕗᑦ ᐱᙴᖅᑎᑦᑎᓚᐅᖅᑐᑦ (bingo) ᑕᖅᑭᐅᓚᐅᖅᑐᒥ ᐱᖁᑎᑖᕈᑎᒃᓴᓄᑦ ᐊᕐᕙᒐᓱᖕᓂᐊᖅᑐᓄᑦ. ᑕᒪᓐᓇ ᑐᓴᒐᒃᓴᖅ ᓴᖅᑭᑎᑕᐅᓂᐊᓕᖅᑎᓪᓗᒍ, ᐊᖑᓇᓱᒃᑏᑦ ᐅᓈᒃᓴᒥᓂᒃ ᐅᑕᖅᑭᔪᑦ ᓱᓕ, ᐅᓈᓂᒃ ᐊᒻᒪᓗ ᐊᐃᖏᑦᑐᓂᒃ.